Fare Bin Nth’abi Fel’ e Yaat ni Mornga’agen e Easter

Sana ka gamanang fare letter nike yib ko fare Bin Somm’on e Presidency nikan be’eg ulan e ward fa branch in e wik kafram. Fare thin ko fare letter e be yoeg ni bin migid e Madnom ngay ko—Madnom ko Easter—ma gubin e ward nge branch e kemus ni nge mada’ ko fare sakrament, ma fare bin tomur e awa nike magay e ngan fanay u tabinaew ni ngan madnom nag ere rran ney ni rib ga’fan.¹

Biney e letter ko fare Bin Somm’on e Presidency e ku motoyil ngay, make ayuwegneg niku tafney nag rogon nima madnom nag e tabinaew rog fare Easter ko urngin e duw. Gelngin ni gura tafney nag rogon ni gamaed ma madnom nag, ma kug pire’eg ni gamaed be thilyeg i bin riyul’ i fan ni yima madnom nag e biney e rran, ere ku thilyeg ni gubin ban’en riy ma sor fan ngak Yesus Kristus.

Tiney e leam e ke powi’iyeg ni kug tafney nag rogon nib thil ni yima madnom nag e Kristmas ko Easter. Ngiyal’ e December, ma gadaed ma gay rogon ni ngan uneg fapi “Bell ko Kristmas,” socks nifan e Kristmas, nib mu’un e tawa’ath ko gift ngay, nge ku boech e yalen—ni woed e pii’ e ayuw nifan e gidii’ nike tu’uf e ayuw rok’, yin’ e tang ko Kristmas, nge be’eg fapi chep nib thothup ko mornga’agen fare yaat ko Kristmas nibay ko Luke 2. Gubin e duw ni gamedra be’eg mornga’agen ere yaat ney ulan e Bible, ma tabinaew romaed e rrin’ ni sana tabinaew romed ba rrin’—chuw nga madan e mad ni woed Joseph, Mary, nge fapi gidii’ nikar bad ni ngar liyoer gaed ngak Yesus, ni gamaed ma yaen u ya’an fare yaat ni mornga’agen e gargel rok’ fare Tathapeg ko Kristus.

Madnom romaed ko Easter, e bay, nib thil boech rogon. Kug thamiy ni tabinaew romaed e ma taga’ ko “yean nga galasia” ni pii’ ni Kristus e mornga’agen fare Easter, ma arram ni tabinaew romaew, e gamaedra mukun nggu madnom niged boech e yalen ni bay rogon ko fare Easter. Gu ba’adag ni guma guy pifakmow nge chiney nike un pifak pifak mow ngay ni yaed ma gay fapi fakanimen ko Easter nge tin nibay ulan fapi basket roraed ko Easter.

Fare letter ko fare bin Somm’on e Presidency e ayuweg neg ke bing owcheg. Gathi kemus nikar pininged gadaed ni ngan micheg ni ngan madnom nag fare rran ni th’abi fel’ ni buch u roey u dakean e fayleng—ni’ir e fare Bayul nge fare Foskoyam’ ni tay Yesus Kristus—nib mu’un fare tayfan nge liyoer nib tu’uf ni ngan dag ngak Somoel, nge ngiyal’ riy nike yo’or ni rayag ni ngaed pired e tabinaew nge tafagar u ta’abang ko biney e Madnom ko Easter.

siasing/Llecheklel

Somoel ni foskoyam’

Tin ba’aray e thin ni yib rok’ fare Profet Joseph Smith e kab ga’fan nib mu’un ko mornga’agen e rofen ni Easter: “Fapi def ko yalen e tiliw rodaed e irreram fapi mich rok’ fapi Apostles nge fapi Profet, ko mornga’agen Yesus Kristus, nike yim’, min ke’yag, me foskoam’ ko fare bin dalip e rran ngay, ni yean nga tharmiy; nge gubin ban’en nibay ko tiliw rodaed nibay rogon ngay.”²

I gag nge Lesa e ku weliyew rogon kanawo’en ni nggu mon’og gow ko ngiyal’ ko Easter. Sana fare duwer ni kug fithew ngomow e rayag ni fan e gidii’ ni gubin ni nge tafney nag rogon: Uw rogon ni gadaed ma dag e machib nge madnom nag fare Foskoyam’ ni tay Yesus Kristus, fare yaat ko mornga’agen e Easter, ni ku woed rogon, ga’angin, e yalen e madnom nag e gargel rok’ Yesus Kristus, fare yaat ko mornga’agen e Kristmas?

