Osisechakl er a Uldimukl

Ng soak el mo mengedecheduch el kirel sel bo kumekedong er ngii el olisechakl er a uldimukl el ngara Ikelesia er a Jesus Kristo er a Uriul-klebesei el Santo. Tial osisechakl a ngarngii a kldei el telengtengil: (kot) sel ureor el uldimukl el mengideb er a rechedal a Rubak, (ongerung) klou a ultutelel a olngeseu me a ringel er a uldimukl, e a (ongedei) Jesus Kristo a chedul a uldimukl.

A Ikelesia er a Jesus Kristo er a Uriul-klebesei el Santo se ra uchelel a mle betok a rebecheleleu el chad ra Diluches er a Merikel me a Resanto er a Europe me a dersta el Native Americans, African Americans, me a Rechad er a Taiheio. Chelechang, ea chelsel eai el rak er sel erul dart a rekil er a lomuchel, ea Ikelesia a mla mo imis el klou a ulecherengel er a Diluches er a Merikel me a beluulechad el meliuekl.

Mesel meketeketa el ulaoch-er a uriul klebesei el omengideb er rechedal a Rubak er a telbiil a mlenga el mo mesisiich, ea Ikelesia a meral mo er ngii a rechedal er a bek el beluu, kebliil, omelekoi, me a bek el bedengir a rechad.¹ Tiang a dimlak el lorimel er ngii el mo kakerous ngbai di mle ngii el dubech el klou el tekoi el ngii a dongerchir er ngii, el mo medengei el kmo a ukedel a ebangkelio a mengideb er a bek el beluu me a bek el rechad.

Kede ngeltengat el mesa tial sils el Zion a mla mechederoder er a bek el beluu me a ikel de kiei er ngii. El uai a Profet Joseph Smith el dilu, a rechedal a Dios er a bek el telcheroll a dmak el mad el tmuil el kirel tial sils, e “le kid a ngelitel er a Dios a millilte el loba el mei tial klebkall er a Uriul-klebesei.”²

Ele kede mla nguu tial techall, eng diak el kired el mekngit el mo er a ngidil rasech, kebliil, a lechub a ngidil ngerang el omii el mukdubech er a chelsel a uriul-klebesei er a Ikelesia er a Kristo. A Jesus a milekoi er kid el kmo, “Bom tang; le lak bom tang eng diak mchedak.”³ Ng kired el mo blak a rengud el choroid a mekngit el uldasu me a omeruul er a chelsel a Ikelesia, rekeblid, e sel kot er ngii a kirel meral ngara rengud. Me sel Ikelesia lolemolem el merael mo klou e bekbedengel a rechedal, e ngkired el mo ungil mengemedaol e outkeu. Kede ousbech er a ta me a tang.⁴

Sel kot el Babilngel el mo er a rechad er a Korinth, a Paulus a ulechais el kmo a rokui el mo metecholb el mo chad er a Ikelesia a dmak el imo el bedengel a Kristo:

“A Kristo a di ua bedenged el di tal chelechad e betok a klekedellel; me ng betok e dmak, el churrengellii a di tal bedengel a chad: me a dirrek el uaisei el mora Kristo.

“Le ngokiu a Reng e kid el rokui a metecholb el mo tang, a de Jews a lechub e kede Gentiles, a derrengodel a lechub e kede mimokl; le kid el rokui a ngara chimol Reng. …

“Me ng mo diak le kautok a ikel kakerous el klekedellel a bedenged; e bai mo dmak el kaukerreu.

“Ma lsekum a tara klekedellel a bedenged a mo chuarm el obengkel, e a ikel bebil a di rokui el mo chuarm el obengkel; ma lsekum ng modanges a tang, e a ikel bebil me ng mo obengkel er a deurreng.”⁵

Sel momelechesiu el uldimukl a klou a ultutelel el mo er a bedenged, uldesued, me a ulekeruled er a reng. Engdi sel bebil ra taem ea dersta er kid a mo chomelchesiu el kmo ngdiak de uldimukl. E sel taem el mechitechut a rengud, e kede mo omelchesiu el kmo kid a diak el sebeched el mo mengaisisiu a ikel omeruul el soal a Rubak a lechub a ikel longerchir a rebebil.⁶ A lebebil eng diak ra rengud engdi kede ouchais a ikel dongerchir er a rebebil—me kid el dirrek—el diak el ikel ngii a longerchir a Rubak. Kede locha mengedecheduch el oba delmedemek el teletael el kmo a belkul a chad a urrekodel er a bebil ra duch a lechub a okedong, engdi a ikang a diak el teletael el Rubak a ousbech er a telkelel a belkud. “A Rubak a omes er a rengul a chad.”⁷ Ng omekerreu el kirel a soal a rengud me a doureng me a bo deuangerang el chad.⁸

