Tej Nqi Zog ntawm Sab Ntsuj Plig
Thaum nej muab siab rau ntseeg tus Tswv thiab Nws lub hwj chim pov thawj hwj, nej yuav haj yam txawj txais lub nqi zog ntawm sab ntsuj plig uas tus Tswv tau muab rau nej.
Ua tsaug rau cov nkauj zoo mloog ntawd. Thaum peb txhua tus sawv hu zaj nkauj “Ua Vajtswv Tsaug Vim Peb Muaj Ib tug Yaj Saub,” kuv twb xav txog ob lub tswv yim. Kuv xav txog tus Yaj Saub Yauxej Xamiv, tus yaj saub ntawm lub caij nyoog tso cai no. Kuv txoj kev hlub thiab qhuas nws los loj tuaj txhua hnub. Lub tswv yim thib ob yog thaum kuv saib kuv tus poj niam, kuv cov ntxhais, thiab cov ntxhais xeeb ntxwv. Ua rau kuv xav tias kuv saib nej txhua leej txhua tus yog kuv tsev neeg.
Ob peb lub hlis tas los, thaum ua vaj txiaj ntsim hauv lub tuam tsev, kuv hais rau kuv tus poj niam, Wendy, hais tias, “Kuv cia siab tias cov muam to taub lawv tej nqi zog ntawm sab ntsuj plig uas nyob hauv lub tuam tsev.” Cov muam, kuv pheej xav txog nej, tsis hais thaum ob lub hlis tas los thaum Wendy thiab kuv wb mus xyuas Harmony, Pennsylvania.
Yog zaum thib ob uas wb mus qhov ntawd. Ob zaug no wb twb txais kev tshoov siab thaum wb taug mus rau ntawm cov av dawb ceev ntawd. Nyob hauv Harmony Yauhas tus Muab Neeg Ua Kev Cai Raus Dej tau txum tim lub Pov Thawj Hwj Aloos rov qab los rau Yauxej Xamiv.
Nyob ntawd, Petus, Yakanpaus, thiab Yauhas tau muab lub Pov Thawj Hwj Mekhixedes txum tim rov qab los.
Nyob hauv Harmony Emma Hale Smith yog nws tus txiv thawj tus teev ntawv thaum tus Yaj Saub muab Phau Ntawv Maumoos txhais lus.
Nyob hauv Harmony Yauxej kuj txais kev tshwm sim uas qhia txog tus Tswv lub siab nyiam rau Emma. Tus Tswv qhia Emma kom nws piav txog cov vaj lug kub, ntuas cov Neeg Ntseeg, txais tus Vaj Ntsuj Plig Dawb Huv, thiab siv nws lub sij hawm “kawm ntau yam.” Nws ntuas Emma kom “tso tej yam ntawm lub ntiaj teb no tseg thiab nrhiav tej yam ntawm ib qho chaw uas zoo dua” thiab ua raws nraim li nws tej kev khi lus rau Vajtswv. Tus Tswv xaus Nws cov lus qhia ntawd thaum Nws hais tej lus no: “Ntawm no yog kuv lub suab los mus rau sawv daws.”1
Txhua yam uas muaj tshwm sim hauv Harmony twb muaj nqis rau nej lub neej. Kev muab lub pov thawj hwj txum tim rov qab los, nrog rau tus Tswv tej lus qhia Emma, yeej pab tau nej txhua leej txhua tus. Kuv yeej xav kom nej to taub tias kev muab lub pov thawj hwj txum tim rov qab los yeej tseem ceeb rau nej cov poj niam ib yam li rau cov txiv neej. Rau qhov tau muab lub Pov Thawj Hwj Mekhixedes txum tim rov qab los, cov poj niam thiab txiv neej uas ua raws li lawv tej kev khi lus txais tau “tag nrho lub koom txoos cov koob hmoov ntawm sab ntsuj plig,”2 los yog hais tias, tag nrho tej nqi zog ntawm sab ntsuj plig uas tus Tswv yuav pub rau Nws cov me nyuam.
