2010–2019
Tej Kev Hloov Kom Txhawb cov Tub Hluas Ntxhais Hluas Dag Zog
Kaum Hli Ntuj xyoo 2019 lub Tuam Rooj Sab Laj

Tej Kev Hloov Kom Txhawb cov Tub Hluas Ntxhais Hluas Dag Zog

Los ntawm Txwj Laug Quentin L. Cook

Ntawm Pawg Kaum Ob tug Thwj Tim

Muaj cov tub hluas ntxhais hluas ntxiv uas yuav kov yeej tej teeb meem thiab taug txoj kev ua raws li kev khi lus vim peb tsom ntsoov rau peb cov tub hluas ntxhais hluas li no.

Ua tsaug, Thawj Tswj Hwm Nelson, rau kev xyiv fab qhia txog cov neeg tim khawv thaum ua kev cai raus dej thiab qhov uas koj tau hais kom peb qhia txog kev pab txhawb cov tub hluas ntxhais hluas lub zog thiab pab lawv hloov ua neeg dawb huv.

Ua ntej kuv qhia txog tej yam uas yuav hloov no, peb xav hais ua tsaug rau cov mej zeej vim nej twb tau ua raws li tej yam uas tau hloov lawm uas yog ib feem ntawm txoj kev muab txoj moo zoo txum tim rov qab los. Ib yam li Thawj Tswj Hwm Nelson qhia xyoo tas los no, nej twb noj nej cov tshuaj vitamees lawm!1

Nej zoo siab phau kawm Los, Nrog Kuv Mus hauv tsev.2 Nej kuj tau ua raws li tej yam uas tau hloov hauv lub koom txoos. Cov hauv pawg txwj laug thiab cov muam hauv Koom Haum Niam Tsev koom siab ua txoj hauj lwm cawm seej.3

Peb ris nej txiaj heev.4 Peb yeej zoo siab uas peb cov tub hluas ntxhais hluas muaj zog thiab rau siab ntseeg.

Peb cov tub hluas ntxhais hluas nyob hauv ib lub caij nyoog uas zoo tiam sis kuj nyuaj heev. Yeej tsis tau muaj tej yam yus xaiv tau suav tsis txheeb npaum li no. Ib qho piv txwv: lub xov tooj ntawm tes cia peb txais tau tej xov xwm tseem ceeb thiab zoo kawg, tsis hais tsev neeg zaj keeb kwm thiab cov vaj lug kub dawb huv. Tiam sis, qhov no kuj muaj tej yam ruam ntsuav, tej kev coj tsis dawb huv, thiab kev phem tshaj yav tas los.

Daim Duab
Kev qhia hauv tsev
Daim Duab
Cov hluas yam ntxim saib ntxim ua

Xwv kom pab peb cov tub hluas ntxhais hluas paub xaiv zoo, lub Koom Txoos tau npaj peb lub txheej xwm zoo heev. Thib ib, twb tau txhawb nqa tus txheej txheem qhia ntawv thiab pib qhia hauv tsev. Thib ob, hnub Sunday tas los Thawj Tswj Hwm Russell M. Nelson, Thawj Tswj Hwm M. Russell Ballard, thiab cov Tuam Thawj Coj tau qhia txog ib lub txheej xwm rau cov me nyuam thiab cov tub hluas ntxhais hluas uas muaj tej yam ntxim saib ntxim ua thiab kev hloov yus tus kheej ua zoo. Lub txheej xwm thib peb yog kev hloov tej koom haum cia cov npisov thiab lwm tus thawj coj tsom ntsoov rau cov tub hluas ntxhais hluas. Kev tsom ntsoov li no los yuav tsum muaj tus ntsuj plig pab peb cov tub hluas ntxhais hluas los ua pawg tub rog hluas li Thawj Tswj Hwm Nelson tau thov.

