Magmangin Perpekto sa Iya

Ang aton Amay nga Langitnon kag aton Manluluwas nga si Jesucristo may gahum sa pagluwas sa aton, kag sa pagbag-o sa aton. Mabuligan Nila kita nga mangin pareho sa Ila.

Pila lamang ka tuig nga nagligad, isa sang amon mga apo nga si Aaron nagsugod nga magkaproblema sa ikaayong-lawas. Ginakapoy sia, may mga lagob, kag daw indi maayo ang panglawas. Pagkatapos sang pagpaeksamin, natukiban nga may ara sia sang grabe nga aplastic anemia, isa ka balatian nga sa diin ang utok sang iya tul-an nag-untat na sa paghimo sang red blood cells, white blood cells, kag platelets. Kon indi mabulong kag mag-ayo sa ulihi, ang iya dugo indi magkorta sing husto ukon makabato sa mga impeksion, gani bisan ang gamay lang nga pagkatumba, mga kasamaran, ukon mga balatian madasig nga mangin makamamatay.

Sa sulod sang pila ka tion, si Aaron nagbaton sang regular nga pagtughong sang platelet kag sang dugo agud mangin hilway sia sa peligro. Ang mga doktor nagpaathag nga ang bulong gid lang sa balatian amo ang bone marrow transplant, kag ang pinakamaayo nga resulta maagom kon utod ang magdonar. Kon isa sang iya mga utod kasanto gid niya, ang resulta sang transplant mahimo nga makasalbar-kabuhi. Ang iya apat ka manghod nga lalaki gin-eksamin, kag ang isa, si Maxwell, nakit-an nga kasanto gid.

Bisan pa nga may yara sang kasanto gid nga magdonar, ang transplant sang utok sang tul-an posible sa gihapon nga may daku nga risgo sang mga komplikasyon. Nangin kinahanglanon sa sini nga proseso nga ang mga selula ni Aaron sa iya balatianon nga utok sang tul-an kinahanglan nga gub-on sang kombinasyon sang chemotherapy kag radiation antes niya mabaton ang stem cells halin sa utok sang tul-an sang iya utod nga si Maxwell. Dayon tungod sang nakompromiso nga immune system ni Aaron, kinahanglan sia nga painon sa sulod sang ospital sing pila ka semana kag dayon sa iya puluy-an sing pila ka bulan nga may espesyal nga mga pagsulundan, mga limitasyon, kag mga bulong.

Ang ginalauman nga resulta gikan sa transplant amo nga ang lawas ni Aaron indi magsikway sang mga selula sang tag-donar kag ang mga selula ni Maxwell amat-amat nga maghimo sang ginakinahanglan nga red kag white blood cells kag platelets sa sulod sang lawas ni Aaron. Ang madinalag-on nga transplant halin sa tag-donar nagatuga sing matuod-tuod gid nga pagbag-o sa lawas. Nakibot gid ako sang ang doktor nagpaathag nga kon si Aaron maghimo sing krimen kag may dugo niya nga mabilin sa natabuan sang krimen, pwede arestohon sang mga pulis ang iya utod nga si Maxwell. Tungod ini nga ang dugo ni Aaron magahalin sa ginsaylo nga mga selula ni Maxwell kag may DNA ni Maxwell, kag mangin amo sini sa nabilin nga bahin sang iya kabuhi.

Ang pagsalbar kay Aaron paagi sa dugo sang iya utod nagtuga sang madamo nga panghunahuna parte sa nagabayad-sala nga dugo ni Jesucristo kag sa epekto sang Iya Pagbayad-sala sa aton. Luyag ko karon magtutok sa permanente, makahatag-kabuhi nga pagbag-o nga matabo kon tugtan naton ang Ginuo nga maghikot sang mga milagro sa aton.¹

