Dahme Kitail Kaskasukuhlki oh Sohte Pahn Manokehla
Ma kumwail kasawi amwail mour ni kapakap, I kamehlele me kumwail pahn kilang wiepe tohto kei me Kauno ketin kaweid kin kumwail nan irair en ansou apwal wet.
Riei ohl akan, I kaskasikehr I en tuhong kumwail nan mihting wet. Keimwseklahn tiepene en prihsduhd nan kapokon lap iei me wiawi nan Eperil 2019. Me tohto me wiawiher nan irair en sounpar riau nekiero. Ekei kumwail ahneki peneinei me kapelsalehdalahr. Ekei solahr arail doadoahk, elen mour, de roson. Pil miehte ekei me solahr ahneki meleilei de koapworopwor ong dahme pahn kohdo mwhur. I poakehla mehlel emenemen kumwail me ahnekidier kahpwal pwukat de kahpwal teikan. I poden wie kapakap pwe Kauno en kansenamwahuwi kumwail. Ni amwail mweidehng Koht en kaunda amwail mour, I ese me E kin ketin kasik me mwahu ong kumwail nin duwen me E kin ketin wia.
Nin doken paisuwed kan me kitail alehier, pil miehte soahng kei me kitail diarehr. Ekei dairehr pwoson loal rehn Samatail Nanleng oh Sapwellime Ieros, Sises Krais. Tohto me diarehr ehu wiepen mour kapw--mehlel wiepen mour soutuk. Kumwail ele kakehlakalahr amwail ehuiong me kumwail kin poakong kan oh ong Kauno. Oh I koapworopworiki me kumwail pil kadaialahr amwail kin Rong Ih oh ale pein amwail kaudial. Kasongosong laud kan kin kihda ansou mwahu kan en keirda me sohte kin dierek nan wasa teikan.
Medewe mwomwen sounpar riau samwalahro. Ia mwomwen amwail keirda? Dahme kumwail koledier? Kumwail mwein men kumwail en kak pwurala nan 2019 oh mihmite mwo! Ahpw ma kumwail kilang mwahu amwail mour ni kapakap, I kamehlele me kumwail pahn kilang ahl tohto duwen en Kauno ah ketin kakahluwai kumwail nan ansou apwal wet, sesewesei kumwail en poadidi kehlail, weliakapw mehlel--emen olen Koht mehlel.
I ese me Kauno ketin sapwellimaniki pilahn kaselel kei ong kitail--emenemen oh koruhsie. Ni limpoak oh kanengamah, E mahsani:
Kumwail seri tikitik kei, oh kumwail saikinte wehwehki kapai laud kan me Sahmo ketin … kaunopadahngehr kumwail;
Oh kumwail saikinte kak wahda soahng koaros met; ahpw, kumwail en perenda, pwe I pahn kahluwai kumwail. 1
Riei ohl akan, I kadehde me Ih me kin ketin, oh wie kakahluwai kitail, ni atail kin rapahki pwehn rong Ih. E ketin kupwurki kitail en keirda oh esehla, menda ma sang--ele ni mehlel sang--kahpwal.
Kahpwal wia wiepen kasukuhl kaselel ehu. Dahme kumwail koledier nan erein sounpar riau nekiero me kumwail kin kalap men tamataman? Amwail pasapeng kan pahn doke kumwail, ahpw I men kihda lesen pahiou me I koapworopworiki me kitail koaros koledier oh sohte pahn manokehla.
Lesen 1: Ni Ihmwo iei me wia Pahson en Pwoson oh Kaudek
Pak tohto ni en Kauno kin kaparkin kitail me keper kan en imwin rahn akan, E kin ketin kapatahiong kaweid wet: Kumwail kesihnen nan wasa sarawi, oh dehr mwekid. 2 Wasa sarawi pwukat ni mehlel iangahki tehnpas sarawi kan en Kauno oh imwen kaudek kan. Ahpw pwehki atail irairdi sangehr pokonpene nan wasa pwukat, kitail esedahr me ehu wasa me keieu sarawi pohn sampa iei ni ihmwo--ehi, mehlel ni imwamwail kan.