A odos el Jodi King a milluches a teletael el blolechau ra ikal mla mo merek el rak:

“Ng dimlak kumdasu el kmo ngdimlak kuldimukl er a ikelesia el mo lmuut er sel taem el bechik er a, Cameron, me a ngak a mlo meringel er kemam a mo dioll. A rengalek me a retelungalek el tir a uchul a deurreng sel kisterir er a ikelesia a omechelang el uchul a klengit el reng me a ringel.

“Ak kumelchesuar el diak a ngerang er ngak sel lak a kungabel er a ngalek malechub eng diak a tet er a osime el kubang. …

“A mle kot el mle meringel Sandei a sel mle kot el temam el mo er sel beches el ward er kemam. Eleng dimlak a rengelekam, e te uleker el kmo a ki dirk mlo bechiil e oingerang e aki mo omuchel er a telungalek er kemam. Ak mla mo meduch el onger aikal ker meng diak el temelii a renguk—Ak medengei el kmo a ikang dimlak el lolemall er a renguk.

“Engdi, tial Sandei, ra kunger a ikal ker a kmal mle meringel er ngak. Aki dirk mlo medengei, uriul er a urungulam, el kmo—ng—diak kim dioll.

“Ak mlora sakrament miting e kmal mekngit a renguk, e ulenger a ikal ker ‘mel bo lodengelkau’ a kmal mle meringel er ngak. …

“Engdi mle sel temel a Sandei Skuul el kmal miltirm a renguk. A osisechakl—el mle kirel a chedaol ngerchelir a rechedil—a kmal di mle mereched el mo taem el louchais a ikel ngar[a] rengrir. Ng miltirm a renguk ma iuechel a medak a merberebet sera kurrengs er tirkal redil loumondai el kirel a klengeltengat el ngii a ulkum dil ngerang me bai le blerngak.

“Ak di mle mereched el mekiis el merael. A kot, eng dimlak el soak lmuut el mong. Ng dimlak el soak el lmuut el mo melchesuar el uai di lengak el tang. Engdi sel kesus, ra uriul er a kungedecheduch er a bechik, ea ki mle medengei kmo aki mo melemolem el mo er a ikelesia eleng diak el dil uchul a Rubak a ulengit er kemam el mong ngbai dirrek el ki mle medengelii a deurreng el mo er ngii sel ki mo mekbeches a telbilam e mo melchesuar a Chedaol Reng el ngara Ikelesia a kuk klou er sel klengit el reng el kulmechesiu er ngii er sel sils. …

“Chelsel a Ikelesia, e ngarngii a melakl el dil, mla mo diak el bechiil, me a remesobil rechad er a ikelesia; tirkel ngarngii a rechad er a telungalek er tir el mla mor choid er a ebangkelio; rechad el ngarngii a secherir malechub eng metarech beserir; rechedal a ikelesia el sechal soal a sechal ma redil soal a redil; rechedal a ikelesia el mengeroid er tir ra tekoi uleksau er ngii malechub a rau el reng , dirk miltecholb; dirk milukl mo er sel basio; chedam ma chedil el mla mo di tir; ma lmuut el bebil. …

“A Osobel a siotai er kid el mo er Ngii—el diak el ior ra omeruul el de ngarngii. Kede mora ikelesia el mo omekbeches a telbiled, e mo menglou a klaumerang er kid, mo osiik a budech, e mo meruul a ikel Ngii a mlo ungil meruul er a chelsel a klengar er Ngii—e mo mesiou er a rebebil el tir a omdasu el kmo ngdiak el uldimukl.”⁹

A Paulus a milsaod el kmo a Ikelesia ma re roureor ra chelsel a mlo er ngii lokiu a Dios “el mengedmokl er a re chedal a Dios, el rokui el kirel a omesiou er a ikelesia, me bo loleketek er a bedengel a Kristo:

“Me kid el rokui a di mo tang, a de ngar ngii el oumera e medengelii a Ngelekel a Dios, kede mo mukeroul el mo ultebechel el chad, el kmal di mo cherrungel el ua teletelel a Kristo.”¹⁰

Ng klengit el reng, sel uaisei, el tara chad, a mo melchesuar el kmo ngii a diak el sebechel mo uaikel rokui el teletael er a klengar, e omdasou el kmo ng diak el uldimukl er tial cheldebechel el Dios a rirellii el mo olngeseu er kid el merael el mo ungil.

