Momourki Inouo

Riei ohl oh lih akan, mie soai pwoat me pid duwen kisin seri emen nan Priameri me kaskasukuhlehng kapakap. E kin nda, “Kalahngan en mesen nting A, mesen nting B, …mesen nting G.” Kalahngan en mesen nting X, Y, Z. Maing Sahm Nanleng, kalahngan en nempe 1, oh 2. Sounpadahk en Praimerio pwunodkidahr ahpw awiawiete. Serio pil nda, “Kalahngan en nempe 5, oh nempe 6—oh kalahngan en ahi sounpadahko. Pwehki ih kelehpw me mweidehng ie ien kanekehla ei kapakap.”

Sahm Nanleng kin ketin karonge en seri koaros kapakap. Sang ni limpoak unsek, e lukei kitail en kamehlele oh momourki inouo.

Sampah wet direki mehkan me kin karotengei kitailla. Me tohto mwomwen sohte kin werei oh sohte sansal. Ma kitail pahn kaliksang mehn kidimas kan, sohte mehlel, rohng sapwung kan, atail anahn kan kin laudsang anahn en sampah me sohte mwahu kan. Paiamwahu, pwe pasapeng mehlel kan kak dierek.

Ni atail pahn kapwaiada sapwelimen Koht kosonned en poakohng ih oh meteikan ni inou mehlel, kitail wia mepwukat koaros nin duwen Sapwelime seri.¹ Koasoi me nda marain kin ieiang sounpar udahn mehlel. Ni atail pahn pwilikihdi mour en sampah oh momourki inou mehlel kan, kitail kin diar mour mehlel²—me saledek, momour—oh kasalehda kesempwal mehlel en atail mour. Pwehn momourki inouo kitail anahne wiahda oh kolokol inou teng ong Koht oh emen emen, sang ni tiahk sarawi kan, me kin lukehiong manaman en Koht en doadoahk nan atail mour.³ Ma kitail pahn mehlel ong pein kitail, kitail pahn ahniki keirda mehlel. Momourki inouo kin kihong kitail wasa, koasoiepe, oh kak en wekidekla. E kin kihong kitail pwoson oh mour soutuk.⁴

Inou sarawi wia kasalepen limpoak ong oh sang Koht, oh pil ong koaros. Koht Sahm Nanleng mwahngi kitail laud sang atail ese pein kitail. Pwoson Sises Krais oh koluhla pahn wahdo meleilei oh mahk mehlel. Me pwukat kin kihsang medek oh apwal kan me kitail kin lelohng. Koht Sahm Nanleng kupwurki kitail en alehdi kisakis me keiu laud—me iei Sapwellime popohl oh mour soutuk.⁵

Atail Koht wia Koht en inou men. E kin ketin “kolokol inou kan oh kin mahk.”⁶ Sapwellime inou kan kin poatoapoat “lel ni imwin rahn akan, de pil sampah wet, de pil ansou me aramas tehmen me pahn komourla.”⁷ Kitail sohte kohdo nan seiloak en mour wet pwehn ahniki peikasal, ahpw en perenki inou sarawi kesempwal kan “me pahn powehdi mehla.”⁸

Sapwelimen Koht tiahk sarawi oh inou sarawi kan ong koaros oh emenemen pahn pein pwukoahki. Nin duwen kupwur pahrek en Koht, emenemen aramas sang wasa koaros oh pil sounpar kak alehdi doadoahk sarawi pwukat. Saledek en pilipil mie—emenemen pahn pein pilada en alehda kisakis en tiahk sarawi pwukat. Sapwellimen Koht tiahk sarawi kan kin wia mehn kaweid nan Sapwellime ahl en inou kan. Kitail kin kahdanki Sapwellimen Koht pilahno pwehn kapwurehdo Sapwellime serihkan iei pilahn en komour, pilahn en peren soutuk. Komour, mour soutuk, oh peren soutuk mie pwehki sang ni tomw me Sises Krais wiahier.⁹

Pwehn wiahla Sapwellimen Koht oh iang mehteikan weid nan Sapwellime ahl en inouo iei en alehdi kapai pen momourki inouo.

Keiu, momourki inouo tepsang Sises Krais me “ketin wiadahr inouo.”¹⁰ Soahng koaros kak doadoahk pene ong ni kamwahu patail ansou me kitail “kamwakel dahr rehn Krais … nan sapwellimen Sahmo inouo.”¹¹ Kapai kan koaros pahn kohieng irail akan me loaloapwoat. “Peren me irail akan me kin kapwaiada Sapwellimen Koht kosonned akan pahn alehdi” iei “kapai en mehkan ni paliwar oh pali ngehn,” o mihmihla rehn Koht nan … peren soutuk.”¹²

Ni atail pah kin momourki inou kan, kitail pil kak kehn sawas pen tohnleng kan ekei pak. Oh kitail pahn—sang rehn irail kan me kin poakohng kitail nin sampah wet, oh pil irail me melahr kan,