Woed ya’an ni gadaed gubin ni gadaed be gay rogon. Kuguy ni Gidii’en Got ko Tin Tomur e Rran e yaed ma tay Kristus ni’ir e mornga’agen fare Easter. Biney e mu’un fare rran ngay ko Madnom nag e Palm Sunday nge boech gidii’en Kristus ni yaed ma madnom nag fare rran ko Friday nib Mangil. Ma krayag ni ngad ted Kristus ni’ir e mornga’agen fare Easter ni gadaed be un ko yalen e nam nib thilthil.

Ulan e bin Be’ech e M’ag bee’ ko scholar N. T. Wright e ke yoeg: “Susun ni ngaed madnom niged e Easter nib thilthil rogon: ko art, thin ni mornga’agen, gosgos nifen e bitir, yoel ni fanethin, musik, churu’, madnom nag, bell, nge concert. … Iraray e bin th’abi ga’ e madnom rodaed. Ran chuweg e Kristmas riy, ma yira chuweg l’agruw e guruy u mm’on ko Mathew nge Luke, ma kemus rogon aray. Ma ran chuweg e Easter, ma dariy babyoren fare bin Be’ech e M’ag; ma dariy Kristian.”³

Gadaed ma fanay fare Bible ni bachan urngin ban’en nibe fil ngodaed ni mornga’agen fare gargel, machib, Kuruth, nge Foskoyam’ ni tay Yesus Kristus. Karimus ni dalip bugi sabathin ni pii’ e atham nge tin dariy bi’id memus ni bachan e gidii’ ni gubin ko n’en ni yoeg fare angel nu tharmiy ko fare kadbul ko Easter ko fare Low ko Yam’: “Ke fosko yam’.”⁴ Ke magar e chep nib thothup ko fare bin Be’ech e M’ag nike ayuweg mornga’agen fare yaat ko Easter nge fare machib rok’ fare Tathapeg ko fare Easter u Judea nge Galilee.

Napan ni gu ul’ul’ gow Lesa i tafney nag rogon ni nggu ga’ nigew rogon ni nggu madnom niged Yesus ni nge par ni mornga’agen fare Easter, kug weliy mornga’agen ko bin ngan ko fapi chep nib thothup e nggu weliyew ngak e tabinaew romow—ma Luke 2 e rin fel’ ko mornga’agen e Easter.

Ma arram ni thogthog ngomow ni yib u tharmiy: fapi verse nib ga’fan ni mornga’agen e Easter ulan fare bin Be’ech e M’ag, gadaed Gidii’en Got ko Tin Tomur e Rran e kan endow nagdaed ko bin th’abi fel’ e tawa’ath ko Easter! Ba tawa’ath nibay e pow riy, reb e m’ag ko Easter nibay e ma’ang’ang riy nib sug fapi chep riy nib thothup ko Easter nifan gidii’en Kristus. Gube non nifan fare Babyor ku Mormon ni rib ga’, ni fare mornga’agen Yesus Kristus ni yib i m’ug ko fare bin Be’ech e Fayleng nibay ko dogur rok’ ni foskoyam’ riy.

Profet Joseph Smith e weliy mornga’agen fare Babyor ku Mormon ni “ire thʼabi matʼaw e thin riy u fithikʼ e pi babyor,”⁵ ni tabab ko 3 Nephi 11, mornga’agen fare yaat ko foskoyam’ ni tay Kristus napan ni yean ngak fapi Nephites, fare machib ko fare Tathapeg ko Easter. Pi chep ney nib thothup ko Easter e be micheg mornga’agen fare Foskoyam’ ni tay Somoel Yesus Kristus.

Ulan e tiney e guruy, Kristus e me’eleg Ragag nge L’agruw e Apostles, me machib ngorad ni woed rogon u dakean fare Buruy, nibe yoeg nike mu’ i mugu’liy fapi motochiyel ku Moses, me machib nag fapi mukun ni yira tay nifan pi u Isreal. Yibliy ma be gol nag fapi m’ar u fithik’ e ma’ang’ang ni “dariy ba yunmon ni rayog ni nge yoeg, ara yog ni yoloey beeʼ, ara yog ni guy gumʼirchaʼen e gidiiʼ fini felʼ nge fini poloʼ falʼngin e pinʼen ni kug guyed ma kug rungʼaged ni ke yoeg Yesus; ma dariy beeʼ ni rayog ni nge guy u laniyaenʼ e falfalaenʼ ni ke suguy maed ni poloʼ ko re ngiyalʼ i nʼen nug rungʼaged nibe meybil ni fan ngomaed ngakʼ e en Chitamangiy.”⁶