Si Aaron wala sing ikasarang sa iya kaugalingon nga daugon ang balatian. Ang iya lawas indi makahimo sang mga selula sang dugo nga kinahanglanon agud masustiner ang iya kabuhi. Bisan ano ang iya himuon, indi niya mapaayo ang utok sang iya tul-an. Pareho nga si Aaron indi makapaayo sang iya kaugalingon, indi naton maluwas ang aton mga kaugalingon. Bisan pa nga kita makasarang, edukado, maalam, ukon mabaskog, indi naton matinloan ang aton mga kaugalingon gikan sa aton mga sala, mabag-o ang aton mga lawas padulong sa walay kamatayon nga kahimtangan, ukon mapahitaas ang aton mga kaugalingon. Posible lamang ini paagi sa Manluluwas nga si Jesucristo kag sa Iya walay dulonan nga Pagbayad-sala. “Wala na sing iban pa nga paagi ukon ngalan nga ginhatag sa idalom sang langit nga paagi sini ang tawo mahimo nga maluwas sa ginharian sang Dios.”² Ang Iya nagabayad-sala nga dugo ang nagatinlo sa aton kag nagapakabalaan sa aton.³

Bisan pa nga si Aaron indi makapaayo sang iya kaugalingon, kinahanglan mangin handa sia sa paghimo sang ginapangayo sang mga doktor agud mangin madinalag-on ang pagtransplant —bisan pa tama kabudlay, makahalangkat nga mga butang. Bisan pa nga indi naton maluwas ang aton mga kaugalingon, kon magpaidalom kita sa kabubut-on sang Ginuo kag magtipig sang aton mga kasugtanan, ang alagyan bukas para matubos kita.⁴ Pareho sang talalupangdon nga proseso sang mismo nga DNA sang mga selula sang dugo ni Aaron nga nagabag-o, mabag-o naton ang aton mga tagipusuon,⁵ mabaton naton ang Iya imahen sa aton mga nawong,⁶ kag mangin bag-o nga mga tinuga kay Cristo.⁷

Si Alma nagpahanumdum sa katawhan sang Zarahemla parte sa nauna nga henerasyon nga nahaylo. Sa paghambal parte sa iya amay, si Alma nagpaathag nga “suno sa iya pagtuo may dako nga pagbag-o nga natabo sa iya tagipusuon.”⁸ Dayon namangkot sia, “Naagyan bala ninyo ining dako nga pagbag-o sa inyo mga tagipusuon?”⁹ Indi ang mga tawo ang nagbag-o sang ila kaugalingon nga mga tagipusuon. Ang Ginuo ang naghikot sang aktwal nga pagbag-o. Ginpaathag gid ini ni Alma. Nagsiling sia, “Tan-awa, ginbag-o niya ang ila mga tagipusuon.”¹⁰ “Nagpaubos sila sang ila mga kaugalingon kag nagbutang sang ila pagsalig sa matuod kag buhi nga Dios … [kag] tampad sila tubtob sa katapusan … [kag] naluwas sila.”¹¹ Ang mga tawo nangin handa sa pagbukas sang ila mga tagipusuon kag paggamit sang pagtuo, kag dayon ginbag-o sang Ginuo ang ila mga tagipusuon. Kag daw ano kadako nga pagbag-o ato! Hunahunaa ang kinalain sa mga kabuhi sining duha ka lalaki nga ginatawag nga Alma antes kag pagkatapos nga nabag-o ang ila mga tagipusuon.¹²

Mga anak kita sang Dios nga may halangdon nga padulongan. Mahimo kita mabag-o agud mangin pareho sa Iya kag mag-angkon “sang kabug-osan sang kalipay.”¹³ Si Satanas, sa pihak nga bahin, luyag nga mangin miserable kita pareho sa iya.¹⁴ May ikasarang kita sa pagpili kon sin-o ang aton sundon.¹⁵ Kon sundon naton si Satanas, ginahatagan naton sia sang gahum.¹⁶ Kon sundon naton ang Dios, ginahatagan Niya kita sang gahum.