Ngehi oh Sister Gong kilang ehu wahn moumourki inouo nan ehu imwen winio. Pahpa pwulopwul men anahne sawas pen soumwahu en mwidihlik. Eh peneineio mwahiei, kaisihsol, oh kapakapki en kak alehdi sawasepen ah mwidihliko. Ansou me irail esehda me mie me pahn sawaskihda, ah pwoudo ngil tikitik nda, “I koapwoaroapwoarki me peneinei o pahn ahniki peren.” Wahnpoaron Paul kaweidki me pwehn momourki inouo “kitail en insenamwahupene sang ni pwoson mehlel en kumwail oh ngehi.”¹³

Nan seiloak en mour wet, kitail kin kak soupwosonla Koht, ahpw e sohte kin ketin uhdisang koapwoaroapwoar kin kitail. Sangete ni tapio Sapwellime marain sohte kin sohrala. E ketin lukei kitail en pwurodo weid nan elen inou me pahn kapwurei kitailla Reh. E ketin awiawi en kasamwo kitail, mendahte atail “inenen dohsang.”¹⁴ Ma kitail pahn tehk mwahu mwomwen atail momour nan ehuehu rahn akan, kitail kak kilang Sapwellime kalahngan kan, mehlel nan atail kasongsong kan, nsensuwed, oh kahpwal kan, de pil atail peren kan. Ekei pak kitail kin pwupwidi, ahpw kitail nantihla mwowe, pwe E pahn ketin sewesei kitail.

Keriahu, Pwuken Mormon pil wia ehu kadehde pen momourki inouo me kitail kak kolki pehtail kan. Pwuhken Mormon wia mehn sawas en kapwure pene Sapwellimen Koht seri kan nin duwen me inou pe miehier.¹⁵ Ni atail pahn wadek Pwuhken Mormon, menda ma ngil tiktik de laud, kitail kak kalelapak rehn Koht “ni mohngiong unsek, ineng mehlel, oh pwoson Krais,” oh sang ni manaman en Ngehn Sarawi me Pwuhken Mormon mehlel.¹⁶ Mepwukat pil iangahki kadehde pen me Sises Krais iei atail Sounkomour, Joseph Smith me kapwurehdo rongamwahu wet, oh me Sapwellimen Kauno mwomwohdso me kahdahnki—Mwomwohdiso en Sies Krais en Souleng en Imwin Rahn-akan.¹⁷

Pwuken Mormon wia kisehn inou ehu ong kitail nein Lehi seri kan, “seri en soukohp kan.”¹⁸ Amwail pahpa kahlap oko alehdi inou ehu me ni ansou me kumwail pahn wadek mepwukat e pahn rasehng rongorong ngilen irail me melahr kan sang nan Pwuhken Mormon.¹⁹ Ngihl me kumwial pahn rong ni asnou me kumwail pahn wadek kadehdedahr me kumwial wia “seri en inou o”²⁰ oh Sises iei Silepamwail.

Pwuken Mormon lukei kitail en “pedelong nan inou ehu rehn Kauno me kitail pahn papah ih oh kapwaiada sapwellime kosonned kan, pwehn kak kapaikin kitail da sapwellime Ngehno.”²¹ Ansou me kitail pahn men weliakapw—me wehwehki, “liksang me kansensuwed kan oh alehda peren mehlel”— kitail kin alehdi kaweid, sawas, oh kehl. Ni atail kin inoukihdi en idawehn Koht oh ahneki loaloapwoat, kitail kak alehdi kapai me inoupe mie nan rongamwahu en Krais²²—met.

Kopwurupwurdohn manaman en prihsduhd en kapaida Sapwellime seri kan wia dake kesiluh en inouo. Nan mwein marain wet, Sohn Sounpepdais, oh Wahnparon Piter, Seims, oh Sohn pekederdo sang rehn Koht pwehn kapwurehdo Sapwellime manaman en prihsduhd.²³ Sapwelimen Koht prihsduhd oh tiahk sarawi kan kakehlailih ehupenehn tohn sampah oh kasarawiala inou sarawi kan nanleng.²⁴

Prihsduhd kak kapaida koaros sangete ipwidi lel mehla—sang kasarawihn seri lel kasarawihn mehla. Kapai kan en pwihsduhd kin kamwahuihla, kansenamwahuihla, oh kihda kaweid mwahu. Pahpa men me mwakar pahn nah pwutak, kin diar limpoak oh mahk ni eh kin kihda kapai en prihsduhd ong nah pwutako. Serepein men me kelehpw wia tohn mwomwohdiso kin peikasalki limpoak en Koht lau e ale kapai en prihsduhd. Nan sampah pwohn, irail peidriark kan kin kaunopada pali ngenirail pwe ren kak pahkida kapai wet. Ni ansou me e pwilikihdi peh kan pohn moangomwen, e kin kehn oh kasalehda sapwellimen Koht limpoak ong uhk. E kin kasalehda ahmw keinek nan peneinei en Israel. E kin kihwei kapai kan sang rehn Kauno. Ehu rahno en peidriark pwoudo ndahngie mwomwen arail kin luke ngehn sarawi ansou kan me arail pahpa pahn kin kihda kapai en peidriark.