Tej Kev Sib Txuas

Tej yam peb ua no, nrog rau tej yam uas tau hloov tau ob peb xyoos tas los no, yeej tsis yog tej yam uas nyias nyob nyias xwb. Txhua yam uas peb hloov yeej yog ib feem ntawm tej txheej txheem sib txuas uas yuav foom koob hmoov rau Tsoom Haiv Neeg Ntseeg thiab npaj lawv ntsib Vajtswv.

Ib feem ntawm tej txheej txheem no yog hais txog tiam neeg uas tab tom loj hlob tuaj. Xav kom cov tub hluas ntxhais hluas lawv muaj tej kev lav ris thaum hnub nyoog tseem hluas —tsis xav kom cov niam tsev txiv tsev thiab cov thawj coj ua tej yam uas cov hluas ua tau rau lawv tus kheej.5

Kev Tshaj Tawm

Hnub no peb tshaj tawm txog tej yam uas yuav hloov rau cov tub hluas ntxhais hluas hauv tej pawg ntseeg thiab ceg txheem ntseeg. Raws li Thawj Tswj Hwm Nelson piav, Muam Bonnie H. Cordon yuav qhia txog tej yam uas yuav hloov rau cov ntxhais hluas hmo no. Ib lub hom phiaj ntawm tej yam uas peb hloov no yog kev txhawb nqa cov uas tuav lub Pov Thawj Hwj Aloos, tej pawg, thiab tej pawg thawj tswj hwm kom lawv muaj zog. Tej kev hloov no yeej ua raws li phau Lus Qhuab Qhia thiab Kev Khi Lus 107:15, uas hais tias, “Pawg npisov yog pawg thawj tswj hwm ntawm lub pov thawj hwj [Aloos], thiab tuav cov yawm sij los yog txoj cai ntawm lub pov thawj hwj no.”

Vaj lug kub qhia tus npisov dej num kom tswj hwm cov pov thawj thiab nrog lawv sab laj, thiab qhia lawv txog tej dej num ntawm lawv lub luag hauj lwm.6 Tsis tas li ntawd, tus pab cuam hauv pawg npisov muaj kev lav ris rau pawg xib hwb thiab tus pab cuam thib ob rau pawg dikas.

Yog li ntawd, xwv kom muaj raws li kev tshwm sim no hauv phau Lus Qhuab Qhia thiab Kev Khi Lus, Koom Haum Tub Hluas tej pawg thawj tswj hwm hauv pawg ntseeg yuav tsis muaj ntxiv li lawm. Cov kwv tij rau siab ntseeg no twb tau ua zoo lawm, thiab peb xav hais ua tsaug rau lawv.

Peb cia siab tias tej pawg npisov yuav tsom ntsoov rau tej kev lav ris pov thawj hwj ntawm cov tub hluas thiab pab lawv ua lawv tej pawg tej dej num. Yuav hu cov txiv neej pab lub Koom Haum Tub Hluas kom pab lub Pov Thawj Hwj Aloos tej pawg thawj tswj hwm thiab pawg npisov ua lawv tej dej num.7 Peb ntseeg tias muaj cov tub hluas ntxhais hluas ntxiv uas yuav txawj kov yeej tej teeb meem thiab taug txoj kev ua raws li kev khi lus vim peb tsom ntsoov rau peb cov tub hluas ntxhais hluas li no.

Raws li tus Tswv tus txheej txheem no, tus npisov muaj kev lav ris rau txhua tus hauv nws pawg ntseeg. Nws pab cov tub hluas ntxhais hluas niam thiab txiv nrog rau cov tub hluas ntxhais hluas. Muaj ib zaug thaum ib tug npisov nrog ib tug tub hluas uas saib duab liab qab sib tham nws tsuas pab tau tus ntawd hloov siab lees txim thaum nws pab tus tub hluas niam thiab txiv hais lus nrog kev hlub thiab kev to taub Kev kho tus tub hluas no zoo twb kho tau nws tsev neeg zoo thiab vim tus npisov tau ua hauj lwm pab tag nrho tus tub hluas tsev neeg ntawd. Tam sim no tus tub hluas no yog ib tug uas tsim nyog tuav lub Pov Thawj Hwj Mekhixedes thiab ua ib tug tub txib.

