Olkeed el mo er a Osobel

A Rubak a milsaod el kmo tial ulebongel el taem ruchei ra Luut el Lemei, ea “ungil dellomel,” el Ngii a mesaod “el rengalek er a renged,”⁵ a mo kaukeroul lobengterir a “mekngit el dellomel,” me a lechub e tirkel diak el betik a rengrir er a Dios e diak loltirakl a Llechul. Me le “dak el merael el mo meklou,”⁶ el kaiuekeed.

Tiang a mo beluulechad er kid el mo er sel taem el luut el mei a Osobel, el ngarngii a betok el ungil me a betok el mekngit er a bitang me a bitang.⁷

Locha ngarngii a taem e ke mo melchesuar el kmo ng diak kom klou e mesisiich el ungil dellomel. Bo leklou a rengum el kirem! A Rubak a mla kmu el kmo a ungil dellomel a ngarngii a kmal dirk mengerngur a ulekurulir. ⁸ Kid el rokui a Uriul-klebesei el Santo er Ngii, meng locha diak de borsel ngii a soad el teleteled, eng di ngarngii a rengud el mo mera el loltirakl er Ngii.

Kede medengei el kmo sel mekngit er tial beluulechad a lorael mo klou, ea sebechekled er a reng, me a sebecheklel a reng er tirkel betik er a rengud, eng kired el mo blak a rengud el mengedmokl, e smisiich, e mo melisiich a risel a klaumerang er kid er a Jesus Kristo. A Apostol Paulus a milekoi er kid el mo meruul a rokui el tekoi ,⁹ mesisiich, e meduch el omekedecheraol¹⁰a betlkil a rengud el mo er a Osobel e blak a rengud loltirakl er Ngii. Chelechal sils me a ngarmedal klebesei eng kired el blak a rengud e ungil ousbech a klisiched el mo, mengesebechakl el kirel a chelbirukl me a terrekakl.¹¹

Ma teletael er a beluulechad a merael mo klou el meliuekl er kid, eng di ngdiak el kired el medakt. A Rubak a diak bo lobes er a Rechedal. Ngarngii a klisiich er a chedaol sengk me a chedaol ulekrael el kirir a remekedung.¹² Tial klengeltengat er a chedaol klisiich, a diak, dil le berkid e le kede telengtengil tial telcheroll. Ng morngii sel desisichii a klaumerang er kid er a Rubak el Jesus Kristo e oltirakl a Llechul, sel bo dodengelii e betik a rengud er Ngii. “A diak a ulebengelel klengar,” a Jesus a miluluuch, “bo lodengelkau el di ta el meral Dios, me a Jesus Kristo, el ngikel mulderchii el mei.”¹³

Kede ungil medengei, sel ngarngii a klaumerang er kid er a Jesus Kristo e meral loltirakl er Ngii el betok el taem el diak el dil chimo el taem—e betok er a di chimol belsechel. Ng chedaol omeruul, el merael mo klou e oberk er a chelsel a kakerous el temel a klengar er kid, e melemolem el dimerekmo sel bo doutibaruach er a Ochil.

A ungil dellomel el ngara delongelel a mekngit dellomel er a beluulechad, e kede mekera e ultuill er a klisiched loltirakl er a Osobel er a ikal ngar medad el sils?

A ikakid a edei el uldasu:

Kot, ng sebeched el mo ungil medengelii a klengar er a Jesus, Osisecheklel, Ilteetel, Klisichel, me a melngakireng er Ngii. A Osobel a milekoi, “Momes er ngak er a rokui el uldasu.”¹⁴ A Apostol el Johanes a dilung, “Kede oubltikerreng, ele Dios a mle kot el oubltikerreng el merkid.”¹⁵ Sel bo de blechoel medengelii a beltkil a Rengul, e kede mengal mo betik a rengud er Ngii, e di merael, mo meduch el loltirakl er a Okesiul el betik a rengul e lomekerreu er a remechebuul el meliuekl er kid. Aikel ungil omeruul doruul bedul Ngii, eng mo ungil osenged el Mesang.¹⁶ Kede oldanges er ngii, e melasm el meruul a mekekerei el omeruul el mo uai Ngii.¹⁷

Ongeru, sel bo dungil medengelii e oubeltik el reng el mo er a Osobel, eng meral mo ngarngii a rengud el yaksok el mo er Ngii el mo meral chedal e oumerang. Kede meruul a telbiil Lobengkel. Kede omuchel loba yaksok er a demetecholb, e kongei a ikal yaksok me a bebil sel douchel a rengud er a bek el sils, e olengit a klausubes, e mad el tmuil el mo melai er a sakrament er a bek el sandei. Kede kongei el mo “blechoel melatk er Ngii e oltirakl a Llechul.”¹⁸

Sel bo dekeldmokl, e kede kongei el mo oltirakl a chedaol ruoll ma telbiil er a templo. Kede mo omelchesuar a chedaol diak a ulebengelel, e chelelakl el taem el ngara blil a Rubak, e ungil a rengud el mo meruul a telbiil lobengkel a Dios e mo melisiich a rengud el mo oltirakl.

