Sakaradahn Kasomw

Rie ohl, lih, oh kempoakepahi kan koaros nan sampa, I lukei kumwail ong kapokon lap wet. Kitail pokonkipene atail wia peneinei laud ehu nan sampa me inengieng en pwongih atail Kaun oh Sounkomour, Sises Krais. Kalahngan en amwail iang patehng kiht.

Pahr nekiero wia ehu ahnsou me pahn intingidi nan pwuhk kan. Ni sohpeikasal emenemen kitail esehla soahng kei me kitail sohte wewehki mwowehsang. Ekei padahk kan me i esehier mwowehu e intingdier nan ai mongiong ni eh kapw oh wia mehn kaweid kei.

Ni karasepe, I udahn ese me Kauno kin ketin kaweid doadoahk kan en Sapwellime Mwomwohdiso. E ketin mahsani me, “I pahn kasalehiong [kumwail] me i kak wia ahi doadoahk.”¹

Pak tohto, ngei oh nei sounkaweid kan kin sengisengki ni aht kilangehr Ah kin ketin uhkinkitailda nan kahpwal laud kan mwurin aht wiahier aht kak koaros oh solahr mehkot me se kak wia. Kitail udahn kin kesihnenkihda kopwuriamwei kan.

I pil wewehkihlahr mwahu met dahme E wewehki ni ansou me E ketin mahsani, “Kilang, I pahn kamwadangahla ahi doadoahk ni ansou me konehng.”² I kin kapwkapwurehiengete ahi perenkihda Ah kin kaweid wei oh kapwulewei kamwadanglahn Sapwellime doadoahk--itarete nan kahpwal en soumwau doar me kohkohseli pohn sampa.

Riei ohl oh lih akan, kehlepen Mwomwohdiso mihmi nan doadoahk kan koaros oh kekeirdahn kadehde kan en towe kan. Kadehde kan pahn keieu keirda mwahu nan imwatail kan. Nan erein pahr nekiero, me tohto kumwail me kalaudehla amwail onopki rongamwahu ni imwamwail kan. I kalahngan ehng kumwail oh noumwail seri kan pahn kalahngan ehng kumwail.

Doadoahk laud en onehda Tehnpas Sarawi en Salt Lake wie popouswei te. Sang ni ahi tungoal ohpis mie wasa me I kin mwohd kilekilang doadoahk me wiewiawi ni tehnpas sarawio.

Kilel

Doadoahk en wia ihmw ni wasa tehnpas sarawi mih ie

Ni ahi kilangehr tohn doadoahk kan arail weiradahsang tuhke kan, paip en pihl oh liol, oh wasa me wehwe kan, i medewehda anahn en emenemen kitail en kihsang meninkau kan, ni sawas en Sounkomouro, me wereilahr nan atail mour kan.

Rongamwahu en Sises Krais iei rongamwahu en koluhla ehu.³ Pwehki Tomw en Sounkomouro, Sapwellime rongamwahuo kieng kitail luhk en weliakapwala, kekeirda, oh nantiheng en mwakelekela. E wia rongamwahu en koapwoaroapwoar, kamwahula, oh kekeirda ehu. Pwe, rongamwahu wet iei rongamwahu en popohl Palingenetail kan kin peren ni atail kin ekisekis kowei mwowe.

Kisehn kapokonpenehn Isrehl, oh kesempwalpe, iei me kohieng kitail ni atail wia aramas kei en warohng oh inengieng en sewese kaunopada sampa ong Ketdo Keriau en Kauno.

Ni atail wie rongorong padahk kan me kaunopdahr ni keneinei sang atail kaun kan pahn kaweid en Ngehn Sarawi, I lukei kumwail en kapakap pwehn kasawiada meninkau kan me kumwail anahne kihsang nan amwail mour pwe kumwail en kak warohng ni mehlel.

I poakoahng kumwail, riei ohl oh lih oko, oh kadehdehki me Samatail Nanleng oh Sapwillime Ieros Kesempwalo mwahngi oh poakohng emenemen kumwail. Ira ketin onopadahr pwehn sewesei kumwail nan ehuehu kahk me kumwail ale kokohwei. I lukei kumwail ong nan kapokon lap wet oh ong ansou mwahu en rongorong kepitien Kauno. Ni mwaren Sises Krais, amen.