Raws li zaj no qhia, tej kev hloov no yuav:

  • Pab cov npisov thiab lawv cov pab cuam tsom ntsoov rau lawv tej kev lav ris tseem ceeb tshaj rau cov tub hluas ntxhais hluas thiab cov me nyuam hauv lub Koom Haum Me Nyuam Yaus.

  • Ua rau txhua tus tub hluas tsom ntsoov rau lub hwj chim thiab tej dej num ntawm lub Pov Thawj Hwj Aloos hauv nws lub neej thiab thaum cuab hom phiaj.

Tej kev hloov no kuj:

  • Pab qhia tias tej kev lav ris ntawm tej pawg Pov Thawj Hwj Aloos pawg thawj tswj hwm tseem ceeb npaum li cas thiab lawv txoj kev hais qhia rau pawg npisov.

  • Pab cov thawj coj laus pab thiab qhia tej pawg Pov Thawj Hwj Aloos pawg thawj tswj hwm siv hwj chim thiab txoj cai ua lawv lub luag hauj lwm.

Ib yam li tau hais, tej kev hloov no yeej tsis tso pawg npisov txoj kev lav ris pab cov ntxhais hluas. Ib yam Thawj Tswj Hwm Nelson tau qhia, “[Tus npisov] thawj txoj kev lav ris yog kev saib xyuas cov tub hluas [thiab cov] ntxhais hluas ntawm nws pawg ntseeg.”8

Peb cov npisov uas khwv heev yuav ua li cas ua raws li kev lav ris no? Raws li nej nco qab, thaum xyoo 2018, tau kho tej pawg lub Pov Thawj Hwj Mekixedes kom ua tau hauj lwm nrog Koom Haum Niam Tsev es yog li ntawd tej pawg txwj laug thiab Koom Haum Niam Tsev yuav ua raws li tus npisov tej lus qhia pab ris tej hauj lwm uas nws siv sij hawm ntau ua thaum yav tas los. Tej kev lav ris no yog kev ua tub txib txoj hauj lwm thiab lub tuam tsev thiab tsev neeg zaj keeb kwm hauv pawg ntseeg9—thiab tej kev txhawb pab rau cov mej zeej hauv pawg ntseeg.

Daim Duab
Ib tug npisov tej kev lav ris

Muaj tej kev lav ris uas tus npisov tsis muaj cai tso rau lwm tus, xws li kev txhawb cov tub hluas ntxhais hluas dag zog, ua ib tug txiav txim, pab cov uas xav tau, thiab kev saib xyuas nyiaj txiag thiab tej xwm txheej ntawm sab cev nqaij daim tawv. Tiam sis, tsis muaj npaum li peb xav thaum yav tas los. Ib yam li Txwj Laug Jeffrey R. Holland piav thaum tau hloov tej pawg Pov Thawj Hwj Mekhixedes: “Tus npisov yeej yog tus pov thawj hlob uas tswj hwm pawg ntseeg. Kev muab [tej pawg txwj laug thiab tej Koom Haum Niam Tsev] koom siab ua hauj lwm li no yuav cia nws tswj hwm txoj hauj lwm ntawm lub Pov Thawj Hwj Mekhixedes thiab Koom Haum Niam Tsev tiam sis nws tsis tas ua txoj hauj lwm ntawm ob pawg ntawd.”10

Piv txwv hais tias, lub Koom Haum Niam Tsev tus thawj tswj hwm thiab ib pawg txwj laug tus thawj tswj hwm raws li tau txib yeej ua tau txoj hauj lwm ntuas cov neeg laus—ib yam li yuav pub ib lub Koom Haum Ntxhais Hluas tus thawj tswj hwm ntuas cov ntxhais hluas. Tus npisov yog tib tug uas ua tau tus txiav txim, tiam sis cov thawj coj no kuj muaj cai txais tau kev tshwm sim pab kho tej teeb meem uas tsis tas muaj tus txiav txim los yog tsis muaj neeg ua lim hiam.11

