Bo moumerang er a Dios me a Urerel

Tial mo merek el October, e ak milengilt lobengkel a President M. Russell Ballard me a Elder Jeffrey R. Holland, el mo oldingel er a United Kingdom, el kemam el tedei a mle ngarngii el mesiou el misionari er sera ki mekekere el chad. Mle techellam el olisechakl e sioning, e dirrek el ulemes a ikel reksi er a uchelel a ikelesia er a beluu er a Britain, el demal a demak el rubak el Heber C. Kimball me a rulureor lobengkel a mla risei el mle kot el misionari.¹

A President Russell M. Nelson, a ulengelakel er kemam el kirel tial ki bo moruul er ngii, ng ulemes el kora ngodech el tekoi el tedei el Apostol a mo oldingel er a basio el tir a mle mesiou er ngii el misionari er a le ngeasek. Ng millekoi el kmo tirkal rokui a mle sorir a bo lolilt er tir el mo oldingel er a ikel ble losiou el beluu. Ng mlo klikmechur a medal, e mocha bleketakl el smodii el kmo alsekum eng mlarngii a bebil er a uleak uchei el Tedei el Apostol el tir a mlara osisiu el mision er a okolem el rak ra memong, e te locha mo nguu tial osisiu el ureror.

siasing/Llecheklel

Heber C. Kimball

Sera kungedmokl er ngak el kirel tial okedong, e ak liluut el menguiu er sel Life of Heber C. Kimball, el milluches er ngii a ngelekel a ngelekel el Orson F. Whitney, el uriul eng mlokedong el mo apostol. Tial hong a le bilskak a betik ra renguk el delak er sera bochul euid a rekik. A ki milngedmokl er kemam el mo er a oterkeklel a This Is the Place Monument er sera July 24, 1947, el milngedmokl er ngii a President George Albert Smith.² Ng mle soal a bokudengei a lmuut el bebil er a tekoi el kirel a beldekek er a Heber C. Kimball.

Tial hong a ngarngii a dmolech el tekoi el kirel a President Kimball el ngii a klou a ultutelel er chelechal de ngarngii el taem. Uchei er a bo kuuchais aikal tekoi, e bok telkib el smodii a cheldechedechal.

A Prophet Joseph Smith er a le kelebus er a Liberty Jail, ea Apostol Brigham Young me a Heber C. Kimball a mla er ngii a ngerchelir, e tia sel kmal mle meringel el taem, le te ulungerachel er a omelukl er a re Santo el kiliei er a Missouri. Tial omelukl a mle klou el ureor e le sel tekingel a Governor Lilburn W. Boggs lultebedii el di kirir lolekngemed er tirkal Santo.³

Kmeed el okedei el rak ruriul e a Heber C. Kimball, seikid el taem eng ngara Kot el Presidency, a ulemdasu er tial reksi el mo lobengkel a beches el telecheroll, a ulsisechakl, “Msall e kdu er kemiu, el kmo ng betok er kemiu a mo mes a sils el kemiu a mo soiseb er a chelsel a rokui el metacherbesul tekoi, ongarm me a odechelakl el sebechemiu el otekau, me a betok el techall el mo olecholt el kmo kau a meral oumerang el kirel a Dios me a Urerel.”⁴

A Heber a millemolem: “Sel mo mchebangel a ikal metacherbesul tekoi el merael mei, eng ulsbechall el kau a kirem el ngarngii a klemedengei er kau er a klemerang el kirel tial ureror. Sel ngii a mo chetituokel sel sechal ma redil a lak a klemedengei er tir ma lechub a sioning er tir e le te mo ruebet. A lsekum meng diak a sioning er kau, bom kiei lokiu a llemalt, e momekedong el mora Ruak e lak el mekimd dil [merko] [omnguu] a sioning er kau. Alsekum eng diak mnguu e kau a mo diak el sebechem el dechor. . … A sils a mei el sechal malechub a redil a mo diak el sebechel el otekau a rokui sel lsekum ngousbech a llomes el loleng er a tara chad. A derta el chad a kirel mo mukrael lokiu a llomes el ngara chelsel. A lsekum eng diak mobang e kau a diak el sebechem el dechor; maleuaisei e mosiik er a sioning er kau er a Jesus e bo murrekodel er ngii, me sel lemei sel ongarm e lak bo mubuu em rebet.”⁵

