Kisakis Kesempwal akan en Palingehn
Ni amwail kin doadoahngki amwail pwoson oh Sapwellime manaman en prihsduhd, amwail kak en alahle kisakis kesemwpal akan en palingehn me Kauno ketin kaunopadahng kumwail pahn laudla.
Kalahngan en kumwail pwehki koul kaselel kan. Ni atail kesihnenda oh koulki koulo, “Kitail Kaping Kalahngan ong Koht, pwehki Soukohpo,” I ahnekihda madmadau kehlail riau. Keieuo iei me pid Soukohp Joseph Smith, soukohp en mwehi wet. Ahi limpoak oh kaping ong ohl menet kin lalaudla rahn koaros. Keriaun madmadauo pwarada ni ei kilenglahng ahi pwoud, nei serepein kan, nein nei serepein serepein kan, oh nein nein nei serepein serepein kan. I medewe me I men pwekkumwailda koaros en wiahla kisehn ahi peneinei.
Sounpwung kei samwalahro, ni keimwseklahn ehu kasarawi en inou sarawi nan tehnpas sarawi, I ndahng ai pwoudo, “I koapworopworki me lih pwukat wehwehki duwen kisakis en palingehn kan me irail ahniki nan tehnpas sarawi.” Riei lihoko, I kin kalap diarada ahi kin medemedewe kumwail, iangahki sounpwong riau samwalahro ni ansou me Wendy oh ngehi pwarek Harmony, Pennsylvania.
Met wia keriapak en aht pwarek wasahu. Nan ansou ko koaros mehtot kin mwekid loallat ni aht kin alu pohn pwehl sarawi wet. Iei wasa wet nan Harmony me Sohn Sounpepdais pwarek Sosep Smith oh kapwurehdo Prihsduhd en Aron.
Pil wasahute me Wahnpoaren Pihter, Seims, oh Sohn pwaredo pwehn kapwurehdo Prihsduhd en Melkisedek.
Iei pil nan Harmony me Emma Hale Smith wia tepin nein eh pwoud souninting ni ansou me Soukohp Sosep kawehweh Pwuhk en Mormon.
Pil nan Harmony me Sosep alehdi kaudial en sapwellimen Kauno ilek ohng Emma. Kauno ketin ruwesehki Emma en koasoiada duwen iren pwuhk sarawi kan, en koangoangoahki Mwomwohdiso, en alehda Ngehn Sarawi, oh en ahniki ansou en “kaskaskuhlki.” Emma pil alehdi kaweid en “pwilikihdi dipwisou kan en sampah oh rapahki soahng kan me pahn mwahu,” oh kolokol ah inou sarawih kan rehn Koht. Kauno ketin kaimwesekala Sapwellime mehn kaweid ong ni lepin mahsen pwukat: “Iei met me wia ngilei ohng kumwail koaros.”1
Mehkoaros me wiawi nan Harmony wia kasansal mwahu ehu ohng amwail mour kan. Kopwurupwurdohn prihsduhd iangahki sapwellimen Kauno kaweid ohng Emma, kak wia mehn kaweid oh kapaiada emenemen kumwail. Ia uwen ahi men kumwail en wehwehki me kopwurpwurdohn prihsduhd e duwehte ni amwail wia lih emen ni eh pil ong ohl emen. Pwehki Melkisedek Prihsduhd kowpurupwurdohr, lih akan oh ohl akan me kolokol arail inou sarawi kan ahniki ahl ong “koaros kapai sarawi kan en mwomwohdiso”2 de, kitail kak inda, ong koaros kisakis kesemwpal akan me Kauno ketkiheng Sapwellime serih kan.
Lih koaros oh ohl koaros me wiahda arail inou sarawi kan rehn Koht oh kolokol inou sarawi pwukat, oh me kin iang warohng patehng tiahk sarawi kan en prihsduhd, ahniki ahl ong ni manaman en Koht. Irail akan me alehdier arail inou sarawi nan tehnpas en Kauno aledier kisakis en Sapwellimen Koht manaman en prihsduhd sang arail inou sarawi mwakelekel, iangahki kisakis en eripit en esehla mwomwen arail pahn doadoahngki.
