Tej Lus Xaus

Los ntawm Thawj Tswj Hwm Russell M. Nelson

Kev ua neeg tsim nyog los yuav tsum hloov siab hloov ntsws kom ua zoo li tus Tswv.

Kuv cov kwv tij thiab cov muam, thaum peb xaus lub rooj sab laj no, peb ua tus Tswv tsaug rau tej zaj lus uas tshoov peb lub siab thiab cov nkauj uas tau txhawb nqa peb. Zoo li peb twb tau noj ib pluas mov loj rau peb sab ntsuj plig.

Peb paub tias Yexus Khetos txoj moo zoo yuav ua rau tib neeg muaj kev zoo siab thiab kev xyiv fab yog lawv mloog thiab ua raws li Nws cov lus qhuab qhia. Peb kuj paub tias txhua lub tsev yuav hloov los ua ib qhov chaw rau kev ntseeg, kev kaj siab lug, kev hlub, thiab tus Tswv tus Ntsuj Plig nyob tau.

Muaj tseeb tiag, lub hlaws muaj nqis tshaj ntawm Kev Muab Txoj Moo Zoo Txum Tim Rov Qab Los yog lub tuam tsev dawb huv. Cov kab ke thiab kev khi lus ntawm lub tuam tsev tseem ceeb heev rau kev npaj ib haiv neeg uas tos txais tus Cawm Seej txoj Kev Los Zaum Ob. Tam sim no peb muaj 166 lub tuam tsev uas tau muab fij tseg, thiab yuav muaj ntxiv.

Yuav qhib tsev ua ntej muab txhua lub tuam tsev fij tseg tsis hais cov tshiab thiab cov uas kho. Ntau tus phooj ywg uas tsis ntseeg li peb yuav koom tej kev saib cov tuam tsev ntawd thiab yuav kawm me ntsis txog cov koob hmoov ntawm lub tuam tsev. Thiab lawv ib txhia uas tuaj xyuas yuav txais kev tshoov siab xav paub ntxiv. Ib txhias yuav xav paub tiag tiag lawv yuav tsum ua li cas kom tsim nyog txais cov koob hmoov ntawm lub tuam tsev.

Vim peb yog mej zeej hauv lub Koom Txoos, peb yuav tsum npaj siab teb lawv tej lus nug. Peb piav tau tias cov koob hmoov ntawm lub tuam tsev los muab tau rau leej twg uas yuav npaj lawv tus kheej. Tiam sis ua ntej lawv nkag tau hauv ib lub tuam tsev uas tau muab fij tseg lawm, lawv yuav tsum ua neeg tsim nyog. Tus Tswv xav kom tag nrho Nws cov me nyuam txais cov koob hmoov mus ib txhis uas muaj hauv Nws lub tuam tsev. Nws tau qhia tias txhua tus yuav tsum hloov ua neeg tsim nyog nkag mus hauv Nws lub tsev dawb huv.

Ib yam zoo kom pib qhia txog qhov no yog kev hais kom lawv saib cov lus uas kos rau lub tuam tsev sab nraud: “Kev Dawb Huv rau tus Tswv: tus Tswv lub Tsev.” Thawj Tswj Hwm Henry B. Eyring zaj lus hnub no thiab lwm zaj twb tau tshoov peb lub siab kom ua neeg dawb huv ntxiv. Txhua lub tuam tsev yog ib qho chaw dawb huv; txhua tus uas mus hauv lub tuam tsev xav ua neeg dawb huv ntxiv.

Txhua yam uas yuav tsum ua kom muaj cai nkag mus hauv lub tuam tsev yog tej yam seb yus puas yog neeg dawb huv. Xwv kom ntsuam xyuas ib tug puas tau npaj siab txaus, txhua tus neeg uas xav txais koob hmoov ntawm lub tuam tsev yuav xam phaj ob zaug: zaum thib ib nrog tus npisov, pawg npisov tus pab cuam, los sis ceg ntseeg tus thawj tswj hwm; zaum thib ob nrog ceg txheem ntseeg los sis qhov chaw tshaj tawm txoj moo zoo tus thawj tswj hwm los sis nws ib tug pab cuam. Nyob hauv xam phaj ntawd, yuav nug ob peb yam.

