Paoa blong Fet blong Sapotem Man

Plante taem, mi bin harem ol prishud lida oli talem tangkyu from fet we i sapotem olgeta we oli givim seves. Aot long filing insaed long voes blong olgeta, yu save se tangkyu blong olgeta i dip mo i ril. Stamba tingting blong mi tedei, i blong talemaot tangkyu blong Lod from yufala i stap sapotem ol wok blong Hem insaed long Jos blong Hem. Mo tu, i blong leftemap tingting blong yufala blong praktisim mo gro long paoa ia blong sapotem ol narawan wetem fet blong yu.

Bifo yu bon i kam, yu bin soemaot paoa ia. Tingtingbak long wanem yumi save abaot spirit wol bifo yumi bon i kam long laef long wol ia. Papa blong yumi long Heven i presentem wan plan blong ol pikinini blong Hem. Yumi bin stap longwe. Lusifa, spirit brata blong yumi, i agensem plan we bae i givim yumi fridom blong mekem joes. Jehova, Pikinini we Papa long Heven i Lavem, i sastenem o sapotem plan ia. Lusifa i lidim wan faet blong agens. Voes blong Jehova we i sapotem plan, i win, mo Hem i volontia blong i Sevya blong yumi.

Tingting ia, we i mekem yu stap long wol ia tedei, i talem stret long yumi se yu bin sapotem Papa mo Sevya. I tekem fet long Jisas Kraes blong sapotem plan blong hapines mo ples blong Jisas Kraes insaed long hem, taem yu no bin savegud long ol jalenj we bae yu fesem long wol ia.

Fet blong yu blong sastenem o sapotem ol wokman blong God, i stamba blong hapines blong yu long laef ia tu. Taem yu bin akseptem jalenj blong misinari blong prea blong save se Buk blong Momon i toktok blong God, yu bin gat fet blong sapotem wan wokman blong Lod. Taem yu bin akseptem invitesen blong kasem baptaes, yu sapotem wan wokman blong God we i gat tingting i stap daon.

Taem yu letem wan i putum han blong hem antap long hed blong yu, mo talem: “Kasem Tabu Spirit,” yu sapotem hem olsem wan we i kasem Melkesedek Prishud.

Stat long dei ia, taem yu bin fetful blong wok, yu bin sapotem wanwan we i bin pasem prishud ia long yu mo wanwan long olgeta we i odenem yu long wan ofis insaed long prishud ia.

Eli long prishud eksperiens blong yu, wanwan taem blong sastenem man i wan simpol taem blong trastem wan wokman blong God. Naoia, plante long yufala i muv i go antap long wan ples we, blong sastenem o sapotem man, i nidim moa long hemia.

Yu jusum blong sapotem evriwan we Lod i singaotem—long weaples Lod i bin singaotem olgeta long hem. Joes ia i hapen long ol konfrens raon long wol. I bin hapen long konfrens ia. Long ol miting olsem, ol nem blong ol man mo woman—ol wokman blong God—oli stap ridim olgeta, mo oli invaetem yu blong leftemap han blong yu blong sastenem olgeta. Yu save holemtaet vot blong yu, o yu save promesem fet blong yu blong sapot. Taem yu leftemap han, yu stap sapotem, yu mekem wan promes. Yu mekem wan promes wetem God, we olgeta nao ol wokman blong Hem, we bae yu sapotem olgeta.

Olgeta ia, oli ol man we oli no stret evriwan, semmak olsem yu. Blong kipim promes blong yu bae i tekem fet we i no muvmuv se Lod nao i bin singaotem olgeta. Blong stap kipim olgeta promes ia, bae i tekem hapines we i no save finis. Blong no kipim olgeta bae i mekem harem nogud i kam long yu mo olgeta we yu lavem—iven bae yu lusum samting i bitim we yu gat paoa blong ting long hem.

Maet oli bin askem yu, o bae oli askem yu, sapos yu sastenem o sapotem bisop blong yu, stek presiden, ol Jeneral Atoriti, mo Ol Jeneral Ofisa blong Jos. I save hapen taem oli askem yu blong sastenem ol ofisa mo ol lida insaed long wan konfrens. Samtaem, bae i long taem blong wan intaviu wetem bisop o stek presiden.

Kaonsel blong mi, i we, yu askem ol kwestin ia long yuwan bifo taem ia i kam, wetem fasin blong lukaot gud long tingting blong yu mo wetem prea. Taem yu mekem olsem, maet bae yu lukbak long ol las tingting, toktok mo wok blong yu. Traem tingbaot mo putum gud ol ansa we bae yu givim taem we Lod i stap intaviu long yu, mo save se, wan dei, bae Hem i askem. Yu save rere mo askem ol kwestin olsem long yuwan:

1. ?Mi mi tingting o tokbaot ol wiknes blong ol pipol we mi mi bin promesem blong sapotem?

2. ?Mi bin lukaotem pruf se Lod i stap lidim olgeta?

3. ?Mi bin folem, wetem ful tingting mo tru fasin, folem lidasip blong olgeta?

4. ?Mi mi tokbaot pruf ia we mi save luk se oli ol wokman blong God?

5. ?Mi mi stap prea from olgeta oltaem, mo talem nem blong olgeta, mo wetem ol filing blong lav?

Ol kwestin ia, long plante long yumi, bae i lidim sam filing blong sem mo wan nid blong sakem sin. God i givim komanmen long yumi, blong no jajem ol narawan long fasin we i no stret mo gud, be long praktis, yumi faenem i had blong no mekem. Kolosap evri samting we yumi mekem taem yumi wok wetem ol pipol, i lidim yumi blong skelem olgeta. Mo long evri saed blong laef blong yumi, yumi stap komperem yumi wetem ol narawan. Yumi stap mekem olsem from plante risen, sam oli stret, be plante taem i lidim yumi blong poenem fingga.

