Kaimwiseklahn Kapahrek

Riei ohl oh lih kempoake kan, ni atail kaimwisekala kapokon wadawad wet, kitail kapingkiheng Kauno pwehki padahk ngenin kan oh atail kemweitkilahr koul oh keseng kan. Kitail inenen perenkihda kamadipw ngenin wet.

Kitail ese me kapwurpwurdohn rongamwahu en Sises Krais pahn wahdo koapworopwor oh popohl ong aramas me pahn rong oh oke Sapwellime padahk. Kitail pil ese me ehuehu peneinei kan kak wiahla wasahn kakairada pwoson, wasa me meleilei, limpoak oh Ngehn en Kauno kin ketiket ie.

Mehlel, tehnpas sarawio me wia kapwat lingan en Kapwurpwurdohu. Tiahk sarawi oh inou kan en nan tehnpas sarawi inenen kesempwal ong kaunopadahn aramas akan me onopadahr en kasamwo Sounkomouro ni Sapwellime Ketdo Keriauo. Met miehier tehnpas sarawi 166, oh me tohto pil pahn kokouda.

Kapidolong ehu kin wiawi mwohn kasarawi en ehuehu tehnpas sarawi kapw oh me onohnda. Kempoakepatail tohto me sohte iang atail lamalam pahn iang lel nan tehnpas sarawi pwuko oh pahn esehla duwen kapai kan en nan tehnpas sarawi. Oh ekei irail me pwarek kan pahn men doula pwehn esehla duwe. Ekei pahn ni mehlel men esehla ia mwoamwen arail kak warehng alehdi kapai kan en tehnpas sarawi.

Kitail tohn Mwomwohdisoht anahne onopada pwe kitail en kakehng sapeng arail peidek kan. Kitail kak kawehwehiong irail me kapai kan en tehnpas sarawi kak kohieng aramas sohte lipilipil oh koaros me pahn kaunopirailda en ale. Ahpw mwohn arail kak pidolong nan ehu tehnpas sarawi, irail anahne warehng. Kauno kupwurki Sapwellime seri koaros en ale kapai poatopoat kan me mie nan Tehnpase. E kasaledahr dahme emenemen aramas anahne wia pwehn warehng pidolong nan Tehnpase sarawio.

Ehu wasa mwahu en tapiada kasukuhl wet iei en isaniki ansou mwahu oh kasalehiong aramas akan mahsen kan me ntingdi ni mas likin tehnpas sarawio: “Kauno me Sarawi: Tehnpas en Kauno.” En Presiden Henry B. Eyring ah padahk rahn wet oh padahk teikan pil kamarainihkin kitail en mwakelekella. Ehuehu tehnpas sarawi wia wasa sarawi ehu; emenemen me kin pidolong nan tehnpas sarawi kin nantihong en mwakelekella sang mahs.

Irehn mweimwei en pidolong nan tehnpas sarawi koaros pid mwakelekel en aramas. Pwehn diarada ma aramaso onopadahr, emenemen aramas me anahne kapai kan en tehnpas sarawi pahn ale kapeidek pak riau: keieuo rehn emen pisop, sounsawas en pisoprik, de prans presiden; keriauo rehn presiden en steik de misin de emen nah sounsawas kan. Nan kapeidek pwuko, mie peidek kei pahn wiawi.

Ekei peidek pwuko apwtehn koasonsapahl pwehn wehwe mwahu. I men tehksapahli peidek pwukat rehmwail:

1. Mie ahmw pwoson reh oh kadehdepen Koht Sahm Soutuko; Sapwellime Iehroso, Sises Krais; oh Ngehn Sarawio?

2. Mie ahmw kadehde en Sapellimen Krais Tomwpen Dihp oh Eh ketin wia Sounkomour oh Soundor?

3. Mie ahmw kadehde me pid Kopwurupwurdohn rongamwahuo en Sises Krais?

4. Komw utung Presiden en Mwomwohdiso en Sises Krais en Souleng en Imwin Rahn-akan me wia soukohp, ohl sarawi, oh sounkihla kaudial oh ihte ih aramas pohn sampah me kolokol oh ahneki mweimwei en doadoahngki kih koaros en prihsduhd?

   Komw utung irail kan me towe Presidensi Keieu oh Pwihn en Wahnparon Ehk-riemen ko me irail wia soukohp kei, ohl sarawi kei, oh sounkihla kaudial kei?