Nanleng kan pil kin ritdahng lih akan me alehdier inou sarawio ong Sapwellimen Koht manaman rasehngete ohl akan me kin kolokol prihsduhdo. I kapakapki me me mehlelo pahn kileldier nan amwail mohngiong kan pwehki I kamehlele me kumwail pahn wekidala amwail mour. Riei lihoko, kumwail ahniki pwuhng en doadoahngki laud sapwellimen Sounkomouro manaman pwehn sewese amwail peneinei oh mehtei kan me kumwail poakpoake.
Met, kumwail mwein ndindahieng pein kumwail me, “Ngilen koasoi wet me kaselel, ahpw ia mwomwen ahi pahn wia met? Ia mwomwen ahi pahn doadoahngki sapwellimen Sounkomouro manaman nan ai mour?”
Kumwail sohte pahn diar wiepe wet eh ntingdi nan pwuhk kan. Ngehn Sarawi me pahn wia noumwail sounkaweid ni amwail pahn rapahki en wehwehkihla dahme Kauno pahn ketkiheng kumwail en ese oh wia. Wiepe wet sohte pahn mwadang de mengei ahpw e pahn wia mehn kakehlepen palingehn. Dahme pahn kak kaperen sang doadoahk ehng Ngehno pwehn esehla manaman en Koht—manaman en prihsduhd?
Dahme I kak ndahng kumwail iei me ni amwail pahn kak ale manaman en Koht nan amwail mour e anahne songen kaweidkohte me Kauno ruwesehki Emma oh emen emen kumwail en wia.
Eri, I lukei kumwail en kapakap oh onoipki ire laud 25 en Doctrine and Covenants oh diarada dahme Ngehn Sarawio pahn padahkiong kumwail. Pein amwail nanantiheng palingenemwail pahn wadohng kumwail popohl ni amwail pahn kalaudehla, wehwehkihla, oh doadoahngki manaman me kumwail kasarawihengehr.
Me patehng nantiheng wet pahn anahne kumwail en kesehla soahng tohtoh kan en sampah. Ekei pak kitail kin kerenieng ansou koaros koasoia duwen atail kin aluhsang akamai kan, kasongosong kan me kin lalaudpeseng, oh kaskuhl likamw akan en sampah. Ahpw ni mehlelo ni amwail pahn wia met e anahne kumwail en tehk mahs pein amwail mour ni keneinei oh ansou koaros. Ni amwail pahn wia met, Ngehn Sarawi pahn ndahng kumwail duwen dahme solahr anahnepe, dahme solahr anahnepe en warohng amwail ahnsou oh amwail kehlail.
Ni amwail pahn sohpeisang kemweiht kan en sampah, soang kei me mwomwen kesempwalehng kumwail pahn met wiahla mehkot keieu kesempwal. Kumwail anahne nda soh ong ekei mehkot, itarete ma e mwomwen me e sohte apwal. Ni amwail pahn tapiada oh pousehla wiepen momour wet en poadidiheng amwail mour ong Kauno, wekdeklah kan me pahn mie nan amwail madamadau, pepehm kan, oh kehlepen palingenimwail kan pahn kopwuriamwei kumwail!
Met kisin lepin koasoi en mpeng. Mie ekei irail me pahn kaluwetehla amwail koahiek en eker manaman en Koht. Mie ekei me pahn song en wia kumwail en ahniki peikasal oh katikala amwail wiewia mwahu ni amwail wia lih mwahu kei.
Ahpw me keieu iei imwintihtiho sohte mwauki kumwail en wehwehki inou sarawi kan me kumwail wiadahr ni amwail pepdais, de lapalahn kisakis en eripit oh kakehlail me kumwail alehdier de pahn ale nan tehnpas sarawi—tehnpas en Kauno. Oh Sehdan sohte douluhl men kumwail en wehwehki me ansou koaros me kumwail kin warohng en papah oh pwongih nan tehnpas sarawi, kumwail mweidehng manaman en Koht oh Sapwellime tohnleng kan en “apwalih” kumwail.3
Sehdan oh nah meh nen kau pahn nantiheng wiahda ahl en irehdi amwail wehwehki duwen kisakis en palingehn kan me kumwail kapaikiher oh pahn kak kapaikihda. Ahpw ekei pak, ekei ahl iraihrdi pwukat pahn kak sang ni en mehteikan wiewia sapwung kan. I kin nsensuedla ni ei medewe me ekei kumwail ahnikiher pepehm me kumwail weksang mehteikan de kaun en prihsduhd saikinte kamehlele kumwail, de amwail pwoud de pahpa de kempoakepahmwail kan wiakawei kumwail de pitihkumwaildier. I pahtoukihla mehlel ni amwail kin ahnekihdi pepehm en lekdekla, kasohwahu, de kopwung sapahrek. Soangen kemwekid sohte mwahu pwukat sohte dewe nan wehin Koht.
