A Jesus Kristo a Klisichir a Rengeasek

Kemiu el sechelik, omko Osobel a mla er tia er chelechal taem, e ngerang dmu er kemiu?

A kuumera el kmo Ngii omuchel lochotii a dmolech el beltkil a rengul le ko er kemiu. Ng locha dulii, eng di dirrek el mesisiich—el mocholt lokiu Ngii el dechor medemiu— meng diak mokor, el mo melchesuar a mesisiich el beltikereng er ngii, er a chelsel a rengmiu el rokir!

Eng di, kede rokui el el mechitechut e olngesonges, me a bebil er a tekoi a sebechel soiseb er a uldesuiu. Kom locha lmatk aikel chelbirukel el mriruul, me a taem el mrirebet er a ongetikaik, tekoi el mouchel er a rengum el riruul—a lechub e ke oureng el riruul mo ungil.

A Osobel a mo melchesuar tiang, e a kuumera el kmo Ngii a mo dmu er kemiu aikel tekoi el Ngii a mla dmu er a chelsel chedaol llechukl:

“Lak ko medakt.”¹

“Lak moumededenger.”²

“Bo mngara deurreng.”³

“Lak el sebek a rengum.”⁴

A kumdasu e Ngii a diak di bo el kengei a telmellem. E diak bo longesadel. Ng diak, Ng bai mo olengit er kau el mo ouchel a rengum—e mocheuekl a kngtim, e mengodech, me bo el sebechel lousubes er kau. Ngii a mo omeklatk er kau el kmo eru el telael rak er a memong e Ngii a chilol a kngtim me bo el sebechem el mo ouchel a rengum. Tiaikid a telengtengil a uldasu er a deureng el sengk el mei er kid el mla er a oubeltikereng el Chedam er a Babeluades.

A Jesus a locha mo masech a telbilem Lobengkel—el mririuul er sera ometecholb e omekbeches er a bek el taem el molai er a sakrament—el ngii meskau a tokubets el deleuill Lobengkel. A deleuill losaod er kid chedaol llechukl a sel dmak el rrengodel me luchul, e ngokiu a ngesou er Ngii, eng mo sebechem lotekau a ngii di el berraod.⁵

A kuumera el kmo a Jesus Kristo a soal omesang, e molchesuar, e bo modengei el kmo Ngii a klisichem. Le ngokiu a ngesou er Ngii, eng diak a torbengau er a ikel sebechem el remuul. Le sel ultekellem a diak a telkelel. Ngii a soal omesekau er sel Ngii osengel er kau. El ngii a kmal ngodech er sel osengel a beluulechad el kirem.

A Osobel a mo dmu el kmo, el diak a mtekengii el tekoi, kau a redil e sechal ngelekel a Ngarbab el Dios. A Demam er a Babeluades a kot el meang el chad er a beluulechad el rokir, el mui er a beltikereng, deurreng, klikiiid, chedaol, llomes, chubechub, me a klemerang. El ta er a klebesei e Ngii a soal a bom ngai aike el rokui lolab.⁶

Tiaikid a uchul e ke ngara beluulechad—el mesuub, mukeroul, e omakes el mo er a ikel rokui el Demam er a Babeluades a milebau el kirel.

Sel mo kudmeklii tiang, e Ngii a uldureklii a Jesus Kristo el mo Osobelem. Tiai a moktek er a Uldesuel kirel a deurreng, Ikelesia er Ngii, priesthood er Ngii, chedaol llechukl—me ngii el rokui.

Tiaikid a ulebengelel omerollem. Tiaikid a mo ta er a klebesei er kau. Tiaikid omolilt er ngii!

Sel kmal techel a uldesuel a Dios el kirel a deureng a sel klisichem el melilt.⁷ Ng uaisei, el Demam er a Babeluades a soal omngiltii a diak a ulebengelel deureng Lobengkel, e Ngii a mo ngosukau el kirel, eng di Ngii a kmal diak bo lorrimel er kau.

Meng mechikau meng di kau el melilt: er a Llomes a lechub a iilkolk? Ungil a lechub a mekngit? Deureng a lechub a klengitelreng? Diak a ulebengelel klengar a lechub a kodall er a reng?⁸

Ng ko er a uaia le beot lomelilt, ng uaisei? Eng di, klengar tial beluulechad, a rulii meng uaia le cheliseksikd e diak el kirel uaisei.

A mondai a kmo ng diak de blechoel mes a tekoi el kmal mo bleketakl er sel ngii a soad. A Apostol Paulus a omekesiu er ngii el kmo ng uaia domes “er a mekngit el dirk, el diak el bleketakl.”⁹ Ng klou a rraureng er a beluulechad el kirel a kmo ngera ungil e ngera mekngit. A klemerang a mla obult el rulii a mengit el uaia lungil e a ungil a uaia le mekngit.¹⁰

Eng di a lsekum eke mera losiik er a klemerang—el diak a ulebengelel, e diak el mengodech el klemerang—eng mo bleketakl aikel molilt el tekoi. Oi, ng mo er ngii ongetikaik me a ongarm. A mekngit a di melemolem el ngarngii. Me a mengasireng el tekoi. Kerior. Eng di ng sebechem el mo selbechakl sel modengei el kmo ke techang, e ngera me ke ngara tiang, e multuil er a Dios.

