Tso Siab rau tus Tswv
Peb yuav tsum tso siab rau tus Tswv thiab Nws txoj kev hlub rau Nws cov me nyuam xwb.
Kuv cov kwv tij thiab cov muam, ib tsab ntawv uas kuv tau txais yav tas los qhia txog lub ntsiab ntawm kuv zaj lus no. Tus uas sau ntawv tab tom xav txog kev yuav txiv hauv lub tuam tsev rau ib tug txiv neej uas nws tus khub mus ib txhis tau tso lub ntiaj teb no tseg lawm. Nws yuav ua tus poj niam thib ob. Nws nug li no hais tias: nws puas yuav muaj nws ib lub tsev hauv lub neej tom ntej, los sis nws yuav tsum nrog nws tus txiv thiab tus poj niam thib ib nyob? Kuv tsuas qhia kom nws tso siab rau tus Tswv.
Kuv hais ib zaj ntxiv uas kuv hnov los ntawm ib tug uas nrog kuv ua hauj lwm, es nws twb tso cai rau kuv hais. Tom qab ib tug txiv tsev tus poj niam tau tso lub ntiaj teb no tseg, tus txiv tsev no yuav ib tug poj niam tshiab. Ib txhia ntawm cov me nyuam tsis pom zoo rau nws yuav lwm tus thiab xav kom ib tug thawj coj ntawm lub Koom Txoos qhia kom lawv paub ua li cas. Tom qab nws hnov txog tej yam uas lawv txhawj txog, uas tsom ntsoov rau tej yam thiab tej kev txheeb ze nyob hauv lub ntuj ntsuj plig los sis nyob hauv tej nceeg vaj yeeb koob uas muaj tom qab Kev Txiav Txim Zaum Kawg, tus thawj coj hais li no: “Nej ua yuam kev txhawj txog tej yam no. Nej yuav tsum txhawj txog qhov uas seb nej puas yuav tsim nyog mus rau tej qhov chaw ntawd. Cia li tsom ntsoov rau qhov ntawd. Yog nej tsim nyog mus txog, ces txhua yam yeej yuav zoo tshaj qhov nej xav tau.”
Yeej yog ib txoj lus qhia uas nplij yus lub siab! Tso siab rau tus Tswv!
Los ntawm tej tsab ntawv uas kuv tau txais lawm, kuv paub tias muaj lwm tus uas nyuaj siab txhawj xeeb txog lub ntuj ntsuj plig uas peb yuav nyob tom qab peb tuag thiab ua ntej peb sawv rov los. Ib txhia xav tias nyob hauv lub ntuj ntsuj plig tseem yuav muaj tej xwm txheej thiab tej teeb meem uas peb muaj hauv lub neej hauv lub ntiaj teb no. Peb paub dab tsi tiag tiag txog txoj kev nyob hauv lub ntuj ntsuj plig? Kuv ntseeg ib tug xib hwb qhia ntawv txog kev teev ntuj nyob hauv BYU qhia yog txog qhov no thaum nws hais tias: “Thaum peb nug peb tus kheej tias peb paub dab tsi txog lub ntuj ntsuj plig los ntawm tej txhooj vaj lug kub, ces lus teb yog ‘peb tsis paub npaum li peb xav.’”1
Los ntawm cov vaj lug kub peb yeej paub tias tom qab peb lub cev tuag lawm peb tus ntsuj plig tseem muaj sia nyob hauv lub ntuj ntsuj plig. Cov vaj lug kub kuj qhia tias lub ntuj ntsuj plig muaj ob qho chaw rau cov uas tau ua “ncaj ncees” thaum lawv ua neej nyob thiab cov uas tau ua phem. Cov vaj lug kub kuj piav tias muaj ib txhia cov ntsuj plig rau siab ntseeg uas qhia txoj moo zoo rau cov uas tau ua phem los sis tau ntxeev siab (saib 1 Petus 3:19; Lus Qhuab Qhia thiab Kev Khi Lus 138:19–20, 29, 32, 37). Qhov tseem ceeb, kev tshwm sim hauv hnub nyoog no qhia tias lawv ua txoj hauj lwm cawm seej hauv lub ntuj ntsuj plig (saib Lus Qhuab Qhia thiab Kev Khi Lus 138:30–34, 58), thiab txawm peb yuav tsum tsis txhob laug sij hawm rau peb txoj kev hloov siab lees txim hauv lub neej no (saib Amas 13:27), peb kawm tias neeg hloov siab lees txim tau nyob ntawd (saib Lus Qhuab Qhia thiab Kev Khi Lus 138:58).