Ni karasepe, e kin kapereniehda ni ei kin esehda me kaun en prihsduhd kan kin nantiheng rapahki patedohn lih akan en nan ward oh stake kounsel kan. I kin linganikihda ohl pwopwoud kan arail kin kasalehda me arail pwukoah keieu kesempwal en prihsduhd iei arail epwel mwahu ong arail pwoud kan.4 I kapingki ohl me kin wauniki mehlel en ah pwoud kaudiahl me e kin alehdi oh kesempwaliki ni pahrek nin duwen peliali en ara pwopwoudo.
Ni en ohl emen ah wehwehki lingan oh manaman en lih Souleng en Imwin-rahn pwung men, kin rapahki, oh kasarawilahr, e wia irehn kapwuriamwei ehu ma e kesihnenda ansou me liho pahn pidolong nan perehu?
Sangete kawaho, lih akan kapaikidahr mehn kaweid ehu me sohte mehkot kak rasehng—iei kak en kilangada me pwung sang me sapwung. Kisakis wet kin lalaudla rehn irail kan me kin wiahda oh kolokol inou sarawi kan. Oh e kin sohrala rehn irail kan me kin inengieng en pohnsehsehla kosonned akan en Koht.
I men kapatahieng me I sohte kasaledekla ohl akan sang ni kupwuren Koht pwe pil irail en kak kilangada dahme pwung sang me sapwung. Ahpw riei lihoko, amwail kak en diarada me mehlelo sang ni sapwung kan, wia soun apwahpwali mwekid pwung en wasahn kouson akan, iei me inenen apwal ni imwin rahn pwukat. Oh se koapworopworkin kumwail en padahkihong mehtei kan en pil wia soahngohte. I pahn kasalehda ni sansal me pid duwen met: ma wiewia mwahu en lih akan pahn sohrala, sampah wet pahn sohte douluhl pwurehng mwahula.
Kitail Souleng en Imwin-rahn akan kaidehn mehn sampah; kitail wia aramas en inou en Israel. Kitail ahniki pwukoah en kaunopada aramas akan ong ni Ketdo Keriau en Kauno.
Met i men kasalehda ni sansal iren kapatapat kei me pid lih akan oh prihsduhd. Ni ansou me kumwail kasarawiahlahr pwehn papah pwukoah sohte lipilipil sang rehn emen me kolokol kih kan en prihsduhd—me rasehng amwail pisop de stake presiden—kumwail ale mweimwei en prihsduhd en kak wia amwail pwukoah kan.
Duwehte, nan tehnpas sarawi, kumwail ahniki mweimwei en wia oh kamwakid tiahk sarawih kan en prihsduhd ansou koaros me kumwail iang towehda. Amwail kasarawialahn nan tehnpas sarawi kaunop kumwaildahr en wia mepwukat.
Ma kumwail kasarawialahr ahpw saikinte kapwopwoudehng ohl emen me kolokol prihsduhd oh emen aramas ndahng kumwail, “Ke pahn mahk pwe sohte prihsduhd nan imwomwailo,” menlau wehwehki me koasoi pwoato sohte pwung. Mwein sohte me kolokol prihsduhd nan imwomwail, ahpw kumwail alehier amwail kakehlail en manaman en prihsduhd rehn Koht nan Sapwellime tehnpas sarawi. Sang inou sarawi pwukat e kin kasalehda manaman en Sapwellime prihsduhdo ong kumwail. Oh tamataman, ma amwail pwoud mehla, kumwail me pahn uhd kaunda nan imwomwail.
Ni amwail wia lih en Souleng en Imwin Rahn-akan me mehlel oh kasarawialahr, kumwail koasoiki oh padahngki manaman oh mweimwei sang Koht. Sang ni ngoang de ni koasokoasoi, se anahne ngilemwail kan en padahngki padahk kan en Krais. Se anahne amwail kaweid nan peneinei, ward, oh steik kaunsel kan. Amwail patedo me inenen kesempwal oh sohte wia kilel en mehn kapwat!