Tsis ntev tas los tau kho tej lus nug no kom meej dua. Kuv xav hais tej lus nug ntawd rau nej tam sim no:

Koj puas muaj kev ntseeg thiab ib zaj lus tim khawv txog Vajtswv, Leej Txiv Nyob Mus Ib Txhis; Nws Leej Tub, Yexus Khetos; thiab tus Vaj Ntsuj Plig Dawb Huv?
Koj puas muaj ib zaj lus tim khawv txog Yexus Khetos txoj Kev Theej Txhoj thiab txog Nws lub luag hauj lwm ua tus Cawm Seej thiab tus Txhiv Dim?
Koj puas muaj ib zaj lus tim khawv tias Yexus Khetos txoj moo zoo tau raug muab Txum Tim Rov Qab Los?
Koj puas txhawb nqa tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua tus yaj saub, tus pom tau, thiab tus qhia kev tshwm sim thiab yog tib tug neeg nyob hauv lub ntiaj teb no uas muaj cai siv tag nrho tej yawm sij ntawm lub pov thawj hwj?

Koj puas txhawb nqa cov mej zeej ntawm Thawj Pawg Thawj Tswj Hwm thiab Pawg Kaum Ob tug Thwj Tim ua cov yaj saub, cov pom tau, thiab cov qhia kev tshwm sim?

Koj puas txhawb nqa lub Koom Txoos lwm cov Tuam Thawj Coj thiab cov thawj coj uas nyob ib cheeb tsam no?
Tus Tswv tau hais tias yuav tsum ua txhua yam raws li kev huv si rau Nws pom (saib Lus Qhuab Qhia thiab Kev Khi Lus 42:41).

Koj puas rau siab coj huv si ntawm koj tej kev xav thiab tej yam koj ua?

Koj puas ua raws li txoj kev cai coj dawb huv?
Koj puas ua raws li Yexus Khetos lub Koom Txoos tej lus qhia thaum koj ua tej yam rau koj tsev neeg thiab lwm tus rau lawv saib xwb thiab tab meeg sawv daws?
Koj puas txhawb nqa los sis tshaj tawm tej lus qhia, tej kev, los sis tej lus qhuab qhia uas fab ntxeev tej lus qhia los ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg?
Koj puas rau siab hwm Hnub Caiv kom dawb huv, nyob hauv tsev thiab hauv lub koom txoos; mus koom koj tej kev sib ntsib; npaj siab thiab ua neeg tsim nyog txais lub cim nco txog; thiab coj koj lub neej kom haum txoj moo zoo tej kev cai thiab tej lus txib?
Koj puas rau siab ua siab ncaj thaum koj ua txhua yam?
Koj puas yog ib tug uas them nyiaj ib feem kaum tag nrho?
Koj puas to taub thiab ua raws li Txoj Lus Txawj Ntse?
Koj puas tshuav nuj nqi los yog lwm yam uas koj yuav tsum ua rau ib tug qub poj niam los sis qub txiv, los yog rau ib tug me nyuam?

Yog tias tshuav no, tam sim no koj puas tseem ua raws li tej yam uas koj yuav tsum ua ntawd?
Koj puas ua raws li tej kev khi lus uas koj twb tau khi tseg hauv lub tuam tsev lawm, tsis hais qhov uas koj hnav lub tuam tsev cev tsoos tsho raws li tau qhia hauv vaj txiaj ntsim?
Puas muaj tej kev txhaum loj hauv koj lub neej uas tsim nyog koj daws kho nrog cov thawj coj ntawm lub pov thawj hwj kom pab koj hloov siab lees txim?
Koj puas xav hais tias koj tsim nyog nkag mus hauv tus Tswv lub tsev thiab koom ua lub tuam tsev tej kab ke?

Tag kis, yuav muab tej lus nug kom tau ib daim ntawv tso cai nkag tuam tsev xa rau cov thawj coj ntawm lub Koom Txoos nyob thoob plaws lub ntiaj teb no.