A leuaisei e ke metik er a klemerang er ker?

Ngara chelsel a ebangkelio er a Jesus Kristo. Ea cherrengelel tial ebangkelio a mosisechakl er a chelsel a Ikelesia er a Jesus Kristo er a Uriul-klebesei el Santo.

A Jesus Kristo a dilu el kmo “Ngak a rael, e klemerang, e klengar: ng diak a chad el mo er a Chedam, a lak lokiu ngak.”¹¹

A le ngarngii a klou a belkul lomelilt el moruul, e a Jesus Kristo me a mla moluut el ebangkelio er Ngii a kot el bedochel lomelilt. A le ngarngii a kerim, e a Jesus Kristo me a mla moluut el ebangkelio er Ngii a bedochel nger. A momelchesiu el mechitechut, e a Jesus Kristo a klisichem.

Ngii a mesterir a remechitechetong a klisichir, me tirkel lomelchesiu el dikea klisichir, e Ngii a mo choisois a klisichir.

Tirkel ulsirs er a Rubak a mo metik a klisichir el mukbeches.¹²

Sel mo uchul e ke metik er a Rael e ngosukau el remuul osischeklel a Kristo el mo omekrael er a klengar kau, e a Ikelesia er a Jesus Kristo er a Uriul-klebesei el Santo a mla kudmeklii a beches, el teletelel sel babier el Kirel a Klisischir a Rengeasek.

siasing/Llecheklel

Ng beches lecheklel sel 2011 el Kirel a Klisichir a Rengeasek.

Ng kmeed el betok er a okeim el rak, e a babier el Kirel a Klisichir a Rengeasek a mla omekrael er a rebetok el telcheroll er a rengeasek el Uriul-klebesei el Santo. Ak blechoel diobang el ngara bokketengek, e ouchais el kirel el mo er a rechad el tir a semeriar el kirel osischekled. Ng mla mukbeches e mekedmokl lultuil er a ikel ringel me a ongetikaik el dechelbangel er chelechal taem. Tial beches el babier el Kirel a Klsiichir a Rengeasek a ngarngii er a online er a okeim el kakerous lomelekoi e dirrek el mo llechukl er a babier. Ng kmal mo klou a ultutelel el kirel aikel molilt er a klengar kemiu. A kulengit me bo murrekodel er ngii e momerk er ngii el mo er a resechelimiu.

siasing/Llecheklel

Sel 2022 lecheklel a babier el Kirel a Klisichir a Rengeasek

Tial beches lecheklel a babier el Kirel a Klisichir a Rengeasek a ngarngii a kedeb el dai er ngii el kmo A Guide for Making Choices.

E msall ek sal meketeklii el kmo, a kot el bedochel lokesiu el sebechiu el mo kerbai er ngii sel molilt a Jesus Kristo. A Jesus Kristo a ngii a klisichir a rengeasek.

A leuaisei e a moktek er a babier el Kirel a Klisichir a Rengeasek a melutk el bedul Ngii. Ng osischeklau a diak a ulebengelel klemerang er a mla moluut el ebangkelio er Ngii—klemerang er a kmo kau ke techang, e Ngii ng techang, e ngera sebechem el remuul lultuil er a Klisichel. Ng osischeklau el kmo ng mekera omolilt er a llemalt loltirakl aikaikid el klemerang.¹³

Ng dirrek el klou a belkul bo modengei el kmo tial babier el Kirel a Klisichir a Rengeasek ngera ikel kuk diak loruul. Ng diak lolilt el kirem. Ng diak el du er kau el kmo “choi” ng “diak” er a bek el ngerang el molilt el meruul. A babier el Kirel a Klisichir a Rengeasek a melutk el kirel a dodai er a omelilt er kau. Ng melutk el kirel aikel mekreos er kau el tekoi, suobel, me a osisechakl e diak longetukl a tokubets el blekeradel.

A Rubak, lokiu a Reprofet er Ngii, a di mla omekrael er kid er tiaikid el teletael. Ngii olengit er kid me bo “doleketek er sel chedaol [ultekelled] el ngmai chedaol ocholt.”¹⁴ Ngii olengit er kid el mo “Rongesii.”¹⁵ E Ngii omekedong er kid el mo oltirakl er Ngii er a ngarbab e chedaol teletael.¹⁶ E kede mesuub a osisiu el teletael er a bek el sandei lokiu a hong el Mei, e Moltirakl er Ngak.

