Audaudki Ngehn Sarawi
Ni amwail wia sapwellimen Sises Krais tohnpadahk pwerisek kei, kumwail kak ale kamarain oh kaudiahl me audaudki Sapwellime kosonned akan, me wiawidahng kumwail.
Ni ei mwesemweselsang samer kamp en Peinakapw akan, kisin serepein pwulopwul masamwahu men ahpw kihdo kisin likou kis. Nan kisin likouo, E idek, “Ia mwomwen ahi kak nda me Koht songosong en ndahngie mehkot?” I kaselelki ah peideko. Pali ngenitail anahne laud kaweid sang nan dewetail nanleng. Kitail kin men en mie anahnepatail oh kak doadoahk. Ahpw ekei pak kitail kin pingkihda ia wekpeseng en pein atail madamadau oh kaweid en Ngehno. Soukohp kan, en mahs oh pil met, padahngkiher “ma luhk ehu wiawi oh kiong uhk pepehm en men wiahda mwahu, met kohsang rehn Krais.”1
Presiden Russell M. Nelson doulahte oh pil luklukei kitailte: “Riei ohl oh lih akan, I peki rehmwail en kalaudehla amwail audaudkihda ngehno pwe kumwail en kak alehdi kaudiahl. … Kumwail anahne pilada en wia doadoahk en ngehno pwe kumwail en perepereniki kisakis sang Ngehn Sarawio oh rong mwahu ngilen Ngehno.”2
I inangih menseng wet ien koasoaiong kumwail sang nan ahi mohngiong me pid wiepe pahieu mehn sewese palingenimwail en kak alehdi kaudiahl.
1. Koasoanehdi mwahu Ansou oh Wasa pwehn Rong Kepitien Koht.
Ni ohmw pilada en katohrehla oh tohnmeteikihla ehu ansou nan rahn koaros en kak karanih kepihtien Koht, duwhete dahme mih nan Pwuken Mormon, sangete nan mwein kawahu, Kepitie pahn wie sansala oh kumwail pahn esehla rongada kepitie.
Wekpeseng en met, me kin ireikitaildi oh ngihl katairong kan me audelahr sampah, oh nan imwatail kan, oh nan atail mour kak karehda atail apwal en rongada Kepihtieh. Ire kedirepw pwukat kak audehla atail madmadau kan oh mohngiong kan karehda kitail sohla kak rong loiloi tikitik kan en Ngehn Sarawi.
Soukohp Joseph Smith padahngki me pali laud en ansou Koht kin kasalehiong kitail Pein Ih wasa kitail kelekehlehpwie, nan wasahn kapokon kan, nan welo de nan mohs akan, oh wasa me sohte katairong de ngilaud.”3
Tepelo mwahuki kitail en dohsang kepitien Koht ni eh kin kaitonla wasa meleilei kan sang kitail. Ma Koht ketin mahsendo ni kepitie wawai oh tikitik, kumwail oh ngehi anahne karanih pwehn rong Ih. Song medewe dahme pahn wiawi ma kitail kin men ehuieng oh karanih nanleng duwehte atail kin mihmi pohn Internet. Pilada ehu ansou oh wasa, oh rong kepitien Koht rahn koaros. Oh dehr kasapwungehla de wekidala pwe mehkoaros kin pwilsang kepitie.
2. Doadoahk dehr Meleilei
Ni amwail kin indahte doadoahngki mehkoat me kuwmail kehn, Kauno pahn doadoahngkin kumwail. E pahn laudla amwail wehwehki kepitien Ngehno ma kumwail kin doadoahngki ansou koaros ma e lel rehmwail. E pahn laudla amwail kasawiada kaweid en Koht oh me E kin “kupwurki ... kasalehda Sapwellime koasondi oh kupwure.”4 Ma kumwail pahn kapwandehla, kumwail kak manokehla kepitieho de soikala ansou mwahu en sewesehda emen aramas ni mwaren Koht.