Qhov no tsis txhais hais tias ib tug ntxhais hluas yuav tsum tsis nrog tus npisov los yog nws niam nws txiv tham. Lawv tsom ntsoov rau cov tub hluas ntxhais hluas huv tib si! Tiam sis qhov no txhais hais tias ib tug thawj coj hauv Koom Haum Ntxhais Hluas tej zaum yuav paub pab ib tug ntxhais hluas zoo tshaj. Pawg npisov yeej txhawj txog cov ntxhais hluas ib yam li cov tub hluas, tiam sis peb paub tias qhov uas muaj cov thawj coj rau cov Ntxhais Hluas uas muaj zog thiab saib xyuas zoo, cov uas hlub thiab qhia zoo, lawv tsis ua lub luag hauj lwm ntawm tej pawg thawj tswj hwm, tiam sis pab cov hluas ua tau tej hauj lwm ntawd, thiaj li yuav pab lawv muaj zog.

Muam Cordon yuav qhia tej yam uas yuav hloov ntxiv rau cov ntxhais hluas hmo no. Tiam sis kuv xav tshaj tawm tias ib pawg ntseeg Koom Haum Ntxhais Hluas tus thawj tswj hwm yuav hais qhia ncaj nraim rau tus npisov ntawm nws pawg ntseeg. Dhau los, yus txib tau ib tug pab cuam ua li no, tiam sis mus tom ntej, cov ntxhais hluas yog kev lav ris ntawm tus uas tuav cov yawm sij tswj hwm rau pawg ntseeg ntawd. Koom Haum Niam Tsev tus thawj tswj hwm tseem yuav hais qhia ncaj nraim rau tus npisov.12

Nyob hauv lub koom txoos thiab ceg txheem ntseeg, peb tseem yuav muaj Koom Haum Tub Hluas pawg thawj tswj hwm. Hauv ceg txheem ntseeg, ib tug sab laj hlob yuav ua Koom Haum Tub Hluas tus thawj tswj hwm13 thiab nrog cov sab laj hlob uas saib xyuas Koom Haum Ntxhais Hluas thiab lub Koom Haum Me Nyuam Yaus, yuav koom ua ke hauv ceg txheem ntseeg Pawg Saib Xyuas lub Pov Thawj Hwj Aloos—Koom Haum Ntxhais Hluas. Cov kwv tij no yuav ua hauj lwm nrog ceg txheem ntseeg Koom Haum Ntxhais Hluas pawg thawj tswj hwm hauv pawg saib xyuas no. Nrog ib tug pab cuam hauv ceg txheem ntseeg pawg thawj tswj hwm ua tus thawj, pawg saib xyuas no yuav tseem ceeb ntxiv vim ntau lub txheej xwm thiab yam ntxim saib ntxim ua rau cov Me Nyuam thiab cov Tub Hluas Ntxhais Hluas yuav ua hauv ceg txheem ntseeg.

Tej sab laj hlob no, raws li ceg txheem ntseeg pawg thawj tswj hwm qhia, yuav pab tus npisov thiab tej pawg Pov Thawj Hwj Aloos ib yam li cov sab laj hlob ua hauj lwm pab ib pawg ntseeg pawg txwj laug.

Hais txog ib qho ntxiv, ib tug sab laj hlob ntxiv yuav ua ceg txheem ntseeg Hnub Caiv Kev Kawm Vaj Lug Kub tus thawj tswj hwm thiab, raws li xav tau, nws ua tau hauj lwm hauv ceg txheem ntseeg pawg saib xyuas lub Pov Thawj Hwj Aloos—Koom Haum Ntxhais Hluas.14

Yuav piav txog tej kev hloov rau tej koom haum no ntxiv nyob hauv xov xwm uas yuav xa rau cov thawj coj. Tej kev hloov los muaj li no:

  • Pawg npisov kev sib ntsib rau pawg tub hluas ntxhais hluas los yuav muab pauv ua pawg ntseeg cov tub hluas ntxhais hluas pawg sab laj.

