Cov Ntxhais Ntxim Hlub
Lub ntsiab ntawm txhua yam peb ua hauv lub Koom Haum Ntxhais Hluas yog kev xav pab nej muaj kev ntseeg tus Tswv Yexus Khetos uas ruaj nrees.
Kuv cov viv ncaus, kuv zoo siab koom nrog nej! Peb pom Vajtswv txoj kev qhia kev tshwm sim ntau uas pab peb hloov siab thiab ua rau peb zoo siab kawg.
Ua ntej peb pib, kuv xav qhia nej txog kuv ob peb tug phooj ywg; lawv yog cov ntxhais hluas uas nyias muaj nyias txuj ci, kab lig kev cai, tsev neeg, thiab lub neej. Lawv txhua tus, zoo ib yam li nej, twb tau tshoov kuv lub siab.
Tus thib ib yog Bella. Nws muaj zog vim nws yog tib tug ntxhais hluas hauv nws ceg ntseeg nyob hauv Iceland.
Cia li ntsib Josephine nyob Afikas, nws twb tau rov qab cog lus tias nws yuav kawm Phau Ntawv Maumoos txhua hnub. Nws kawm tias kev rau siab ntseeg ua qhov yooj yim no ua rau nws txais tau lub hwj chim thiab cov koob hmoov.
Thiab tus kawg yog Ashtyn, ib tug ntxhais hluas zoo kawg uas twb tau tas sim neej tom qab nws raug mob cancer rau xyoo lawm. Kuv tseem nco txog nws zaj lus tim khawv txog Yexus Khetos txoj Kev Theej Txhoj.
Nej txhua tus yog cov ntxhais hluas zoo kawg. Nej tsis zoo ib yam, nyias muaj nyias txiaj ntsim thiab tej xwm txheej tiam sis muaj tej yam tseem ceeb uas nej zoo sib xws.
Nej txhua tus yeej yog Leej Txiv thiab Leej Niam Saum Ntuj Ceeb Tsheej cov ntxhais, thiab Nkawd thiab tus Cawm Seej yeej yuav hlub nej tas mus li.1 Thaum nej los ze dua Nws, txawm nej ze zuj zus mus tom ntej xwb, nej kawm txog kev kaj siab lug uas los vim nej yog cov thwj tim rau siab ntseeg peb tus Cawm Seej, Yexus Khetos.
Thawj Tswj Hwm Russell M. Nelson, peb tus yaj saub uas peb hlub, tau thov kom kuv qhia txog tej yam uas tau hloov uas yuav pab nej “kawm txuj ci los ua neeg dawb ceev”2 thiab muaj hwj huam ua ncaj ncees ntxiv. Hmo no kuv yuav hais txog plaub yam uas yuav hloov.
Cov Ntxhais Hluas lub Ntsiab Lus
Qhov thib ib, lub ntsiab ntawm txhua yam peb ua hauv lub Koom Haum Ntxhais Hluas yog kev xav pab nej muaj kev ntseeg tus Tswv Yexus Khetos uas ruaj nrees3 thiab paub tseeb tias nej yog Vajtswv cov ntxhais.
Hmo no, kuv xav qhia txog kev hloov Koom Haum Ntxhais Hluas lub ntsiab lus. Kuv thov kom nej yuav hnov tus Vaj Ntsuj Plig Dawb Huv ua tim khawv txog tej lus tseeb thaum kuv hais lub ntsiab lus no:
Kuv yog ib tug ntxhais ntawm leej niam leej txiv saum ntuj ceeb tsheej uas hlub kuv4 thiab kuv muaj cwj pwm thiab txoj hmoov uas nyob mus ib txhis.5
Vim kuv yog Yexus Khetos tus thwj tim,6 kuv siv zog ua neeg zoo li Nws.7 Kuv xav txais thiab ua raws li kev tshwm sim8 thiab kuv xav txhawb pab lwm tus los ntawm Nws lub npe dawb huv.9
Kuv yuav ua tim khawv txog Vajtswv txhua lub sij hawm thiab ua tim khawv txog txhua yam nyob hauv txhua qhov chaw.10
Thaum kuv siv zog ua neeg tsim nyog txais kev tsa nto,11 kuv xav tau lub txiaj ntsim kev hloov siab lees txim12 thiab xav ua zoo ntxiv dua txhua hnub.13 Nrog kev ntseeg,14 kuv yuav txhawb kuv tsev neeg dag zog,15 ua thiab ua raws li tej kev khi lus dawb ceev,16 thiab txais cov kab ke17 thiab cov koob hmoov los ntawm lub tuam tsev dawb huv.18
Cia li saib txoj kev pauv lo lus “peb” mus rau “kuv.” Tej yam tseeb no yeej hais rau nej txhua tus. Nej yeej yog Leej Txiv thiab Leej Niam Saum Ntuj Ceeb Tsheej cov ntxhais uas Nkawd hlub. Nej yeej yog cov thwj tim khi lus ntawm peb tus Cawm Seej, Yexus Khetos. Kuv caw nej kawm thiab xav txog tej lus no. Kuv paub yog nej ua li ntawd, nej yuav paub tias tej lus no muaj tseeb. Yog nej to taub tej yam tseeb no nej yuav hloov nej txoj kev kov yeej teeb meem. Qhov uas nej paub nej yog leej twg thiab paub nej lub hom phiaj yuav pab nej xav ua raws li tus Cawm Seej lub siab nyiam.