3. Ale Amwail Ilek sang Kauno
Kapakap me Sahm Nanleng kin kupwurki sapeng iei atail pekipek pwehn loieng aramas me anahne atail sawas. Presiden Henry B. Eyring padahkihong kitailehr en rapahki kaudial ni atail kin peki rehn Koht ihs me kitail kak sewese ni Mware. “Ma kumwail wia soangen peidek pwukat, Ngehn Sarawi pahn ketdo oh kumwail pahn kehn loiloi tikitik en mehkan me kumwail kak wia ong aramas teikan. Ni amwail doula oh wia mepwuko, kumwail wiewia en Kauno ilek, oh ni amwail wiewia en Kauno ilek, kumwail warehng en ale kisakis en Ngehn Sarawi.”5
Kumwail kak kapakap oh peki rehn Kauno en ketkihong kumwail amwail pwukoah. Ni amwail wia met, E kak doadoahngki amwail talent kan pwehn kapwaiada Sapwellime doadoahk lapo.
En ahi nohno pahpao, Fritz Hjalmar Lundgren, patohdo sang Sweden ni eh sounpar 19. E leledo nan Amerika kelehpw, wa ehu kapang oh ni eh skuhl kihte sounpar wenou. Ni eh sehse lokaiahn wai, ohlo kohla Oregon oh wia doadoahk en pal tuhke wasao, oh ih, en ahi nohnou ah nohno, oh ahi nohnou, iangala Mwomwohdisoh. Sohte pak ehu e pwukoahki ehu ward, ahpw pwehki ah wia sounpadak en peneinei pwerisek men, e kahrehdo tohtohsang peneinei 50 ong mwekid kan en Mwomwohdisoht. Ia mwoamwen eh wia mwo?
Mwurin en ahi pahpakahlapo eh kapilsalehdala, I diar kisinlikou ehu nan nah doropwe kan me wiawihdasang ohl emen me pwurodo nan mwomwohdiso pwehki limpoak en ahi pahpakahlapo. Kisinlikouo koasoia me, “I kamehlele me en Brother Fitz doadoahk pweida pwehki eh kin kalap wia en Sahm Nanleng ilek kan.”
Kisinlikouo kohsang rehn Brother Wayne Simonis. Pahpakahlapo kin pwarek ih oh eri esehla tohn ah peneineio pwon. Mwurin ansou kis, Pahpakahlap ndahiong irail me mie anahneparail oh luke irail en kohla iang sarawi. Ahpw ni Rahn Sarawio, Brother Simoni pirida nan ehu kahpwal—ohlo saikinte kanekehla ah oase nimweho oh mie kasikpen kotou nan wihko. E lemehda en kohla ni imwen kaudeko, itik pehn Pahpakahlapo, ahpw e pahn pwurala nihmwo pwehn kanekehla ah oase ihmwo. Ah peneinei te me pahn iang kamadipw sarawi pwe e sohte pahn iang.
En ohlo koasondio doudoula mwahu lao e mihmi pohn oasen ihmwo, oh rong aramas emen doudouda ni kehndakeo. Ohlo nda: “Ni ahi kilengla, ... Brother Fritz keskesihnen pohn kehndakeo. E sireidohng ie. Ni tapio, I namenekda duwehte en kisin seri men eh kin dierekda ah sohte iang sukuhl. Oh ... I pil lingeringerda. [Ahpw Brother Fritz oudahte] kapwuhrasang ah sekido oh langahda ni kehndakeo Ni eh welikada pehn ah seht pwetepweto, e sohpeidohngie oh nda, ‘Brother Simonis, mie pil ehu noumw ama? Doadoahk wet uhdahn kesempwal ihme ke mweselkihsang ahmw peneineio, oh ma e inenen kesempwal, I men sewese iuk.’ Ni ei kilenglahng nan mesehko, I kilang kadek oh limpoak en Krais. Ahi lingeringero sarasang. ... I pwilikihda ahi dipwisoun doadoank ko Rahn Sarawio oh idawehnla kempoakepahio doudi ni kehndakeo oh pwurala ni imwen kaudeko.”
Ahi papahkahlapo kapwaiadahr ah do a doahk me sang Kauno, oh e pil ese me e anahne kahrehdo sihpw me salongalao. Me duwete en ohl pahmeno arail wahda kepoakeparail ohl mwatoro oh kadardi sang pohn oasen ihmwo pwehn kakehlailda rehn Sises Krais,6 Pahpakahlapo pil doukihdala ah ileko pohn oasen ihmw ehu. Kauno kin ketikihda kaudial ong irail me kin men sewese mehteikan.
