Letem God I Win

Ol dia brata mo sista. Mi talem tangkyu tumas from ol naes mesej blong konfrens ia mo from spesel janis we mi gat blong toktok long yufala naoia.

Blong moa long 36 yia we mi bin stap olsem wan Aposol, doktrin ia blong karem Isrel i kam tugeta i kasem tingting blong mi.¹ Evri samting abaot wok ia i tajem mi, olsem ol seves mo ol nem² blong Ebraham, Aesak, mo Jekob; laef blong olgeta mo waef blong olgeta; kavenan we God i bin mekem wetem olgeta mo i go kasem famli laen blong olgeta;³ taem ol twelef traeb oli go wanwan; mo plante long ol profesi abaot wok blong kam tugeta long taem blong yumi.

Mi bin stadi long kam tugeta ia, mi bin prea from, mi lafet long ol skripja we i tokbaot hemia, mo mi bin askem Lod blong leftemap save blong mi abaot hemia.

So, traem tingting long glad we mi gat taem stadi i lidim mi long wan niu tingting. Wetem help blong tu man we i stadi lanwis Hibru, mi bin lanem se wan long ol Hibru mining blong toktok ia, Isrel, hem i “Letem God i win.”⁴ Long wei ia nao, stret nem ia, Isrel, i tokbaot wan we i wantem letem God i win insaed long laef blong hem. !Tingting ia i tanem sol blong mi!

Toktok ia, wantem, i impoten long intepretesen blong toktok ia, Isrel.⁵ Yumi evriwan i gat fridom blong joes blong yumi. Yumi save jusum blong pat blong Isrel, o no. Yumi save jusum blong letem God i win insaed long laef blong yumi, o no. Yumi save jusum blong letem God i paoa ia we i moa strong insaed long laef blong yumi, o no.

Blong sot taem, bae yumi gobak long wan impoten taem long laef blong Jekob, apuboe blong Ebraham. Long ples ia we Jekob i singaotem Peniel (we i minim “fes blong God”),⁶ Jekob i bin faet wetem wan series jalenj. God i testem fridom blong hem blong mekem joes. Tru long faet blong hem, Jekob i pruvum wanem i bin moa impoten long hem. Hem i bin soem se hem i bin wantem blong letem God i win insaed long laef blong hem. Olsem ansa, God i bin jenisim nem blong Jekob i go long Isrel⁷ we i minim se “letem God i win.” Afta long hemia, God i bin promesem Isrel se evri blesing we Hem i bin putum antap long hed blong Ebraham, bae i blong hem tu.⁸

Sore tumas, laen blong Isrel i bin brekem kavenan blong olgeta wetem God. Oli bin stonem ol profet, mo oli no bin wantem blong letem God i win insaed long laef blong olgeta. Long en, God i bin seraotem olgeta oli go long ol fo kona blong wol ia.⁹ Wetem sore, Hem i bin promesem afta se bae Hem i mekem olgeta oli kam wanples, olsem we i stap long Aesea: “ Long smoltaem nomo, mi mi bin gowe long yufala [Isrel]. Be mi mi lavem yufala,mo mi glad blong tekem yufala i kambak long mi bakegen .”¹⁰

Wetem Hibru mining blong Isrel long maen, kam tugeta blong Isrel i tekem wan niu mining. Lod i stap mekem olgeta we oli wantem letem God i win long laef blong olgeta, oli kam tugeta wanples. Lod i stap mekem olgeta we oli wantem letem God i win long laef blong olgeta blong Hem i paoa ia we i strong moa long laef blong olgeta.

Blong plante handred yia, ol profet oli bin tokbaot finis, kam tugeta ia,¹¹ mo !hem i stap hapen naoia! Olsem wan pat we i mas hapen fastaem long Seken Kaming blong Lod, !hem i wok ia we i moa impoten insaed long wol ia!