Riei lih kesempwaloko, amwail kehlail pahn kehlaila ni amwail pahn papah mehteikan. Amwail kapakap, kaisihsol, ahnsou nan pwuhk sarawi kan, papah nan tehnpas sarawi oh wia doadoahk en kadaudok en peneinei pahn ritingada nanleng ong kumwail.
I peki ni ngidingid kumwail en onopki ni kapakap mehlel koaros kumwail kak diar me pid duwen manaman en prihsduhd. Kumwail kak tepkihda Doctrine and Covenants iralaud 84 oh 107. Iralaud pwuko pahn kahluwa kumwail ehng nan ekei ire. Iren pwuhk sarawi kan oh padahk kan en soukohp, ohl sarawi, oh sounkihda kaudiahl kan en rahnpwukat audawudki me mehlel pwukat. Ni amwail wehwe ah pahn laudla oh ni amwail pahn doadoahngki amwail pwoson nan manaman en prihsduhdo, amwail kak en alahle kisakis kesemwpal akan en palingehn me Kauno ketin kaunopadahng kumwail pahn laudla. Ni amwail pahn wia met, kumwail pahn diar amwail kak en sewese wiahda peneinei poatopoat me kin ehupene, katengtengpene nan tehnpas sarawi en Kauno, oh diren limpoak ong Samatail Nanleng oh Sises Krais.
Koaros atail doadoahk laud en papah mehtei kan, kalohki rongamwahu, kaunsekiala Souleng kan, oh doarehla me melahr akan me kin wiawi nan tehnpas sarawi. Met kitail ahniki tehnpas sarawi 166 nan sampah oh me tohto me pahn pil kokouda.
Ni amwail ese, Tehnpas Sarawi en Salt Lake, Temple Square, oh wasah kan me pasehng Church Office Building pahn pwurehng wiawihda me pahn tepda ni imwin pahr et. Tehnpas sarawi wet anahne epwel mwahu oh kaunopada pwehn koangoangoah irail me pahn kohdo mwuhr kan, duwehte me e wiahng kitail mehn ansou wet.
Ni Mwomwohdiso wet eh wie kekeirda, tehnpas sarawi tohto pahn wiawihda pwe peneinei kan en kak ale kapai me keieu laud, iei mour soutuk.5 Kitail pohnese me tehnpas sarawi kan wia wasa keieu sarawi nan Mwomwohdiso wet. Ansou koaros me pilahn akan kin pakairda ong ni kokoudahn ehu tehnpas sarawi kapw, e kin wia ehu kemwekid kesempwal ong atail poadoapoad. Ni atail koasoikipenehr pwongpwong wet, kumwail lih akan ahniki pwukoah laud ong ni doadoahk en tehnpas sarawi, oh ni tehnpas sarawi iei wasa me kumwail pahn ale amwail kisakis keieu laud en palingehn.
Menlau rong mwahu oh kapaidoke ei pahn pakairdihda pilahn en kauwada tehnpas sarawi kapw walu. Ma ehu tenpaso pahn kokouda nan wasa me kumwail pwungki, I kangoangei kumwail en itiekdi kapakap ni kaping kalahngan nan amwail mohngiong. Se perenkihda aht pakairki pilahn en kauwada tehnpas sarawi nan wasa pwukat: Freetown, Sierra Leone; Orem, Utah; Port Moresby, Papua New Guinea; Bentonville, Arkansas, Bacolod, Philippines; McAllen, Texas; Cobán, Guatemala; oh Taylorsville, Utah. Kalahngan en kumwail, kempoakepahi lih akan. Se kapingki mehlel amwail ale pilahn pwukat oh amwail pasapeng wahun kan.
Pwehn kaimwsekala, I men pwilikihdi kapai pohmwail, pwe kumwail en kak wehwehki manaman en prihsduhd me kumwail kasarawiengehr oh kumwail en kak kalaudehla manamano sang ni amwail pahn kodoadoahki amwail pwoson Sapwellimen Kauno manamano.
Kempoakepahi lihoko, sang ni wahulap oh kaping laud, I kiheng kumwail ahi limpoak. Ni karakarahk, I kalohkihda me Koht ketin ieias! Sises iei ih me Krais. Sapwellime Mwomwohdiso met. I kadehdehki ni mwahr sarawi en Sises Krais, ahmen.