A omrellel me a otireklel a telbiil a rullii a beltkil a rengul a Osobel el mo urrekodel er a chelsel a rengud. Sel Liahonaer a chelechal buil, a President Russell M. Nelson a milekoi: “[A] telbile[d] a mo lmuut el olekeed er kid el mo er Ngii . … A Dios a diak bol ikrii a deleuill er Ngii lobengterir a re mla mekur a ungil deleuill Lobengkel.”¹⁹ Ma President Nelson a mle ungil melekoi er tial tutau, “Ngokiu a chedaol oterkeklel aika el beches el templo, eng mla medechel a klisichel a kledios el mora beluulechad el melisiich er kid e ometok er a mesisiich el klisichel a cherarou.”²⁰

Sebeched el mesa uchul me a Rubak a omekrael er a repofet er Ngii el mo olekeed a blil a Rubak el merkid meng mo sebeched el blechoel el mora chelsel a Blil?

Sel bo desiseb er a blil a Rubak, eng mo diak dolchesuar a teletael er a beluulechad el omtok er kid, sel dosuub a moktek er a klengar me a diak a ulebengelel sengk el merkid lokiu a Osobeled, el Jesus Kristo.

Sel ongingil, e ongedei el uldesuek: chelsel tial chedaol omerael, e kede kerkikl, e mesebechakl, e mo ungil kudmeklii sel sengk er a Chedaol Reng el oba rokir el rengud. A President M. Russell Ballard me a Elder Kevin W. Pearson a dirk milekoi er sel locholt el milngelechel er ngii a President Nelson el ngii a kluut el mo omelekl er ngii: “Ng mo diak el sebeched el mo selbechakl er a chedaol tekoi a lak a ulekrael, oterkeklel, me a ongelodel a Chedaol Reng.”²¹ Ng sengkl el diak a mo ruchei er ngii. Ng blak a rengud el mo melekau a doruul er a bek el sils me a odbechel a Chedaol Reng dil lobengeked. Kid a llomes el mo er a beluulechad, me sel kirel, e kede melilt el mo ngodech er a rebebil. A President Dallin H. Oaks a dirk uleker er a rengeasek el chad: “Kau [eng] ‘sebechem el mo ngodech?’ … [Tokubets] el klou a ututelel … aikel molilt el meruul er a chelsel a klengar kau. … Kau ke merael bedul uchei el omtok a teletael er a beluulechad?”²²

A dirk klilechesii er a social medai a tiakid, a kuleker er a roltirakl el mo ouchais a omelilt el riruul el uchul e te mlo ngodech er a beluulechad. Ak ngilai a betok er a dart el nger.²³ Aikakid a kuk di bebil:

Amanda: Ngak a nurse er a blil a kelbus. Ak melasm el omekerreu er a rekelbus el di uai a Kristo.

Rachel: Ngak a opera singer, meng blechoel uldasu el kmo ak oubail a ngidil bail el beskak, el diak el iior er a teletelel. [Ele ngak a endowed,] Ak silbedeterir a [ re producer] el kmo a bail a kirel el mo [ungil lomekabail]. Ng mle diak el sorir … eng di te kilengei el mo remuul. Ng diak bo kumtechei er a budech el mer ngak sel kdechor el sioning er a Kristo er a bek el taem.

Chriss: Ngak a alcoholic (el ngara recovery), sebechek el mora templo, el chedal a Ikelesia. Ak mesaod er tial omeruul el kchau er ngii el kirel a addiction me a klaumerang er a ngak er a Tngakireng [er a Jesus Kristo].

Lauren: Ak miluches er a klekool er a sibai lobengterir a kimdak el ngara skuul. Ng mle sorir ak chad er a sibai el dilemuk, e di mo kiul dulii a mekngit el tekoi. Te melemolem el di melekoi er ngak, engdi ak mle kotouar e dimlak bok mesim.