Ntxiv rau qhov uas yus ua siab ncaj teb tej lus nug no, txhua tus neeg laus uas mus hauv lub tuam tsev to taub tias lawv yuav hnav cev tsoos tsho dawb huv ntawm lub pov thawj hwj nyob lawv cov khaub ncaws sab haud. Nov yog ib lub cim txog qhov uas yus tau cog lus hauv yus nruab siab yus mam li siv zog hloov los ua neeg zoo li tus Tswv txhua hnub. Qhov no kuj ua rau peb nco qab tias peb yuav tsum coj raws li peb tej kev khi lus txhua hnub thiab taug txoj kev ua raws li kev khi lus txhua hnub raws li ib txoj kev siab thiab dawb huv ntxiv.

Rau ib me pliag, kuv xav hais lus rau peb cov tub hluas ntxhais hluas. Peb yaum kom nej ua neeg tsim nyog txais ib daim ntawv tso cai nkag tuam tsev uas siv qee zaus xwb. Lawv tsuas yuav nug nej txog tej yam uas muaj nqis rau nej thaum nej npaj mus ua kab ke sawv cev rau lwm tus ua kev cai raus dej thiab ua kev pom zoo. Peb zoo siab vim nej tsim nyog thiab txaus siab koom tes ua tej hauj lwm dawb huv hauv lub tuam tsev. Peb ua nej tsaug!

Yog nej yuav ua neeg tsim nyog nkag mus hauv tus Tswv lub tsev los nej yuav tsum npaj nej sab ntsuj plig ntau heev. Tiam sis yog muaj tus Tswv txoj kev pab, nej yeej ua tau txhua yam. Tej zaum qhov uas yus ua ib lub tuam tsev yog qhov yooj yim dua yus npaj ib co neeg mus rau hauv lub tuam tsev. Kev ua neeg tsim nyog los yuav tsum hloov siab hloov ntsws kom ua zoo li tus Tswv, ua ib tug neeg ncaj ncees, coj yam ntxwv zoo dua, thiab ua ib tug neeg dawb huv ntxiv.

Kuv ua tim khawv tias kev ua hauj lwm npaj li no yuav ua rau yus txais tau cov koob hmoov suav tsis txheeb nyob hauv lub neej no thiab tej koob hmoov uas xav tsis tawm txog hauv lub neej tom ntej, tsis hais qhov uas yus tsev neeg yuav nyob mus ib txhiab thiab ib txhis yam li “zoo siab tsis paub kawg.”¹

Nim no kuv xav hais txog ib yam ntxiv: kev npaj rau lwm xyoo. Xyoo 2020 thaum lub caij nplooj ntoo hlav, yog 200 xyoo tom qab Yauxej Xamiv tau muaj Thawj Zaug Ua Yog Toog Pom. Vajtswv Leej Txiv thiab Nws Leej Tub, Yexus Khetos tau tshwm sim rau Yauxej, ib tug tub hluas uas muaj 14 xyoos. Lub sij hawm ntawv twb qhib kev rau txoj Kev Muab Yexus Khetos Txoj Moo Zoo Txum Tim Rov Qab Los tag nrho, ib yam li tau qhia hauv Phau Vaj Lug Kub Npaiv Npaum.²

Tom qab ntawd muaj cov tub xa xov saum ntuj uas tuaj xyuas, tsis hais Maulaunais, Yauhas tus Muab Neeg Ua Kev Cai Raus Dej, thiab cov Thwj Tim puag thaum ub Petus, Yakaunpaus, thiab Yauhas. Lwm tus tau los tom qab ntawd, tsis hais Mauxes, Eli-as, thiab Eliyas. Txhua tus tau muaj Vajtswv txoj cai foom koob hmoov Vajtswv cov me nyuam hauv lub ntiaj teb dua ntxiv.

