Si Jesucristo Amo ang Kusog sang mga Lamharon
Ibutang ang inyo pagsalig kay Jesucristo. Giyahan Niya kamo sa husto nga paagi. Sia amo ang inyo kusog.
Samtang nagahanda para sa sining mensahe karon, nakabatyag ako sang mabaskog nga pagtandog nga maghambal sa mga lamharon nga babayi kag lalaki.
Nagahambal man ako sa sadto mga lamharon, bisan sa mga indi na makadumdum sini.
Kag nagahambal ako sa tanan nga nagapalangga sang aton mga lamharon kag gusto sila nga magmadinalag-on sa kabuhi.
Para sa ulihing-tubo, may mensahe ako nga para gid sa inyo halin sa inyo Manluluwas, nga si Jesucristo.
Ang Mensahe sang Manluluwas para sa Inyo
Pinalangga kong lamharon nga mga abyan, kon ari diri ang Manluluwas subong, ano ang Iya ihambal sa inyo?
Nagapati ako nga magasugod Sia sa pagpahayag sang Iya dako nga pagpalangga sa inyo. Mahimo nga maggamit Sia sang mga tinaga, pero magailig ini sing mabaskog—halin lang sa Iya presensya—nga indi gid ini masal-an, padulong sa inyo tagipusuon, nga nagapuno sa inyo bilog nga kalag!
Pero tungod kay tanan kita mahuyang kag indi perpekto, mahimo nga mabalaka kamo. Mahimo nga madumduman ninyo ang ginpanghimo ninyo nga sala, ang tinion nga nagpadala kamo sa tentasyon, mga butang nga kuntani wala ninyo ginhimo—ukon tani mas maayo pa ang inyo ginhimo.
Mabatyagan ina sang Manluluwas, kag nagapati ako nga pasaligon Niya kamo paagi sa mga pulong nga Iya ginhambal sa balaan nga mga kasulatan:
“Indi magkahadlok.”1
“Indi magduhaduha.”2
“Magpakaisog.”3
“Dili malisang ang inyo mga tagipusuon.”4
Wala ako nagapati nga magapangatarungan Sia sa inyo mga sala. Indi Niya ini pagkapankapanan. Indi, pangabayon Niya kamo nga maghinulsol—nga bayaan ang inyo mga sala, nga magbag-o, para patawaron Niya kamo. Padumdumon Niya kamo nga 2,000 anyos ang nagligad gindala Niya sa Iya Kaugalingon inang mga sala agud kamo maka hinulsol. Bahin ina sang plano sang kaluwasan nga ginregalo sa aton sang aton mapinalanggaon nga Amay nga Langitnon.
Mahimo nga ipatalupangod ni Jesus nga ang inyo kasugtanan sa Iya—nga ginhimo sadtong ginbunyagan kamo kag ginabag-o tagsa nga mag-ambit kamo sang sakramento—nagahatag sa inyo sang espesyal nga koneksyon sa Iya. Ang klase sang koneksyon nga ginalaragway sa balaan nga mga kasulatan nga ulolupod nga magpagota amo nga, upod sa Iya bulig, madala mo ang bisan ano nga palas-anon.5
Nagapati ako nga gusto sang Manluluwas nga si Jesucristo nga inyo makita, mabatyagan, kag mahibal-an nga Sia amo ang inyo kusog. Nga upod sa Iya bulig, wala sang limitasyon sa pwede ninyo malab-ot. Nga ang inyo potensyal wala sing limitasyon. Gusto Niya nga tulukon ninyo ang inyo kaugalingon pareho sang panulok Niya sa inyo. Kag lain ina katama sa paagi sang panulok sang kalibutan sa inyo.
Ang Manluluwas magadeklarar, nga pat-od gid, nga anak kamo nga babayi ukon lalaki sang Dios nga Makagagahum. Ang inyo Amay nga Langitnon amo ang pinakamahimayaon nga persona sa uniberso, puno sang pagpalangga, kalipay, katinlo, pagkabalaan, kasanag, grasya, kag kamatuoran. Kag sa pila ka adlaw gusto Niya nga mapanubli ninyo ang tanan nga ara sa Iya.6
Amo ina ang rason kon ngaa ari kamo sa duta—para magtuon, magtubo, kag mag-uswag kag mangin mga tinuga nga gintuyo sang Amay sa Langit nga mangin kamo.
