Ang Walay Katapusan nga Prinsipyo sang Gugma

Ang walay katapusan nga prinsipyo sang gugma makita sa pagkabuhi sang duha ka dakong sugo: higugmaa ang Dios sa bug-os mo nga tagipusoon, sa bug-os mo nga kalag, sa bug-os mo nga hunahuna, kag sa bug-os mo nga kusog, kag higugmaa ang imo isigkatawo subong sang imo kaugalingon.¹

Madumduman ko ang una nga tig-tulugnaw sa pag-istar ko diri sa Utah—bisan diin may yelo. Tungod halin sa Disyerto sang Sonora, nanamian ako sang primero nga mga adlaw, pero pagkatapos sang pila ka adlaw, narealisar ko nga kinahanglan ko magbugtaw sing mas temprano agud palahon ang yelo halin sa alagyan.

Isa ka aga, samtang nagabagyo sang yelo, nagapalamalhas ako sa pagpala sang yelo, kag nakita ko ang akon kaingod nga nagaabri sang iya garahe sa tabok sang dalan. Mas may edad sia sangsa akon, ano pa abi ko kon makatapos ako gilayon, mabuligan ko sia. Gani, sa mabaskog nga tingug ginpamangkot ko sia “Brother, kinahanglan mo sang bulig?”

Nagyuhum sia kag nagsiling, “Salamat, Elder Montoya.” Dayon ginguyod niya ang snowblower halin sa iya garahe, ginpaandar ang motor, kag sa pila ka minutos, nakakas niya ang tanan nga yelo sa atubang sang iya balay. Nagtabok sia dayon dala ang iya makina kag namangkot sa akon, “Elder, kinahanglan mo sang bulig?”

Nga nagayuhum, nagsiling ako, “Huo, salamat.”

Handa kami magbuligay tungod palangga namon ang isa kag isa, kag ang kinahanglanon sang akon utod akon kinahanglanon, kag ang akon iya. Bisan ano nga lenggwahe ang ginahambal sang akon utod ukon kon diin man sia nga pungsod naghalin, palangga namon ang isa kag isa tungod mag-utod kami, mga anak sang isa lang ka Amay.

Sang gin-anunsyo ang ministering, si Pangulong Nelson nagsiling, “Ipatuman naton ang mas bag-o, mas balaan nga paagi sa pag-atipan kag pag-alagad sa iban.”² Para sa akon, ang mas balaan nagakahulugan nga mas personal, mas madalom, mas pareho sa paagi sang Manluluwas: “Maghigugmaanay kamo,”³ sing isa-isa.

Kulang ang maglikaw nga mangin upang sa iban; kulang ang makita kag labayan lang ang nagakinahanglan sa dalanon. Kalitan naton ang tagsa ka oportunidad nga magbulig sa aton kaingod, bisan pa nga ini ang una ukon ang amo lang nga tion nga nakita naton sia sa sining kabuhi.

Ngaa ang pagpalangga sa Dios ang una nga dakong sugo?

Sa banta ko tungod ini sang Iya importansya sa aton. Iya kita mga anak, ginatatap Niya ang aton kaayohan, nagasandig kita sa Iya, kag ang Iya gugma nagaamlig sa aton. Ang Iya plano nagalakip sang kahilwayan sa pagpili; gani, laban-laban gid nga makahimo kita sang pila ka mga sayop.

Ginatugotan Niya nga tilawan kita kag tentaron. Pero bisan kon nagahimo kita sang pila ka mga sayop ukon nagakatentar, ang plano nagatigana sang isa ka Manluluwas agud nga matubos kita kag makabalik sa presensya sang Dios.

Ang kalisdanan sa aton mga kabuhi makatuga sang pagduhaduha sa katumanan sang mga promisa nga ginhatag sa aton. Palihog magsalig sa aton Amay. Pirme Niya nga ginatuman ang Iya mga promisa, kag matun-an naton ang luyag Niya nga itudlo sa aton.