Txhua tus poj niam thiab txhua tus txiv neej uas ua kev khi lus rau Vajtswv thiab ua raws li lawv tej kev khi lus, thiab ua neeg tsim nyog ua cov kab ke pov thawj hwj, yeej txais tau Vajtswv lub hwj chim. Cov uas txais lawv vaj txiaj ntsim hauv tus Tswv lub tsev txais ib lub txiaj ntsim uas yog lub hwj chim pov thawj hwj nrog lub txiaj ntsim kev txawj ntse kom paub siv lub hwj chim ntawd.
Lub ntuj ceeb tsheej twb qhib rau cov poj niam uas tau muab hwj chim pov thawj hwj rau ib yam li lub ntuj twb qhib rau cov txiv neej uas tuav lub pov thawj hwj. Kuv thov kom qhov tseeb yuav los tshoov nej txhua tus lub siab vim kuv ntseeg tias qhov tseeb ntawd yuav hloov nej lub neej. Cov muam, nej muaj cai siv tus Cawm Seej lub hwj chim kom pab nej tsev neeg thiab lwm tus uas nej hlub.
Tam sim no, tej zaum nej hais rau nej tus kheej tias, “Hais li ntawd los yeej zoo, tiam sis kuv yuav ua li cas? Kuv yuav ua li cas kom muaj tus Cawm Seej lub hwj chim hauv kuv lub neej?
Nej nrhiav tsis tau tus txheej txheem no nyob hauv ib phau ntawv. Tus Vaj Ntsuj Plig Dawb Huv yuav qhia nej kom nej to taub tus Tswv xav kom nej paub thiab ua dab tsi. Tus txheej txheem no yeej tsis yooj yim thiab ua tsis taus sai sai, tiam sis nws yeej txhawb nqa yus sab ntsuj plig. Muaj dab tsi zoo dua qhov uas yus ua hauj lwm nrog tus Ntsuj Plig kom to taub lub hwj chim—lub hwj chim pov thawj hwj?
Qhov uas kuv yeej qhia tau nej yog qhov uas yog nej xav tau Vajtswv lub hwj chim hauv nej lub neej ces nej yuav tsum ua ib yam li tus Tswv tau qhia Emma ua thiab tau qhia nej txhua tus.
Yog li ntawd, kuv caw nej thov Vajtswv kawm tshooj 25 ntawm phau Lus Qhuab Qhia thiab Kev Khi Lus thiab kawm tias tus Vaj Ntsuj Plig Dawb Huv yuav qhia dab tsi rau nej. Yog nej siv zog ua li no rau nej tus kheej nej yuav muaj kev xyiv fab thaum nej tau txais, to taub, thiab siv lub hwj chim uas tau muab rau nej ua nej vaj txiaj ntsim.
Yog nej yuav siv zog li no nej yuav tsum tso ntau yam ntawm lub ntiaj teb no tseg. Tej lub sij hawm peb lam hais txog qhov uas peb khiav tawm ntawm lub ntiaj teb no txoj kev sib cav sib ceg, kev dag ntxias, thiab tej lub tswv yim cuav. Tiam sis yog peb xav ua li ntawd tiag tiag peb yuav tsum ntsuam xyuas peb lub neej tsis tu tsis tseg. Thaum nej ua li ntawd, tus Vaj Ntsuj Plig Dawb Huv yuav tshoov nej lub siab txog tej yam uas tsis tas ua, qhov uas tsis tsim nyog rau nej siv sij hawm thiab siv zog ua.
Thaum nej tsis tsom ntsoov rau tej yam ntawm lub ntiaj teb, tej uas nej xav tias yog tej yam tseem ceeb heev los nej yuav saib tias tej ntawd tsis tseem ceeb npaum li nej xav. Muaj tej yam uas nej yuav tsum tso tseg, txawm yog tej ntawd tsis yog tej yam phem. Thaum nej cob nej tus kheej rau tus Tswv kom tas nej lub neej, ces qhov uas nej tej kev xav thiab nej lub zog ntawm sab ntsuj plig hloov hlo yuav ua rau nej xav tsis thoob!