Kam tugeta ia bifo wan taosen yia ia, i wan taem blong wanwan i mekem fet i kam bigwan mo givim paoa long tingting long saed blong spirit blong plante milian pipol. Mo olsem ol memba blong Jos Ia blong Jisas Kraes blong Ol Lata-dei Sent, o “lata-dei kavenan Isrel,”¹² yumi bin kasem wok ia blong helpem Lod wetem bigfala impoten wok ia.¹³

Taem yumi stap tokbaot kam tugeta blong Isrel long tugeta saed blong vel, yes, yumi stap tokbaot misinari wok, tempol mo famli histri wok. Yumi stap tokbaot tu blong bildimap fet mo testemoni insaed long hat blong olgeta we yumi stap laef wetem, wok wetem mo givim seves wetem. Eni taem we yu mekem eni samting we i stap helpem eniwan—long tugeta saed blong vel—blong hem i mekem ol kavenan wetem God, nao yu stap help blong mekem Isrel i kam tugeta long wan ples.”

I no longtaem, waef blong wan long ol apuboe blong mi i bin gat hadtaem long saed blong spirit. Bae mi singaotem hem “Jill.” Nomata we mifala i livim kakae, prea, mo givim ol prishud blesing, papa blong Jill i stap ded. Hem i fraet tumas se bae hem i lusum papa blong hem, mo semtaem, testemoni blong hem.

Let, wan naet, waef blong mi, Sista Wendy Nelson, i talem long mi abaot situesen blong Jill. Long nekis moning, Wendy i filim se bae hem i serem ansa blong mi long Jill long saed blong faet blong hem, !we i wan tu toktok nomo! Toktok ia, hem i sot maen.

Afta, Jill i bin talem long Wendy se, long fas ples, hem i harem nogud tumas long ansa blong mi. Hem i talem: “Mi stap hop se Bubuman bae i promesem mi wan merikel blong papa blong mi. Mi wokem askem se, from wanem, toktok ia sot maen i toktok we hem i filim se hem i mas talem.

Afta we papa blong Jill i ded, toktok ia, sot maen i gohed blong kam long maen blong hem. Hem i openem hat blong hem blong andastanem dip moa se sot maen i minim “we i lukluk kolosap nomo.” Nao tingting blong hem i stat blong jenis. Afta, Jill i talem se “Sot Maen i mekem mi mi stop, mi tingting mo mi kam oraet. Toktok ia, naoia i fulumap mi wetem pis. I mekem mi tingbaot bakegen blong mekem lukluk blong mi i go longwe mo lukaotem wanem we i no save finis. I mekem mi tingbaot se i gat wan tabu plan i stap, mo we papa blong mi i stap laef yet, mo i lavem mo i lukaotgud long mi. SotMaen i bin lidim mi i go long God.”

Mi mi praod tumas long smol apugel blong mifala. Long taem we hat blong hem i harem nogud tumas long laef blong hem, dia Jill ia i bin stap lanem blong akseptem tingting we God i gat long papa blong hem, wetem wan lukluk we i blong taem we i no save finis blong laef blong hem. Taem hem i bin jusum blong letem God i win, hem i bin faenem pis.

Sapos yumi letem hemia, bae i gat plante wei we Hibru mining ia blong Isrel i save helpem yumi. Traem tingting olsem wanem prea blong yumi blong ol misinari blong yumi—blong ol hadwok blong yumiwan blong mekem Isrel i kam tugeta—i save jenis taem kaen tingting ia i stap long maen. Plante taem yumi prea se yumi, mo ol misinari bae yumi go long olgeta we oli rere blong kasem ol trutok blong gospel we i kambak blong Jisas Kraes. Mi stap askem miwan se ?bae Lod i lidim yumi i go long huia taem yumi prea blong faenem olgeta we oli wantem blong letem God i stap win insaed long laef blong olgeta?

