Moltirakl er a Jesus Kristo loba Bakes er a Klaumerang

Ko mesulang, a re mengitakl, el chilteklii a “Faith in Every Footstep.” Tial chelitakl me a tekoi er a chelsel a llilechesii a Brother Newell Dayley sera 1996¹ el kirel omengedmeklel a ungil klebesei er sel mong meng 150 el rekil a rekot el chad el mlora Salt Lake Valley sera 1847.

Meng uaisei el tial chelitakl a mlekedmokl el kirel seikid el ungil klebesei, a klumech er a chelsel a mora rokui el chad er a beluulechad.

Ng dimla soak a koras er ngii el chelitakl.

Rodam me a rodos, a kuchais el kmo sel doltirakl er a Jesus Kristo loba blekeklel a klaumerang, eng ngarngii a urunguled. Ngarngii a urunguled er a Rubak el Jesus Kristo. Ngarngii a urunguled er a rokui el ngar tial klengar. Ngarngii a urunguled el mo mesisiich er a cheleuid el de ririuul, me a lengeled, me a ringel, me a ongarm me a ikel metacherbesul. Ngarngii a urunguled er a ouchelreng me a nguu a klausubes me a ousubes er a rebebil. Ak kuchais el kmo ngarngii a urunguled me a budech el ngara Kristo. Ngii a sebechel loltekau er kid er chelechal sils er a chelsel aikel metacherbesul el taem. Ng kildmeklii el mo er tirkel mle kot luchelel a ikelesia, e Ngii a mo kudmeklii er chelechang el mera derta er kid.

Chelechal rak eng mo 175 el rekil tirkel mle kot el chad el mora Salt Lake Valley, el ngii a mla rullak el mo melbedebek er a ruchelek, el bebil er tir a milrael el ngara Nauvoo el mora Salt Lake Valley. A derrir ma redemerir a delak el mechas me a demak el rubak a milrael er tial rael er a ked sera le ngeasek. A Henry Ballard a mle lluich a rekil;³ Margaret McNeil a mle13;⁴ a Joseph F. Smith, el ngii a mlo ongelolem el President er a Ikelesia, a mle 9 er sera le bo a ra Salt Lake Valley.⁵

Ng dimlak a kmal ngera er tir er tial kemangel lomerael, el mlarngii a reua kelekolt, secher, me a diak el lungilbesul el kall ma bail. Uai tial okesiu, a Henry Ballard sera le siseb er a Salt Lake Valley, eng mlo outkeu ra lesa tial “Yaksok el Beluu” eng di mlo bekikl el kmo nglocha ngarngii a chad el mesang e le bilel a kmal mechetong meng dimlak lungil milii a bedengel. Ng milertii er a delul a kerrekar el tal sils el mocha milkelekang. Ng mlora tara blai meng olengit a bail mel sebechel melemolem er tial omerollel e bo losiik er a rechad er a blil. Ng milreng a sulel a Dios el uchul eng mlo er sel mocha blil e mle selbechakl.⁶

A demal ma delal a demak el rubak a ultirakl er a Jesus Kristo loba bakes er a klaumerang er a chelsel a ikal olasm el blol chau. Ak mui er a omereng el saul el dimlak a tang mel terbengii omerollir. A bekesir er a klaumerang a mla omekngeltengak er ngak me a ikel bek el telecheroll el mei, el di uai a bekesem er a klaumera er chelecha el sils el mo omekngeltengat er a ruldidelel a rsechem el merael mei.

