Mwurin Kasongosong en Atail Pwoson

Ni ei wia kisin seri, Frank Talley, tohn Mwomwohdiso men ahpw nda en wahda aht peneineio sang Puerto Rico ong Kahnihmw en Salt Lake pwe sen kak katengtengpene nan tehnpas sarawio, ahpw kahpwal kan mwadangete miehda. Emen riei serepeinko, me adaniki Marivid, soumwahuda. Ahi pahpa/nohno kedirepkihla oh kapakapki dahme ira pahn wia ahpw ira pepehmte me se pahn wia seiloako. Ira kamehlele me ni ara ideidawehn loiloi tikitik kan sang Kauno oh kohla ni tehnpas sarawio, aht peneineio pahn silasildi oh kapaida—oh ihme wiawi.

Tetehn kahpwal kan me kitail sohpai nan mour wet, kitail kak liki me Sises Krais pahn kaunopada ahl en doudoula ni atail kekeid nan pwoson oh kapwaiahda Kupwure. Koht inoukidahr me koaros me pwoson momourki inou kan me re wiadahr Reh pahn, nin duwen Sapwellime ansou, ale Sapwellime kapai koaros me inoupe miehier. ElderJeffrey R. Holland masani, “Ekei kapahi kan kin kohdo mwadang, oh ekei kin kohdo mwuhr, ekei sohte pahn kohdo lao nanleng; ahpw ong irail akan me kin pereniki rongamwahu en Sises Krais, e kin kohdo¹

Moroni kawehwe me “pwoson iei mehkan me kitail kin koapworopworiki ahpw sohte kin kilang; kahrehda, dehr akpwungki dahme kumwail sohte kilang lao kumwail pein kadehde wahn amwail pwoson.”²

Atail peideko iei: “Dahme kitail anahne wia pwehn powehdi kasongosong kan me kin lel kitail?”

Nan ah keieun kapahrek ong weipokon, Presiden Russell M. Nelson padahngki me: “Ni aht wia Presidensi kapw ehu se men tapiada aht pwukoa ni aht medemedewe mwoamwen ni imwio. Ong ni kahrepe wet, se koaskoasoaiong kumwail rahnwet sang ni tehnpas sarawi. Ni imwilahn dahme emen emen kitail kin nanantiong iei en wiahdi atail inou kan ki manaman en nan tehnpas sarawi en Kauno, katengtengpene nin duwen peneinei kan, kapwaiada inou sarawih kan me kitail wiahda nan tehnpas sarawi me pahn karehiong kitail en kak iang alehdi kapai keieu laud en Koht—me iei mour soutuk. Tiahk sarawih kan en tehnpas sarawi oh inou sarawih kan me kumwail wiahda wasao wia mehn kakehlepen amwail mour, amwail inou sarawi oh peneinei, oh amwail kak en powehdi kasongosong kan me pahn kohsang rehn tepelo. Amwail kaudok nan tehnpas sarawi oh amwail sawas ong kadaudokamwail kan wasao pahn kapai kumwailda sang ni eh pahn kalaudehla pein amwail kaudiahl oh meleilei oh pahn kakehlakahla amwail inou en kekeidte pohn ahl en inouo.”³

Ni atail kin idawehn kepitien Koht oh Sapwellime ahl en inouo, E pahn ketin kakehlaka kitail nan atail kahpwal kan.

En ahi peneineio seiloklang tehnpas sarawio sounpar kei samwalahr me apwal, ahpw ni at kerekerenlahng ni tehnpas sarawio nan Kanihmw en Salt Lake, Utah, ahi nohnou, diren peren on pwoson, nda, “Kitail pahn nsenamwahu; Kauno pahn apwali kitail.” Se katengtengpene nin duwen ehu peneinei, oh riei serepeino kehlailda. Met wiawi mwurin kasongosong pen en ahi pahpa/nohnou ara pwoson oh ni en ahi pahpa/nohnou ara idawehnlahr loiloi tikitik kan sang Kauno.

Karasaras en ahi pahpa/nohnou kin kaukaweidte aht mour lel rahn wet. Ara karasaraso padahkihong kiht kahrepen padahk en rongamwahuo oh sewese kiht en wehwehki wehwe, kahrepe oh kapai kan me rongamwahuo kin wadohng kiht. Wehwehki kahrepen rongamwahu en Sises Krais kak pil sewese kitail sohpai atail kasongosong kan ni pwoson.

