Magsunod kay Jesucristo sa mga Tikang sang Pagtuo

Salamat, choir, sa pagkanta sang “Faith in Every Footstep.” Ang tono kag mga tinaga sinang kanta ginsulat sang 1996 ni Brother Newell Dayley¹ sa paghanda para sa selebrasyon sang ika-150 nga anibersaryo sang pag-abot sang una nga mga pionero sa Salt Lake Valley sang 1847.

Bisan pa nga ining kanta ginsulat sa paghanda para sinang selebrasyon, ang iya sini mensahe magamit sang bilog nga kalibutan.

Nanamian gid ako sang koro:

Mga kauturan, nagasaksi ako nga kon sundon naton si Jesucristo nga may pagtuo, may ara sang paglaum. May paglaum kay Ginuong Jesucristo. May paglaum para sa tanan sa sining kabuhi. May paglaum nga madaug naton ang aton mga kasaypanan, aton mga kalisod, aton mga paghimud-os, kag aton mga pagtilaw kag kabudlayan. May paglaum sa paghinulsol kag pagbaton sang kapatawaran kag sa pagpatawad sa iban. Nagapamatuod ako nga may paglaum kag paghidaet kay Cristo. Mabuligan Niya kita karon nga malampuwasan ang mabudlay nga mga panahon. Ginhimo Niya ini sa una nga mga pionero, kag himuon Niya ini karon para sa tagsa sa aton.

Ini nga tuig ang ika-175 nga anibersaryo sang pag-abot sang una nga mga pionero sa Salt Lake Valley, nga nagdala sa akon sa pagpamalandong sa eksperiyensia sang akon mga katigulangan, ang pila sa ila naglakat halin sa Nauvoo pakadto sa Salt Lake Valley. May mga kalolohan ako sa tuhod nga nagpanglakaton sa mga patag sa ila pagkalamharon. Si Henry Ballard 20 anyos;³ Si Margaret McNeil 13;⁴ kag si Joseph F. Smith, nga sang ulihi nangin ika-anum nga Pangulo sang Simbahan 9 anyos lang sang nag-abot sia sa Salt Lake Valley.⁵

Nagpangatubang sila sang tanan nga sahi sang kawad-an sa dalanon, pareho sang tuman nga tigtulugnaw, balatian, kag kakulang sang nagakaigo nga bayo kag pagkaon. Halimbawa, sang si Henry Ballard nagsulod sa Salt Lake Valley, nagkalipay sia sa pagkakita sang “Dutang Panaad” pero nahadlok nga may makakita sa iya tungod ang iya ginasuksok nga bayo gurisnay nga wala ini lubos nga nagtabon sang iya lawas. Nagpanago sia sa likod sang mga kahoy-kahoy bilog nga adlaw asta nagdulom. Dayon nagkadto sia sa isa ka balay kag nagpangayo sang bayo agud nga makapadayon sia sa iya pagpanglakaton kag mapangita ang iya ginikanan. Nagpasalamat sia sa Dios nga nalab-ot niya ang iya palaabuton nga puluy-an sing luwas.⁶

Ang akon kalolohan nagsunod kay Jesucristo sa mga tikang sang pagtuo sa tagsa nila ka mga pagtilaw. Nagapasalamat ako nga wala gid sila nagpangampo. Ang ila mga tikang sang pagtuo nagbugay sa akon kag sa nagsunod nga mga henerasyon, pareho nga ang inyo mga tikang sang pagtuo subong magabugay sang inyo mga kaliwat.

Ang tinaga nga pionero pareho nga nombre (noun) kag berbo (verb). Bilang nombre mahimo ini magkahulugan sang tawo nga isa sang pinakauna nga naglagulad ukon nagpuyo sa bag-o nga teritoryo. Bilang berbo, nagakahulugan ini sang pagbukas ukon paghanda sang alagyan para sa iban nga magsunod.⁷

