Ae blong Fet
Sapos yumi jusum sam pat nomo we yumi akseptem long ofisol toktok, yumi blokem lukluk ia blong yumi we i go taem we i no save finis, mo lukluk fulap nomo long ol eksperiens blong yumi long ples ia mo naoia.
I no longtaem bifo oli Krusifaem Hem, oli bin tekem Jisas i go long fored blong Paelat long jajmen rum. “?Yu yu King blong ol laen blong Isrel?” Paelat i luk nating long hem mo askem. Jisas i ansa: “Mi mi no king olsem ol king blong wol ia. … Mi mi bon, mi kam long wol ya, blong mi talemaot ol tok we i tru. Mo man we i glad blong folem ol tok we i tru, i save harem ol tok blong mi.”
Paelat i askem, “?Wanem nao ol tok ya we i tru?”1
Long wol blong tedei, kwestin ia “?Wanem nao ol tok ya we i tru?” i save had tumas blong andastanem long olgeta we oli no biliv.
Long Gugul long intanet, “?Wanem nao ol tok ya we i tru?” i karem moa long wan milian ansa. Yumi save kasem fulap infomesen long ol telefon blong yumi bitim ol buk insaed long wan brikis laebri. Yumi laef wetem ol infomesen mo tingting we i tumas blong yumi yusum. Fulap taem i gat ol temtesen mo naesfala samting we i stap lidim yumi evri ples.
Wetem fulap konfius raon long yumi, i no wan sapraes se fulap oli putum olgeta folem ol toktok ia we oli bin talem 2,500 yia i pas we i kam long Protagoras i go long yangfala Sokratis: “Wanem i tru blong yu,” hem i talem, “i tru blong yu, mo wanem i tru long mi, i tru long mi.”2
Trutok tru long Gospel ia we I Kambak, we i blong Jisas Kraes
Yumi gat blesing blong gospel blong Jisas Kraes we i kambak bakegen long wol ia, mo yumi talemaot wetem wan tingting we i stap daon se i gat sam samting we oli fulwan mo tru tumas. Ol trutok ia we i no save finis oli semmak blong evri boe mo gel blong God.
Ol skripja oli tijim, “Trutok hem i wan save abaot ol samting olsem we oli stap, olsem we oli bin stap, mo olsem we bae oli kam.”3 Trutok i lukluk long fored mo biaen, mo i mekem lukluk blong yumi blong tedei nomo i go moa bigwan.
Jisas i talem: “Mi nao rod ya, mo mi mi stamba blong trutok, mo mi stamba blong laef.”4 Trutok i soem long yumi rod i go long laef we i no save finis, mo i kam nomo tru long Sevya blong yumi, Jisas Kraes. I no gat wan narafala wei.
Jisas Kraes i tijim yumi hao blong laef mo, tru long Atonmen blong Hem mo Laef Bakegen long Ded, Hem i givim fogivnes long yumi from ol sin blong yumi, mo i givim laef we i gohed afta long ded. Hemia i tru tumas.
Hem i tijim yumi se, i nomata sapos yumi rij o pua, ol man oli save long yumi o no, o gat fulap save o simpol. Be, resis blong laef blong yumi long wol ia i blong mekem fet blong yumi long Lod Jisas Kraes i kam moa strong, i blong jusum gud ova long nogud, mo obei ol komanmen blong Hem. Taem yumi stap selebretem ol niufala jenis blong saens mo meresin, ol trutok blong God i go moa bitim ol samting ia.
Agensem ol trutok blong taem we i no save finis, oltaem i gat wan giaman tok blong trikim ol pikinini blong God long trutok. Ol raorao blong Setan bae oli oltaem semmak. Lisin long olgeta toktok ia, we hem i talem 2,000 yia i pas:
“… Yufala i no save kasem save long ol samting we yufala i no luk. … [Wan man i save mekem eni samting mo i] no wan kraem.”