Ni mehlel, mehkoaros me Koht kin ketin lukehki oh kangoangehkin kitail en wia iei kadehde pen Sapwellime limpoak ong kitail oh Kupwure en ketkihong kitail kapai kan me koasondiongehr me pwoson kan. Kitail sohte kak kasik me neitail serihkan pahn pein esehla oh pereniki rongamwahuo; pwe iei atail pwukoah en kasukuhli irail. Ni atail sewesehki neitail serihkan en doadoahngki arail saledek en pilipil ni pwung, atail karasaras pwungo pahn kamaraini irail en wiahda pein arail pilipil pwung kan. Arail mour pwosono pahn uhd sewese neirail serihkan en ese me mehlel kan en rongamwahuo ong irail.

Mwahnakapw oh peinakapw akan, kumwail rong mwahu soukohpo ni eh koasoiong kumwail rahn wet. Rapahki pwehn esehla me mehlel kan oh rapahki pwehn wehwehkihla rongamwahuo ong pein kumwail. Presiden Nelson apwtehn kaweidki: “Soangen marain da me kumwail sohte ahneki? … Idawehn karasaras en Soukohp Joseph. Rapahkihda wasa meleilei. … Aktikitikla mwohn Koht. Kasalehiong Semomwail Nanleng audepen amwail mohngiong kan. Ale pasapeng kan sang Reh.”⁴ Ni amwail rapahki kaweid sang Semomwail Nanleng limpoako, rongorong kaweid en soukohp ieias kan, oh alahlasang karasaras en pahpa/nohno pwung kan, kumwail pil kak wiahla kakon en pwoson kehlail ehu nan amwail peneinei.

Ong pahpa/nohno kan me neirail serihkan wetsangehr ahl en inouo, pwurala ni keneinei. Sewese irail en wehwehkihla me mehlel kan en rongamwahuo. Tepda met; e saik oh sohte pwand.

Atail karasaras en mour pwung kak wia mehn kasukuhl mwahu ehu. Presiden Russell M. Nelson koasoiahier me: “Kitail Souleng en Imwin Rahn-akan ahnlahr medemedewe me ‘mwomwohdiso’ iei mehkot me kin wiawi nan imwen kaudeko, me peneinei kan kin sewesehda. Kitail anahne wekid madmadau wet. E lelehr ansou me Mwowmohdisoht tepsang nan peneinei kin alahle sawas sang prans, ward oh steik kan.”⁵

Pwuhk sarawi kan padahngki, “Kaiahnehda seri nan ahl me e anahne keid ie: oh ni eh mahla, e sohte pahn wetsang ie.”⁶

Re pil koasoia, “Oh met, pwehki padahk en mahseno kak kaweidki aramas akan en wiahda me pwung—ehi e kin wekidala en aramas akan madmadau kehlail sang kedlahso, de sohte lipilipil mehkot me wiawihongehr irail—ihmekahrehda Alma medemedewe me irail anahne doadoahngki kamwahu pen mahsen en Koht.”⁷

Mie ehu soai en lih emen me nsensuwedkihlar en nah pwutako ah kin kangkang kandi laud. Sohla katepen en liho kin lipwore nah pwutako pwe pwutako kin kangkangete me sukehn. Ni eh mwarosala douluhl, liho lemehda en wahla nah pwutako rehn ohl marain men me nah pwutako kin wauneki.

Liho ni wahu patohla rehn ohlo oh nda, “Maing, laudlahr en nei pwutako kin kang kandi. Komw kak kaweidki en sohla kang kandi?”

Ohlo rongehr oh ndahiong nein liho pwutako, “Kohwei ni imwomwo oh pwuredo mwurin wihk riau.”

Liho kahrehda nah pwutako oh samwalahr ni imwarau, pwonopwonkihda dahme ohlo sohte ndakihong nah pwutako en tokedisang kang kandi.

Wihk riau mwuri, ira pwurala. Ohl maraino kilenglahng pwutako oh nda, “Pwutak, udahn ke anahne sohla kang kandi. E sohte mwahueng ahmw mour.”

Pwutako pwunkihla oh inouki me e solahr pahn kang kandi.

En pwutako nohnou peidek, “Dahme komw sohte ndakihong ih wihk riau samwalahro?