Bo debechei a kerkeriil mel Rubak a oungerachel er ngii me a tirkel blal loldurech er tir e bai bo dungil loubeltikelreng e bo dungil el mo er a ta me a tang er sel bkul rebab el sebeched. Bo dolengit er Ngii me lochotid a rael, ra bek el sils, el mo “melai er … a remechebuul, ma rechelmus, ma rechitechut a ocherir el mei, ma re mikou [el, rokui el chad]”¹¹—tiang a rokui el chad —el mora klou el mur er a Rubak.

A ongerung el techetechel a osisechakl er a uldimukl a kirel a ikel bo doruul. Meng locha diak de blechoel omdasu el kirel, a mo uldimukl a mo er ngii leng uchul a omesiou me a omeruul doruul el mo er a rebebil me a Rubak. Sel kmal di domdasu el kirel a ikel dousbech malechub a ikel soal a rengud a sebechel rulii meng meringel er kid a mo uldimukl.

Kede melasm el loltirakl osischeklel a Osobel.

“Ngkel chad el kmal mo ungil er a delongeliu, a mo mesiungiu. …

“E dirrek a ngelekel a chad el Sechal a mlei el diak a olisechakl er ngii, ng bai me olisechakl, e odersii a klengar ngii el kirir a re betok.”¹²

A uldimukl a diak le mei sel dongiil el kirel ngbai mei sel bo dolngeseu er a rebebil.

Chelechang, eng telkib el metacherbesul, sel modersau el mo meruul a tekoi malechub omelenget el ngidil ngera el mo er a ngidil chad a bai kora mla mo diak el ungil. Sel babier er a Deseret Magazine er a tial merko el rak, ea chad er a omeluches el Rod Dreher a ouchais er a cheldechedal ngii ma ngeasek el chedil ra lengara Budapest:

“Ak mlara mlai er a buai el ngara Budapest lobengekl a … sechelik el ngara okedei a rekil—me domekedong er ngii el Kristina—me kim ngar tial omerollam el mo mengedecheduch er a chuodel el [Kristiano] el mechas, el ngii ma mla mad el bechil, a mle chemau a ultutakl er a re communist . Me tial omerollam, ea Kristina a mesaod el kmo ng kmal meringel sel dil bleketakl el mora resechelil losisiu a rekrir el kirel a ringel el chau sel bechiil e chedil el loungalek er a dirk mekekerei.

“A ikal ringel ngarngii a Kristina a di osisiu sel ngeasek el redil a mesuub el mo chedil e bechiil—eng di a blekeradel er tial telecheroll el ngarngii a uasei a ringel er a klengar a uchul eng mo mekngit a klengar a chad meng kirem el oltngakl. Ngii ma bechil te kaumondai a lebebil er a taem? Maleuaisei eng kirel choitii a bechil, tir a melekoi. A rengelekel te mengesang er ngii? Maleuaisei eng kirel ngoiteterir el mora day care el blirir a rengalek.

“A Kristina a bekikl el kmo a resechelil a diak lomdasu el kmo a omelasm, me a ringel, a telengtengil a klengar—e locha bai sebechel telengtengil a ungil klengar, a lsekum tial ringel osisecheklid el mo klou a rengud, bekururau e oubeltikelreng. …

“… A sociologist er a klechelid er a Daingak ra Notre Dame el Christian Smith a miltik er a omesubel el remeklou el chad el [rekrir] 18–23 el kmo rebetok er tir a oumerang el kmo a buai a bai di ‘chelechad er a derstal chad el ngarngii a klisichir el melilt el kirir el mo outkeu ra klengar er tir.’¹⁴

Meng okiu tial omesuub, ea ngidil ngerang el chad a metik el meringel “a ual bedengel omekcharm ra chad.”¹⁴