Txoj hauj lwm cawm seej hauv lub ntuj ntsuj plig yog kev tso cov ntsuj plig dim ntawm qhov uas vaj lug kub piav hais tias yog kev “ua cev qhev.” Txhua tus hauv lub ntuj ntsuj plig raug txoj kev ua cev qhev. Thawj Tswj Hwm Joseph F. Smith’s txoj kev tshwm sim tseem ceeb, uas tau tso cai siv ua vaj lug kub nyob hauv tshooj 138 ntawm phau Lus Qhuab Qhia thiab Kev Khi Lus, hais tias cov tuag uas ncaj ncees, cov uas muaj kev “kaj siab lug” (Lus Qhuab Qhia thiab Kev Khi Lus 138:22) thaum lawv tos txoj Kev Sawv Rov Los (saib Lus Qhuab Qhia thiab Kev Khi Lus 138:16), lawv “xav hais tias qhov uas lawv cov ntsuj plig sib ncaim ntev loo ntawm lawv lub cev nqaij yeej zoo li kev ua cev qhev” (Lus Qhuab Qhia thiab Kev Khi Lus 138:50).
Cov neeg phem kuj raug ib txoj kev ua cev qhev ntxiv. Vim lawv muaj kev txhaum thiab tsis tau hloov siab lees txim, lawv nyob hauv ib lub tsev kaw (1 Petus 3:19; kuj saib Lus Qhuab Qhia thiab Kev Khi Lus 138:42). Vaj lug kub qhia tias cov ntsuj plig no yog “cov uas raug txhom khi” los sis “cov uas raug kaw” (Lus Qhuab Qhia thiab Kev Khi Lus 138:31, 42) los sis “raug muab pov tawm mus rau qhov chaw tsaus ntuj nti” nrog “kev quaj, thiab kev nyiav, thiab muaj kev tom hniav qees” thaum lawv tos kev sawv rov los thiab kev txiav txim (Amas 40:13–14).
Txhua tus nyob hauv lub ntuj ntsuj plig yuav sawv rov los vim muaj Yexus Khetos txoj Kev Sawv Rov Los (saib 1 Kauleethaus 15:22), txawm yog tej pawg nyias yuav muaj nyias sij hawm. Mus txog lub sij hawm uas teem tseg ntawd, cov vaj lug kub qhia peb tias tej yam uas lawv ua hauv lub ntuj ntsuj plig los qhov tseem ceeb yog txoj kev ua hauj lwm cawm seej. Tsis tshua muaj dab tsi ntxiv uas tau tshwm sim lawm. Muaj neeg qhia txoj moo zoo rau cov neeg tsis paub, cov uas tsis tau hloov siab lees txim, thiab cov uas ntxeev siab lawv thiaj li yuav dim ntawm txoj kev ua cev qhev thiab mus tom ntej kom txais cov koob hmoov los ntawm Leej Txiv Saum Ntuj Ceeb Tsheej uas hlub lawv.
Cov ntsuj plig ncaj ncees uas tau hloov siab los ntseeg lawm txoj kev raug kaw hauv lub ntuj ntsuj plig yog qhov uas lawv yuav tos cov sawv cev ua kab ke rau lawv hauv lub ntiaj teb lawv thiaj li yuav ua kev cai raus dej thiab txais tau tus Vaj Ntsuj Plig Dawb Huv cov koob hmoov—tej zaum yuav cia lawv tshoov lwm tus lub siab ua li ntawd (saib Lus Qhuab Qhia thiab Kev Khi Lus 138:30–37, 57–58).2 Qhov uas cov sawv cev ua kab ke no kuj cia lawv mus tom ntej nrog txoj cai pov thawj hwj kom ntxiv dag zog rau cov neeg ncaj ncees uas qhia tau txoj moo zoo rau cov ntsuj plig uas raug kaw.