A derta er kid a kirel lobang a sioning er ngii er a Urerel a Dios⁶ me a ulterekokl el ngerchelel a Jesus Kristo. Sel 76th section of the Doctrine and Covenants a melekoi el kirel a ikel kldei el dauch er a klebkall e ngii a mengaisisiu er sel kot el ngarbab el klebkall el mora sils. E kuk mo mengaisisiu er sel ongeru el renged el diua buil.⁷

Tia kora ngodech e le a sils a dingii loba llemesel, eng di a buil a didichel a sils el meluich er ngii malechub eng “melai a didichel ra sils.” Sel dosaod er sel ongerul dauch er a renged, bades 79 a melekoi el kmo ngarngii tirkel “tir a diak el mesisiich a klaumera er tir er a Jesus.” Ng diak el sebeched el monguu sel kot el ngarbab el dauch er a renged e mo kiei lobengkel a Dios el Chedam el dousbech ra llomes el lobang a tara chad; ng kired el oba meral sioning er kid er a Jesus Kristo me a ebangkelio er Ngii.

Kede kiei er a beluulechad el betok a klengit er ngii⁸ me a reng el mla mo ikrii a Dios e le a uldesuir a rechad.⁹ A tara kot el mesisiich el okesiu el ngara chedaol llechukl el Heber C. Kimball a simbai el kirel a ngeiul a sioning er a urerel a Dios me a Jesus Kristo a ngar sel babier er a Alma el ngii a mellach er a retedei el ngelekel sechal—Helaman, Shiblon, me a Corianton.¹⁰ A reteru el ngelekel sechal a mle merang el kirel a Dios me a Urerel. Engdi a tara rengelekel a riruul a bebil er a mekngit el omeruul. Sel denguu er ngak e sel kot el klou a ultutelel er tial omellach er a Alma a sel ngii a chedam el millekoi a tekingel mo klungiolir a rengelekel.

Sel kot el blel simbai er ngii, e di ua Heber C. Kimball, a derta er tir a mla er ngii a sioning er tir er a Jesus Kristo e mle merang el kirel a Dios me a Urerel.

Sel tokubets el osisecheklel a Alma el mora ngelekel er a Helaman, eng dilii a dmolech el yaksok el kmo tirkel nguu a “klaumerang er tir el mora Dios a mo nguu a selbechakl er a chelesl a ringel, kerior, ma ongarm el mer tir, e mo suobel er a uriul el sils.”¹¹

A Alma a milsa anghel, a uai tial tekoi a diak el blechoel dubech. A odubech el ngara Chedaol Reng a blechoel el dubech. A ikaidid el odubech a dirrek el meklou a belkul el diuai osengem er a anghel. A President Joseph Fielding Smith a ulsisechakl: “A odubech el mera rengud el mlara Chedaol Reng el mei a lmuut el klou a relii er a ues. A Reng sel longedecheduch el mora reng, e sel ultil er a chelsel a rengud a kmal meringel er ngii el mengubet.”¹²

Tiang a ngoikid el mora omellach er a Alma el mora ongeru el ngelekel, er a Shiblon. Shiblon a mle melemalt, el di uai a obekul er a Helaman. Sel llach el soak el meketeklii ra Alma 38:12, a kmul kmo, “Momes e motebechelii a rengum er a tekingel a tech, me bo mui er a beltik el reng.“

Motebechelii a utebengall el tekoi. Sel de ngara uos, e kede omtebechell er ngii. A ungil belkul tiang a omekrael, omtebechell, malechub eng merrob. A Chuodel el Renged a ochotii er kid el duleldiu er a deurreng sera bo dodengei el kmo ngmo rengii a bedenged.¹³ A bedenged a diak el mekngit—ng klebokel e usbechall—ngdi ngarngii a bebil ra tekingel a tech, el lak dousbech el ngara ungil e melmalt el rolel el klikiid, eng sebechel oridid er a Dios me a Urelel e tomelii el ngodechii a klaumerang er kid.

