ताकि तिनीहरूले हजुरलाई चिन्न सकून्

केही वर्ष पहिले, एरिजोनाको हाम्रो गृह वार्डमा प्रभूभोज सभाका क्रममा मैले जीवन परिवर्तन गर्ने अनुभव पाएँ । प्रभूभोजको प्रार्थनाले “[येशू ख्रीष्ट] को नाम [आफू स्वयम्मा] लिने” चाहनाको सङ्केत गरेजस्तै,^१ पवित्र आत्माले मलाई येशूका धेरै नामहरू छन् भनेर सम्झाउनु भयो । त्यसपछि मेरो हृदयमा यो प्रश्न आयो: “यस हप्ता मैले येशूको नामहरू मध्ये कुन नाम लिनु पर्दछ?”

येशूका तीनवटा नामहरू मेरो मष्तिस्कमा आए र मैले तिनीहरूलाई लेखेँ । ती तीनवटा नामहरू मध्ये प्रत्येकमा ख्रीष्टका जस्तै चरित्रहरू थिए जुन म अझै पूर्ण रूपमा विकास गर्न चाहन्थें । त्यो हप्ताको लगत्तै, मैले ती तीनवटा नामहरूमा ध्यान केन्द्रित गरेँ र तिनीहरूका सम्बन्धित चरित्रहरू र विशेषताहरूलाई अँगाल्ने प्रयास गरेँ । त्यस समयदेखि, मैले मेरो व्यक्तिगत उपासनाको अंशका रूपमा यो प्रश्न सोधिरहेको छु: “यस हप्ता मैले येशूको कुन नाम लिनु पर्दछ?” त्यो प्रश्नको जवाफ पाउँदा र ख्रीष्टका जस्तै सम्बन्धित चरित्रहरू विकास गर्ने प्रयासले मेरो जीवनलाई आशीषित तुल्याएको छ ।

उहाँको महान् मध्यस्थता प्रार्थनामा, येशूले यो महत्त्वपूर्ण सत्यलाई व्यक्त गर्नुभयो: “अनि यो अनन्त जीवन हो, कि तिनीहरूले हजुरलाई चिनून् , एकमात्र सत्य परमेश्वर र येशू ख्रीष्ट, जसलाई हजुरले पठाउनुभएको छ ।”^२ आज म तपाईंहरूलाई आशीषहरू र सामर्थ्य बाँढ्न चाहन्छु जुन उहाँका धेरै नामहरूद्वारा येशू ख्रीष्टलाई चिन्दा आउँछन् ।

हामीले कसैलाई चिन्ने एउटा सरल तरिका भनेको उसको नाम सिक्नु हो । यो भनिएको छ कि “एउटा व्यक्तिको नाम त्यो व्यक्तिका लागि कुनै पनि भाषामा सबैभन्दा मीठो र अति नै महत्त्वपूर्ण आवाज हो ।”^३ के तपाईंले कहिल्यै कसैलाई गलत नामले पुकार्नुभएको वा उसको नाम बिर्सिनुभएको अनुभव गर्नुभएको छ? मेरी श्रीमती एलेक्सिस र मैले कहिलेकाहीँ हाम्रा छोराछोरीहरू मध्ये एकलाई “लोला” भनेर सम्बोधन गरेका छौँ । दुर्भाग्यवश, तपाईंले अनुमान गर्नुभएको जस्तै, लोला हाम्रो कुकुर हो ! राम्रा वा नराम्राका लागि, कसैको नाम बिर्सनुले सम्भवत: तपाईंले तिनीहरूलाई राम्रोसँग चिन्नुहुन्न भन्ने सन्देश ती व्यक्तिलाई दिन्छ ।

येशूले मानिसहरूलाई नामद्वारा चिन्नुभयो र बोलाउनुभयो । प्राचीन इस्राएललाई, परमप्रभुले भन्नुभयो, “नडराऊ: किनकि मैले तिमीलाई छुटकारा दिएको छु, मैले तिमीलाई तिम्रो नामले पुकारेको छु; तिमी मेरो हौ ।”^४ इस्टरको बिहान, पूनरुत्थापित ख्रीष्ट प्रतिको मरियमको साक्षी दृढ भयो जब येशूले उनलाई नाम लिएर पुकारे ।^५ त्यसैगरी, परमेश्वरले जोसेफ स्मिथलाई उनको आस्थाको प्रार्थनाको जवाफमा नामले पुकार्नुभयो ।^६

