COVID-19 oh Tehnpas Sarawi kan
Kolokol amwail inou en nan tehnpas sarawi kan oh kapai me keiou kesempwal me mih nan amwail madamadau kan oh mwohngiong kan. Tengedihong amwail inou kan me kumwail wiadahr.
Riei ohl oh lih kempoake kan, ni mehlel kitail audaukidahr ngehn sarawi. Ia wen ahi kapingki pwehki kapakap kan, rohng kan, oh koul kan nan erein kapokon wet. Kalangan ong emenemen kumwail pwehki amwail patehng kiht, sohte lipilipil wasa kumwail mih ie.
Ni tepin pahr samwalahro, pwehki keper en COVID-19 oh atail ngoangki wia tohn wehin sampah aramas mwahu kei, se wiahda ehu pilipil apwal en ritingidi tehnpas sarawi kan ni wen ansou iou. Nan erein sounpwong ko, se ahniki pepehm en pwurehng ritingada ni keneinei. Tehnpas sarawi kan ansouwet ritidahr oh kin doadoahk ni dake paiou, ninduwen kosonned en koapwerment oh irehn perehre kan.
Dake 1, ong tehnpas sarawi kan, pwopwoud warohng kan me apwtehn alehdi tiahk sarawi kak en katengteng pene nin duwen pwopwoud iou.
Dake 2, ong tehnpas sarawi kan, koaros tiahk sarawi kan ong me memour kak wiawi, iangahki tiahk sarawi en inou ohng emente, katengteng penehn ohl oh lih pwopwoud, oh katengteng penehn serih kan ong arail pahpa oh nohno kan. Se apwtehn wekidala ireh kei nan dake 2 oh mweidohng neitail me pwulopwul kan, toweh me kapw kan, oh irail me mie neirail doropwehn mweimwei en wia tiahk sarawi en papdaiski arail peneinei me melahr akan.
Dake 3, ong tehnpas sarawi kan, irail me wiahda apwoitnment kak iang patehng ahpw kaidehnte tiahk sarawi ong me momourte ahpw pil ong koaros me melahr kan.
Dake 4 iei pwuralahng koasondi koaros, tiahk sarawi kan koaros me kin wiawi.
Se kapingki amwail kanengamah oh tohnmetei ni loaloapwoat ong wekidekla pwukat oh ansou apwal wet. I kapakapki me amwail ineng en papah oh sawas nan tehnpas sarawi en laudsang dahme kin wiawi ni tapio.
Mwein kumwail pahn medemedewe iahd me kumwail pahn kak pwurala nan tehnpas sararwi. Pasepeng: Amwail tehnpas sarawi pahn ritida ni ansou me amwail kopwerment pahn mweidada. Ansou me soumwahu en COVID-19 pahn sohla keper nan amwail wasah kan, amwail tehnpas sarawi kan pahn pwurehng ritida. Wia wen amwail kak koaros pwehn sewese nempehn COVID en tikitikla nan amwail wasa kan pwe amwail ansou nan tehnpas sarawi en kak laudla.
Eri, kolokol amwail inou en nan tehnpas sarawi kan oh kapai me keiou kesempwal me mih nan amwail madamadau kan oh mwohngiong kan. Tengedihong amwail inou kan me kumwail wiadahr.
Kitail wie kekeirda ansou wet ong ehu rahn! Tehnaps sarawi paisek-ehu me wie wihwiawi de pil kamwkamwahula. Pahr me samwalahro, mendahte eh mie soumwahu keper, pwehl kan weiweidahr pwehki tehnpas sarawi 21 me kapw!
Se men wiahda tehnpas en Kauno en karanih toweh kan, pwe ren kak iang ahniki kapai sarawi en towehda tehnpas sarawi ni ansou koaros me re kak.
Ni ei pakairkier duen tehnpas sarawi 20 me pahn koukouda, I medemedewe oh kapinga pioneer kan—mehn mahs oh rahn pwukat—me kasarawilahr pwehn sewese en wia pwoadoapwod en rahn wet. Tehnpas sarawi pahn koukouda nan wasa kan me pahn sansal: Oslo, Norway; Brussels, Belgium; Vienna, Austria; Kumasi, Ghana; Beira, Mozambique; Cape Town, South Africa; Singapore, Republic en Singapore; Belo Horizonte, Brazil; Cali, Colombia; Querétaro, Mexico; Torreón, Mexico; Helena, Montana; Casper, Wyoming; Grand Junction, Colorado; Farmington, New Mexico; Burley, Idaho; Eugene, Oregon; Elko, Nevada; Yorba Linda, California; oh Smithfield, Utah.
Tehnpas sarawi kan wia kise kesempwal ong Kopwurupwurdohn rongamwahu en Sises Krais ni unsek. Tiahk sarawi kan en nan tehnpas sarawi kin sewese atail mour ong manaman oh kehl me sohte kin kak wiawi nan ehu wasa tohrohr. Se kalangankiong Koht pwehki kapai pwukat.
Ni atail pahn ritingidi kapokon wet, se men pwurehngte kataman duwen aht limpoak ong kumwail. Se kapakapki pwe Koht en ketin kamwerehdi Sapwellime kapai kan oh perehre ong emenemen kumwail. Kitail wia Sapwellime doadoahk en papah ni atail ehupene. Ni eimah, kitail en wenla mwowe nan sapwellimen Kouno doadoahk en kilohri! I kapakapki mepwukat ni lengileng sarawi en Sises Krais, amen.