4. Kamehlele oh Liki
Me keren, I pil wadekada nan pwuhk sarawi kan koasoipen pil emen misineri me alehier ah ilek sang Kauno. Aron wie kaskasukuhli nanmwarki en mehn Laman kan me medmedewe dahme Amon rien Aron pwutako sohte iang kohdo kasukuhli ih. “Oh Aron eri ndahiobg nanmwarkio: Kilang, Ngehn en Kauno malipehier ih en kohla ekis wasa.”7
Ni ei kin wadek irepwuko, Ngehno kin kalelehki ahi mohngiong: emenemen kitail ahneki ehu pwukoah pwehn kapwaiada, oh ekei ansou Ngehno kin malipeikitail ong “oapwoat ahl tohrohr.” Mie ahl tohto pwehn kauwada wehin Koht sang kitail tohnpadahk en Sises Krais kan me kin wiada oh kolokol inou kan. Ni amwail wia Sapwellime tohnpadahk pwerisek kei, kumwail kak ale kamarain oh kaudial me iang ahki Sapwellime kosonned akan oh wiawihdahng kumwail. Kumwail ahneki pwukoa oh ilek kan pwehn kapwaiada nan mour wet oh pil pahn ale kaweid pwehn kapwaiada mepwukat.
Nihpai, rien Jared ohlo, oh pil Moses irail koaros anahne kotehla madau tehlap ehu—oh emenemen irail kapwaiada ni mwoamw kei me wekpeseng. Nihpai wiahda doahk “kapwuriamwai sang ni tuhke.”8 Rien Sared Pwutak wiada pwoht patapat ehu “kelahil me rasohng dahl ehu.”9 Oh Mohsis “alu nan mad nan werengen sehd.”10
Emenemen irail ale kaweid, me pahrekiong arail ireko, oh emenemen irail liki oh doadoahngki. Kauno mwahngi irail kan me kin peik oh, ihme Nihpai nda, pahn “ketin kaunopada oapwoat ahl [pwe kitail] en kak wiahda dahme e ketin pahngoaki.”11 Kilang pwe Nihpai nda, “ahl ehu”—“ahlo.”
Da kitail kin pwandehla de soikala ilek kan sang Kauno pwehki Ah ketin kaunopada “ahl apwoat” me weksang ahl me kitail kin kasik?
Ahi pahpakahlapo kohla wasa kis me sohte pahrekiong—ah sekido, pohn oasen ihmw ehu, ni Rahn Sarawi. Liki Koht en kahluai kumwail, mendahte ma ahlo mwoamwen weksang dahme kumwail kin kasik de e weksang en mehteikan.
Souleng en Imwin Rahn-akan kin kohdo ni soangen mwoahmw kei, ahpw “koaros duwepenehte rehn Koht”—“me toantoal oh pwetepwet, me sensel oh saledek, ohl oh lih,” kiripw oh pwopwoud, kepwehpwe oh semwehmwe, pwulepwul oh mah, towe wereilahr oh me kapw kan.12 Sohte lipilipil ihs kumwail de dahme kumwail sohsohpai, kumwail lukehng en kohdo ni tehpel en Kauno.13
Ni amwail kin rapahki oh kapwaiada kupwuren Koht en wiahla amwail doadoahk rahn koaros, kaweid pahn uhdahn kohieng kumwail en wekila oh koluhla.
En Mwomwohdisoht pirokram kapw ong serihkan oh me pwulopwul kan kokouda pohn poahson en kasukuhl pwehn ale kaudial, diarada dahme Kauno kupwurki kitail en wia oh doadoahngki kaweidko. Emenemen kitail, sohte lipilipil sounpar depe de mwoamwen atail mour, kak nantihong en rapahki, ale, oh doadoahngki. Ni amwail idawehn ire poatopoat wet me kasarawilahr ong ansou wet, kumwail pahn karaniala Sises Krais—Sapwellime limpoak, Sapwellime marain, Sapwellime kaweid, Sapwellime meleilei, oh Sapwellime manaman en kakehlaka oh kapwaiada. Oh kumwail pahn kalaudehla amwail audaud en palingehn pwehn wiahla Sapwellime dipwisoun doadoahk rahn koaros pwehn kapwaiada Sapwellime doadoahk lapo. Ni mwaren Sises Krais, ahmen.