Keimwsekla, kapai kan en momourki inouo kin kohsang ni atail pahn kin idawehn Sapwellimen Kauno soukohp oh kin pereniki momouriki inouo, iangahki pwopwoud. Inou sarawi en kopwopwoud pahn poatoapoat ma kitail pahn kin pilada peren en atail pwoud oh peneinei kan sang pein nsenatail. Ma “ngehi” pahn wialah “kitail,” kitail koaros pahn kekeirda. Kitail pahn wiahki ehu mahla de pwulopwulla. Ni atail pahn kin kapaiada meiteikan, kitail pahn diar popohl laud, met oh pahn kohkohlahte.

Menda wekpeseng en irair en ansou kan, ma kitail pahn wia wen atail kak koaros, oh rapahki Sapwelime sawas, Kauno pahn kaweid kitail, nin duwen Kupwure, sang kaweid en Ngehn Sarawi.²⁵ Inou en kapwopwoud iei ehupenehn nan pwungen meh riemen me wiadahr inou wet—Sapwelimen Koht mehn ketemen oh atail wauneki kisakis en saledek en pilipil oh kapai sang Sapwellime sawas ma kitail pahn poaden rapahki.

Wahn momourki inou sarawi kan nan peneinei kin sansal nan imwatail kan oh mohngiongitail kan. Mweidohng ie en wia ehu karasaras me pid pein ngehi.

Ansou me ngehi oh Sister Gong medewedahr me se pahn kapwopoudla, ih ei wehwehkihla mwomwen saledek e pilipil oh pilipil. Se dohkipeseng uwen ansou ieu. Ihme kahrehda ei kak alehdi nei PhD nan international relations.

I kapakap oh idek, “Maing Sahm, ien pwoudkihla Susan?” I kehn meleilei. Ih nan ansou pwukat me i wehwehkila duwen kapakap sang nan mohngiong unsek, “Maing Sahm, i udahn poakpoake Susan oh men pwoudki. I inoukihdi me I pahn wia ohl pwopwoud oh pahpa mwahu men ni uwen ei kak koaros”—ni ei wiadahr inou mehlel wet, ih ei kak kehn pasapeng pen ei kapakapo.

Met en peneinei en Gong oh Lindsay poadoapoad en peneinei, soai, oh kilel kan kin seweseikit en ehuong aht peneinei kan en mahsoko me iang momourki inouo nan arail mwehi kan.²⁶ Kadaudokat kan me iei:

En nohno kahlap ah nohno me adaniki Alice Blauer Bangerter, me pekpek en pwopwoud wiawihieng pak siluh nan rahntehieu, ahpw padahkihiong ah pwoud en wiahda nah mehn wia pwete pwe en kak wia pwete iangahki deidei.

En Loy Kuei Char ah pahpa pahpa kahlap ampwuhwih nah seri kan oh kahre donkey men me wa arail kopwe kan oh kotehla sapw tehn en Big Island nan Hawaii. Inou oh tohnmetei me peneinei en Char wiadahr inenen kapaiada aht peneinei.

Gram Mary Alice Powell Lindsay kelehpwkihla seri limen ansou me ah pwoud oh neira pwutak laudo wiahkintehieu mehla ansou kis rahnte depe nanpwunge. Gram me wia lihohdi men erein pahr 47, apwalihada ah peneinei tikitik sang sawas oh limpoak en tohn mwomwodiso kan. Nan erein pahr pwukat, Gram inoukihiong Kauno ma E pahn sewese e sohte pahn kaulimala. Kauno ketin sewesedahr liho. Liho sohte kaulimala.

Riei ohl oh lih akan, i kadehdehki sang ni manaman en Ngehn Sarawi me koaros me mwahu pahn poatoapoat pwehki Sahm Nanleng, oh Sises Krais, oh Sapwellime Tomwo. Atail kaun, Sises Krais, me wia Sounsawas en inou kapw wet. Kadehdehki Sises Krais me wia inou oh kahrepen Pwuken Mormon.²⁷ Sang ni inouo, Sapwellimen Koht manaman en Prihsduhd pahn kapaaida Sapwellime seri kan, inou en kopwopwoud, kadaudok kan, oh pil emenemen.

Atail Sounkomouro mahsanih, “Ngehi me tapi oh imwi, Krais amwail Kaun; ih ngehi me wia Soundoar en sampah.”²⁸

E ketin ieiang kitail nan atail inou kan sangete ni tapi lel imwi. I kadehdehki lengileng kapai ni mwaren Sises Krais, amen.