siasing/Llecheklel

Yesus Kristus ni yibe m’ug ngak fapi Nephites

Biney e Easter, tabinaew romow e nggu tabab gaed ko fare fapi 17 e guruy ni somm’on ko 3 Nephi 11, ni gumanag ni gamed manang mornga’agen. Gamed manang mornga’agen fare ulung i gidii’ ni yeleg fare temple ko fare binaew ni kanoeg yu Bountiful ngay ni rung’ag e laman Got ni’ir e Chitamangiy nge Yesus Kristus ni guy ni yib u tharmiy nga butt’ nibe pingingdaed ko fare Easter:

“Mu sakʼiy gaed ngalang ngam baed ngog, … ni nge yog ni ngam math gaed ko fath u fathan e richib u lan paʼag ngu rifrifanʼeg, ni nge yog ni ngam nanged ni gag e … fare Got ko fayleng ni poloʼ, ma kan liiʼeg nggumʼ ni bachan e pi denen ko gidiiʼ nu fayleng.

“Me … fare ulung i gidiiʼ e ranoed, … ni tataʼabeeʼ … mar guyed nga oewchraed mar thamiyed nga paʼaraed, … mar falʼeged babyoren, ni ireram fachaʼ. …

“Mar tolul gaed ni yaed gubin u taʼabang, ni yaed be gaʼar:

“Hosanna! Ke magaer fare Got ni Thʼabi Tolang! Mar awgaed nga butʼ nga charen I rifrifanʼay Yesus, mar liyoer gaed ngakʼ.”⁷

Mu tafney nag: ya’an fapi Nephites ko fare temple ni yaed be mad nga pa’ fare Somoel nike foskoyam’! Gamaed be athapeg ni nggu uneged e 3 Nephi ko yalen e Easter romaed ni woed rogon nibay ko Luke 2 nifan e Kristmas romaed. Riyul’, ni fare Babyor ku Mormon e ma weliy fare bin ni th’abi fel’ e yaat ni mornga’agen e Easter. Dabin ni pag ni dabin weliy mornga’agen e biney e yaat ko Easter.

Gube piningmed ni ngam sap gaed ko fare Babyor ku Mormon ko rogon nibe micheg nib gel mornga’agen Kristus ni foskoyam’ nge fapi machib rok Kristus nibay riy.

Rayag ni gadaedra fith, Uw rogon ni fare be’eg e Babyor ku Mormon ko Easter era tawa’ath nag e yafos rodaed nge pi’in nib t’uf rodaed ko tin nib ga’fan? Bay ni bo’or e gidii’ nira nang. Gubin ngiyal’ ni gadaedra be’eg fa dad filed mornga’agen fare Babyor ku Mormon me rayag ni ngad taga’ gaed ko tin nira buch u tomuren ni rib fel’.

Dawri n’uw napan ngay, ni gag nge Lesa e ku unew ngareb e magawon ko reb e fagar, bee’ nib bpin nib gel e mich rok’ nike yim’ ni bachan e ke m’ar. Gamaed e tabinaew nge tafagar ni kug mukungaed nga ta’abang, ni gamaed be weliy mornga’agen ere bpin ney ni rib fel’ nge rogon nike suguy e yafos romaed.

Napan ni gub sak’iy u charen fare kahol ni gube non ngak boech e gidii’, mug guy l’agruw chi buliyol nib Primary-nikar bow ko fare kahol ni yow be gay rogon ni ngar guyew langgin—owchrow nibe mus u mirichlen fare kahol—nikar bow ni ngar fingichiyew e aunty rorow. Dariy bee’ u charen row, ere yean Lesa nge par nga charen row me pii’ e ayuw ngoraw me fanow nagrow. Me fith ngorow ko rogon row nge fa’anra yow manang ko ngan e bay e aunty rorow riy e chiney. Un ngorow ko kirbaen’ rorow, ma gali buliyol ney ni fak Got, ni michuwun’ row ngay, e rogew ni aunty rorow e chiney e bay nib falfalaen’ ma bay rok’ Yesus.