Tshaj tej yam no, peb cov vaj lug kub tsis hais ntau txog lub ntuj ntsuj plig tom qab peb tuag thiab muaj ua ntej Txoj Kev Txiav Txim Zaum Kawg.3 Yog li ntawd peb paub dab tsi ntxiv txog lub ntuj ntsuj plig? Cov mej zeej ntawm lub Koom Txoos ntau twb ua yog toog thiab txais kev tshoov siab kom qhia lawv tias yuav ua li cas thiab muaj tej pawg twg nyob hauv lub ntuj ntsuj plig, tiam sis tej yam ntawm sab ntsuj plig no los yuav tsum tsis txhob xav los sis qhia hais tias yog lub Koom Txoos cov lus qhuab qhia raug cai. Thiab, yeej muaj cov mej zeej thiab lwm tus uas luam ntawv ntau txog lawv txoj kev twv seb lub ntuj ntsuj plig zoo li cas.4
Hais txog tag nrho tej no, Txwj Laug D. Todd Christofferson thiab Neil L. Andersen tej lus ceeb toom nyob hauv tej lub tuam rooj sab laj dhau los yeej tseem ceeb nco txog. Txwj Laug Christofferson qhia hais tias: “Yuav tsum nco ntsoov tias tsis yog txhua yam uas ib tug thawj coj ntawm lub Koom Txoos hais yog cov lus qhuab qhia, tsis hais thaum yav tas los los yog. Nyob hauv lub Koom Txoos, neeg to taub tias ib qho uas ib tug thawj coj hais ib zaug feem ntau yog nws tus kheej tej kev xav uas nws tsis hais kom raug cai rau tag nrho lub Koom Txoos.”5
Nyob hauv rooj sab laj tom qab ntawd, Txwj Laug Andersen qhia txog lub ntsiab cai no: “Cov lus qhuab qhia yog qhia los ntawm tag nrho 15 tus mej zeej ntawm Thawj Pawg Thawj Tswj Hwm thiab Pawg Kaum Ob tug Thwj Tim. Nws tsis tau muab zais hauv ib nqe ntawm ib zaj lus xwb.”6 Zaj lus tshaj tawm txog tsev neeg, uas 15 tug yaj saub, cov pom tau, thiab cov qhia kev tshwm sim sau npe, yeej yog ib yam uas qhia zoo txog lub ntsiab cai ntawd.
Ntxiv rau cov ntawv raug cai xws li zaj lus tshaj tawm txog tsev neeg, cov Thawj Tswj Hwm ntawm lub Koom Txoos tej lus qhia, uas lwm tus yaj saub thiab cov thwj tim pom zoo, kuj ua yam ntxwv txog qhov no. Hais txog tej xwm txheej uas muaj hauv lub ntuj ntsuj plig, tus Yaj Saub Yauxej Xamiv qhia ob yam ze rau thaum nws tau ua nws txoj hauj lwm qhuab qhia tiav uas cov yaj saub tom qab tau qhia ntau. Ib yam yog nws tej lus qhia nyob hauv zaj lus rau King Follett uas cov hauv yus tsev neeg uas ncaj ncees yuav nyob ua ke hauv lub ntuj ntsuj plig.7 Ib yam ntxiv yog nws zaj lus uas nws hais hauv lub ntees tuag hauv xyoo kawg nawsm nws lub neej hais tias: “Cov ntsuj plig ncaj ncees yeej txais kev tsa nto rau ib txoj hauj lwm loj dua thiab muaj yeeb koob loj dua … [nyob hauv] lub ntuj ntsuj plig. … Lawv tsis nyob deb ntawm peb, thiab paub thiab to taub peb tej kev xav, tej yam peb ua, thiab feem ntau ua rau lawv lub siab mob.”8
Yog li ntawd, yuav ua li cas teb lus nug uas kuv hais ua ntej txog qhov uas cov ntsuj plig nyob qhov twg? Yog tias nej xav tias lus nug ntawd yog lus nug txawv heev, cia li xav txog nej tej lus nug, los sis lwm tus tej lus nug uas nej raug ntxias kom teb raws li tej yam uas nej tau hnov los ntawm lwm tus thaum yav tas los? Hais txog tag nrho tej lus nug txog lub ntuj ntsuj plig, kuv xav tias yuav zoo teb ob yam no. Qhov thib ib, nco ntsoov tias Vajtswv hlub Nws cov me nyuam thiab yeej yuav ua qhov uas zoo tshaj rau peb txhua tus. Qhov thib ob, nco ntsoov txog tej lus qhia los ntawm Phau Vaj Lug Kub Npaiv Npaum no, uas tau pab kuv ntau thaum muaj lus nug uas teb tsis taus:
“Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse.
“Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txoj kev uas yog txoj tseeb” (Paj Lug 3:5–6).
Ib yam li ntawd, Nifais tau xaus nws zaj nkauj thaum nws hais tej lus no: “Auj tus Tswv es, kuv tau tso siab rau koj, thiab kuv yuav tso siab rau koj mus ib txhis li. Kuv yuav tsis tso siab rau neeg lub hwj chim li” (2 Nifais 4:34).
