Ob txoj Lus Txib Tseem Ceeb
Peb yuav tsum sim coj raws li ob txoj lus txib tseem ceeb no. Yog xav ua li no, peb yuav tsum taug ib txoj kev nqaim nruab nrab ntawm txoj kev cai thiab txoj kev hlub.
Kuv cov muam ntawm Yexus Khetos txoj moo zoo, kuv hais nyob zoo rau nej cov uas Vajtswv pom zoo pov hwm Nws tsev neeg nyob mus ib txhis. Thawj Tswj Hwm Russell M. Nelson tau qhia peb tias, “Tau muab lub Koom Txoos txum tim rov qab los kom muab tsev neeg los ua ke, sib khi, thiab txais kev tsa nto mus ib txhis li.”1 Cov lus qhia no yeej tseem ceeb rau tib neeg uas yog poj niam nyiam poj niam, txiv neej nyiam txiv neej, cov txiv neej uas hloov los ua poj niam, los sis cov poj niam uas hloov los ua txiv neej, feem ntau peb hu ua LGBT.2 Thawj Tswj Hwm Nelson kuj tau qhia rau peb tias txawm peb “tsis tas sib pom zoo los peb tseem sib hlub los tau.”3 Tej lus qhia ntawm tus yaj saub no yeej tseem ceeb rau nej tsev neeg sib tham kom teb tau cov me nyuam thiab cov tub hluas ntxhais hluas tej lus nug. Kuv tau thov Vajtswv kom txais kev tshoov siab hais lus rau nej vim tias nej yeej txais tau tej lus nug no, uas txhua tsev neeg nyob hauv lub Koom Txoos muaj.
I.
Kuv pib hais txog qhov uas Yexus qhia tias yog ob txoj lus txib tseem ceeb.
“Nej yuav tsum hlub tus Tswv nej tus Vajtswv kawg siab kawg ntsws, kawg plab kawg plawv.
“Nqe no thiaj yog lus txib uas tseem ceeb dua ntais.
“Thiab nqe ob uas tseem ceeb hais li no hais tias: Hlub koj tej kwv tij zej zog ib yam li koj hlub koj lub cev.”4
Qhov no txhais hais tias Vajtswv txib kom peb hlub txhua leej txhua tus, vim Yexus zaj lus piv txwv txog tus Neeg Xamalis zoo qhia tias txhua tus yog peb tus neeg zej zog.5 Tiam sis qhov uas peb xav ua raws li txoj lus txib thib ob no yuav tsum tsis txhob ua rau peb tsis nco qab txoj lus txib thib ib, kom hlub Vajtswv kawg siab kawg ntsws. Peb qhia tias peb hlub Nws thaum peb “ua raws li [Nws] cov lus txib.”6 Vajtswv hais kom peb ua raws li Nws cov lus txib vim tsuas yog peb ua li ntawd xwb, tsis hais hloov siab lees txim los yog, peb thiaj li yuav rov qab mus nrog Nws nyob thiab hloov los ua neeg zoo tag nrho zoo li Nws.
Nyob hauv nws zaj lus hais rau cov tub hluas ntxhais hluas ntawm lub Koom Txoos, Thawj Tswj Hwm Russell M. Nelson hais lus txog qhov uas “Vajtswv txoj kev hlub thiab Nws txoj kev cai yeej sib koom ua ke.”7 Tej kev cai uas tseem ceeb tshaj plaws rau tej xwm txheej ntawm cov uas hais tias lawv yog neeg LGBT yog Vajtswv txoj kev cai sib yuav thiab txoj kev cai coj dawb huv. Ob yam no yeej tseem ceeb rau peb Leej Txiv Saum Ntuj Ceeb Tsheej txoj hau kev cawm seej rau Nws cov me nyuam. Zoo li Thawj Tswj Hwm Nelson qhia, “Vajtswv tej kev cai yeej yog vim Nws hlub peb mus ib txhis li thiab Nws xav kom peb hloov los ua neeg raws li peb muaj peev xwm ua.”8
Thawj Tswj Hwm Nelson qhia hais tias: “Ntau lub teb chaws … tau tso cai rau poj niam yuav poj niam thiab txiv neej yuav txiv neej. Vim peb yog cov mej zeej ntawm lub Koom Txoos, peb ua raws li tej kev cai ntawm peb tej teb chaws … , tsis hais kev sib yuav ntawm cov pej xeem. Tiam sis qhov tseeb yog thaum chiv keeb … Vajtswv yog tus uas tsa kev sib yuav! Thiab txij hnub ntawd los Nws hais tias kev sib yuav yog los ntawm ib tug txiv neej thiab ib tug poj niam. Vajtswv tsis tau hloov txoj kev sib yuav uas Nws tau teem tseg.”