A tekoi el ruchelir a noun e verb. Sel noun eng sebechel belkul a chad el kot el mlo mesang malechub eng kiei er a dirke mlo beluu. Sel le verb, eng sebechel belkul a kmo ng mo meledaes er a rael el rechad a mo oltirakl er ngii.⁷

Sel kumdasu er a rucheled el kildmeklii a rael el kirir a rebebil, e a kot el ulduesuek a mora Profet Joseph Smith. A Joseph smith a mle ketengel el chad e le bekesel er a klaumerang a milkrolii el mora delul oreomel, el mlo outubaruach e ngara nglunguuch meng milkengii a rael el kired el mo oba cherrengelel a ebangkelio er a Jesus Kristo. A klaumera er a Joseph el mo “oker er a Dios”⁸ er sel tutau er a 1820 a milkengii a rael er a Oluut er a cherrengelel a ebangkelio er a Jesus Kristo, el uldimukl er ngii a re profet me a re apostol el mokedong el lmuut el mo mesiou el ngara beluulechad.⁹ Ak medengei el kmo a Joseph Smith a profet er a Dios. Ak medengei el kmo sel mui-el bekesel er a klaumerang a milkrolii el mo outubaruach er a medal a Dios el Chedam me a Betik er a rengul el Ngelekel er a, Jesus Kristo.

Sel bekesel er a klaumerang a Prophet Joseph Smith a rirelii meng mlo dongu er a Rubak el kirel olchotel a Babier er a Mormon, el ngii a tara sioning er a Jesus me a krasia el tngakireng er Ngii.

Ngokiu sel klaumerang me a blakereng er a Joseph Smith er a chelbengelel er a meklou el ongarm me a ultok, e ngii a mlo sebechel el dongu er a chimal a Rubak el lmuut el muchelii sel Ikelesia er a Jesus Kristo er a belulechad.

Ngokiu sel dirk mlo merek el klou el ongdibel, e a kuluuchais el kmo te milkera a remesiou el misionari er a lomekngeltengat er ngak. Ak mlukngeltengat sera lolsisechakl er ngak el kirel sel klebokel el uldeseul a Demad er a Babeluades, ma sel Kot el Ues er a Joseph Smith, me a sel oidel er a Babier er a Mormon. Aikal mla moluut el osisechakl me a suobel a ulmekrael a blekeklek er a klaumerang lolsisechakl er tirkel tir a mle sorir lorrenges a klumech er a ebangkelio er a Oluut.

A re misionari er kid er chelechang a kot rechad er chelechal taem e le tir louchais er tial klebokel el klumech el mora rechad el meliuekl er a belulechad, meng mekengii sel rael el mora rengelekel a Demad er Babeluades el mo medengelii Ngii me a Ngelekel, el Jesus Kristo. Sel mo kongei er tial ebangkelio er a Jesus Kristo a mekengii a rael el mora rokui el chad el mo kldmokl el mo nguu a chedaol ruoll me a klengeltengat er a Ikelesia me a templo.

Tial mlo merek el klou el ongdibel ea, President Russell M. Nelson, a liluut el melekoi “el kmo a Rubak a mla olengit er a rokui el mekedung el mekekere el chad el mo mengedmokl er tir el mo mesiou el misionari” e a “sel mo mesiou a klou a klisichel, eng di kuk di tara techall” el mora “rengeasek el odos el sebecherir.”¹⁰

Kemiu el ngeasek el sechal me a redil, a bekesiu er a klaumerang a mo ngosukemiu el mo oltirakl er a ongtil a Rubak el mo misionari—el mo ta er tirkel kot el chad el mong er chelechal taem—el mo mekengii a rolir a rengelekel a Dios el mo metik e mor tial rael er a telbiil e ngoititerir el lmuut el mo er sel klebokel el le ngarngii a Dios.

A President Nelson a mle tara mle kot el uchelel a Ikelesia. Sera le Apostol eng ulemais el mo omok a betok el beluu el kirel a osisecheklel a ebangkelio. Uriul er a le dirk blo el profet e President er a Ikelesia, eng ulengit er kid el mo “melisiich a chedaol klengar er [kid] el kirel a ngeiul a chedaol ocholt.”¹¹ Ng lmelemolem el olisechakl er kid el kmo kede mekera a bo dolisiich a klaumerang er kid. Ngar sel ongdibel er a re mekekerel chad, eng dilu el kmo:

“A kulengit er kemiu me bo mesisiich er a klaumera er kemiu. Mouedikel el kirel. Mdelmii ra rengum. Mongeluolu er ngii. Mungil lomtebechel er ngii me bol klou. …

“[E] momes a ikel longasireng el mo dubech er a klengar er kau.”¹²

Ngii a olisechakl er kid el kmong mekera demengai el mo mesisiich er a chedeaol klengar rekid meng diak dultuil ra tang. Ng millekoi el kmo, “aikal sils el merael mei, eng diak el sebeched el mo selbechakl er a chedaol tekoi a lak a ulekrael, ngesou, ongelaod, me a blechoel el odbechel Chedaol Reng.”¹³

A kuuchais el kmo a President Russell M. Nelson a profet er a Dios el ngara beluulechad er chelechal sils.