Biney e yingar, ma kar pire’egew e gapas ko fare gonop ko falfalaen’, ko rogon e bitir, nira michegew nibay nib riyul’ fare Foskoyam’ ni tay fare Tathapeg. Yow manang ni bay ulan gum’ircha’en row ni bachan rogon e machib ko galibthir, tabinaew, fapi tiyugang’ ko Primary ni yaed be yung fapi awoch ko mich ngak Yesus Kristus nge fare yafos ni manechubog. Yow ba gonop ko duw nibay nga mm’on rorow, gali buliyol ney e ke yib ko fare mulwol ko Easter nge fare machib ko foskoyam’ ni tay fare Tathapeg nge fapi thin rok’ fapi profet nibay mornga’agen ulan fare Babyor ku Mormon.

Ku guy ni napan nira pii’ President Russell M. Nelson bakan fare Babyor ku Mormon ngak bee’ ni gathi bee’ ko tiliw rodaed, nib mu’un e tiyugang’ ngay u dakean e fayleng, ma baga’ nima pingeg ko 3 Nephi me be’eg mornga’agen Kristus ni yibi m’ug ngak fapi Nephites. Biney nibe rrin’, fare profet rodaed nib fas e be micheg ni Kristus e bay nib fas.

Dabiyog rodaed ni ngaed weliyed e mich rodaed ngak Yesus Kristus nge mada’ ko ngiyal’ ni ngad micheged mornga’agen. Fare Babyor ku Mormon e reb e mich ni mornga’agen Yesus Kristus ni bachan fapi payg riy nib thothup, nib sug e profet riy nibe micheg ni gathi kemus nira yib Kristus machae riyul’ nike mu’ i yib.

Nibay ulan paʼag e bay reb e copy ko Babyor ku Mormon riy ni’ir e bin somm’on e edition. Biney e gubin ngiyal’ nima ayuwegneg. Baga’ ni ga’angin yang e yafos rog ko napan ni kug ilaal, ma woed ni ri guba’dag, make gin owcheg ngay, ko n’en ni rrin’ Joseph Smith ko napan nib fel’yangren ko rake babyor ney nib thothup ni pilyeg e thin riy nge mu’ me publish nag mornga’agen. Fapi ma’ang’ang ko tin ni thingari buch e bo’or ni ngan tafney nag mornga’agen.

Machane gathi irerray fan ni gu ba’dag e rake babyor ney. Biney e bachan e rake babyor ney, ni dariy reb nikan publish nag u dakean e fayleng ni woed ko biney, nibe micheg fare yafos, fapi pigpig, nge fapi machib, fare Bayul, nge fare Foskoyam’ ni tay Yesus Kristus. Pi walageg, fil mornga’agen e rake babyor ney ni mornga’agen Yesus Kristus ni gubin e rran e rayag nira thilyeg e yafos rom. Mara bing owchem ngam guy e tin nib fel’. Ra ga’nag e athap rom me suguyem ko t’ufeg. Ma bin th’abi ga’ riy, era gelnag e mich rom ngak Yesus Kristus me tawa’ath nigem ko llowaen’ ni yow e Chitamangi e yow manang gur, ni gab t’uf rorow, ma yow ba’adag ni ngam sul nga tabinaew, ni bin somm’on e letter riy nib capital e T.

Pi walageg, ke taw ko ngiyal’ riy, ni ka’i yoeg fapi profet ni kakrom, “fare ngiyalʼ innʼem e bay yib u napʼan ni ke garar fare llowaenʼ ni morngaʼagen ba Tathapeg u dakean gubin e nam, nge mfen, nge thin, nge gidiiʼ.”⁸ Gadaed be guy e biney nikan micheg nibe buch e chiney, u dakean fare mʼag ku Yesus Kristus u lan fare Babyor ku Mormon.

siasing/Llecheklel

Fare Somoel i Yesus Kristus

Dariy bakan e babyor ngay nibe dag makemus ni biney ni:

• Bachan Yesus Kristus, gubin ban’en make thil.

• Bachan Ir, gubin ban’en make mo’onog.

• Bachan Ir, yafos e ke moem boech—ni rib ga’ ko ngiyal’ nib gel e amith.

• Bachan Ir, gubin ban’en ma rayag.

Fare wub rok’ ni’ir e fare Tathapeg nike foskoyam’, ni ngongliy rogon Got ni’ir e Chitamangiy, e irerram e bin th’abi ma’ang’ang nge mulwol ni rib fel’ ko Easter. Ra ayuweg e tabinaew romow nge michaen’raed ngak Yesus Kristus ni’ir e Tathapeg rodaed nge fare Tathapeg rodaed, ni’ir e ke bing wo’en e yam’.

Michuwun’ug ngay ga’angin nib riyul’ fare Babyor ku Mormon nge Yesus Kristus ni’ir e Fak fare Got nib fos. U dakean fithngan Yesus Kristus, amen.