   Komw utung ihr teikan me pil iang wia Kaun Lapalap en Mwomwohdisoht oh irail kan me kakaun Mwomwohdisoht nan ahmw wasa?

5. Kauno mahsaniher me mehkoaros pahn kin “wiawi ni mwakelekel” mwohn Silahngi (Doctrine and Covenants 42:41).

   Komw kin nantiong en ahneki lamalam oh wiewia mwakelekel?

   Komw kin momourki kosonned en mwakelekel?

6. Komw kin idawehn padahnk kan en Mwomwohdiso en Sises Krais nan ahmw mour oh nan ahmw wiewia rehn tohn ahmw peneinei oh mehteikan?

7. Komw kin utung de pwungki sohte lipilipil padahk, wiewia kan, de koasondi kan me uhong Mwomwohdiso en Sises Krais en Souleng en Imwin Rahn-akan?

8. Komw kin nantiong wauneki Rahn en Sapad, ni imwomwi oh ni imwen kaudek; iang mihting kan; kaunopohng oh ale kamadipw sarawi; oh momourki mour me wauneki kosonned oh koasondi kan en rongamwahuo?

9. Komw kin nantiong en kin mehlel nan mehkoaros me komw kin wia?

10. Komw kin pwain meirong en eisek-kis-ehu ni unsek?

11. Komw kin wehwehki oh peikiong Mahsen en Eripit?

12. Mie ahmw pweipwand de soangen inou teikan ong ahmw pwoud en mahs oh seri kan?

    Ma mie, komw kin kapwaiada mepwukat ansou koaros?

13. Komw kin kolokolete inou kan me komw wiahda nan tehnpas sarawi, iangahki kin likilikauwi karment kan nin duwen koasondi me komwi ale nan kasarawi en endowment?

14. Mie dihp toutou nan omwi mour me anahne en kanseno ong prishduhd kan pwehn wia kisehn omwi koluhla?

15. Ni omw madamadau, komw warohng en pidolong nan tehnpas en Kauno oh iang wia tiahk sarawi kan?

Lakapw, peidek pwukat me koasonsapahlehr pahn pekederlahng sounkaweid kan en Mwomwohdisoht wasa koaros nan sampa.

Me patehng sapengala peidek pwukat ni mehlel, e sansalehr me emenemen aramas mah me pidolong nan tehnpas sarawi pahn kalapw likauwih karment sarawi kan en prihsduhd pahn arail likou kan. Met wia kilel en inou en mas loalle pwehn nantihong rahn koaros en duwehla Kauno. E pil katamanehng kitail en ahnikihte pwoson inou kan me wiawihda rahn koaros pwehn alu nan ahl en inou rahn koaros ni wahu oh mwakelekel.

Met, nan erein kisin ansou kis, I men koasoaiong neitail me pwulopwul kan. Se kangoangei kumwail en warehng ale kisinlikoun mweimwei en pidolong nan tehnpas sarawi en lepin ansou. Peidek kan me pahn wiawihong kumwail pahn pid amwail kaunop ohng tiahk sarawi kan en pepdaiski oh kasarawi ohng me melahr akan. Se inenen kaping kalahnganki amwail warehng kan oh men iang wia doadoahk sarawi kan en tehnpas sarawi. Se poakohng kuwmail!

En emenemen warehng pidolong nan tehnpas en Kauno anahne kaunopada lap ong palingenamwail. Ahpw pwehki sawas sang Kauno sohte mehkot apwal. Ekei ansou, e kin mengei en kauwada ehu tehnpas sarawi sang kaunopada aramas en pidolong nan tehnpas sarawi. En emenemen warehng anahne weliakapw unsek en madmadau oh mohngiong pwehn kak duwehla Kauno, me wia aramas mehlel, wia mehn kahlmengi mwahu men, oh aramas mwakelekel men.