Nim no kuv hais lus ceeb toom me ntsis. Muaj cov uas xav tab kaum nej txoj kev txawj txais Vajtswv lub hwj chim. Muaj cov uas xav kom nej tsis ntseeg nej tus kheej los sis qhia tias nej txoj kev txawj hnov tus ntsuj plig vim nej yog cov poj niam ncaj ncees tsis tseem ceeb.
Muaj tseeb tiag, tus yeeb ncuab tsis xav kom nej to taub kev khi lus uas nej tau ua thaum nej ua kev cai raus dej los sis vaj txiaj ntsim kev txawj ntse thiab lub hwj chim uas nej tau txais los sis yuav txais hauv lub tuam tsev—tus Tswv lub tsev. Thiab Dab Ntxwg Nyoog yeej tsis xav kom nej to taub tias txhua zaus nej tsim nyog ua hauj lwm thiab teev tiam hauv lub tuam tsev, nej muaj Vajtswv lub hwj chim ntxiv thiab Nws cov tim tswv “saib xyuas” nej.3
Dab Ntxwg Nyoog thiab nws cov tub rog pheej tsim tej yam tav nej kev kom nej tsis txhob to taub tej txiaj ntsim ntawm sab ntsuj plig uas Vajtswv tau foom pub rau nej. Tu siab uas muaj tej yam tav nej kev vim lwm tus coj yam ntxwv tsis zoo. Ua rau kuv nyuaj siab thaum kuv xav tias ib tug thawj coj pov thawj hwj tau saib nej tsis tseem ceeb los sis tsis ntseeg nej, los sis ib tug txiv tsev, leej txiv, los yog phooj ywg tau tsim txom nej los yog ntxeev siab rau nej. Kuv tu siab heev yog nej leej twg xav tias muaj neeg tau tso nej tseg, saib tsis taus nej, los sis txiav txim tsis yog txog nej. Tej kev txhaum no yeej tsis muaj chaw nyob hauv Vajtswv lub nceeg vaj.
Tiam sis kuv yeej zoo siab kawg thaum kuv hnov txog cov thawj coj pov thawj hwj uas nrhiav kev rau cov poj niam koom tes hauv tej pawg ntseeg thiab ceg txheem ntseeg pawg sab laj. Txhawb kuv lub siab heev thaum ib tug txiv qhia tias nws txoj kev lav ris lub pov thawj hwj tseem ceeb tshaj plaws yog kev saib xyuas nws tus poj niam.4 Kuv qhuas tus txiv neej uas saib taus nws tus poj niam txoj kev txawj txais kev tshwm sim thiab koom tes pab nkawd txoj kev sib yuav vim nws yog ib tug khub sib npaug zos.
Thaum ib tug txiv neej to taub ib tug poj niam ncaj ncees uas yog Neeg Ntseeg hauv Hnub Nyoog Kawg muaj hwj chim npaum li cas, ces nws yeej xav sawv ntsug thaum tus poj niam ntawd nkag los hauv qhov chaw nws nyob ntawd, yom?
Txij thaum chiv keeb los, cov poj niam muaj lub txiaj ntsim coj ncaj ncees—lawv txawj paub qhov zoo thiab qhov phem. Lub txiaj ntsim no muaj zog ntxiv rau cov uas ua raws li lawv tej kev khi lus. Thiab lub txiaj ntsim no ploj zuj zus rau cov uas tso Vajtswv cov lus txib tseg.