Yog ib qho txuj ci tseem ceeb uas peb kuj muaj Phau Ntawv Maumoos: Ib zaj Tim Khawv Ntxiv txog Yexus Khetos, Tej kev tshwm sim uas tau muab luam tawm hauv phau Lus Qhuab Qhia thiab Kev Khi Lus thiab phau Lub Hlaws uas Muaj Nqis Heev kuj tau pab peb to taub Vajtswv cov lus txib thiab qhov tseeb uas nyob mus ib txhis.

Cov yawm sij thiab tej luag hauj lwm ntawm lub pov thawj hwj tau muab txum tim rov qab los, tsis hais tej luag hauj lwm ua ib tug Thwj Tim, Xya Caum, yawg suab, pov thawj hlob, txwj laug, npisov, pov thawj hlob, xib hwb, thiab dikas. Thiab cov poj niam uas hlub tus Tswv rau siab ua hauj lwm hauv Koom Haum Niam Tsev, lub Koom Haum Me Nyuam Yaus, Koom Haum Ntxhais Hluas, Hnub Caiv Kev Kawm Vaj Lug Kub, thiab lwm yam txoj kev hu hauv lub Koom Txoos—tej yam tseem ceeb ntawm kev muab Yexus Khetos txoj moo zoo Txum Tim Rov Qab Los.

Yog li ntawd, xyoo 2020 yog ib xyoo uas nco txog 200 xyoo dhau los. Lub Plaub Hlis Ntuj lub tuam rooj sab laj yuav txawv lwm lub rooj sab laj tas los. Rau lub hli tom ntej no, kuv cia siab tias txhua tus mej zeej thiab txhua tsev neeg yuav npaj siab rau ib lub rooj sab laj uas yuav ua koob tsheej txog lub hauv paus ntawm txoj moo zoo uas tau muab txum tim rov qab los.

Tej zaum nej yuav xav pib npaj thaum nej rov qab nyeem Yauxej Xamiv zaj lus hais txog nws Thawj Zaug Ua Yog Toog raws li muaj hauv phau lub Hlaws uas Muaj Nqis Heev. Lwm xyoo peb yuav kawm los ntawm phau Los, Nrog Kuv Mus txog Phau Ntawv Maumoos. Tej zaum nej yuav xav txog tej lus nug tseem ceeb xws li, “Kuv lub neej yuav txawv li cas yog tias tsis muaj tej kev txawj ntse los ntawm Phau Ntawv Maumoos?” los sis “Tej yam uas muaj tom qab Thawj Zaug Ua Yog Toog tau pab kuv thiab cov uas kuv hlub li cas?” Thiab, vim tab tom tshaj tawm cov video txog Phau Ntawv Maumoos, tej zaum nej yuav xav siv tej ntawd thaum nej kawm nej tus kheej thiab nrog nej tsev neeg.

Xaiv nej tej lus nug. Tsim ib txoj kev npaj. Cia txoj kev kaj ci ntsa iab ntawm txoj Kev Muab Txoj Moo Zoo Txum Tim Rov Qab Los ci rau nej. Yog nej ua li ntawd, ces lub tuam rooj sab laj thaum lub Plaub Hlis Ntuj tom ntej los nej yeej yuav nco ntsoov tas mus li.

Nim no, thaum kuv xaus lus, kuv qhia rau nej txog kuv txoj kev hlub thiab foom koob hmoov rau nej, kom nej txhua tus yuav zoo siab thiab dawb huv zuj zus tuaj txhua hnub. Thaum nej ua li ntawd, thov nej paub tias peb tseem txais kev tshwm sim hauv lub Koom Txoos thiab tseem yuav txais raws li tus Tswv qhia mus txog “Vajtswv tej lub hom phiaj twb tiav tas, thiab tus Yehauvas zoo kawg nkaus yuav hais tias txoj hauj lwm tiav lauj.”³

Kuv foom koob hmoov rau nej li no, rov qab qhia nej tias kuv hlub nej, thiab ua tim khawv tias Vajtswv muaj txoj sia nyob! Yexus yog tus Khetos! Nov yog Nws lub Koom Txoos thiab peb cov Nws cov neeg. Los ntawm Yexus Khetos lub npe dawb ceev, amees.