I kadehde me soangen kaunop wet kin wahdo kapai mwuledek nan mour wet oh kapai sohkasikpe nan mour me pahn kohdo, iangahki “popohl poatopoat ong amwail peneinei en tengetengedi sang met oh kohkohlahte soutuk.”¹

Met I pahn uhd kosoia mehkot tohrohr: koasoandi kan en pahr kohkohdo. Nan tepin pahr 2020, e pahn lel sounpar 200 mwurin en Joseph Smith kilangada sansalo me kitail kin kahdaneki Kasansal Keieu. Koht Sahm oh Sapwellime Ieros Kehmpoake, Sises Krais, sansalohng Joseph, me pwulepwulki sounpar 14. Mwekido me kahmwowehda Kapwurpwurdohn rongamwahu en Sises Krais ni unsek, me kokohmpe wiawiher nan Pwuhk Sarawi.²

Mwuri iei pwarodohn tohnleng kei me iangahki Moroni, Sohn Sounpepdais, oh Wahnparon en mwoweh kan Piter, Seims oh Sohn. Mehkei pil idawehndo, iangahki Moses, Elias, oh Ilaisa. Emenemen irail pwarkihdo manaman sarawi pwehn pwurehng kapaiada seri en Koht kan pohn sampah.

Sang ni manaman, kitail pil alehier Pwuken Mormon; Pil ehu Kadehde pen Sises Krais, me wia iengen Pwuhk Sarawi. Kaudiahl kan me ntingdiehr nan Doctrine and Covenants oh Pearl of Great Price pil kalaudelahr atail wehwehki kosonned akan oh me mehlel kan en Koht.

Kih kan oh ohpis kan en prihsduhd pil kapwurpwurdohr, iangahki ohpis kan en Wahnparon, Isiakan, peidriark, samworo lap, elder, pisop, prihsd, sounpadahk, oh dihken. Oh lih me poakong Kauno pil pwerisek papah nan Pwihn en Sawas en Lih, Praimeri, Peinakapw kan, Santi Skuhl, oh malipilip en Mwomwohdisoht teikan—koaros wia kisehn Kapwurpwurdohn rongamwahu en Sises Krais ni unsek.

Kahrehda, pahr 2020 pahn kahdankihla kariepwikihn pahr. Kapokon lap en Epreil kohkohdo pahn weksang kapokon lap koaros me wiawiher. Nan irair en sounpwong weneu kohkohdo, I koapworopworiki me toweh kan koaros oh peneinei koaros pahn kaunopehng ehu kapokon tohrohr me pahn kasarawi poahson en rongamwahu kapwurpwurdohu.

Kumwail kakehr tapiada amwail kaunopada ni amwail pahn wadek koasoiepen Kasansal Keieuo sang Jospeh Smith me ntingdi nan Pearl of Great Price. Atail irehn kasukuhl en pahr kohkohdo nan Kohdo, Idawehn Ie iei Pwuken Mormon. Kumwail en kin doandoaropwe peidek kesempwal kan me iangahki, “Ia mwomwen ahi mour ah pahn wekila ma dahme I esehsangehr nan Pwuken Mormon pahn wiahkintehiu sohrala?” de “Ia mwomwen kemwekid kan me wiawi mwurin Kansansal Keieu me wiawihero ah pahn wekila ohngie oh me I poakehng kan?” Oh pwehki kasdohn Pwuken Mormon kan eh tepier kohda, kumwail kak ale oh kapatahiong nan amwail oh nan en amwail peneinei kan irehn kasukuhl kan.

Pein pilada amwail peidek kan. Pein koasonehdi amwail koasondi kan. Serehda elemwail kan ki marain lingan en Kapwurpwurdohu. Ni amwail wia met, kapokon lap en Epreil kohkohdo sohte pahn wia mehkot me kumwail pahn tamatamante; ahpw kumwail sohte pahn kak manokehla.

Met pwehn kaimwsekala, I pwilikihdiong kumwail ahi limpoak oh ahi kapai pwe emenemen kumwail en ahniki popohl oh mwakelekel nan rahn koaros. Ni ansouohte, menlau kamehlele me kaudiahl kin kohkohda nan Mwomwohdisoht oh pahn pil kohkohda nin duwen kaweid en Kauno lao “kupwuren Koht kan pahn pweida, oh Siohwa Lapalahpie pahn mahsani me doadoahko pweidahr.”³

I kapaiahda kumwail, katengehdi ahi poakohng kumwail, ni ahi kadehde me Koht ketin ieias! Sises iei ihme Krais! Met wia Sapwellime Mwomwohdiso oh kitail iei Sapwellime aramas. Ni lengileng sarawi en Sises Krais, ahmen.