कतिपय अवस्थाहरूमा, येशूले आफ्ना चेलाहरूलाई नयाँ नामहरू दिनुभयो जसले तिनीहरूको प्रकृति, क्षमता र सम्भाव्यतालाई सङ्केत गर्दछ । यहोवाले याकूबलाई इस्राएलको नयाँ नाम दिनुभयो, जसको अर्थ “त्यो एक जो परमेश्वरसँगै विजयी हुन्छ” वा “परमेश्वरलाई विजयी हुन दिन्छ ।”^७ येशूले याकूब र यूहन्नालाई बोएनर्जेस नाम दिनुभयो, जसको अर्थ “मेघगर्जनका छोराहरू” हो ।^८ उनको भावी नेतृत्व क्षमता देखेर, येशूले सिमोनलाई केफास वा पत्रुसको नाम दिनुभयो, जसको अर्थ चट्टान हो ।^९

जसरी येशूले हामी प्रत्येकलाई नामले चिन्नुहुन्छ, त्यसरी नै हामीले येशूलाई राम्ररी चिन्न सक्ने एउटा तरिका भनेको उहाँका धेरै नामहरू सिक्नु हो । इस्राएल र पत्रुसका नामहरू जस्तै, येशूका धेरै नामहरू शीर्षकहरू हुन् जसले हामीलाई उहाँको अभियान, उद्देश्य, चरित्र र विशेषताहरू बुझ्न सहयोग गर्दछन् । जब हामीले येशूका धेरै नामहरू बारे जानकारी पाउछौँ, हामी उहाँको दैवी उद्देश्य र उहाँको नि:स्वार्थ चरित्रलाई अझै राम्ररी बुझ्नेछौँ । उहाँका धेरै नामहरू जान्नाले हामीलाई उहाँजस्तै बन्न—हाम्रो जीवनमा आनन्द र उद्देश्य ल्याउने ख्रीष्टका जस्तै चरित्रहरू विकास गर्न प्रेरित गर्छ ।

केही वर्ष पूर्व, अध्यक्ष रसल एम. नेल्सनले धर्मशास्त्र निर्देशिकामा उल्लेखित येशू ख्रीष्टका बारेका सबै धर्मशास्त्रहरू अध्ययन गर्नुभयो ।^१० त्यसपछि तिनले यूवा वयश्कहरूलाई पनि त्यही धर्मशास्त्र अध्ययन गर्न आमन्त्रण गरे । येशूका धेरै नामहरूका बारेमा, अध्यक्ष नेल्सनले भन्नुभयो, “येशू ख्रीष्ट हुनुभएका सबै विषयहरू अध्ययन गर्नुहोस् प्रार्थनापूर्वक र दृढतापूर्वक उहाँका विभिन्न शीर्षक र नामहरूको अर्थ तपाईंका लागि व्यक्तिगत रूपमा के हो भनेर बुझ्नका लागि ।”^११

अध्यक्ष नेल्सनको आमन्त्रण अनुशरण गर्दै, मैले येशूका धेरै नामहरूको आफ्नै सूची निर्माण गर्न सुरु गरेँ । मेरो व्यक्तिगत सूचीमा अहिले ३०० भन्दा बढी नामहरू छन्, र त्यहाँ मैले अझै पत्ता लगाउन बाँकी अति धेरै छन् भन्ने विषयमा म निश्चित छु ।

जबकि त्यहाँ येशूका केही नामहरू छन् जुन उहाँका लागि मात्र आरक्षित छन्,^१२ हामी हरेकका लागि उपयोगी हुने पाँचवटा नाम र शीर्षकहरू म बाँढ्न चाहन्छु । म तपाईंलाई आफ्नो स्वयम्को सूची निर्माण गर्न आमन्त्रण गर्दछु जब तपाईंले येशूलाई उहाँका धेरै नामहरूद्वारा चिन्नुहुन्छ । यसो गर्दा, तपाईंले पत्ता लगाउनुहुनेछ कि—तिनीहरूको सम्सर्गमा ख्रीष्टका जस्तै चरित्रहरूका साथै त्यहाँ अन्य नामहरू छन्—जुन तपाईंले येशूको करारवद्ध अनुयायीका रूपमा आफूमा लिन चाहनुहुन्छ ।^१३

पहिलो, येशू असल गोठालोहुनुहुन्छ ।^१४ यसरी, येशूले आफ्ना भेडाहरूलाई चिन्नुहुन्छ,^१५ “आफ्नो भेडालाई नामले बोलाउनुहुन्छ,”^१६ र, परमेश्वरका थुमाका रूपमा, आफ्ना भेडाहरूका लागि आफ्नो जीवन दिनुभयो ।^१७ त्यसरी नै, येशूले हामी, विशेष गरी हाम्रा परिवारहरूमा र सेवा गर्ने दाजुभाइ दिदीबहिनीका रूपमा असल गोठालो भएको चाहनुहुन्छ । येशूप्रतिको हाम्रो प्रेम देखाउने एउटा तरिका उहाँका भेडाहरूलाई खुवाउनु हो ।^१८ ती भेडाहरू जो भड़किरहेका हुन सक्छन्, असल गोठालाहरू हराएका भेडाहरू खोज्न उजाडस्थानमा जान्छन्, त्यसपछि तिनीहरू सुरक्षित नफर्केसम्म तिनीहरूसँगै बस्छन् ।^१९ असल गोठालोका हैसियतले, अनि स्थानीय परिस्थितिले अनुमति दिँदासम्म, हामीले मानिसहरूलाई तिनीहरूको घरमा नै सेवा गरेर धेरै समय बिताउने प्रयास गर्नुपर्दछ । हाम्रा सेवामा, सन्देश पठाउनु र प्रविधिको प्रयोग गर्नु भनेको सेवाको वृद्धि गर्नका लागि हुनुपर्दछ, व्यक्तिगत सम्पर्कलाई प्रतिस्थापन गर्न होइन ।^२०