A Osobeled, el Jesus Kristo, a ngii a di mla kot el uchelel a omengedmeklel a rael. E le, Ngii a “rael”¹⁴ el kirel sel uldasu er a mo suobel el mo mekedmokl me bol sebeched el mo ouchel a rengud e, okiu a klaumerang er kid er Ngii, e kede lmuut el mo er a Demad er a Babeluades.

A Jesus Kristo a dilu el kmo, “Ngak a rael, e klemerang, e klengar: ng diak a chad el mo er a Chedam, a lak lokiu ngak.”¹⁵ Ngii a mle yaksok el diak el bechikid me lak a mengelaod er kid; Ngii a me er kid sel ngarngii a ongarm el desiseb er ngii.¹⁶ Ngii a mla oleker er kid el “mei er [Ngii] el meral ngara rengud, e [Ngii] a mo omekungil er [kid].”¹⁷

Ak kuchais el kmo a Jesus Kristo ngii a Osobeled e Olsobel, ngii a Omtechei er kid er medal a Chedam. A Demad er a Babeluades a mla mekengii a rael el kired el lemuut el mo er Ngii sel doltirakl er a Betik er a rengul el Ngelekel, Jesus Kristo, loba klaumerang er a bek el bekesed.

A delal me a demal a demak el rubak me a delak el mechas me a rebebil er a rucheled a chilbangel a betok el olibesongel er sera lemei el ngara kareta, me a kuruma, e merael el mora Salt Lake Valley. Kid el dirrek a mo chobangel a ringel er a chelsel a omeroled er tial kengar er kid. Kid a diak bo doldubech a kuruma malechub a domesiul a delkedokel el kareta loleong a mekedidai el rois el soiseb er a dmolech el yuki; kid a melasem el di uai tir el melisiich a chedaol klengar er kid el mo mesisiich a ongetikaik me a ringel er a chelechal beluulechad. A rael a kired el mo oeak ngii; me a bukl—me a le bebil eng rois—a bo dolemiakl. Me a ongarm er chelechal taem a kuk ngodech er sera le temir a rucheled, aika diak lak el meringel el me er kid.

Ng klou a belkul el kired el mo oltirakl er a profet e delalem er a rael er a telbiil er a klaumerang, el di uai tirkel mle uchelel a Ikelesia.

Mei e doltirakl er a Jesus Kristo loba klaumerang er a bek el bekesed. Ng kired el mo mesiou er a Rubak e mesiou er a ta ma tang. Ng kired el mo melisiich er a chedaol klengar er kid loltirakl e mengull a telbiled. Ng diak el kired el mecherei sel meral orechudel el tekoi el ngii a otireklel a llechul a Dios. A Diablong a melasem lolngesonges er a blakelreng er kid me a beltkil a rengud el mora Dios me a Rubak el Jesus Kristo. A kulengit me lak mobes el kmo a lsekum a ngii di el chad a remiid er a rolel, ng di kid a diak el tang mebo deriid el mora Osobel. Ngokiu sel klengeltengat er a ouchel reng, eng sebeched el lmuul el mo er Ngii. Ngii a mo ngosukid el mo medengei, mukeroul, e mengodech sel dolasem el di nga er sel rael er a telbiil.

Mei e di doltirakl er a bekesel a Jesus Kristo e, loba klaumerang er a bek el bekesed, e bo dechau Ngii, ea chochid ldechor el mesisiich er a rael er a telbiil, tia ea nglunguchek el ngara ngklel a Jesus Kristo, amen.