Bisan ginahimo naton ang husto, ang mga sirkumstansya sa aton kabuhi sarang magbag-o halin sa maayo pakadto sa malain, halin sa kalipay pakadto sa kasubo. Ang Dios nagasabat sang aton mga pangamuyo suno sa Iya walay dulonan nga kaluoy kag gugma kag sa Iya kaugalingon nga kaluoy kag gugma kag sa Iya tiontion.

• Ang sapa nga ginaimnan ni Elias sang tubig nagmala.⁴

• Ang pana ni Nefi nga hinimo sa mabakod kaayo nga asero nabali.⁵

• Isa ka bata nga lalaki ang gindaugdaug kag ginpahalin sa eskwelahan.

• Ang madugay-ginpaabot nga bata napatay pila lang ka adlaw pagkatapos matawo.

Ang mga sirkumstansya nagabag-o.

Kon ang mga sirkumstansya magbag-o halin sa maayo kag positibo pakadto sa malain kag negatibo, sarang gihapon kita mangin malipayon tungod ang kalipay wala nagadepende sa mga sirkumstansya kundi sa aton panimuot tuhoy sa mga sirkumstansya. Si Pangulong Nelson nagsiling, “Ang kalipay nga aton mabatyagan halos wala sing kalabtanan sa mga sirkumstansya sang aton mga kabuhi kag may dako kaayo nga kalabtanan sa ginatutokan sang aton mga kabuhi.”⁶

Pwede kita maghulat lang nga magbag-o ang mga sirkumstansya, ukon pwede magpangita kita kag magpaluntad sang bag-o nga mga sirkumstansya.

• Si Elias nagkadto sa Sarepta, sa diin ang isa ka balo ang naghatag sa iya sang pagkaon kag ilimnon.⁷

• Si Nefi naghimo sang pana halin sa kahoy kag nangayam sang mga sapat nga makaon.⁸

• Ang bata nga lalaki nagpamati kag nagkopya sang mga leksyon sa tupad sang bintana sa gwa sang eskwelahan kag subong, maestro na sia sa elementarya.

• Ang mag-asawa nakaangkon sing daku nga pagtuo sa Manluluwas nga si Jesucristo kag nagsalig sa plano sang kaluwasan. Ang ila pagpalangga sa madugay-ginpaabot nga bata nga gulpi napatay mas daku sangsa ila kalisod.

Kon makabati ako sang mga pamangkot, “Amay nga Langitnon, ara ka gid bala dira? Kag ginapamatian kag ginasabat mo bala ang pangamuyo sang [tagsa ka] bata?,”⁹ luyag ko magsabat, “ara Sia sadto, ara Sia subong, kag mangin ara Sia pirme para sa imo kag sa akon. Anak Niya ako, Amay ko Sia, kag nagatuon ako nga mangin maayo nga amay pareho sa Iya.”

Kami sang akon asawa nagatinguha pirme nga mangin ara sa pagsuporta sa amon kabataan sa bisan ano nga tion, bisan ano nga sitwasyon, kag bisan ano nga paagi. Ang tagsa ka bata pinasahi, daku ang ila bili sa Dios, kag bisan ano pa ang mga hangkat, mga sala, kag mga kahuyangan nila, palangga sila sang Dios kag palangga namon sila.

Pagbaton ko sining tawag nga mangin General Authority, sa adlaw antes sang amon biyahe pa-Salt Lake, ang tanan namon nga kabataan kag ila mga pamilya nagtipon sa amon balay para sa family home evening, sa diin ginpabutyag namon ang amon pagpalangga kag pagpasalamat. Pagkatapos sang leksyon, ginhatagan ko sang priesthood blessing ang tagsa ko ka bata. Ang tanan naghibi. Pagkatapos sang mga bendisyon, ang kamagulangan ko nga bata nagpasalamat para sa tanan, sa daku nga pagpalangga nga ginhatag namon sa ila halin sa ila pagkatawo asta sadto nga tion.