Ea kuk ngodech er tiang, a ucheled a mlarngii a dmolech el rengrir el uldimukl, ta rengrir, me a urungulir er a Kristo lokiu a ringel el riruul el mo mesiou el misionari, omekedechor a templo, e chiloit a ungil blirir ele te mlocheracheb e mocha lmuut el omuchel, e mle betok el teletael le te uldars er tir me a ikel ngarngii er tir el mo uchul a Zion. Ng mlarngii a rengrir el mo odars a klengar tir a lsekum eng mlo kirir. Kede rokui el ngmai a klengeltengat ele a uchul aikel dechal a rengrir. Tiang a di osisiu el mer chelechang el mo er tirkel betok locha mo er cheroid er a telungalek ma sechelirir, mo diak a techall er a ureor, malechub e te mlo chemau a mekngit el blekeradel malechub a mekngit lomeruul ele te mlo metecholb. Ma ngkedir, a leuaisei, a sel mesisiich el reng el mo uldimukl er a delongelir a rechad ra telbiil. A ngidil ringel el deruul leng uchul a urerel a Rubak a ngosukid el mo ungil medengelii a basio er kid Lobengkel el uldersii a klengar er Ngii el mo ra rebetok.

Sel ulebongel e kot el klou a belkul el telengtengil a olisechakl er a uldimukl a sel ngerachel el chedul a Jesus Kristo. Kid a diak de bo dechad er a Ikelesia el di kaukledem a uchul, el dirrek el klou a belkul. Kede mo chad er ngii el kirel a ngebetel a klengit lokiu a beltikelreng me a krasia er a Jesus Kristo. Kede mo chad er ngii el mo kudmokl a chedaol ruoll er a mo suobel e mo olsobel er kid ma tirkel betik er a rengud el ngar tial beluulechad me a bitang. Kede mo chad er ngii el mo teloi er sel klou el ureor el mo toketekii a Zion el uchul a kedmeklel a Rubak a luut el mei.

A Ikelesia ngerchelel lomes a ikal telbiil er a mo suobel me a diak a ulebengelel klengar el Dios a mla meskid lokiu a chedaol ruoll er a chedaol priesthood.¹⁶ Ngokiu a ikakid el telbiil e kid a nguu sel kot el ngarbab e dmolech el reng er a uldimukl. A President Russell M. Nelson a dirk milluches el kmo:

“Sel ta el kau me a ngak de bekur a telbiil lobengkel a Dios, ea delongeled lobengkel a mengai el mo kmes er a ikel sils ruchei er a telbiled. Chelechang e ke de mla moak el mo tang. E le uchul tial telbiled lobengkel a Dios, e Ngii a diak a tang me bol mesaul a rengul lolengeseu er kid, me kid a diak a tang me bo dokngemedii sel klechubechub er a kllou el Rengul el me er kid. A derta er kid a ngarngii a tokubets el basio er ngii er a chelsel a rengul a Dios. …

“… A Jesus Kristo ngii a otil a ikal telbiil (mesa Hebrews 7:22; 8:6).”¹⁶}

Alsekum kede medengei aikang, ea urungelel a Rubak el kired a mo omekellomes a rengud, e diak lolemall a rengud.

Ng sebeched el omelchesiu a deurreng sel, di kid ma de tal chad ra renged, “el kmal di mo cherrungel el ua teletelel a Kristo.”¹⁷ Meng locha ngarngii a chelitechut me a olibesongel er a omerael, engdi tiang a ngarbab el omerael. Kede kaingeseu el outkeu ra ta ma ta er tial omerael, e ungil medengei el kmo a lengarngii a ringel ma omekioud er a yaksok el klengeltengat, eng sebeched “el diak de medakt; [e le Kristo a mla] mo mesisiich er a beluulechad,”¹⁸e kid a Obengkel. Bo el ta lobengkel a Chedam, Ngalek, me a Chedaol Reng a ngii a kot el ngarbab el uldimukl.¹⁹

Ng uaisei, a olisechakl er a uldimukl a mo ua tiakid—a dersta er kid a sebechel kongei el kmo: a Jesus Kristo a mlad el kirek; Ngii a ulemdasu el kmo ngak a klou a belkuk el mo ra Resechel. Ngii a betik a rengul er ngak e sebechel remuul aikel rokui el meklou a ultutelel er a chelsel a klengar ngak. Sel bo louuchel a renguk er a kengtik, ea krasia er Ngii a mo ngodechak. Ak tal renged Lobengkel er a ebangkelio er a telbiil; Ak uldimukl ra chelsel a Ikelesia er Ngii me a rengedel; e ngak a uldimukl er a Urerel el mo nguu a ngebetel a klengit el mora rokui el ngelekel a Dios.

A kuuchais el kmo kemiu a uldimukl, el ngara ngklel a Jesus Kristo, amen.