Maet bae God i lidim yumi long sam we oli neva biliv long God o Jisas Kraes, be naoia oli wantem save abaot Tufala mo plan blong hapines blong Tufala. Ol narawan, maet oli “bon insaed long kavenan”¹⁴ be oli mestem rod finis mo oli kamaot long kavenan rod ia. Maet naoia oli rere blong sakem sin, kambak, mo letem God i stap win. Yumi save help taem yumi welkamem olgeta wetem han mo hat we i open. Mo sam long olgeta we Lod i lidim yumi long olgeta, maet oli oltaem filim se i gat wan samting we i no gat insaed long laef blong olgeta. Olgeta tu, oli wantem tumas blong kam oraet evriwan mo gat glad ia we i kam long olgeta we oli wantem blong letem God i stap win insaed long laef blong olgeta.

Gospel net ia blong karem Isrel i kambak tugeta, i bigbigwan. I gat rum blong wanwan we i akseptem fulwan gospel ia blong Jisas Kraes. Wanwan we i jenisim laef i kam wan pikinini blong kavenan wetem God¹⁵ tru long bladlaen o tru long adopsen. !Wanwan i kam blong i kasem fulwan evri samting we God i bin promesem long olgeta fetful pikinini blong Isrel!¹⁶

Wanwan long yumi i gat wan tabu paoa we hem i save kasem, from se wanwan i wan pikinini blong God. Wanwan i semmak long ae blong Hem. Wanem mining biaen long trutok ia, i bigwan mo i dip. Ol brata mo sista. Plis lisin gud long wanem bambae mi talem. God i no laekem wan kala blong skin i moa bitim wan narawan. Doktrin blong Hem long saed ia i klia gud. Hem i stap invaetem evriwan blong kam long Hem, “ blak mo waet, slef mo fri, man mo woman.”¹⁷

Mi save mekem tingting blong yu i kwaet se olsem wanem bae yu stanap long fes blong God bae i no dipen nating long kala blong skin blong yu. Se God i glad o no long yu, bae i dipen nomo long hamas hat mo tingting yu givim long Hem mo long ol komanmen blong Hem, be i no from kala blong skin blong yu.

Mi krae sore se ol Blak brata mo sista blong yumi raon long wol oli mas gotru long harem nogud from kala blong skin mo fasin blong no gat jastis. Tedei, mi stap singaotem ol memba blong yumi evri ples blong lidim rod blong lego fogud ol fasin mo ol aksen we oli no gat jastis long man. Mi plis long yufala blong promotem respek long evriwan long ol pikinini blong God.

Kwestin we i kam long wanwan long yumi, i nomata kala blong skin blong yumi, i semmak nomo: ?Yu yu wantem letem God i stap win insaed long laef blong yu? ?Yu yu wantem letem God i paoa ia we i moa strong insaed long laef blong yu? ?Bae yu yu letem ol toktok blong Hem, ol komanmen blong Hem, mo ol kavenan blong Hem oli lidim tingting blong yu long wanem yu stap mekem evri dei? ?Bae yu yu letem voes blong Hem i kam faswan ova long eni nara samting? ?Yu yu wantem letem wanem Hem i nidim yu blong mekem i kam faswan long evri nara bigfala tingting we yu yu gat? ?Yu yu wantem se tingting blong yu i draon insaed long tingting blong Hem?¹⁸

Tingting se hamas we yu wantem bae i blesem yu. Sapos yu no mared mo stap lukaotem hem we i no save finis, tingting blong yu, blong wantem pat blong “Isrel,” bae i helpem yu disaed huia bae yu deit wetem mo long wanem wei.

Sapos yu yu mared long wan we i brekem ol kavenan blong hem, hamas yu wantem blong letem God i win insaed long laef blong yu bae i letem ol kavenan blong yu wetem God i stap gud nomo. Sevya bae i hilim hat blong yu we i brokbrok. Ol heven bae oli open taem yu stap lukaot blong save olsem wanem blong muv fored. Yu no nid blong stap mestem rod, o askem samting long yuwan.