  • Yuav tsis siv lo lus “cov Hluas Kev Sib Koom” ntxiv lawm thiab yuav hais “tej yam ntxim saib ntxim ua rau Koom Haum Ntxhais Hluas,” “tej yam ntxim saib ntxim ua rau tej pawg Pov Thawj Hwj Aloos,” los sis “cov hluas tej yam ntxim saib ntxim ua” thiab yuav ua txhua lub lim tiam yog ua tau.

  • Pawg ntseeg cov nyiaj txiag rau cov tub hluas ntxhais hluas tej yam ntxim saib ntxim ua los yuav faib sib npaug zos rau cov tub hluas thiab cov ntxhais hluas nyob ntawm seb nyias muaj pes tsawg tus hauv nyias lub koom haum. Yuav muab nyiaj txaus rau lub Koom Haum Me Nyuam Yaus tej yam ntxim saib ntxim ua.

  • Nyob hauv txhua theem—pawg ntseeg, ceg txheem ntseeg, thiab lub koom txoos—peb yuav siv lo lus “lub koom haum” thiab tsis siv lo lus “koom haum pab.” Cov uas coj lub Koom Txoos Koom Haum Niam Tsev, Koom Haum Ntxhais Hluas, Koom Haum Tub Hluas, lub Koom Haum Me Nyuam Yaus thiab Hnub Caiv Kev Kawm Vaj Lug Kub yuav hu lawv ua “Cov Tuam Thawj Coj.” Cov uas coj tej koom haum hauv pawg ntseeg thiab ceg txheem ntseeg yuav hu lawv ua “pawg ntseeg cov thawj coj” thiab “ceg txheem ntseeg cov thawj coj.”15

Tej kev hloov uas tshaj tawm hnub no los pib thaum twg tej ceg ntseeg, pawg ntseeg, koog chaw, thiab ceg txheem ntseeg npaj lawm tiam sis yuav tsum ua thaum txog lub Ib Hlis Ntuj hnub tim 1, xyoo 2020. Tej yam uas hloov no, thaum txuas ua ke nrog tej yam uas tau hloov lawm los, yeej yog ib txoj kev siv zog raws li cov lus qhuab qhia kom foom koob hmoov thiab ntxiv dag zog rau txhua tus txiv neej, poj niam, tub hluas, ntxhais hluas, thiab me nyuam, pab txhua tus coj raws li peb tus Cawm Seej, Yexus Khetos, tus yam ntxwv thaum peb taug txoj kev ua raws li peb tej kev khi lus.

Cov kwv tij thiab cov muam, kuv cog lus thiab ua tim khawv tias tag nrho tej yam uas hloov no, los ntawm tus thawj tswj hwm thiab tus yaj saub tau txais kev tshoov siab ua, Russell M. Nelson, yuav ua rau txhua tus mej zeej ntawm lub Koom Txoos muaj hwj chim thiab muaj zog. Peb cov tub hluas ntxhais hluas yuav muaj kev ntseeg tus Cawm Seej ntxiv, yuav pab pov hwm lawv kom txhob raug tus yeeb ncuab tej kev ntxias, thiab yuav npaj lawv lub siab kov yeej teeb meem hauv lub neej no. Los ntawm Yexus Khetos lub npe dawb ceev, amees.

p51

  1. Saib Russell M. Nelson, nyob hauv “Latter-day Saint Prophet, Wife and Apostle Share Insights of Global Ministry,” Newsroom, Kaum Hli Ntuj 30, 2018, newsroom.ChurchofJesusChrist.org.

  2. Nej kuj tau siv zog kom siv lub Koom Txoos lub npe raug raws li Thawj Tswj Hwm Russell M. Nelson tau qhia thiab nco txog peb tus Cawm Seej nrog kev hlub thiab kev tswm seeb.