Thawj Tswj Hwm Nelson tau hais ntxiv: “Vajtswv kuj tsis tau hloov Nws txoj kev cai coj dawb huv. Tsis tau hloov tej yam yus yuav tsum ua kom nkag hauv lub tuam tsev.”9
Thawj Tswj Hwm Nelson ua rau peb nco ntsoov tias “txoj lub txib rau peb cov Thwj Tim yog kom tsis qhia dab tsi tsuas yog qhov tseeb xwb. Txoj lus txib no yeej tsis tso txoj cai rau [cov Thwj Tim] muab Vajtswv txoj kev cai hloov.”10 Yog li ntawd, kuv cov muam, lub Koom Txoos cov thawj coj yeej yuav tsum qhia txog qhov tseem ceeb uas yog kev sib yuav ntawm ib tug txiv neej thiab ib tug poj niam thiab txoj kev cai coj dawb huv.
II.
Txoj hauj lwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog npaj Vajtswv cov me nyuam mus rau lub nceeg vaj xilethi-aus, thiab qhov tseem ceeb yog lub yeeb koob siab tshaj plaws, uas yog kev tsa nto los sis txoj sia nyob mus ib txhis. Txoj hmoov siab tshaj plaws ntawd los yeej txais tau los ntawm kev sib yuav mus ib txhis xwb.11 Txoj sia nyob mus ib txhis muaj lub hwj chim tsim neeg uas los ntawm qhov uas txiv neej thiab poj niam koom ua ke12—qhov uas kev tshwm sim hauv hnub nyoog no hais tias yog “ib txoj kev muaj tub ki ntxiv mus ib txhiab thiab ib txhis.”13
Nyob hauv nws zaj lus hais rau cov tub hluas ntxhais hluas, Thawj Tswj Hwm Nelson qhia hais tias, “Kev ua raws li Vajtswv tej kev cai yuav pov hwm nej thaum nej kawm ntxiv thiab txais kev tsa nto thaum kawg”14—Kev tsa nto yog kev hloov los ua neeg zoo li Vajtswv, thiab kev ua neej nrog peb Leej Niam thiab Leej Txiv Saum Ntuj Ceeb Tsheej. Nov yog txoj hmoov uas peb xav kom txhua tus uas peb hlub txais tau. Vim peb hlub lawv, peb yeej yuav tsum tsis txhob cia txoj kev hlub ntawd kov yeej Vajtswv cov lus txib thiab txoj hau kev thiab txoj hauj lwm, uas peb paub tias yuav ua rau cov uas peb hlub muaj kev zoo siab tshaj plaws.
Tiam sis muaj neeg coob uas peb hlub, tsis hais ib txhia uas paub txog txoj moo zoo lawm, uas tsis ntseeg los sis tsis xaiv ua raws li Vajtswv cov lus txib txog kev sib yuav thiab txoj kev cai coj dawb huv. Yuav ua li cas txog lawv nev?
Vajtswv cov lus qhuab qhia hais tias peb txhua tus yog Nws cov me nyuam thiab nws tau tsim peb kom peb yuav muaj kev xyiv fab.15 Kev tshwm sim hauv hnub nyoog no qhia tias Vajtswv tau npaj lub neej hauv ntiaj teb no peb thiaj li xaiv tau kev mloog lus kom txais tau Nws cov koob hmoov siab tshaj plaws los sis xaiv tau tej yam uas ua rau peb txais tau tej nceeg vaj uas tsis muaj yeeb koob npaum li ntawd.16 Vim Vajtswv hlub Nws cov me nyuam heev, tej nceeg vaj no tseem zoo tshaj tej yam uas peb cov neeg hauv ntiaj teb tsis txawj to taub.17 Yexus Khetos txoj Kev Theej Txhoj qhib kev rau txhua yam no, vim Nws “muab yeeb koob rau Leej Txiv, thiab txhiv tag nrho tej yam nws ob txhais tes tau ua.”18
III.
Kuv twb hais txog txoj lus txib thib ib, tiam sis thib ob nev? Peb yuav ua li cas kom ua raws li txoj lus txib kom peb hlub peb cov neeg zej zog? Peb yaum peb cov mej zeej hais tias cov uas ua raws li tej lus qhia thiab ua tej yam li cov txiv neej nyiam txiv neej, cov poj niam nyiam poj niam, cov txiv neej hloov los ua poj niam, thiab cov poj niam hloov los ua txiv neej ua mas peb yuav tsum hlub lawv zoo li tus Cawm Seej txib peb kom hlub peb txhua tus neeg zej zog. Yog li ntawd, thaum lawv tau tso cai rau txiv neej yuav txiv neej thiab poj niam yuav poj niam, Thawj Pawg Thawj Tswj Hwm thiab Pawg Kaum Ob tug Thwj Tim hais tias: “Yexus Khetos txoj moo zoo qhia kom peb sib hlub thiab ua siab zoo thiab hais lus zoo rau txhua tus neeg—tsis hais thaum peb tsis sib pom zoo. Peb pom zoo hais tias cov uas ua raws li tej kev cai los sis tej kev txiav plaub uas tso cai rau poj niam yuav poj niam los txiv neej yuav txiv neej los yuav tsum tsis txhob saib tsis taus lawv.”19
Tsis tas li ntawd xwb, peb yeej yuav tsum tsis txhob tsim txom cov uas tsis ntseeg thiab tsis cog lus ib yam li peb tau ua.20 Tu siab uas ib txhia neeg uas muaj xwm txheej li no tseem xav tias cov mej zeej thiab cov thawj coj nyob hauv peb tsev neeg, pawg ntseeg, thiab ceg txheem ntseeg xyeej lawv thiab saib tsis taus lawv. Peb txhua tus yuav tsum rau siab ua siab zoo ntxiv thiab hais lus zoo.