Adam: A betok el chad a diak loumerang sel kdu el kmo a kultirakl er a llach er a deleboes e diak kumes a mekngit el siasing er a teletael er a deleboes. Te diak lodngelii sel deureng ma budech le beskak.

Ella: A demak a chedal sel chelechad er a LGBTQ. Ak blechoel melasm el mo mengull a uldesuir a rechad ea osisiu el taem e ak a sioning er a Kristo e oumerang aikel kuumerang.

Andrade: Ak tilbir el melemolem el mo er a ikelesia sera telungalek er ngak a tilbir el diak el luut el mong.

Ea ulebongel, a Sherry: Aki mlara ungil klebesei er a blil a governor. Te rirous a rrom el mo uldars el mo “toast.” Ak melemolem el di soak a ralm, el ngika el chad ra ureor a kmul uasei tiang a diak el ungil teletael. Aki mle toast el mo er a governor, mak ngiluu a kebengek el mui ra ralm lodersii el morbab! A governor a dimlak el ngasech a rengul.

A President Nelsol a dilul kmo, “Choi, kom kiei er a beluulechad, eng di ngodech a llechemiu er a beluulechad el ngii a ngosukemiu meng diak bom chelsechusm er a klikingelel a beluulechad.”²⁴

Anastasia, a ngeasek el chedil er a Ukraine, a mlara osbitar lomechell er a ngelkel sechal sera lomuchel a dub er a Kyiv er a February. A nurse a milkengii a chesimer e di mle mereched el melekoi, “Mnguu a ngelekem tolechoi, e bilii er a bar, e bora chelsel a klou el osbitar—ra chelechang!”

Uriul, a Anastasia a milekoi:

“Ng kmal dimlak er a uldesuek el kmo sel kot el sils el bok chedil a kmal mo meringel, … engdi ak bai omdasu a … klengeltengat me a ongasireng el blak ues. …

“Chelechal taem, … uai a lak el sebeched el mo osubes er tireke el meruul a telemall me a mekngit … , eng di sel kmesiungel a Kristo, eng ngarngii a klaumerang er ngak el mo sebechek el mo [ousubes]. …

“Ng diak kudengei a ikel rokui el mo dubech er a ngarmedal taem … eng di ak medengei el kmo sel doltirakl a telbiled a uchul eng sebechel a Chedaol Reng el melemolem el obengked, … el mo melchesuar a deurreng ma urunguled, … er a chelsel a ikel meringel el taem.”²⁵

Rodam ma rodos er ngak, Ak mla mukngeltengat el nguu a klou el beltkil a rengul a betik er a rengud el Osobel, el Jesus Kristo. Ak medengei el kmo Ngii a ngar e omekrael a chedaol el Urerel. Ng diak a tekoi el sebechel ungil smodii tial beltkil a renguk el mo er Ngii.

Kid rokui a “rengalek er a telbiil” el meliuekl er a beluulechad el ngara beluu ma kakerous el teletelel a klechad, el betok er a million, el mengichiil er a luut er a Rubak me a Osobel. Me sel dungil mo er tirkel meliuekl er kid, e kede remuul a soal a rengud, uldesued, omelilt, me a omerelled. Sel dosiik loba rokui el rengud el mo medengelii e oubeltik el reng el mo er a Osobel, e kede ngiklid er a beluulechad lokiu a telbiil lobengkel a Dios, el ngodech, e diak dosisiu, e tokubets, sel doldanges er Ngii me a Osisecheklel e diak doliakl er kid er a rebebil el ngodech a klaumerang er tir.

Ng klebokel el omerael sel dungil dellomel el ngara delongelel a mekngit dellomel, al bebil mekngit a rengud engdi kede blechoel ellelakl le tial ulekurulel me a klisichel a morengul a klaumerang er kid. Sel becherei a betlkil a rengum el mo er a Osobel me a beltkil a Rengul mo er kau a mo dmolech er a chelsel a rengum, e ak yaksok er kemiu a lmuut el medechel a klaumerang, budech, me a deurreng sel bomchau a olasm er a klengar er kemiu. A Osobel a mle yaksok el kmo ng [mo] mengideb er a Rechedal, el uaisel cheldecheduch el kirel a ungil dellomel me a mekngit el dellomel, el ungil dellomel a mo nguu a diak a ulebengelel klengar, e mo nguu a korone el ngara klebkellel a celestial. ²⁵ El ngara a ngklel a Jesus Kristo, amen.