Ohl maraino sirei. “Wihk riau samwalahro I wie kangkangete kandi laud.”

Ohl menet momourki mour pwungo me e ese me ah kaweid pahn manamante ma e kin wiewia dahme e kaweidki.

Kaweid me kitail kin wiahiong neitail serhikan kin manaman ni arail kin kilang atail weweid pohn ahl en inouo. Soukohp Jacob nan Pwuken Mormon wia ehu karasaras en mepwung pwukat. Nah pwutak Inos ntingiedi lipwen en ah pahpao padahk kan:

“Ngehi, Inos, sang ni ahi ese me ahi pahpa wia ohl pwung men—pwehki e padahkihong ie duwen arail lokaia, oh pil duwen epwel oh kaweid sang Kauno—oh meid pai mwaren ei Koht pwehki kahrepe wet. …

“... Oh mahsen akan me I kin rong sang rehn ahi pahpa me e kin koasoia duwen mour soutuk, oh peren en souleng kan, kihrdi nan ahi mohngiong.”⁸

Nohno kan en sounpei sikasik riekido kin wie momourki rongamwahuo, oh neirail pwutak ko mahwen ni koapworopwor, Arail kauno kosoia:

“Arail nohno kan padahkihong irail me ma irail sohte ahneki peikasal, Koht pahn ketin apwali irail.

“Oh irail pil ndahiong ie en arail nohnohkan arail koasoi dene: Se sohte peikasal aht nohno kan ese.”⁹

Inos oh sounpei sikasik ko kakehlailkihda pwoson en arail pahpa/nohno kan, me sewese irail powehdi kasongosong kan en arail pwoson.

Kitail kapaikidahr kapwurpwurdohn rongamwahu en Sises Krais rahn pwukat, me pwengkitaildahr ni atail kin mwarosala de nsensuwedla. Kitail esehda me e pahn mie wahn atail doadoahk kan nin duwen kupwuren Kauno ma kitail wenla mwowe nan kasongosong kan en atail pwoson.

Ngehi oh ahi pwoudo iang Elder David A. Bednar kohla ni kasarawi en Tehnpas Sarawi en Haiti Port-au-Prince. Nait pwutak Jorge, me iang kiht, ndahki duwen ah pepehm; “Inenen kapwuriamwei, Papa! Ni en Elder Bednar tepda wia kapakap en kasarawio, I kak kehn me pereo audaudkihda limpoak oh marain. Kapakapo kalaudehla ahi wehwehkihla duwen kahrepen tehnpas sarawi ehu. Tehnpas Sarawi me wia tehnpas en Kauno.

Nan Pwuken Mormon, Nihpai padahngki me ni atail anahne esehla kupwuren Koht, E pahn kakehlaka kitailla. E ntingiedi, “Ngehi, Nihpai, sang ni ei inenen pwulepwul … ohpil ahneki anahn akan en esehla duwen me rir en Koht akan, eri, I ahpw likiweriong Kauno, oh e ketin pwarehng ie oh ketin kamaterekala nan ei mohngiong pwe I kin kamehlele padahk koaros me ei pahpahu kasaledahr; eri, I ahpw sohte kin duwehte riei kan me kin uhwong ei pahpao.”¹⁰

Riei ohl oh lih akan, kitail sewesehda neitail serihkan oh koaros mehn mpetail kan en idawehn sapwellimen Koht ahl en inouo pwe Ngehno en kak kasukuhli irail oh kamaterekala mohngiongirail pwehn inengieng ideidawehn Ih erein arail mour.

Ni ahi kin medewe karasaras en ahi pahpa/nohnou, I diarada me atail pwoson Kaun Sises Krais pahn kasalehiong kitail ahl me pahn kahreikitaillahng atail wasahn kousono nanleng. I ese me manaman kan kin kohdo mwurin kasongosong en atail pwoson kan.

I kadehdeki Sises Krais oh Sapwellime tounmetei en Tomwo. I ese me iei Ih me atail Sounkomour oh Soundor. Ih oh Samatail Nanlengo ketido ni menseng en rahno nan 1820 rehn Joseph Smith, soukohp en Kapwurpwurdohu. Presiden Russell M. Nelson me wia atail soukohp en rahn wet. Ni mwaren Sises Krais, amen.