Para mangin posible ini, Iya ginpadala si Jesucristo para mangin inyo Manluluwas. Amo ini ang katuyoan sa likod sang Iya dako nga plano sang kalipayan, sang Iya Simbahan, sang Iya priesthood, sang balaan nga mga kasulatan—sini tanan.
Amo ina ang inyo kapalaran. Amo ina ang inyo palaabuton. Amo ina ang inyo pagpili!
Kamatuoran kag Mga Pagpili
Sentro sa plano sang Dios para sa inyo kalipayan amo ang inyo gahum sa pagpili.7 Siyempre, gusto sang inyo Amay nga Langitnon nga pilion ninyo ang wala katapusan nga kalipay upod sa Iya, kag buligan Niya kamo nga malab-ot ina, pero indi gid Sia magpilit sa inyo.
Gani ginatugtan Niya kamo nga mamili: Kasanag ukon kadulom? Maayo ukon malain? Kalipay ukon kasubo? Kabuhi nga wala katapusan ukon kamatayon nga wala katapusan?8
Daw kahapos lang mamili, no? Pero bisan paano, diri sa kalibutan, daw mas nangin komplikado gali ini.
Ang problema kay indi naton pirme makita ang mga butang sing maathag. Si Apostoles Pablo nagkumparar sini sa pagtulok “sa indi maathag nga larawan sa espeho.”9 Kadamo sang kagamo sa kalibutan parte sa kon ano ang husto kag sala. Ang kamatuoran ginalubag para ang malain daw magmaayo kag ang maayo magmalain.10
Pero kon sinsero kamo nga nagapangita sang kamatuoran—wala katapusan, wala nagabag-o nga kamatuoran—ang inyo mga pagpili mangin mas maathag. Huo, may mga tentasyon kag pagtilaw gihapon kamo. Matabo gihapon ang malain nga mga butang. Makalilibog nga mga butang. Masubo nga mga butang. Pero masarangan ninyo kon nakilala ninyo kon sin-o kamo, ngaa ari kamo diri, kag kon nagasalig kamo sa Dios.
Gani sa diin ninyo makita ang kamatuoran?
Ara ini sa ebanghelyo ni Jesucristo. Kag ang kabug-osan sinang ebanghelyo ginatudlo sa Ang Simbahan ni Jesucristo sang mga Santos sa Ulihing mga Adlaw.
Siling ni Jesucristo, “Ako amo ang dalan, ang kamatuoran, kag ang kabuhi, wala sing may makakadto sa Amay kon indi paagi sa akon.”11
Kon may importante kamo nga mga pagpili nga himuon, si Jesucristo kag ang Iya ginpanumbalik nga ebanghelyo amo ang pinakamaayo nga pilion. Kon may mga pamangkot kamo, si Jesucristo kag ang Iya ginpanumbalik nga ebanghelyo amo ang pinakamaayo nga sabat. Kon pamatyag ninyo maluya kamo, si Jesucristo amo ang inyo kusog.
Ginahatagan niya sing gahum ang mga ginakapoy; kag sa mga daw ginaluyahan, ginadugangan Niya sing kusog.
Ang mga nagahulat sa Ginuo pagabag-uhon paagi sa Iya kusog.12
Para sa Kusog sang mga Lamharon
Para buligan kamo nga makita ang Dalan kag para buligan kamo nga himuon ang doktrina ni Cristo nga nagaimpluwensya nga giya sa inyo kabuhi, Ang Simbahan ni Jesucristo sang mga Santos sa Ulihing mga Adlaw naghanda sang bag-o nga balasahon, ginbag-o nga bersyon sang Para sa Kusog sang mga Lamharon.