Peb txhua tus yeej muaj cai xav txog tej xwm txheej hauv lub ntuj ntsuj plig los sis sib tham txog tej no los sis lwm yam uas tsis muaj lus teb thaum peb nyob nrog tsev neeg los sis phooj ywg. Tiam sis tej lus uas tsis yog cov lus qhuab qhia raug cai thov kom peb tsis txhob qhia tej ntawd los yog hais tias yog cov lus qhuab qhia raug cai Yog peb ua li ntawd ces ntshe peb tsis txhawb nqa tus Tswv txoj hauj lwm thiab tej zaum yuav ua rau tib neeg tsis xav nrhiav kev nplij siab los yog kev pab uas los ntawm kev tshwm sim rau yus tus kheej uas muaj hauv tus Tswv txoj hau kev rau peb txhua tus. Ntshe tej zaum kev tso siab rau tej lus qhia ntawm yus tus kheej los sis tej kev twv txog tej yam uas tsis paub yuav ua rau peb tsis xav kawm thiab ua tej yam uas yeej yuav ua rau peb to taub ntxiv thiab pab peb mus tom ntej thaum peb taug kev raws li peb tej kev khi lus.
Tso siab rau tus Tswv yeej yog ib txoj lus qhia tseeb uas txhua tus paub nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Cov lus ntawd yog Yauxej Xamiv tej lus qhia thaum Haiv Neeg Ntseeg thaum ub raug tsim txom phem heev thiab muaj teeb meem uas ntshe txhua tus xav tias lawv kov tsis yeej.9 Qhov ntawd yog lub ntsiab cai zoo tshaj plaws rau peb siv yog tias peb tej kev xav kawm los yog xav tau kev nplij siab raug teeb meem hais txog tej yam uas tsis tau muab tshwm sim lawm los yog tsis tau txais ua cov lus qhuab qhia raug cai ntawm lub Koom Txoos.
Lub ntsiab cai no zoo siv thaum muaj tej lus nug txog tej kev sib khi rau lub neej tom ntej los yog muaj tej yam uas yuav tsum kho vim muaj tej xwm txheej los sis kev txhaum hauv lub neej no. Yeej muaj ntau yam uas peb tsis paub peb thiaj li yuav tsum tso siab rau tus Tswv thiab Nws txoj kev hlub rau Nws cov me nyuam xwb.
Qhov uas peb paub txog lub ntuj ntsuj plig yog qhov uas lawv ua Leej Txiv thiab Leej Tub txoj hauj lwm cawm seej nyob ntawd. Peb tus Cawm Seej twb qhib txoj hauj lwm no thaum nws tshaj tawm txoj kev ywj pheej rau cov raug kaw (saib 1 Petus 3:18–19, 4:6; Lus Qhuab Qhia thiab Kev Khi Lus 138:6–11, 18–21, 28–37), thiab peb tseem ua txoj hauj lwm ntawd thaum cov tub txib tsim nyog qhia txoj moo zoo, tsis hais kev hloov siab lees txim, rau cov uas tseem xav tau txoj moo zoo uas yuav ntxuav lawv huv (saib Lus Qhuab Qhia thiab Kev Khi Lus 138:57). Lub hom phiaj ntawm tag nrho tej ntawd los muaj hauv cov lus qhuab qhia raug cai ntawm lub Koom Txoos uas tau txais los ntawm kev tshwm sim hauv hnub nyoog no.
“Cov tuag uas hloov siab lees txim yuav txais kev txhiv dim, los ntawm kev ua raws li cov kab ke hauv Vajtswv lub tsev,
“Thiab tom qab lawv tau raug txim rau lawv tej kev ua txhaum lawm, thiab tau ntxuav lawv huv lawm, lawv yuav txais nqi zog raws li tej yam lawv ua, vim lawv yog cov uas muaj tug txais txoj kev cawm seej” (Lus Qhuab Qhia thiab Kev Khi Lus 138:58–59).
Peb txhua tus tej dej num yog kev qhia cov lus qhuab qhia ntawm txoj moo zoo, ua raws li cov lus txib, sib hlub thiab sib pab, thiab ua txoj hauj lwm cawm seej hauv lub tuam tsev dawb huv.
Kuv ua tim khawv txog qhov tseeb uas kuv tau hais nyob ntawm no thiab tej lus tseeb uas tau qhia thiab yuav qhia nyob hauv lub rooj sab laj no. Muaj tag nrho tej no vim yog los ntawm Yexus Khetos txoj Kev Theej Txhoj. Ib yam li peb paub los ntawm kev tshwm sim hauv hnub nyoog no, nws “muab yeeb koob rau Leej Txiv, thiab txhiv tag nrho tej yam nws ob txhais tes tau ua” (Lus Qhuab Qhia thiab Kev Khi Lus 76:43; ntxiv qhov uas ntawv qaij). Los ntawm Yexus Khetos lub npe, amees.