Kuv kuj xav qhia nej tias kuv tsis zam kev rau cov txiv neej hlo li hais tias lawv tsis tas ua raws li Vajtswv cov lus txib kom lawv paub qhov zoo thiab qhov phem. Tiam sis, kuv cov muam uas kuv hlub, nej txoj kev txawj paub qhov tseeb thiab qhov tsis tseeb, nej txoj kev txawj pov hwm kev ncaj ncees hauv peb cov pej xeem, los tseem ceeb kawg hauv hnub nyoog kawg no. Thiab peb tso siab rau nej qhia lwm tus ua li ntawd. Cia kuv qhia meej txog qhov no: yog lub ntiaj teb cov poj niam tsis coj zoo ntxiv lawm, lub ntiaj teb yeej yuav poob mus.
Peb Tsoom Haiv Neeg Ntseeg hauv Hnub Nyoog Kawg tsis yog los ntawm lub ntiaj teb, peb yog los ntawm Ixayees cov neeg khi lus. Tus Tswv twb hu peb npaj ib co neeg rau tus Tswv txoj Kev Los Zaum Ob.
Nim no, kuv xav qhia meej txog ob peb yam ntxiv hais txog cov poj niam thiab lub pov thawj hwj. Thaum ib tug twg uas tuav lub pov thawj hwj cov yawm sij—xws li nej tus npisov los sis ceg txheem ntseeg tus thawj tswj hwm—lawv tsa nej ua hauj lwm rau nej txoj kev hu, nej tau txais txoj cai pov thawj hwj kom ua nej txoj kev hu.
Ib yam li ntawd, nyob hauv lub tuam tsev, nej tau kev tso cai ua thiab coj cov kab ke pov thawj hwj txhua zaus nej mus. Nej qhov vaj txiaj ntsim hauv lub tuam tsev npaj nej ua li ntawd.
Yog nej tau txais nej qhov vaj txiaj ntsim tiam sis nej tsis tau yuav txiv uas tuav lub pov thawj hwj thiab ib tug hais rau nej tias, “Pab koj nyuaj siab vim koj tsis muaj lub pov thawj hwj hauv koj tsev,” thov paub tias qhov nws hais li ntawd tsis yog. Tej zaum nej tsis muaj ib tug uas tuav lub pov thawj hwj hauv nej tsev, tiam sis nej twb tau ua kev khi lus dawb ceev rau Vajtswv hauv Nws lub tuam tsev. Los ntawm tej kev khi lus ntawd nej txais ib qho vaj txiaj ntsim uas yog Nws lub hwj chim pov thawj hwj rau nej. Thiab nco ntsoov tias, yog tus txiv tsev tas sim neej lawm, nej yuav yog tus tswj hwm hauv nej tsev.
Vim nej yog cov poj niam ncaj nees uas txais vaj txiaj ntsim lawm, nej hais lus thiab qhia nrog Vajtswv lub hwj chim thiab txoj cai. Txawm nej ntuas lwm tus los sis sib tham nrog lawv, peb xav tau nej lub suab uas tshaj tawm txog Khetos cov lus qhuab qhia. Peb xav tau nej cov lus nyob hauv tsev neeg, pawg ntseeg, thiab ceg txheem ntseeg pawg sab laj. Nej txoj kev koom tes los yeej tseem ceeb heev thiab tsis yog lam tau lam ua xwb!
Kuv cov muam uas kuv hlub es, nej lub hwj chim yuav loj zuj zus thaum nej pab lwm tus. Thaum nej thov Vajtswv, yoo mov, nyeem vaj lug kub, thiab pab hauv lub tuam tsev thiab nrhiav tsev neeg zaj keeb kwm ces lub ntuj ceeb tsheej yuav qhib plho rau nej.
Kuv thov kom nej thov Vajtswv kom nej kawm tau tag nrho tej yam tseeb uas nej nrhiav tau txog lub hwj chim pov thawj hwj. Tej zaum nej yuav xav pib nyeem Lus Qhuab Qhia thiab Kev Khi Lus tshooj 84 thiab 107. Ob tshooj no yuav ua rau nej nrhiav tau lwm nqe vaj lug kub. Tej nqe vaj lug kub thiab tej lus qhia los ntawm cov yaj saub, cov pom tau, thiab cov txais kev tshwm sim no muaj tej yam tseeb no puv npo. Thaum nej to taub ntxiv thiab nej muab siab rau ntseeg tus Tswv thiab Nws lub hwj chim pov thawj hwj ntawd, nej yuav haj yam txawj txais lub nqi zog ntawm sab ntsuj plig uas tus Tswv tau muab rau nej. Thaum nej ua li ntawd, nej yuav kawm tias nej yuav txawj pab tsim tej tsev neeg mus ib txhia uas koom siab, ua kev cai sib khi hauv tus Tswv lub tuam tsev, thiab muaj kev hlub rau peb Leej Txiv Saum Ntuj Ceeb Tsheej thiab Yexus Khetos.