  3. “Tag nrho cov mej zeej hauv Yexus Khetos lub Koom Txoos yuav tsum ‘los ua hauj lwm nyob hauv nws lub vaj txiv hmab rau txoj kev cawm seej ntawm neeg cov ntsuj plig’ (Q&K 138:56). Txoj hauj lwm cawm neeg txoj sia yog kev ua tub txib rau cov mej zeej, kev pab cov neeg hloov siab los ntseeg, kev pab cov uas tsis tshua muaj siab ntseeg, ua hauj lwm hauv lub tuam tsev thiab nrhiav tsev neeg caj ceg, thiab qhia txoj moo zoo. Pawg npisov coj txoj hauj lwm no nyob hauv nws pawg ntseeg, muaj lwm tus hauv pawg ntseeg pawg sab laj pab” (Handbook 2: Administering the Church, 5.0, ChurchofJesusChrist.org).

  4. Peb cov thawj coj hlub cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg vim nej ua zoo thiab ua thwj tim zoo. Peb qhuas cov neeg, cov niam tsev, txiv tsev, cov tub hluas ntxhais hluas, thiab cov me nyuam uas taug txoj kev ua raws li lawv tej kev khi lus—thiab lawv rau siab ua li ntawd nrog kev xyiv fab.

  5. Thaum xyoo 2019, cov dikas uas muaj 11 xyoos pib muab lub cim nco txog, thiab cov ntxhais hluas thiab cov tub hluas uas muaj 11 xyoos txais tau tej daim ntawv tso cai nkag tuam tsev uas siv qee zaum xwb. Xyoo tas los no, Thawj Tswj Hwm Nelson twv peb cov tub hluas ntxhais hluas kom lawv koom ib pawg tub rog hluas kom muab Ixayees sau los ua ke nyob ob sab ntawm daim ntaub thaiv (saib “Hope of Israel” [kev hawm Vajtswv rau cov hluas nyob thoob ntiaj teb, Rau Hli Ntuj 3, 2018], HopeofIsrael.ChurchofJesusChrist.org). Lawv teb li cas los ua rau peb xav tsis thoob.

    Cov tub txib tam sim no yeej ua hauj lwm zoo kawg thaum lawv hluas zog. Txij thaum lub Kaum Hli Ntuj 6, 2012, cov tub hluas tsim nyog ua tau tub txib thaum muaj 18 xyoo thiab cov ntxhais hluas thaum muaj 19 xyoos.

  6. “Thiab tej dej num ntawm tus thawj tswj hwm saib xyuas lub Pov Thawj Hwj Aloos yog los tswj plaub caug yim tus pov thawj, thiab los sab laj nrog lawv, los qhia lawv tej dej num ntawm lawv lub luag hauj lwm rau lawv. … Tus thawj tswj hwm no yuav tsum yog tus npisov; vim qhov no yog ib qho ntawm tej dej num ntawm lub pov thawj hwj no” (Lus Qhuab Qhia thiab Kev Khi Lus 107:87–88).

  7. Kuj yuav hu cov thawj coj laus ua cov pab pawg lub Pov Thawj Hwj Aloos kom pab khiav tej txheej xwm thiab yam ntxim saib ntxim ua thiab koom lawv pawg tej kev sib ntsib kom pawg npisov yuav mus xyuas tej pawg hauv Koom Haum Ntxhais Hluas thiab yam ntxim saib ntxim ua thiab tej lub sij hawm mus xyuas lub Koom Haum Me Nyuam Yaus. Ib txhia uas pab no tej zaum yuav hu lawv pab ib lub sij hawm xwb xws li thaum pw nraum zoov; lwm tus los yuav hu lawv ntev zog pab cov uas txhawb nqa pawg ntawd. Yeej yuav muaj ob tug txiv neej laus hauv txhua pawg kev sib ntsib, lub txheej xwm, los sis yam ntxim saib ntxim ua. Txawm tej luag hauj lwm thiab lub npe yuav hloov, peb tsis xav tias yuav muaj cov txiv neej tsawg dua ua hauj lwm thiab txhawb nqa tej pawg Pov Thawj Hwj Aloos.