दोस्रो, आउने असल कुराका प्रधान पादरी येशू नै हुनुहुन्छ।^२१ उहाँको क्रूसमा टाँगिन केही घण्टा मात्रै बाँकी छ भनी जानकारी पाएर येशूले भन्नुभयो: “मैले तिमीहरूलाई यी कुराहरू भनेको छु, ताकि ममा तिमीहरूलाई शान्ति होस् । संसारमा तिमीहरूलाई सङ्कष्ट हुनेछ: तर खुशी बन; मैले संसारलाई जितेको छु ।”^२२ आज, हाम्रो संसार बारम्बार ध्रुवीकृत र विभाजित भएको हुनाले, हामीले सकारात्मकता, आशावाद र आशाको प्रचार र अभ्यास गर्नुपर्ने महान् आवश्यकता छ । विगतमा भएका हाम्रा कुनै पनि चुनौतीहरूका बाबजुद पनि, आस्थाले सदैव आशाले भरिपूर्ण भविष्यतर्फ निर्देशित गर्दछ,^२३ जसले हामीलाई खुशीका लागि येशूको आमन्त्रणलाई पूरा गर्न अनुमति दिन्छ ।^२४ खुसीसाथ सुसमाचार जिउनाले हामीलाई आउँने असल चीजहरूको अनुयायी बन्नसहयोग गर्दछ ।

येशूको अर्को उपाधि यो हो कि उहाँ हिजो, आज र सदासर्वदा उस्तै हुनुहुन्छ।^२५ एकरूपता ख्रीष्टको जस्तै चरित्र हो । येशूले सदैव आफ्ना पिताका चाहना पूरा गर्नुभयो,^२६ र हामीलाई बचाउन, सहयोग गर्न र चङ्गाइ दिन उहाँका बाहुहरू निरन्तर फैलाइएका छन् ।^२७ जब हामी एकरूपतामा सुसमाचार अनुरूप जिउँछौं, हामी येशूजस्तै हुनेछौँ ।^२८ यद्यपि संसारले यसको लोकप्रियताको सहारामा ठूला परिवर्तनहरू अनुभव गर्नेछ किनकि मानिसहरूलाई सिद्धान्तका हरेक हुरीसँगै यता-उता फ्याँकिनेछ,^२९ सुसमाचारमा एकरूपता अनुरूपको जीवनले जीवनका आँधिबेहरीहरूमा स्थिर र अचल बन्न हामीलाई सहयोग गर्दछ ।^३० “परमप्रभुका लागि समय निकाल्नुहोस्” भन्ने अध्यक्ष नेल्सनको आमन्त्रणलाई स्वीकार गरेर पनि हामी एकरूपता देखाउन सक्छौँ ।^३१ ठूलो आध्यात्मिक शक्ति, साना र साधारण चीजहरू मार्फत् आउँदछ^३२ जस्तै दैनिक प्रार्थना, पश्चात्ताप, धर्मशास्त्र अध्ययन, र अरूलाई सेवा गर्ने “पवित्र बानी र धार्मिक दिनचर्याको” विकास गरेर ।^३३

चौथो, येशू इस्राएलका एक पवित्र हुनुहुन्छ।^३४ येशूको जीवन पवित्रताको नमुना थियो । हामीले येशूलाई अनुशरण गर्दा, हामी इस्राएलमा एक पवित्र बन्न सक्छौँ ।^३५ हामी पवित्रतामा विकसित हुन्छौँ जब हामी नियमित रूपमा मन्दिरमा जान्छौँ, जहाँ प्रत्येक प्रवेशद्वारमाथि “परमेश्वरको पवित्रता” खोपिएको छ । हामीले हरेक पटक मन्दिरमा आराधना गर्दा, हामी हाम्रो घरलाई पवित्र स्थल बनाउनका लागि महान् शक्ति प्रदान गर्छौं ।^३६ पवित्र मन्दिरमा प्रवेश गर्नका लागि जोसँग हाल अनुमति पत्र छैन, म तपाईंहरूलाई आफ्ना विशपसँग भेट्न र त्यस पवित्र स्थानमा प्रवेश गर्न वा फर्कन तयार हुन आमन्त्रण गर्दछु । मन्दिरमा बिताइने समयले हाम्रो जीवनमा पवित्रता बढाउँछ ।