Mei e desaod a erul tekingel a tech el meketakl—kot, ngasech el reng, ea ongerung, laok el reng.¹⁴ Ngungil dodengei el kmo a ika lerung sel lak dongikiid malechub e ke domtebechel a rengud eng mo uchul a klou secherel a rengud, oridii sel ongitkaik er a Reng, e oridid ra Dios me a Urelel. A cherarou a osiik a bek el techall lomecheliu a klengar er kid lolab a siasing er a uldikl me a delengerengel.

Ngarngii er a derta el telungalek, el bode betik er a re kesbenge rengrir el lobekl el mla mo kachelebed malechub e te olbedii a ngalek. Sera Ongeuid el buil, e ak mla er sel United Kingdom All-Party Parliamentary forum er a London.¹⁵ A odechelakl elmo er a redil ma re ngeasek a mle kot el souadel el klou el mondai ra beluulechad. Ea uldimukl er a tekoi ra chodechelakl, e te ngarngii a re kuk melekoi e mekngit el tekoi. Sel uchetemel a telungalek a kmu er kid el kmo “tirkel mo meterkakl er a re becherir malechub e te rengelekir … a tara klebesei a mo mukerekeriil er a medal a Dios.”¹⁶

A President Nelson a mle mesisiich a omelkingel er tiang sera tutau ra chelii.¹⁷ Kulengit me mrelii er a uldesuem el kmo a blel meterkakl er kau a rechad er a blim mal lak, e kau a diak bom mongelebed malechub ke melekoi a mekngit malechub e ke mengurusii ra bechim malechub e te ngelekem.

Chelechal taem ea tara kot el klou longarm a uldikel me a mekngit lomelekoi el delalem er a tekoi el buai. Meng betok el mla dubech el tekoi ra ngasech el reng me a mekngit lomelekoi a mla mutechei a klebechel luldasu, cheldecheduch, me a omengull. Te betok a mla chemoit a ikel luleklatk el dilung ngikel ngarbab el Apostol er a Osobel el Petrus, el mo oltirakl a ikel lungil blekerdelel a Kristo el uai olsecherakl el reng, kllou el reng, kldung, bekururau, me a tmolech el beltik el reng.¹⁸ Te dirrek el mla mo ikrii sel lungil lomilkingel a Kristo er a kle ngariou el reng.

Osisiu el taem sel domtebechel a ngesechel a rengud e dongikiid er kid ra bebil er a tekingel a tech, eng kired elmo oltirakl a klikiid e lungil klengar lomtebechel a uldesued, omelkinged, me a omerelled. Ng kired el mengeroid er kid er a mekngit el siasing er a deleboes, melbodb a ikel lungil losongel ra chelsel a re keblid, e mengeroid er kid ra bek el blekerdelel a klengit.

Tiang a ngoikid el mo er sera Alma e ra lollach er a ngelekel er a Corianton. Meng dimlak el uai ea re bebil er ngii, ra Helaman ma Shiblon, a Corianton a milruul a mekngit.