  8. Russell M. Nelson, “Cov Neeg Tim Khawv, tej Pawg Pov Thawj Hwj Aloos, thiab Koom Haum Ntxhais Hluas tej Pawg,” Liahona, Kaum Ib Hlis Ntuj 2019, 39, ntxiv qhov uas ntawv qaij; kuj saib Ezra Taft Benson, “To the Young Women of the Church,” Ensign, Kaum Ib Hlis Ntuj 1986, 85.

  9. Peb kuj qhia kom cov npisov siv sij hawm ntxiv nrog cov tub hluas ntxhais hluas uas tsis tau sib yuav thiab lawv tsev neeg.

  10. Jeffrey R. Holland, lub tuam rooj sab laj kev sib ntsib rau cov thawj coj, Plaub Hlis Ntuj 2018; kuj saib “Effective Ministering,” ministering.ChurchofJesusChrist.org. Txwj Laug Holland hais tias tej kev lav ris uas tus npisov txib tsis tau lwm tus ua yog kev tswj hwm tej pawg Pov Thawj Hwj Aloos thiab cov ntxhais hluas, ua ib tug txiav txim, saib xyuas cov nyiaj txiag thiab tej xwm ntawm sab cev nqaij daim tawv ntawm lub Koom Txoos, thiab pab cov pluag thiab cov xav tau. Pawg txwj laug thiab Koom Haum Niam Tsev ob pawg thawj tswj hwm thiab lwm tus yeej saib xyuas tau kev ua tub txib txoj hauj lwm, ua hauj lwm hauv lub tuam tsev thiab nrhiav tsev neeg zaj keeb kwm, pab qhia zoo hauv pawg ntseeg, thiab saib xyuas thiab txhawb pab cov mej zeej ntawm lub Koom Txoos.

  11. Ntxiv rau tej xwm txheej uas yuav tsum muaj cov yawm sij ntawm tus txiav txim, tej xwm txheej txog kev ua lim hiam hom twg los yuav tsum yog tus npisov ua raws li lub Koom Txoos tej tsab cai.

  12. ceg txheem ntseeg lub Koom Haum Niam Tsev tus thawj tswj hwm kuj yuav hais qhia ncaj qha rau ceg txheem ntseeg tus thawj tswj hwm.

  13. Hu tau ceg txheem ntseeg Koom Haum Tub Hluas tus thawj tswj hwm ob tug pab cuam los ntawm cov mej zeej hauv ceg txheem ntseeg, los sis, yog yuav tsum ua, tej zaum yog tus sab laj hlob uas txib kom saib xyuas Koom Haum Ntxhais Hluas thiab tus sab laj hlob uas txib kom saib xyuas lub Koom Haum Me Nyuam Yaus.

  14. Tus tij laug uas yog Hnub Caiv Kev Kawm Vaj Lug Kub tus thawj tswj hwm muaj kev lav ris rau tej txheej txheem qhia ntawv rau cov tub hluas ntxhais hluas ob hnub Sunday txhua lub hli.

  15. Tej pawg thawj tswj hwm ntawm Koom Haum Niam Tsev, Koom Haum Ntxhais Hluas, Koom Haum Tub Hluas, Hnub Caiv Kev Kawm Vaj Lug Kub, thiab lub Koom Haum Me Nyuam Yaus hauv lub koom txoos thiab ceg txheem ntseeg yog cov Tuam Thawj Coj los sis ceg txheem ntseeg cov thawj coj. Hauv ib pawg ntseeg, pawg npisov coj cov tub hluas, yog li ntawd cov pab tej pawg Pov Thawj Hwj Aloos tsis yog pawg ntseeg cov thawj coj.