Peb tej hauj lwm tag nrho kom ib leeg txhawb pab ib leeg, tshaj tawm txog txoj moo zoo, pab Haiv Neeg Ntseeg ua zoo tag nrho, thiab txhiv cov tuag dim yeej koom ua ke hauv lub tuam tsev dawb huv. Peb muaj 166 lub tuam tsev nyob thoob plaws lub ntiaj teb, thiab yuav muaj ntxiv.
Ib yam li nej paub, peb npaj kho lub Tuam Tsev Salt Lake, Tshav Tuam Tsev, thiab qhov chaw nyob ze lub Koom Txoos lub Tsev Ua Hauj Lwm uas yuav pib thaum xaus xyoos no. Yuav tsum tshwj lub tuam tsev dawb ceev no cia thiab npaj kom tshoov tiam neeg yav tom ntej lub siab, ib yam li tau tshoov peb lub siab hauv tiam neeg no.
Thaum lub Koom Txoos loj tuaj, yuav ua tej lub tuam tsev ntxiv xwv kom tsev neeg coob ntxiv yuav txais tau txoj koob hmoov zoo tshaj plaws, uas yog txoj sia nyob mus ib txhis.5 Peb xav tias ib lub tuam tsev yog ib lub tsev dawb huv hauv lub Koom Txoos no. Thaum peb tshaj tawm txog kev npaj yuav ua ib lub tuam tsev tshiab, ces yog ib feem ntawm peb zaj keeb kwm. Ib yam li peb tau hais hmo no, nej cov muam no yeej tseem ceeb rau kev ua hauj lwm hauv lub tuam tsev, thiab lub tuam tsev yog qhov chaw uas nej yuav txais nqi zog ntawm sab ntsuj plig siab tshaj plaws.
Thov nej cia li mloog zoo thiab nyob tswm seeb thaum kuv tshaj tawm txog qhov uas peb yuav ua yim lub tuam tsev tshiab. Yog tias hais txog ib lub uas tseem ceeb rau nej, kuv thov kom nej cia li nyo hau thiab thiab thov Vajtswv ua Nws tsaug hauv nej lub siab. Peb zoo siab tshaj tawm tias yuav ua lub tuam tsev nyob hauv tej qhov chaw no: Freetown, Sierra Leone; Orem, Utah; Port Moresby, Papua New Guinea; Bentonville, Arkansas; Bacolod, Philippines; McAllen, Texas; Cobán, Guatemala; and Taylorsville, Utah. Ua tsaug ntau, cov muam. Ua tsaug vim nej txais tej kev npaj no thiab nyob tswm seeb thaum hais li no.
Thaum xaus lus, kuv xav foom koob hmoov rau nej, kom nej yuav to taub lub hwj chim pov thawj hwj uas tau muab rau nej thiab kom nej yuav ua rau lub hwj chim ntawd loj tuaj thaum nej muab siab rau ntseeg tus Tswv thiab Nws lub hwj chim ntawd.
Kuv cov muam, nrog kev ris txiaj thiab kev hwm, kuv qhia txog kuv txoj kev hlub rau nej. Kuv txo hwj chim qhia nej tias Vajtswv muaj txoj sia nyob! Yexus yog tus Khetos. Nov yog Nws lub Koom Txoos. Kuv ua tim khawv li no los ntawm Yexus Khetos lub npe dawb ceev, amees.