Kon hunahunaon ko ang mga pionero nga naghanda sang alagyan para sa iban, una ko gid madumduman ang Propetang si Joseph Smith. Si Joseph pionero tungod ang iya matinuohon nga mga buhat kag pagpili nagdala sa iya sa kakahuyan sa diin nagluhod sia sa pagpangamuyo kag ginbuksan ang alagyan agud maangkon naton ang kabug-osan sang ebanghelyo ni Jesucristo. Ang pagtuo ni Joseph nga “magpangamuyo sa Dios”⁸ sa sinang aga sang tigpamulak sang 1820 nagbukas sang paagi sa Pagpanumbalik sang kabug-osan sang ebanghelyo ni Jesucristo nga nagalakip sang mga propeta kag mga apostoles nga gintawag sa pag-alagad liwat sa duta.⁹ Nakahibalo ako nga si Joseph Smith propeta sang Dios. Nakahibalo ako nga ang iya matinuohon nga mga tikang nagdala sa iya nga magluhod sa presensya sang Dios nga Amay kag Iya Bugtong nga Anak, nga si Jesucristo.

Ang mga tikang sang pagtuo sang Propetang si Joseph naghimo sa iya nga mangin galamiton sang Ginuo sa pagpagwa sang Libro ni Mormon, nga isa pa gid ka testamento kay Jesucristo kag Iya nagabayad-sala nga grasya.

Paagi sa pagtuo kag pagpursigi ni Joseph Smith sa pihak sang di-matupungan nga mga kabudlayan kag mga upang, nangin instrumento sia sa mga kamot sang Ginuo sa pagpahamtang liwat sang Simbahan ni Jesucristo sa duta.

Sang nagligad nga pangkabilogan sang komperensya, naghambal ako parte sa kon paano ang akon full-time nga pag-alagad sa misyon nagbugay sa akon. Nabugayan ako sa akon pagtudlo parte sa mahimayaon nga plano sang aton Amay nga Langitnon, sa Unang Panan-awon ni Joseph Smith, kag iya paglubad sang Libro ni Mormon. Ining ginpanumbalik nga mga panudlo kag doktrina naggiya sang akon mga tikang sang pagtuo sa pagtudlo sa mga handa magpamati sang mensahe sang Pagpanumbalik sang ebanghelyo.

Ang aton mga misyonero subong mga moderno nga pionero tungod ginapaambit nila ining mahimayaon nga mensahe sa mga tawo sa bilog nga kalibutan, kag gani ginabuksan ang paagi para sa mga anak sang aton Amay nga Langitnon nga makilala Sia kag ang Iya Anak, nga si Jesucristo. Ang pagbaton sang ebanghelyo ni Jesucristo nagabukas sang paagi para sa tanan nga maghanda para sa kag magbaton sang mga ordinansa kag mga bugay sang Simbahan kag sang templo.

Sining ulihi nga pangkabilogan nga komperensya, ginsulit ni Pangulong Russell M. Nelson “nga ang Ginuo nagpangabay sa tagsa ka takos kag makasarang nga young man nga maghanda sa pag-alagad sa misyon” kag nga “ang misyon gamhanan pero opsyonal nga oportunidad” para sa “lamharon kag makasarang nga sisters.”¹⁰

Mahal kong young men kag young women, ang inyo mga tikang sang pagtuo makabulig sa inyo nga sundon ang pangagda sang Ginuo nga mag-alagad sa mga misyon—nga mangin moderno nga mga pionero—sa pagbukas sang paagi para sa mga anak sang Dios nga makasalapo kag magpabilin sa dalan sang kasugtanan pabalik sa Iya mahimayaon nga presensya.

Si Pangulong Nelson nangin pionero sa Simbahan. Bilang Apostoles, nagbiyahe sia kag nagbukas sang madamo nga mga lugar para sa pagwali sang ebanghelyo. Wala madugay pagkatapos nga nangin propeta sia kag Pangulo sang Simbahan, nagpangabay sia sa aton nga “dugangan ang [aton] espirituhanon nga ikasarang sa pagbaton sang rebelasyon.”¹¹ Nagapadayon sia sa pagtudlo sa aton kon paano pabakuron ang aton mga panaksihon. Sa isa ka debosyonal para sa young adults, nagsiling sia:

Ginapangabay ko kamo nga tatapon ang inyo panaksihon. Pangabudlayi nga maangkon ini. Mangin responsable sa pag-angkon kag pagtipig sini. Atipana nga magbakod ini. Sagura ini agud nga magdako. …

“[Dayon] hulata ang mga milagro nga matabo sa inyo mga kabuhi.”¹²

Ginatudloan Niya kita kon paano mangin mas espirituhanon nga makasandig-sa-kaugalingon. Nagsiling sia nga “sa maabot nga mga adlaw, indi posible nga makalampuwas kita sing espirituhanon kon wala ang nagagiya, nagatudlo, nagapasulhay kag dalayon nga impluwensya sang Balaan nga Espiritu.”¹³

Nagapamatuod ako nga si Pangulong Russell M. Nelson ang propeta sang Ginuo sa kalibutan subong.