Sa masobra 50 anyos, ang Para sa Kusog sang mga Lamharon nangin giya sang mga henerasyon sang mga lamharon nga Santos sa Ulihing nga Adlaw. May kopya gid ako sini pirme sa akon bulsa, kag ginaistorya ko ini sa mga tawo nga nagapamangkot parte sa aton mga talaksan. Ginpanami pa gid ini kag ginpabag-o para mas makabulig sa mga hangkat kag mga tentasyon sa aton panahon. Ang bag-o nga bersyon sang Para sa Kusog sang mga Lamharon may ara online sa 50 ka lainlain nga mga lenggwahe kag may ara man sang gin-imprinta. Mangin dako ini nga bulig sa paghimo sang mga pagpili sa inyo kabuhi. Palihog ipangabuhi ninyo ini mismo kag ipaambit sa inyo mga abyan.
Ining bag-o nga bersyon sang Para sa Kusog sang mga Lamharon may ikaduha nga tig-ulo nga Giya sa Paghimo sang mga Pagpili.
Para maathag kaayo, ang pinakamaayo ninyo nga giya sa paghimo sang mga pagpili amo si Jesucristo. Si Jesucristo amo ang kusog sang mga lamharon.
Gani ang katuyoan sang Para sa Kusog sang mga Lamharon amo nga itudlo kamo sa Iya. Ginatudloan kamo sini sang wala katapusan nga mga kamatuoran sang Iya ginpanumbalik nga ebanghelyo—mga kamatuoran parte sa kon sin-o kamo, kon sin-o Sia, kag kon ano ang inyo malab-ot upod ang Iya kusog. Ginatudloan kamo sini kon paano maghimo sang matarong nga mga pagpili base sa sinang wala katapusan nga mga kamatuoran.13
Importante man nga mahibal-an kon ano ang wala ginahimo sang Para sa Kusog sang mga Lamharon. Wala ini nagahimo sang mga desisyon para sa inyo. Indi ini maghatag sa inyo sang “huo” ukon “indi” sa tagsa ka pagpili nga pwede ninyo atubangon. Ang Para sa Kusog sang mga Lamharon nagatutok sa pundasyon sang inyo mga pagpili. Nagatutok ini sa mga panindugan, mga prinsipyo, kag doktrina imbes sa tagsa ka pangginawi.
Ang Ginuo, paagi sa Iya mga propeta, pirme nagagiya sa aton sa sina nga direksyon. Nagapangabay Sia sa aton nga “patubuon ang [aton] espirituhanon nga ikasarang sa pagbaton sang rebelasyon.”14 Ginaagda Niya kita nga “pamatian Sia.”15 Ginatawag Niya kita nga sundon Sia sa mas mataas kag mas balaan nga pamaagi.16 Kag nagatuon man kita sa pareho nga paagi tagsa ka semana sa Dali, Magsunod sa Akon.
Sa banta ko pwede ang giya maghatag sa inyo sang malaba nga listahan sang mga bayo nga indi ninyo dapat suksukon, mga tinaga nga indi ninyo dapat ihambal, mga sine nga indi ninyo dapat tan-awon. Pero makabulig gid bala ina sa bug-os-kalibutan nga simbahan? Ang ina bala nga paagi magahanda sa inyo sa bilog-kabuhi nga pagka-Cristohanon?