[God i no stap blesem yu, be] evri [man] i [stap] gro i kam antap folem bigfala waes blong [hem] nomo.”5
“I no wan stret tingting se wan man olsem … Kraes … bae hem i Pikinini blong God.”6
“[Wanem we yu bilivim, i no wan waes kastom mo i wan] krangke ia blong ol tingting blong yufala.”7 ?I saon olsem wanem i stap hapen tedei, no?
Wetem Restoresen blong gospel, God i bin givim long yumi wei ia blong lanem mo save ol impoten trutok long saed blong spirit: yumi lanem tru long ol tabu skripja, tru long ol prea blong yumiwan mo ol eksperiens blong yumiwan, tru long kaonsel blong ol profet mo ol aposol we oli stap laef, mo tru long Tabu Spirit we i lidim yumi we i save helpem yumi “save trutok long saed blong evri samting.”8
Trutok, Yumi Luksave Tru long Spirit
Yumi save save ol samting blong God taem yumi lukaotem olgeta long saed blong spirit. Pol i talem, “Ol samting we i blong God nogat man i save, be hem nomo we i gat Spirit blong God. … [From] olgeta, oli luksave olgeta long saed blong spirit.”9
Luk peinting ia we i kam long Michael Murphy. Long lukluk ia, bae i had blong yu bilivim se hem i wan art wei blong ae blong man. Be, sapos yu luk ol dot ia long wan defren lukluk, bae yu luksave naesfala wok blong artis ia.
Semmak, we yumi luk ol trutok blong God long saed blong spirit long wan lukluk blong wan ae blong fet. Pol i talem: “Be man we Tabu Spirit ya i no stap long hem, hem i no save kasem ol paoa ya we Tabu Spirit i stap givim: from long hem, i olsem we oli krangke samting nomo from we Tabu Spirit nomo i save mekem man i save ol paoa ia.”10
Ol skripja, ol prea blong yumi, ol eksperiens blong yumiwan, ol profet blong tedei, mo presen we i Tabu Spirit i givim yumi wan klia lukluk blong trutok long saed blong spirit blong rod we yumi nidim long wol ia.
Ofisol Toktok tru long Ae blong Fet
Yumi lukluk long ofisol toktok long famli tru long ae blong fet.
Presiden Gordon B. Hinckley i presentem “Famli: Wan Ofisol Toktok i Go long Wol” wetem toktok ia: “Wetem fulap giaman tingting we i mekem yumi no luksave trutok, wetem fulap giaman toktok abaot ol standet mo ol valiu, wetem fulap temtesen we i luk naes, blong tekem doti blong wol we i stap kam sloslo, mi filim blong wonem [yu].”11
Ofisol toktok i stat wetem: “Evri famli blong man—man mo woman—oli mekem olgeta folem imej blong God. Wanwan long olgeta hem i wan spirit pikinini boe o gel blong papa wetem mama long heven, mo from we oli olsem wan spirit, wanwan long olgeta i gat gud fasin mo gat bigfala janis blong save kam olsem God.”
Hemia i ol trutok we oli no save finis. Yu mo mi, i no wan mistek blong kriesen blong wol.
Mi lavem ol toktok ia: “Long laef bifo wol ia, ol spirit pikinini boe mo gel oli save mo wosipim God olsem Papa blong olgeta we i no save finis mo akseptem plan blong Hem.”12
Yumi bin laef bifo yumi bin bon i kam long wol. Aedentiti blong yumi wanwan i wan pat blong yumi foreva. Long ol wei we yumi no andastanem fulwan, gro blong yumi long saed blong spirit longwe, i lidim yumi blong kam huia yumi long ples ia.13 Yumi bin akseptem plan blong God. Yumi bin save se bae yumi fesem ol hadtaem, sobodi, mo harem nogud long wol ia.14 Yumi bin save tu se Sevya bae i kam mo taem yumi stap traem blong pruvum se yumi klin inaf, bae yumi girap long Laef Bakegen long Ded, mo gat “moa glori antap long hed blong [yumi] blong oltaem mo oltaem.”15
Ofisol toktok i talem stret: “Mifala i stap talemaot naoia se fasin we oli mekem laef long wol ia, hem i kam long God. Mifala i stap talemaot trutok ia se laef hem i tabu mo hem i impoten insaed long plan ia blong God we i no save finis.”