Ang aton Manluluwas, si Jesucristo ang pinakamaayo nga pionero sa paghanda sang alagyan. Sa pagkamatuod, Sia amo “ang dalan”¹⁴ para sa plano sang kaluwasan nga matuman agud makahinulsol kita kag, paagi sa pagtuo sa Iya, makabalik sa aton Amay nga Langitnon.

Siling ni Jesus, “Ako amo ang dalan, ang kamatuoran, kag ang kabuhi, wala sing may makakadto sa Amay kon indi paagi sa akon.”¹⁵ Nagpromisa sia nga indi Niya kita pagbayaan nga mga ilo; Magabalik Sia sa aton sa aton mga pagtilaw.¹⁶ Gin-agda Niya kita nga “[magkari] sa [Iya] nga may bug-os nga katuyuan sang tagipusuon, kag paayuhon [Niya] [kita].”¹⁷

Nagasaksi ako nga si Jesucristo ang aton Manluluwas kag aton Manunubos, ang aton Mananabang sa Amay. Ang aton Amay nga Langitnon nagbukas sang alagyan agud nga makabalik kita sa Iya paagi sa pagsunod sa Iya Pinalangga nga Anak, nga si Jesucristo nga may pagtuo sa tanan naton nga ginahimo.

Ang akon kalolohan-sa-tuhod kag iban pa nga una nga mga pionero nagpangatubang sang madamo nga mga upang sa ila pagbiyahe paagi sa mga karwahe, mga karo, kag paglakat pakadto sa Salt Lake Valley. Kita man magapangatubang sang mga hangkat sa aton indibidwal nga mga pagpanglakaton sa bilog naton nga kabuhi. Wala kita nagatulod sang mga karo ukon nagamaneho sang mga karwahe sa taklaron nga mga bukid, kag nagalusot sa madamol nga mga tumpok sang yelo; nagatinguha kita pareho sa ila nga madaug sing espirituhanon ang mga tentasyon kag mga hangkat sang aton panahon. May mga banas nga dapat naton lakton; may mga bungyod—kag kon kis-a mga bukid—nga dapat taklaron. Bisan pa nga ang mga pagtilaw sa karon lain sangsa iya sadto sang una nga mga pionero, indi ang mga ini mas mahapos para sa aton.

Importante nga sundon ang propeta kag malig-on nga magpamat-od sa paghimo kag pagtuman sang mga kasugtanan sa Dios, pareho sang una nga mga pionero.

Sundon naton si Jesucristo nga may pagtuo sa tagsa ka tikang. Kinahanglan naton mag-alagad sa Ginuo kag mag-alagad sa isa kag isa. Kinahanglan naton pabakuron ang aton mga kaugalingon sa esprituhanon paagi sa pagtuman kag pagtahod sang aton mga kasugtanan. Indi naton dapat pagkalimtan ang kakinahanglanon sang pagtuman sang mga kasugoan. Ginatinguhaan ni Satanas nga paluyahon ang aton katampad kag pagpalangga sa Dios kag kay Ginuong Jesucristo. Palihog dumduma nga kon may sin-o man nga magtalang, indi gid kita madula sa aton Manluluwas. Sa bugay sang paghinulsol, makadangop kita sa Iya. Buligan Niya kita nga magtuon, magtubo, kag magbag-o sa aton pagtinguha nga magpabilin sa dalan sang kasugtanan.

Kabay nga sundon naton pirme ang mga ginhimo ni Jesucristo kag, nga may pagtuo sa tagsa ka tikang, magtutok sa Iya, nga malig-on nga ginapahamtang ang aton mga tiil sa dalan sang kasugtanan, ang akon mapainubuson nga pangamuyo sa ngalan ni Jesucristo, amen.