Nej yuav muaj kev kaj siab lug thaum nej coj raws li Yexus Khetos.
Koom Haum Ntxhais Hluas tej Pawg
Qhov thib ob uas yuav hloov yog Koom Haum Ntxhais Hluas tej pawg. Txwj Laug Neal A. Maxwell hais tias, “Tib neeg yeej xav txais kev tiv thaiv tej cua daj cua dub ntawm lub neej no nyob hauv qhov chaw pov hwm uas yog kev koom siab.”19 Peb tej pawg yuav tsum hloov los ua tej qhov chaw pov hwm peb ntawm cua daj cua dub, tej qhov chaw uas muaj kev hlub thiab kev koom siab. Xwv kom peb muaj kev koom siab thiab kev ua phooj ywg ntxiv, thiab ua rau txhua tus xav tias lawv muaj chaw nyob hauv Koom Haum Ntxhais Hluas, peb yuav hloov ob peb yam hauv peb tej pawg.
Tau 100 xyoo tawm, cov ntxhais hluas tau sib faib ua peb pawg. Pib tam sim no, peb caw cov thawj coj hauv Koom Haum Ntxhais Hluas thiab cov npisov thov Vajtswv xav txog txhua tus ntxhais hluas tej kev xav tau thiab muab lawv faib raws li lawv hnub nyoog thiab raws li nej pawg ntseeg tej xwm txheej. Tej zaum yuav zoo li no.
-
Yog tias nej muaj ob peb tug ntxhais hluas, tej zaum nej yuav muaj ib pawg rau Koom Haum Ntxhais Hluas thiab txhua tus yuav sib ntsib ua ke.
-
Tej zaum nej muaj ib pawg ntxhais hluas uas muaj 12 xyoos thiab ib pawg ntxhais hluas tsawg uas muaj hnub nyoog hlob dua. Tej zaum nej yuav txiav txim siab muaj ob pawg: Koom Haum Ntxhais Hluas 12 thiab Koom Haum Ntxhais Hluas 13-18.
-
Los sis tej zaum nej muaj ib pawg ntseeg loj uas muaj 60 tus ntxhais hluas, es nej xav muaj rau pawg, cov uas muaj hnub nyoog zoo ib yam hauv txhua pawg.
Txawm nej tsa nej tej pawg zoo li cas los, nej cov ntxhais hluas yeej tseem ceeb pab txhua tus koom siab. Cia li ua ib txoj kev kaj rau txhua tus nyob ib puag ncig. Cia li hlub thiab saib xyuas raws li nej cia siab nej yuav txais los ntawm lwm tus. Nrog kev thov Vajtswv, cia li pab lwm tus thiab ua zoo. Yog nej ua li ntawd, nej yuav muaj kev siab zoo hauv nej lub neej. Nej yuav xav zoo txog lwm tus thiab yuav pib pom lawv rov qab ua zoo rau nej.
Koom Haum Ntxhais Hluas tej Pawg lub Npe
Qhov thib peb, vim yuav faib tej pawg zoo li no, yuav hu txhua pawg raws li lub npe “Koom Haum Ntxhais Hluas” no.20 Peb yuav tsis siv tej lub npe “Beehive,” “Mia Maid,” thiab “Laurel” ntxiv.
Txhawb tej Pawg Thawj Tswj Hwm Dag Zog
Qhov kawg uas kuv xav hais txog yog tej pawg thawj tswj hwm. Nej faib nej tej pawg hauv Koom Haum Ntxhais Hluas li cas los, txhua pawg yuav tsum muaj ib pawg thawj tswj hwm!21 Vajtswv twb pom zoo rau cov ntxhais hluas coj lawv tej pawg thaum lawv hluas.
Twb tau ntxiv dag zog thiab qhia meej ntxiv txog lub luag hauj lwm thiab lub hom phiaj ntawm ib pawg thawj tswj hwm. Txoj hauj lwm cawm seej yog ib txoj kev lav ris tseem ceeb no, xws li kev txhawb pab lwm tus, kev qhia txog txoj moo zoo, pab neeg rov qab muaj siab ntseeg, thiab ua hauj lwm hauv lub tuam tsev thiab nrhiav tsev neeg zaj keeb kwm.22 Nov yog txoj kev uas peb siv kom muab Ixayees sau los ua ke23—ib txoj hauj lwm rau txhua tus ntxhais hluas uas koom nrog tus Tswv pawg tub rog hluas.