Sapos yu gat ol tru kwestin abaot gospel o Jos, taem yu stap jusum blong letem God i stap win, bae yu stap wokbaot blong faenem mo andastanem ol ful trutok we oli no save finis we bae oli lidim laef blong yu, mo bae oli helpem yu blong stap strong long kavenan rod ia.

Taem yu fesem temtesen—iven sapos temtesen ia i kam taem we yu taed gud, o yu filim se yu stap yuwan o oli no save andastanem yu—traem tingting long paoa blong tingting we yu save pulum i kam long yu taem yu stap jusum blong letem God i win insaed long laef blong yu, mo taem yu stap toktok wetem Hem blong i mekem yu kam strong moa.

Taem we bigfala tingting blong hat blong yu i blong letem God i stap win, blong yu pat blong Isrel, plante desisen bae oli kam isi moa. !Plante trabol, oli nomo ol trabol! Yu save gud hao blong yu presentem yuwan. Yu save wanem blong wajem mo ridim, weaples blong spendem taem blong yu mo huia blong fren wetem. Yu save wanem yu wantem mekem i kamtru. Yu save kaen man o woman we yu rili wantem kam olsem.

Naoia, ol dia brata mo sista. Hem i tekem tugeta, bilif mo strong paoa long tingting blong letem God i win. I tekem wok we i gogohed, i strong blong sakem sin mo blong sakemaot man ia we i folem fasin blong wol tru long Atonmen blong Jisas Kraes.¹⁹ Hem i tekem had wok, oltaem mo evri dei blong developem ol evri dei fasin blong stadi long gospel, blong lanem moa abaot Papa long Heven mo Jisas Kraes, mo blong lukaotem mo mekem folem revelesen we i blong yuwan.

Long ol denja taem ia we Aposol Pol i bin profesae from,²⁰ Setan i nomo stap traem blong haedem ol atak blong hem agensem plan blong God. Plante ivel tingting oli fulap i stap. From hemia, wan wei ia nomo blong stap laef long saed blong spirit, i blong mekem desisen blong letem God i stap win insaed long laef blong yumi, blong lanem blong harem voes blong Hem, mo blong yusum evri paoa blong yumi blong help blong mekem Isrel i kam tugeta.

Naoia, ?olsem wanem nao Lod i filim abaot ol pipol we oli letem God i stap win? Nifae i talem stret: “[Lod] i lavem olgeta we oli wantem se Hem i God blong olgeta. Luk, hem i lavem ol papa blong yumi, mo hem i mekem kavenan wetem olgeta, yes, mo tu, wetem Ebraham, Aesak, mo Jekob; mo hem i tingbaot ol kavenan we hem i bin mekem.”²¹

?Mo wanem nao Lod i wantem mekem blong Isrel? Lod i mekem tabu promes se !bambae Hem i “ faet long ol faet blong [yumi], mo ol faet blong ol pikinini blong [yumi], mo hemia blong ol pikinini blong ol pikinini blong [yumi], … i go kasem nambatri mo nambafo jeneresen”!²²

Taem yufala i stap stadi long ol skripja blong yufala long ol nekis sikis manis ia, mi leftemap tingting blong yufala blong mekem wan lis blong evri samting we Lod i bin promesem se bae Hem i mekem long kavenan Isrel ia. !Mi ting se bae yu sapraes bigwan! Tingting hevi long olgeta promes ia. Tokbaot olgeta wetem ol famli mo ol fren blong yufala. Afta, laef mo luk ol promes ia oli kamtru insaed long stret laef blong yufala.

Ol dia brata mo sista blong mi. Taem yufala i stap jusum blong letem God i stap win insaed long laef blong yufala, bambae yufala i gat eksperiens, blong yufalawan, se God i “wan God blong ol merikel.”²³ Olsem wan pipol, yumi ol kavenan pikinini blong Hem, mo bambae oli singaotem yumi folem nem blong Hem. Long hemia, mi testifae long tabu nem blong Jisas Kraes, amen.