Plan blong Papa blong yumi i blong leftemap tingting blong wan hasban mo waef blong karem ol pikinini i kam long wol ia mo i wok blong yumi blong toktok blong protektem ol bebi we oli no bon yet.
Ol Prinsipol blong Ofisol Toktok Oli Joen long Naes Wei
Sapos yumi jusum sam pat nomo we yumi akseptem long ofisol toktok, yumi blokem lukluk ia blong yumi we i go taem we i no save finis, mo lukluk fulap nomo long ol eksperiens blong yumi long ples ia mo naoia. Taem yumi stap tingting hevi wetem prea abaot ofisol toktok tru long ae blong fet, yumi andastanem moa hao ol prinsipol ia oli joen, oli sapotem olgetawan mo soemaot plan blong Papa blong yumi blong ol pikinini blong Hem.16
?Bae yumi sapraes taem ol profet blong Lod oli talemaot tingting blong Hem, mo long sam man, kwestin i stap yet? I tru, sam oli sakemaot voes blong ol profet kwiktaem,17 mo sam oli prea mo tingting hevi long ol ones kwestin blong olgeta—ol kwestin we bae oli ansarem wetem fasin blong wet longtaem mo wan ae blong fet. Sapos ofisol toktok i bin kamaot long wan nara taem, bae i gat ol kwestin yet, be nomo, bae oli ol defren kwestin long hemia blong tedei. Wan stamba tingting blong ol profet i blong helpem yumi ansarem ol kwestin blong hat blong yumi.18
Bifo hem i kam olsem Presiden blong Jos, Presiden Russell M. Nelson i bin talem: “Ol profet oli lukluk i go fastaem. Oli luk ol denja we enemi i putum i stap o bae i putum yet i stap long rod blong yumi. Ol profet oli luk fastaem tu ol bigfala posibiliti mo janis we i stap wet long olgeta we oli lisin wetem wan hat blong wantem obei.”19
Mi testifae long ol trutok mo paoa long saed blong spirit blong yunaet voes ia blong Fas Presidensi mo Kworom blong Olgeta Twelef Aposol.
Wol I Stap Wokbaot I Go Longwe
Long ful laef blong mi, mi luk ol bigfala jenis long ol bilif blong wol abaot fulap prinsipol we oli tijim insaed long ofisol toktok. Long ol taem blong yangfala blong mi mo ol yia we mi jes mared, fulap long wol oli wokbaot i go longwe long ol standet blong Lod we yumi singaotem loa blong jastiti, se ol rilesensip long saed blong seks i hapen nomo bitwin wan man mo woman we i mared folem loa. Long ol 20 mo 30 yia blong mi, fulap oli lego tabu proteksen blong ol bebi we oli no bon yet, taem oli akseptem moa fasin blong abosen. Long ol yia we i jes pas, fulap oli lego loa blong God se, mared i tabu yunion bitwin wan man mo wan woman.20
Taem mi stap luk fulap oli stap wokbaot i go longwe long ol limit we Lod i putum blong rimaenem yumi long dei long Kapaneam taem we Sevya i talemaot Tabu wok blong hem mo sore tumas we “plante man blong Hem oli gowe.”
Afta Sevya i askem Olgeta Twelef: “?Yufala tu i wantem gowe long mi?”
Pita i ansarem:
“Masta. ?Bambae mifala i save go long hu? Yu nomo yu gat ol tok blong laef ia we i no save finis.