Ang Manluluwas nagtudlo nga kita “dapat mangin perpekto.”¹⁷ Daw daku gid ini nga hangkat. Makita ko sing maathag ang akon personal nga kakulangan kag narealisar gid ang distansia sa ulot naton kag sang pagkaperpekto. Mahimo nga may huyog kita sa paghunahuna nga kinahanglan naton nga himuon nga perpekto ang aton mga kaugalingon, pero indi ina posible. Ang pagsunod sang tagsa ka suhestiyon sa tagsa ka libro sa kalibutan tuhoy sa pagbulig sa kaugalingon indi makapahanabo sini. May isa lamang ka dalan kag isa ka ngalan nga sa diin maagom ang pagkaperpekto. Kita “naperpekto paagi kay Jesus nga manugpatunga sang bag-o nga kasugtanan, nga nagtuman sining lubos nga pagbayad-sala paagi sa pagpaagay sang iya kaugalingon nga dugo.”¹⁸ Ang aton pagkaperpekto posible lamang paagi sa grasya sang Dios.

Mahunahuna bala ninyo kon ano kamakahalawhaw kuntani para sa amon lamharon nga apo nga si Aaron ang magpinsar nga sia mismo ang dapat mag-intiendi kag maghikot sang tanan nga medikal nga proseso nga naangot sa iya transplant? Indi naton dapat paminsaron nga kinahanglan naton himuon ang mahimo lamang sang Manluluwas sa milagroso nga proseso sang aton pagmangin perpekto.

Sa pagtapos ni Moroni sang iya kasulatan, nagtudlo sia, “Huo, magkari kay Cristo, kag magmangin perpekto sa iya, … kag kon inyo dumilian ang inyo mga kaugalingon sang tanan nga pagkadi-diosnon, kag palanggaon ang Dios sa inyo bug-os nga ikasarang, kaisipan kag kusog, nian ang iya grasya igo para sa inyo, agud paagi sa iya grasya mahimo kamo nga maperpekto kay Cristo.”¹⁹ Daw ano kasulhay kag kagamhanan nga kamatuoran! Ang iya grasya igo para sa akon. Ang iya grasya igo para sa imo. Ang iya grasya igo para sa tanan nga “ginabudlayan kag ginabug-atan.”²⁰

Sa mga pagbulong pareho sina sang kay Aaron, ang resulta sa masami wala sing kapat-uran. Sa pagkamatuod, nagkinahanglan si Aaron sing ika-duha nga transplant kay ang una may mga komplikasyon. Maayo na lang, tungod sang espirituhanon nga pagbag-o sang tagipusuon, indi na kami kinahanglan magpalibog kon matabo ina. Kon magkabuhi kita suno sa Iya kabubut-on, “nga nagasandig sing bug-os sa mga merito niya nga gamhanan sa pagluwas,”²¹ may yara sang 100 porsiyento nga garantiya nga matinloan kita sang dugo sang Manluluwas kag sa ulihi maperpekto sa Iya. Sia “isa ka Dios sang kamatuoran, kag indi [mahimo] nga magbutig.”²²

Pat-od gid nga ining proseso sang pagbag-o nagakinahanglan sing tion kag indi makompleto tubtob pagkatapos sining kabuhi, pero sigurado ang promisa. Kon ang pagtuman sang mga promisa sang Dios daw madugayan pa matabo, padayon gihapon kita sa pagkapot sa sinang mga promisa, nga nakahibalo nga matuman ang mga ini.²³

Ang milagroso nga pagbag-o sa lawas ni Aaron nagdala sang dako nga kalipay sa amon pamilya. Hunahunaa ang dako nga kalipay sa langit samtang nagakatabo ang dako nga mga pagbag-o sa aton mga kalag.

Ang aton Amay nga Langitnon kag aton Manluluwas, nga si Jesucristo, nagapalangga sa aton kag maalwan nga nagtanyag nga bag-uhon kita kag himuon kita nga perpekto. Luyag nila nga himuon ini. Importante ini sa Ila buluhaton kag himaya.²⁴ Nagapamatuod ako nga may gahum Sila sa paghimo sini kon magpalapit kita sa Ila sa pagtuo. Sa ngalan ni Jesucristo, amen.