Riei ohl akan, kumwail kin weuwa prihsduhd en Koht, Pwuhng kan en prihsduhd kin uhlahngete manaman akan en nanleng.3 Kumwail oh amwail peneinei kan alehier tiahk sarawi kan en prihsduhd. Iei nan tiahk sarawi kan [en prihsduhd], [me] manaman en nanleng kan kin mihmi ie.4 Manamano kin wie langalang ong kumwail oh amwail peneinei nan imwamwail kan ni amwail kin kolokol inou kan me kumwail wiadahr.5
Sounparte 185 samwalahro, ni rahn wet te, Epreil 3, 1836, Ilaisa kapwurehdo kih kan en prihsduhd me mweidada atail peneinei kan en katengtengpene kohkohlahte. Ihme kahrehda e kin kansenamwahu ansou me kamadipw sarawi kin wiawi ni imwamwail kan. Ia mwomwen eh sair tohn amwail peneinei ni arail kilang kumwail, arail pahpa, pahpa kahlap, ar pwoud, nair pwutak, de riarail ohl, kamwakid tiahk sarawi kesempwal wet? Dahme kumwail pahn wia pwehn koledi pepehm sarawi wet nan amwail peneinei?
Kumwail mwein pepehm me miehte me kumwail anahne wia pwehn wiahda imwamwail en wiahla wasa sarawi en pwoson mehlel. Ma iei, menlau wiahda. Ma kumwail pwopwoud, ale kaweid rehn amwail pwoud me wia peliamwail nan doadoahk kesempwal wet. Mie doadoahk malaulau kei me kesempwal sang met. Nan pwungen met oh ansou me Kauno pahn ketin sapahldo, kitail koaros anahne imwatail kan en wia wasa meleilei oh saledek. 6
Wiewia kan oh mwekid kan me luke Ngehno pahn kakairada sarawi en ni imwamwailo. Pil duwehte me mehlelo me me sarawio pahn sohrala ma mie mehkoat nan amwail wiewia de mehn mpemwail kan me kin katiamauwi Ngehn Sarawi, ni ansouo nanleng kan pahn pein sohrala.7
Mie pak kumwail kin medewe dahme kahreda Kauno kupwurki sen wiahda imwato en wiahla wasahn kasukuhlki rongamwahuo oh momourki rongamwahuo? Kaidehn en kounop kihtda ong, oh sewesei kiht nan irair en soumwahu doaro. Irairdi kan en ansou wet pahn uhdi ehu rahn. Ahpw, amwail inou en wiahda imwamwail en wia amwail wasa sarawi en pwoson sohte anahne uhdi. Ni en pwoson oh sarawi kin sosohrala nan sampa ohla wet, amwail anahn ong wasa sarawi pahn lalaudla. I kangoange kumwail en doula oh wiahda imwamwail en wiahla ehu wasa sarawi “oh dehr mwekid8 sang kilel kesempwalo.
Lesen 2: Kitail Anahne Emenemen
Koht kupwurki kitail en doadoahk pene oh sewese emenemen. Ihme kahrehda E ketin kadarkitaildo sampa nan peneinei kei oh kihkitail pene nan ward kei oh steik kei. Ihme kahrehda E ketin peki kitail en papah oh sewese emenemen. Ihme kahrehda E ketin peki kitail en momour nan sampa wet ahpw kaidehn kisehn sampa wet.9 Kitail kak wiahda mehkoat me laudsang atail kin kelkelehpw.10 Koasondi en popohl en Koht pahn sohte doadoahk ma Sapwellime serihkan pahn sohte ehupene.
Soumwahu doaro me ehusoahng pwe e lelong aramas koaros nan sampa kerenieng ni ansou tehiou. Ni en ekei kin doarasang mehteikan, kitail koaros ahneki kahpwal ni songosongen mwohmw kei. Pwehki met, atail kahpwalo pahn kak sewese kihpene seri en Koht kan kehlail sang mahs. Eri, I idek, kahpwal wet kakereneiukala ong mehn mpemw kan--ong riomw ohl oh lih akan apali ahlo oh nan sampa?
Nan mwekid wet, kosonned lap riauo kak kaweid kitail: keieu, en poakong Koht oh, keriau, en poakohng mehn mpemw kan.11 Kitail kin kasalehda atail limpoak ni papah,
Ma kumwail ese mehmen me kelkelehpw, kohla reh--menda ma kumwail pil kin kelkelehpw! Kumwail sohte anahne ehu kahrepe de padahk de ilek me pahn wiawi. Rahnmwahu te oh kasalehda amwail limpoak. Dipwisou kapw kan en mwehi wet kak sewese kumwail. Soumwahu doar de soh, emenemen seri en Koht kesempwalo anahne ese me e sohte kelkelehpw.