Si Joseph Smith nagsiling, “Ginatudloan ko sila sang husto nga mga prinsipyo, kag ginatugtan sila nga dumalahan ang ila mga kaugalingon.”17
Kag si Haring Benjamin nagsiling sa iya katawhan sa Libro ni Mormon, “Kag sa katapusan, indi ko masugid sa inyo ang tanan nga mga butang nga paagi sa sini mahimo kamo nga makasala; kay may nanuhay-tuhay nga mga paagi kag mga pahito, bisan sapagkadamo nga indi ko maisip ang mga ini.”18
Ginpadayon ni Haring Benjamin, “Apang ini lamang ang masiling ko sa inyo, … [bantayi] ang inyo mga kaugalingon, kag ang inyo mga panghunahuna, kag ang inyo mga pulong, kag ang inyo mga buhat, kag magtuman sang mga kasuguan sang Dios, kag magpadayon sa pagtuo sa … aton Ginuo, bisan tubtob sa katapusan sang inyo mga kabuhi.”19
Malain bala nga may mga patakaran? Siyempre indi. Kinahanglan naton ini adlaw-adlaw. Pero indi husto ang magtutok lamang sa mga patakaran imbes nga magtutok sa Manluluwas. Kinahanglan ninyo nga mahibal-an ang ngaa kag paano kag dayon pamensaron ang mga konsikwensya sang inyo mga pagpili. Kinahanglan ninyo nga ibutang ang inyo pagsalig kay Jesucristo. Giyahan Niya kamo sa husto nga paagi. Sia amo ang inyo kusog.19
Ang Gahum sang Matuodtuod nga Doktrina
Ang Para sa Kusog sang mga Lamharon maisog sa pagdeklarar sang doktrina ni Jesucristo. Maisog ini nga nagaagda sa inyo nga maghimo sang mga pagpili base sa doktrina ni Cristo. Kag maisog ini sa paglaragway sang mga bugay nga ginapromisa ni Jesucristo sa mga nagasunod sa Iya Paagi.21
Si Pangulong Russell M. Nelson nagtudlo: “Kon ang inyo pinakadako nga handum amo nga tugotan ang Dios nga magpangibabaw [sa inyo kabuhi], … madamo nga mga desisyon ang mas nagahapos himuon. … Madamo nga mga isyu ang indi na isyu! Makahibalo kamo kon paano ninyo dal-on ang inyo kaugalingon. Makahibalo kamo kon ano ang tan-awon kag basahon, sa diin gamiton ang inyo oras, kag kon sin-o ang updan. Makahibalo kamo kon ano ang luyag ninyo tapuson. Makahibalo kamo kon ano nga klase sang tawo … gusto ninyo nga mangin.”22
Mas Mataas nga Talaksan
Si Jesucristo may mataas kaayo nga talaksan para sa Iya mga sumulunod. Kag ang imbitasyon nga sinsero nga pangitaon ang Iya pagbuot kag magpangabuhi sa Iya mga kamatuoran amo ang pinakamataas nga posible nga talaksan!
Ang importante nga temporal kag espirituhanon nga mga pagpili indi lamang dapat ibase sa personal nga gusto ukon ano ang mahapos ukon popular.22 Ang Ginuo wala magsiling, “Pagusto kamo sang himuon ninyo.”
Ang Iya ginasiling, “Tugoti ang Dios nga magpangibabaw.”
Sia nagsiling, “Dali, sunod sa akon.”24
Sia nagasiling, “Magpangabuhi sa mas balaan, mas mataas, mas hamtong nga pamaagi.”
Sia nagasiling, “Sunda ang akon mga kasugoan.”
Si Jesucristo amo ang aton perpekto nga ehemplo, kag ginatinguhaan naton upod ang tanan nga kusog sang aton kalag nga sundon Sia.
Pinalangga ko nga mga abyan, suliton ko, kon ang Manluluwas nagatindog diri subong, ipahayag Niya ang Iya wala katapusan nga pagpalangga sa inyo, ang Iya bug-os nga pagsalig sa inyo. Silingan Niya kamo nga mahimo ninyo ini. Sarang kamo magpatindog sang masadya, malipayon nga kabuhi tungod si Jesucristo amo ang inyo kusog. Makakita kamo sang kompiyansa, kalinong, kahilwayan sa katalagman, kalipay, kag pagkalakip sa karon kag sa wala katapusan, tungod makita ninyo ina tanan kay Jesucristo, sa Iya ebanghelyo, kag sa Iya Simbahan.
Sa sini maligdong ako nga nagasaksi bilang Apostoles sang Ginuong Jesucristo kag ginabilin sa inyo ang akon tudok-sa-kasingkasing nga bendisyon nga may dako nga pagpasalamat kag pagpalangga sa inyo, sa ngalan ni Jesucristo, amen.