Leng Corianton el miruul a mekngit, eng mle kirel a Alma el lolsisechakl er ngii el kirel a ouchel reng. Ng kirel lolsisechakl er ngii el kirel a berredel a klengit e mekerang a bo louchel er a rengul.¹⁹

Meng uaisei ea llechul a Alma a omerrob a ngibesereng er a tekoi er a tech, engdi tirkel mla tomelii a llach bo louchel a rengrir. A President Nelson a milsterir a rechad er a Ikelesia a tmolech el llach el kirel a ouchel reng er sera April 2019 er a klou logndibel. Ng milketeklii el kmo a douchel a rengud ra bek el sils a usbechall ra klengar er kid. “A ouchel reng a diak el tekoi el di duubech er a tal taem, ng melemolem. Tia mekengii a deureng me a budech er a uldesued,” ngulsisechakl. “A ouchel reng er a bek el sils a ngii a rael el bedul a klikiid, e a klikiid a meskid a klisiich.”²⁰ Ulekum me a Corianton meng ngultireklii sel lulsisechakl er ngii a President Nelson, eng mle sebechel louchel a rengul er a uchei er a bo longesang a uldesuel er a mekngit el uldasu. A meklou el delengerengel a dimlak el bol dubech.

A ikel mlo orokiolel el lomellach er a Alma e uledars el mo er a rengelekel a bebil er a meklou el llach er a rokui el chedaol llechukl. Ng melutk eI kirel sel Tngakireng el mla er a Jesus Kristo.

A Alma a mlochotii el kmo a Kristo a mo smuld a klengit.²¹ A lak sel Tngakireng er a Osobel, e sel diak a ulebengelel llechul a kerekeriil a mo ngeiuul a meringel el kelsbengel.²² Leng sel Tngakireng er a Osobel, ea klechubechub a sebechel ngosuterir tirkel mla ouchel a rengrir, e mesterir a techall me te lmuut elmo mesa Dios. Kid a ungil bo dodengelii tial lungil llach.

Ngdiak a chad el sebechel lemuut el mora Dios el di moltuil ra ungil urerel; kid el rokui el lousbech e rsel klungiolel a tngakireng er a Osobel. Kede rokui eldi mla ruebet ra klengit, e di tal rael el de borngii a sel Tngakireng er a Jesus Kristo e kid a mo sebeched el nguu a klechubechub e kiei lobengkel a Dios.²³

A Alma a dirrek el milsang a ungil llach el mora Corianton e me rekid a re ngarngii malechub e kede mocha soiiseb ra rael er a ouchel reng ra klengit, a blel kekerei malechub eng meringel el uai ikel riruul a Corianton. Bades 29 ra Alma 42 a kmul kmo, “E chelechang, e rungalek, a kuureng melak el luut el mo omekringel er kau aikal tekoi, di le kngtim a omekringel er kau el merekong, el ngii el ringel a uchul e ke mo ouchel a rengum.”

A Corianton a rirengesii a Alma ra lollach e te diul luleuchel a rengrir e mlo mesiou el lulbang a chetengakl. Leng sel Tngakireng e ra Osobel, a mo omekungir a re bek el chad.

Seral temel a Alma, mal temel a Heber, e tokuni er chelechal temed, e kede rokui el kired el morngii a klaumerang er kid e ra Jesus Kristo, mengikiid er kid ra tekingel a tech, ouchel a rengud ra kengtid, e osiik er a budech lokiu ra Tngakireng er a Jesus Kristo e mo merang el ngara medal a Dios ma Urelel.

A dirk mlo merek el cheldecheduch ma lmuut el mildung er tial tutau, ea President Russell M. Nelson a millekoi el ua tiakid: “A kulengit er kemiu me bo mesisiich el sioning er a Jesus Kristo. Mouedikel el kirel. Mdelmii ra rengum. Mongeluolu er ngii. Mungil lomtebechel er ngii mel bol klou. E momes a ikel longasireng elmo dubech e ra klengar er kau.”²⁴

Ng dmeu a renguk er chelechang el bode rengesii a President Nelson. A kuuchais el kmo a President Nelson a profet er chelechal taem. Ng betik er a renguk e urrekodel a ikel mengasireng e ulekrael locholt el dolai lokiu ngii.

Ngak el Apostol ra Rubak el Jesus Kristo, e ak kuuchais el lungil medengei e sioning er a chedaol Osobel mesel meral Tngakireng er Ngii loba ngklel a Jesus Kristo, amen.