Lesen 3: Amwail Pwihn en Prihsduhd Sohte Kokouda ong Mihting te.
Ni ansoun soumwahu doaro, en pwihn mihting kan ni Rahn Sarawi sohla wiawi ki ansou iou. Ekei pwihn kan met kakehr tuhpene nan internet. Ahpw, doadoahk me Kauno ketikihong pwihn kan en prihsduhd sohte koasondi en wiawihte nan ehu mihting. Mihting kan wia pali tikitik en pwukoa me koasondi ong pwihno en kak wia.
Riei ohl akan nan Prihsduhd en Aron oh pwihn en elder kan, kadaiala amwail iroir ong kahrepen pwihn kan. Ia mwomwen kupwuren Kauno ong kumwail en doadoahngki amwail pwihno pwehn kapwaiada Sapwellime doadoahk--met? Rapahki kaudial sang Kauno. Kakarakarahkihala pein komwi. Peki! Rong! Ma komw malipilipdahr en kahluwa, kaweid nin duwen emen presidensi oh pil rehn tohn pwihno. Sohte lipilipil ahmw ohpis en prihsduhd de malipilip, mweidehng Koht en kakaun ahmw inou ni ahmw wia emen tohn ahmw pwihn oh nan ahmw papah. Kin pereniki me pwung kan me kumwail pahn kapwaiada ni amwail kin pwerisek wiewia ehu doadoahk mwahu.12 Pwihn kan pato nan wasa mwahu ehu pwehn kamwadangiala kapokonpenehn Israel nan pali riauko koaros.
Lesen 4: Kitail Kin Rong Mwahu Sises Krais Ni Atail Kin Nennenla.
Kitail wie momour nan ansou ehu me kokohpadahr mahso, ansou me mehkoaros pahn wie mwekmwekid; oh mehlel mohngiong en aramas pahn uhdi; pwe aramas koaros pahn direkihla masak.13 Ire pwuko mehlel mwohn soumwahu doaro, oh e pil pahn mehlel mwuri. Mwekmwekid en nan sampa pahn lalaudla. Ahpw, kepitien Kauno sohte wia ngihl ehu me laud oh katairong, ahpw … e [wia] ngihl tikitik malamal ehu, [duwehte] ehu mwenginingin, oh e kin [pwar] nan mour en aramas.14 Pwehn kak rong ngihl tikitiko, kumwail pil anahne nennenla.15
Nan erein ansou kis, soumwahu doaro pil irehdi mwekid kei me kin wiawi nan atail mour kan. Me keren kitail ele pahn kak pilada en pwurehng audehla ansou pwuko ki katairong oh mwekid kan en sampa. De kitail kak doadoahngki atail ansou kan pwehn rong kepitien Kauno mwengmwengininginiki Sapwellime kaweid, kansenamwahu, oh meleilei. Ansoun nennenla wia ansou sarawi--ansou me pahn kakairada pein atail kaudial oh kihda meleilei.
Kaiahnehkin komwi en ahneki ansoun kelkelehpw oh iang me komw kin poakohng kan. Langahda ahmw mohngiong ong Koht nan kapakap. Kihda ansoun ahmw wadek pwuhk sarawi kan oh kaudek nan tehnpas sarawi.
Riei ohl akan, mie me tohto me Koht ketin kupwurki kitail en koledi sang dahme kitail loieng kan nan erein soumwahu doar wet. I kasalehdate ire pahiou. I luke kumwail en wiahda pein amwail ireh kan, medewehda mwahu, oh ehukihong irail me kumwail kin poakohng,
Mwohtail me marain ong aramas me kin kolokol inou kan en Koht.16 Kauno pahn ketin kalaudehla ah malipe Sapwellime sounpapah kan me warehng kolokol prihsuhd pwehn kapai, kansenamwahuwih, oh kakehlaka aramas oh sewese kaunopada sampa oh aramas akan ong ni Sapwellime Ketdo Keriauo. Emenemen kitail anahne kapwaiada pwukoa sarawi me kitail alehier. Kitail kak wia met! I kadehdeki, sang ni ai poakong emenemen kumwail, ni mwar sarawi en Sises Krais, amen.