A kumdasu el kmo tial babier a sebechel meskau a betok el tekoi el uaia rua bail el diak el kirem loubail, tekoi el diak el kirem el melekoi, me a katsudo el diak el kirem lomes. Eng di tiang locha kmal ngarngii a relii er tial di mekelkelii a beluulechad el ikelesia? Tiaikid el teletael ng locha meral kudmeklau el mo oltirakl a blekerdelel a Kristo er a klengar kau el rokir?

A Joseph Smith a dilu el kmo, “A kulisechakl er tir a meral osisechakl, e tir a di tir lomtebechel er tir.”¹⁷

A King Benjamin a dilu er a rechedal er a chelsel a Babier er a Mormon el kmo, “Ng diak el sebechek el masech er kemiu aikel rokui rolel e kom ruebet er a klengit; e leng betok a rolel me a teletelel, el kmal imis el betok el diak el sebechek el mechur.”¹⁸

E millemolem a King Benjamin el melekoi el kmo, “Eng di tiakid ak delii er kemiu, … bom kerekikl omerelliu, me a uldesuiu, me a omelkingiu, me a blekerdeliu, e moltirakl a llechul a Dios, e molemolem el ngara klaumerang er a … Rubak, el mo el muut er a ulebongel.”¹⁹

siasing/Llecheklel

Osobel el Jesus Kristo

Ng mekngit a le ngarngii a llach? Ng kmal diak. Kede rokui lousbech er a bek el sils. Eng di diak el melemalt a dotilii a moktek er kid er a llach e lak dotilid er a Osobel. Ng kirem el mo medengei el kmo ngera uchul e mekera teletelel e sola omdasu el kirel a uriul taem er a ikel molilt el meruul. Ng kirem lotilii a klaumera er kau er a Jesus Kristo. Ngii a mo mekrolau er a llemalt. Ngii a klisichem.²⁰

A babier el Kirel a Klisichir a Rengeasek a bleketakl louchais osischeklel a Jesus Kristo. Ng bleketakl el siotai er kau el mo melilt omeruul tekoi lultuil er a osischeklel a Kristo. E dirrek el kmal bleketakl el smaod a klengeltengat el Jesus Kristo a mla yaksok el mo er tirkel loltirakl er a Rolel.²¹

A President Russell M. Nelson a ulisechakl el kmo: “Sel sekum e ke mui el soam el kongei er a Dios meng mo omtebechel er a [klengar kau], … eng betok el tekoi el molilt el meruul a mo beot. … Betok el mondai a mo diak a belkul mondai! Ke medengei el kmo ng mekera omongedmokl er kau. Ke medengei el kmo ngera komes e ngera ke menguiu, e ker a mchoit a temem er ngii, e te ngera mobengterir. Ke medengei el kmo ngera soam el mo kudmokl. Ke medengei el kmo ngera el teletelel a klechad … a soam el mo er ngii.”²²

A Jesus Kristo a ngarbab a llechul kirir a roltirakl er Ngii. Ea ongit el mo meral losiik er a Soal e oltirakl a merang el Llechul a ngii a kot el ngarbab el teletael!

A meklou a belkul omelilt er a tekingel a klechad me a chedaol tekoi a diak el kirel di ultuil er sel soal a chad, a lechub e sel ungil er ngii a lechub eng chetengakl.²³ A Rubak a diak el du el kmo, “Moruul aikel soam.”

Ng bai dmu el kmo, “Bechere Dios me lomtebechel.”

E dirrek el Ngii a kmo, “Mei, e moltirakl er ngak.”²⁴

Ngii a melekoi el kmo, “Bom kiei er a chedaol, e ngarbab, e ultebechel el rael.”

E Ngii a melekoi el kmo, “Moltirakl a llechuk.”

A Jesus Kristo a cherrungel lokesiu, e kid a melasm el mo er sel tkul er bab el sebeched el mo oltirakl er Ngii.

Kemiu el sechelik, me kluut el dulii, omko Osobel a dechor medemiu er chelechal sils, eng mochotii a diak a ulebengelel beltkil a rengul kiriu, me sel mui el klaumera er Ngii er kemiu. Ng mo dmu er kemiu el kmo ng sebechiu el kudmeklii. Ng sebechiu el toketekii a ungil, e deuil a reng el klengar le Jesus Kristo a ngii a klisichiu. Ko mo mui el medengei, e metik er a budech, me a selbechakl, e ngara deurreng, er chelechang me a diak a ulebengelel, e mo metik el kmo ngii el rokui a ngara Jesus Kristo, me a ebangkelio er Ngii, me a Ikelesia er Ngii.

A kuchotii a meral sioning er ngak el Apostol er a Rubak el Jesus Kristo e meskemiu a meral ngara renguk el klengeltengat lobengkel a dmolech lomereng el saul me a beltikereng le ko er kemiu, el ngara ngklel a Jesus Kristo, amen.