येशूको एउटा अन्तिम नाम हो कि उहाँ आस्थावान् र सत्य हुनुहुन्छ।^३७ जसरी येशू सदैव आस्थावान् र सधैँ सत्य हुनुहुन्थ्यो, त्यसरी नै हामीले पनि हाम्रो जीवनमा यी विशेषताहरू प्रदर्शन गरौँ भन्ने उहाँको तीव्र चाहना छ । जब हाम्रो आस्था कमजोर हुन्छ, हामी येशूलाई पुकार्न सक्छौँ, “परमप्रभु, मलाई बचाउनुहोस्” जसरी गालीलको समुद्रको आँधीबेहरीमा डुब्न लाग्दा पत्रुसले गरेका थिए ।^३८ त्यस दिन, येशू डुब्दै गरेको चेलालाई बचाउन तल पुग्नुभयो । उहाँले मेरा लागि त्यस्तै गर्नुभएको छ, र उहाँले तपाईंका लागि पनि त्यस्तै गर्नुहुनेछ । येशूलाई कहिल्यै नत्याग्नुहोस्—उहाँले तपाईंलाई कहिल्यै त्याग्नुहुनेछैन!

जब हामी आस्थावान् र सत्य हुन्छौँ, हामी “ममा रहो” भन्ने येशूको आह्वानलाई अनुशरण गर्दछौँ, जसको अर्थ “मसँग रहनू” पनि हुन सक्छ ।^३९ जब हामी प्रश्नहरूको सामना गर्दछौँ, जब हामीलाई हाम्रो आस्थाका लागि खिल्ली उडाइन्छ, जब संसारका ठूला र विशाल भवनहरूमा भएकाहरूद्वारा हामीलाई जब घृणाका औँलाहरू हामीतिर औंल्याइन्छन्, हामी आस्थावान् रहन्छौँ र हामी सत्य रहन्छौँ । यी क्षणहरूमा, हामी येशूको बिन्ती सम्झन्छौँ, “हरेक विचारमा मलाई हेर; शंका नगर, नडराऊ ।”^४० हामीले त्यसो गर्दा, उहाँले हामीलाई उहाँसँग रहन आवश्यक आस्था, आशा र शक्ति प्रदान गर्नुहुन्छ। ^४१

प्रिय दाजुभाइ तथा दिदीबहिनीहरू, येशू हामीले उहाँलाई चिनून् भन्ने चाहनुहुन्छ किनभने स्वर्गमुनि उहाँको एक मात्र नाम छ जसद्वारा हामीले मुक्ति पाउन सक्छौँ ।^४२ येशू नै मार्ग, सत्य र जीवन हुनुहुन्छ — उहाँद्वारा बाहेक कोही पनि पिताकहाँ फर्कन सक्दैनन् ।^४३ येशू एक मात्र मार्ग हुनुहुन्छ ! त्यसकारणले गर्दा, येशूले इशारा गर्नुहुन्छ, “मकहाँ आऊ,”^४४ “मलाई अनुशरण गर,”^४५ “मसँग हिँड,”^४६ र “मेरा बारेमा जान ।”^४७

मेरो सारा हृदयले, म येशू ख्रीष्टको गवाही दिन्छु—कि उहाँ जीवित हुनुहुन्छ, उहाँले तपाईंलाई प्रेम गर्नुहुन्छ, र उहाँले तपाईंलाई नामद्वारा चिन्नुहुन्छ । उहाँ परमेश्वरका पुत्र,^४८ पिताका जन्माइएका एकमात्र हुनुहुन्छ ।^४९ उहाँ हाम्रो चट्टान, हाम्रो किल्ला, हाम्रो ढाल, हाम्रो शरण र हाम्रो उद्धारकर्ता हुनुहुन्छ ।^५० उहाँ अँध्यारोमा चम्कने ज्योति हुनुहुन्छ ।^५१ उहाँ हाम्रा मुक्तिदाता^५२ र हाम्रा उद्धारकर्ता हुनुहुन्छ^५३। उहाँ पुनरुत्थान र जीवन हुनुहुन्छ ।^५४ मेरो गहिरो चाहना यो छ कि तपाईंले येशूलाई उहाँका धेरै नामहरूद्वारा चिन्नुहुनेछ र तपाईंले आफ्नो जीवनमा उहाँका दैवी गुणहरूको उदाहरण दिँदा उहाँ जस्तै बन्नुहुनेछ । येशू ख्रीष्टको नाउँमा, आमीन ।