Bendisyoni ang inyo kabataan, bisan 5 ukon 50 man ang ila edad. Updi sila; mangin ara para sa ila. Bisan pa nga ang pag-aman sang mga kinahanglanon obligasyon nga ginpahamtang suno sa plano sang Dios, indi naton pagkalimtan ang mag-ambit sang malipayon nga mga tinion upod sa aton kabataan.

Ang pagpalangga sang aton Amay nga Langitnon sa tagsa Niya ka anak tunay. Ara Sia para sa kada isa. Wala ako nakahibalo kon paano Niya ini ginahimo, pero ginahimo Niya. Sia kag ang Iya Panganay nagaisa sa paghimo sang buluhaton kag himaya sang Amay, nga “ipahanabo ang pagkawala’y kamatayon kag kabuhi nga wala’y katapusan sang tawo.”¹⁰ Ginpadala Nila sa aton ang Balaan nga Espiritu agud giyahan kita, paandaman kita, kag agud pasulhayan kita kon kinahanglanon.

Ginsugo Niya ang Iya Pinalangga nga Anak sa pagtuga sining matahum nga kalibutan. Ginsugo Niya si Adan kag si Eva kag ginhatagan sila sang ila kahilwayan sa pagpili. Nagpadala Sia sang mga mensahero sa madamo kaayo nga tinuig agud nga mabaton naton ang Iya gugma kag Iya mga kasugoan.

Ara Sia sa Sagrado nga Kakahuyan nga nagasabat sang sinsero nga pamangkot sang lamharon nga si Joseph kag ginatawag sia sa iya ngalan. Siling niya: “Ini ang Akon Hinigugma nga Anak. Pamatii Sia!¹¹

Nagapati ako nga ang pinakamataas nga pagpakita sang gugma sang Dios para sa aton natabo sa Getsemani, sa diin ang Anak sang buhi nga Dios nagpangamuyo, “Amay ko, kon mahimo, ilikaw sa akon ini nga kupa sang pag-antos! Pero indi ang akon kabubut-on ang matuman, kundi ang imo.”¹²

Nakita ko nga ang diutay ko nga maintiendihan parte sa Pagbayad-Sala ni Jesucristo nagadugang sang akon pagpalangga sa Amay kag Iya Anak, nagabuhin sang akon huyog nga magpakasala kag mangin malalison, kag nagadugang sang akon kahanda nga mangin mas maayo kag maghimo sing mas maayo.

Si Jesus naglakat nga wala sing kahadlok kag pangduhaduha pakadto sa Getsemani, nga nagasalig sa Iya Amay, kay nakahibalo nga kinahanglan Niya linason ang linasan sang alak nga isahanon. Ginbatas Niya ang tanan nga kasakit kag kahuy-anan. Ginpasibangdan sia, ginhukman, kag ginlansang sa krus. Sa tion sang Iya kaugalingon nga kasakit kag pag-antos sas krus, si Jesus nagtutok sa panginahanglan sang Iya iloy kag iya pinalangga nga disipulo. Ginhatag Niya ang Iya kabuhi.

Sa ika-tatlo nga adlaw nabanhaw Sia. Ang lulubngan wala sing unod; nagatindog Sia sa tuo-nayon nga kamot sang Iya Amay. Nagalaum Sila nga pilion naton nga tumanon ang aton mga kasugtanan kag magbalik sa Ila presensya. Ining ika-duha nga kahimtangan indi ang aton katapusan nga kahimtangan; indi kita sakop sining dutan-on nga puluy-an kundi walay katapusan kita nga mga persona nga nagakabuhi sa umalagi nga mga eksperiyensya.

Si Jesus amo ang Cristo, ang Anak sang buhi nga Dios. Buhi Sia, kag tungod buhi Sia, ang tanan nga mga anak sang Dios magakabuhi sa walay katubtuban. Salamat sa Iya nagabayad-sala nga sakripisyo, sarang kita tanan magkabuhi upod sa Ila. Sa ngalan ni Jesucristo, amen.