Nej yeej paub hais tias, nyob hauv txhua theem ntawm lub Koom Txoos, tus Tswv hu ib pawg thawj tswj hwm coj Nws cov neeg. Cov ntxhais hluas, qhov uas nej yog ib tug hauv ib pawg thawj tswj hwm tej zaum yog nej cib fim thib ib koom tes ua raws li tus txheej txheem ua thawj coj li no. Nej cov thawj coj laus, cia li tsom ntsoov rau kev hu tej pawg thawj tswj hwm ces nyob ntawm lawv ib sab qhia thiab coj lawv kom lawv ua taus.24 Txawm ib pawg thawj tswj hwm paub npaum li cas los, cia li pab lawv kawm txuj ci thiab ntseeg lawv tus kheej kom lawv tau koob hmoov thaum ua thawj coj. Cia li nyob ze lawv, tiam sis tsis txhob ua txhua yam. Tus Ntsuj Plig yuav coj nej thaum nej coj lawv.
Xwv kom qhia tias cov niam tsev txiv tsev thiab cov thawj coj tsem ceeb npaum li cas, cia kuv qhia ib zaj rau nej. Tus npisov tau hu Chloe ua nws pawg tus thawj tswj hwm. Nws tus thawj coj tau thov nws nrhiav tus Tswv txoj kev pab thaum nws qhia tias nws xav tau leej twg hauv nws pawg thawj tswj hwm. Chloe tau thov Vajtswv thiab txais kev tshoov siab seb yuav xav tau leej twg ua nws ob tug pab cuam sai heev. Thaum nws tseem xav thiab thov Vajtswv seb yuav xaiv leej twg ua tus teev ntawv, tus Ntsuj Plig pheej ua rau nws xav txog ib tug ntxhais hluas uas ua rau nws xav tsis thoob—yog ib tug uas tsis tshua tuaj rau lub koom txoos.
Vim nws tsis tshua paub zoo nws puas tau txais kev tshoov siab, Chloe sib tham nrog nws niam, uas piv tias ib yam uas qhia tias yus tau txais kev tshwm sim yog thaum yus pheej xav txog ib yam. Nws rov qab ntseeg nws tus kheej, es Chloe xav tias nws yuav tsum hais tus ntxhais hluas no lub npe. Tus npisov tau hu tus ntxhais hluas ntawd, thiab nws tau lees yuav txoj kev hu ntawd. Tom qab tau muab nws tsa, tus teev ntawv no hais tias, “Kuv yeej tsis tau xav tias muaj ib qho chaw uas neeg xav tau kuv. Kuv xav tias kuv tsis sib haum. Tiam sis vim muaj txoj kev hu no, kuv xav tias zoo li Leej Txiv Saum Ntuj Ceeb Tsheej muaj ib lub hom phiaj thiab ib qho chaw rau kuv nyob.” Thaum Chloe thiab nws niam tawm kev sib ntsib no, Chloe tau tig mus rau nws niam thiab los kua muag hais tias, “Kev tshwm sim los muaj tiag! Kev tshwm sim yeej zoo kawg!”
Nej tej pawg thawj tswj hwm, Vajtswv tau hu nej thiab tso siab rau nej coj ib pawg ntawm Nws cov ntxhais. “Tus Tswv paub nej. … Nws tau xaiv nej.”25 Ib tug uas muaj txoj cai pov thawj hwj tau muab nej tsa; qhov no txhais hais tias thaum nej ua nej tej dej num ntawm nej txoj kev hu, nej siv txoj cai pov thawj hwj. Nej muaj ib txoj hauj lwm tseem ceeb ua. Cia li mloog thiab ua raws li tus Vaj Ntsuj Plig Dawb Huv tej kev tshoov siab. Thaum nej ua li ntawd, nej yuav ua siab loj ua hauj lwm, vim nej tsis ua nej ib leeg!
Nej cov thawj tswj hwm, peb xav tau nej lub tswv yim, nej lub suab, thiab nej lub zog nyob hauv pawg ntseeg cov tub hluas ntxhais hluas pawg sab laj uas Txwj Laug Quentin L. Cook qhia txog hnub no. Nej yeej tseem ceeb rau kev pab nej cov nus thiab cov viv ncaus.26
Tej kev hloov rau tej pawg thiab kev ua thawj coj no los pib thaum twg tej pawg ntseeg thiab ceg ntseeg npaj lawm tiam sis yuav tsum ua tiav thaum lub Ib Hlis Ntuj hnub tim 1, xyoo 2020.
Kuv cov viv ncaus, kuv ua tim khawv tias tej yam uas hloov no yeej yog tus Tswv tau qhia rau peb. Thaum peb rau siab hloov tej yam no, thov kom peb yuav tsom ntsoov rau peb lub hom phiaj: txhawb nqa peb txoj kev xav coj raws li Yexus Khetos thiab pab lwm tus los cuag Nws. Kuv ua tim khawv hais tias nov yog Nws lub Koom Txoos. Kuv zoo siab uas Nws cia peb ua ib txoj hauj lwm tseem ceeb.
Kuv thov Vajtswv kom tib tug Ntsuj Plig uas tau qhia kom hloov tej yam no yuav coj nej mus taug txoj kev ua raws li nej tej kev khi lus. Kuv hais lus tim khawv li no los ntawm Yexus Khetos lub npe, amees.