IV.
Peb tsis to taub vim li cas peb nyias muaj nyias tej teeb meem hauv lub ntiaj teb no. Tiam sis peb paub tias Vajtswv yuav pab peb txhua tus kov yeej tej teeb meem no yog peb nrhiav Nws txoj kev pab tiag tiag. Tom qab peb raug txom nyem thiab hloov siab lees txim rau tej kev txhaum kev cai uas peb twb paub lawm, peb yuav txais tau ib lub nceeg vaj uas muaj yeeb koob. Tus uas txiav txim kawg yog tus Tswv, Nws tib leeg muaj kev txawj ntse, laj lim tswv yim, thiab kev tshav ntuj txaus kom txiav txim rau peb txhua tus.
Tam sim no, peb yuav tsum sim coj raws li ob txoj lus txib tseem ceeb no. Ua li no peb yuav tsum taug ib txoj kev nqaim nruab nrab ntawm txoj kev cai thiab txoj kev hlub—ua raws li cov lus txib thiab ua raws li peb tej kev khi lus, thiab hlub peb cov neeg zej zog thaum taug txoj kev no. Xwv kom taug txoj kev no los peb yuav tsum nrhiav kev tshoov siab los ntawm Vajtswv kom paub tias peb yuav tsum txhawb nqa dab tsi thiab tsis txhob txhawb nqa dab tsi thiab paub hlub thiab mloog zoo thiab qhia lwm tus thaum peb ua li ntawd. Xwv kom taug txoj kev no los peb yuav tsum tsis txhob tso cov lus txib tseg tiam sis tseem yuav tsum to taub thiab hlub tag nrho. Xwv kom taug txoj kev no peb yuav tsum xav txog cov me nyuam uas tsis paub yog tias lawv yog txiv neej nyiam txiv neej los sis poj niam nyiam poj niam, tiam sis yuav tsum tsis txhob siv tej lub npe thaum lawv tseem hluas vim, cov me nyuam feem ntau, lawv txoj kev tsis paub qhov ntawd ploj zuj zus thaum sij hawm dhau mus.21 Xwv kom taug txoj kev mus no peb tsis pom zoo rau kev ntxias kom tib neeg tsis ua raws li lawv tej kev khi lus thiab tsis txhawb nqa cov uas coj tib neeg mus deb ntawm tus Tswv. Thaum ua txhua yam no peb nco ntsoov tias Vajtswv tau cog lus tias cov uas ua raws li Nws cov lus txib yuav muaj kev cia siab, kev xyiv fab, thiab cov koob hmoov.
V.
Cov niam tsev thiab txiv tsev thiab peb txhua tus muaj kev lav ris qhia ob txoj lus txib tseem ceeb no. Thawj Tswj Hwm Spencer W. Kimball tau hais rau cov poj niam hauv lub Koom Txoos txog dej num no nyob hauv kev qhia tej yuav muaj los yav tom ntej no: “Lub Koom Txoos yuav loj tuaj hauv hnub nyoog kawg vim ntau tus poj niam zoo nyob hauv lub ntiaj teb … yuav xav koom lub Koom Txoos. Yuav muaj li no yog tias cov poj niam hauv lub Koom Txoos coj ncaj ncees thiab hais lus zoo hauv lawv lub neej thiab yog tib neeg pom tias cov poj niam hauv lub Koom Txoos yog neeg txawv … ntawm cov poj niam hauv lub ntiaj teb. … Yog li ntawd cov poj niam uas coj yam ntxwv zoo hauv lub Koom Txoos yuav ua ib pawg tseem ceeb kom lub Koom Txoos loj tuaj hauv hnub nyoog kawg, tsis hais txog pes tsawg tus neeg los sis hais txog sab ntsuj plig los yog.”22
Hais txog kev qhia tej yuav muaj los yav tom ntej ntawd, Thawj Tswj Hwm Russell M. Nelson hais tias “hnub uas Thawj Tswj Hwm Kimball pom los yog hnub no. Nej yog cov poj niam uas nws tau pom!”23 Peb cov uas tau hnov tej lus qhia tej yuav muaj yav tom ntej 40 xyoo dhau los tsis tau paub tias cov uas cov poj niam ntawm lub Koom Txoos yuav cawm yog lawv cov phooj ywg thiab tsev neeg uas tam sim no raug ntxias los ntawm tej yam uas neeg ntiaj teb hais tias yog tej yam tseem ceeb thiab tus dab phem tej kev haub ntxias. Kuv thov thiab foom koob hmoov rau nej kom nej qhia thiab ua raws li tej lus no, los ntawm Yexus Khetos lub npe, amees.