“Mo mifala i bilif finis long yu. Mifala i save finis we yu yu [Kraes, Pikinini blong God we i stap laef].”21
I No Evriwan I Faenem Ples Insaed long Ofisol Toktok
I gat fulap, yangfala mo olfala, we oli stap tru long ol tijing blong ol profet, nomata we ol eksperiens blong olgeta blong naoia i no go stret tumas olsem hemia insaed long famli ofisol toktok: ol pikinini we laef blong olgeta i safa from divos; ol yangfala we ol fren blong olgeta i jikim loa blong jastiti; woman mo man we oli harem nogud tumas from patna blong olgeta i no fetful; ol hasban mo ol waef we oli no save gat pikinini; ol woman mo man we oli mared be patna blong olgeta i no stap serem fet blong hem long gospel ia we i bin kambak long wol; ol singgel woman mo man we, from fulap risen, oli no save mared.
Wan fren blong kolosap 20 yia, we mi laekem tumas, i no mared yet hem i laekem olgeta we oli semmak seks olsem hemwan. Hem i bin stap tru long ol tempol kavenan blong hem, mo i bin mekem ol talen blong hem i go moa bigwan, mo i wok strong tugeta long Jos mo long komuniti. Hem i bin talem long mi i no longtaem, “Mi save gat sore wetem olgeta long semmak situesen blong mi we oli jusum blong no kipim loa blong jastiti long wol ia we yumi laef long hem. ?Be Jisas i no bin askem long yumi blong ‘no stap man blong wol ia’? I klia se ol standet blong God oli defren long olgeta blong wol ia.”
Ol loa blong man, plante taem oli muv i go aotsaed long ol baondri we ol loa blong God oli putum i stap. Blong olgeta we oli wantem blong mekem God i glad, bae oli nidim fet, longfala tingting mo fasin blong wok strong.22
Waef blong mi, Kathy, mo mi, i bin save wan singgel sista we i stap samples long ol 40 yia blong hem, we i gat talen long saed blong wok blong hem mo i wok strong insaed long wod blong hem. Hem tu, i bin kipim ol loa blong God. Hem i bin raetem:
“Mi bin drim long dei ia we bae oli blesem mi wetem wan hasban mo ol pikinini. Mi stap wet yet. Long sam taem, situesen blong mi i mekem mi gat ol filing ia se oli fogetem mi mo mi stap miwan; be mi traem blong no lukluk long wanem mi nogat, be mi lukluk long wanem mi gat, mo hao mi save helpem ol narawan.
“Blong givim seves long evri famli blong mi , long wod blong mi, mo long tempol i bin helpem mi. Oli no fogetem mi mo mi no stap miwan from mi mi pat blong, mo yumi evriwan yumi pat blong, wan famli we i moa bigwan.”
I Gat Wan we I Andastan
Sam bae oli talem, “Yu no andastanem situesen blong mi.” Ating bae mi no andastanem, be mi testifae se i gat Wan we i andastan.23 I gat Wan we Hem i save ol hevi trabol blong yu from sakrifaes blong Hem insaed long garen mo long antap long kros. Taem yu stap lukaotem Hem mo obei ol komanmen blong Hem, mi promes long yu se bae Hem i blesem yu mo karemaot ol trabol we oli hevi tumas blong yu karem yuwan. Bambae Hem i givim long yu, ol fren we oli blong oltaem mo ol janis blong yu givim seves. Moa impoten, bae Hem i fulumap yu wetem paoa blong Tabu Spirit mo mekem yu saen blong yu save se Hem i luksave yu. I no gat wan joes, no gat wan wei, we i stopem yu blong gat kampani blong Tabu Spirit o i stopem yu blong kasem ol blesing blong taem we i no save finis, we i gud inaf blong yu tingting long hem.
Mi save Sevya i stap laef. Mi witnes se Hem i stamba blong evri trutok we i mata mo bae Hem i givim evri blesing we Hem i promesem long olgeta we oli obei ol komanmen blong Hem. Long nem blong Jisas Kraes, amen.