Presiden George Q. Cannon, i givim wan woning we mi givim long yufala olsem woning we i kam long mi. Mi biliv se hem i talem trutok: “God i bin jusum ol wokman blong Hem. Hem i klemem se hem i raet blong Hem blong panisim olgeta, sapos i nid blong panisim olgeta. Hem i no givim hemia long wanwan long yumi blong tokbaot man mo jajem se oli rong o no. I no gat man, nomata hem i strong hamas long fet, i nomata se hae olsem wanem long Prishud, we i save tokbaot nogud olgeta we Lod i jusum, mo faenem fol long atoriti blong God long wol, mo no mekem Hem i no glad. Tabu Spirit, bae i kamaot long kaen man olsem, mo bae hem i go long tudak. From se i olsem, ?yu yu no luk hamas nao i impoten blong yumi mas lukaotgud?”¹

Lukluk blong mi, i we ol memba blong Jos raon long wol oli stap tru long wanwan long olgeta, mo long olgeta we oli prisaed ova long olgeta. Be, yumi save mo yumi mas mekem i gud moa bitim hemia. Yumi save go antap moa long paoa blong yumi blong sapotem wanwan long yumi. I tekem fet mo wok. Hemia fofala tingting mi givim blong yumi tekem aksen long hem long konfrens ia.

1. Yumi save faenem ol spesifik aksen we ol spika oli tokbaot mo stat tedei blong folem olgeta. Taem yumi mekem olsem, paoa blong yumi blong sapotem olgeta, bae i kam antap.

2. Yumi save prea from olgeta taem oli toktok, se bae Tabu Spirit bae i tekem toktok blong olgeta i go long hat blong spesifik pipol we yumi lavem. Taem yumi lanem afta se i gat ansa long prea blong yumi, paoa blong yumi blong sapotem ol lida ia bae i kam antap moa.

3. Yumi save prea from ol spesifik spika, se bae oli kasem blesing mo kam strong moa taem oli givim mesej blong olgeta. Taem yumi luk se God i mekem olgeta i kam strong moa, bae yumi gro long fet blong yumi blong sapotem olgeta, mo bae i stastap.

4. Yumi save lisin long ol mesej blong ol spika we oli kam olsem wan ansa long prea blong yumiwan, blong kasem help. Taem ol ansa oli kam, mo bae oli kam, bae yumi gro long fet blong yumi blong sapotem ol wokman blong Lod.

Antap long fasin blong kam antap blong sapotem olgeta we oli givim seves long Jos, bae yumi lanem se i gat wan nara ples we yumi save mekem paoa ia i kam antap moa. Long ples ia, hem i save tekem moa bigfala blesing long yumi. Hem i stap insaed long hom mo famli.

Mi toktok long yangfala man we i holem prishud, we i stap long wan hom wetem papa blong hem. Bae mi talemaot long yufala, aot long eksperiens blong mi, se i minim wanem blong wan papa blong filim fet blong yu we i sapotem hem. Maet yu luk se hem i trastem hemwan. Be hem i fesem moa jalenj bitim hemia we yu save. Sam taem, hem i no save luk wei tru long ol problem long fored blong hem.

Gud tingting mo filing blong yu long hem bae i save helpem hem. Lav blong yu long Hem bae i helpem hem moa. Be samting ia we bae i help moa, i ol tru toktok olsem: “Papa. Mi bin prea from yu, mo mi bin filim se Lod bae i helpem yu. Evri samting bae i oraet. Mi save hemia.”

Ol toktok olsem oli wok tu long nara wei, papa i go long boe. Taem wan boe i mekem wan seris mistek, maet long wan samting long saed blong spirit, maet hem i filim se hem i no mekem wok blong hem. Olsem papa blong hem, long stret taem ia, bae yu sapraes se, afta we yu prea blong save wanem blong mekem, bae Tabu Spirit i putum ol toktok ia long maot blong yu: “Boe. Mi stap long saed blong yu oltaem. Lod i lavem yu. Wetem help blong Kraes, yu save kambak. Mi save se yu save mekem, mo bae yu mekem. Mi lavem yu.”

Insaed long prishud kworom mo insaed long famli, moa fet blong sapotem wanwan long yumi, i rod ia nao we yumi bildimap Saeon we Lod i wantem yumi blong krietem. Wetem help blong Kraes, yumi save mekem mo bae yumi mekem. Bae yu tekem taem blong lavem Lod wetem ful hat, paoa long tingting, maen, mo paoa long bodi, mo blong lavem wanwan long yumi olsem yumi lavem yumiwan bakegen.

Taem yumi gro long klin lav ia blong Kraes, hat blong yumi i kam sofsof. Lav ia bae i mekem yumi stap daon mo i lidim yumi blong sakem sin. Tras blong yumi long Lod mo long wanwan long yumi bae i gro. Mo afta, bae yumi muv i go blong kam wan, olsem we Lod i promesem se yumi save mekem.²

Mi testifae se Papa long Heven i save mo i lavem yu. Jisas Hem I Kraes we i stap laef. Hemia i Jos blong Hem. Yumi holem prishud blong Hem. Bae Hem i ona ol hadwok blong yumi blong gro long paoa blong praktisim prishud ia mo blong sapotem wanwan long yumi. Mi witnes long hemia, long tabu nem blong Jisas Kraes, amen.