Gachalpen fare Pilung ko Gapas

Fare prophecy ni pii’ ngak Zekariah nike buch,¹ ni yib Yesus ngalan fare Binaew nib Thothup nibe yib u dakean e donkey, ni biney e ba “pow ni kakrom nifan e Jewish ni’ir e bee’ nib pilung,”² ya riyul’ ni’ir e Pilung ko fapi pilung nge fare Pilung ko Gapas.³ Yib i yileg ni pire’ e gidii’ nibe lek ma yaed falfalaen’ ngak, ni yaed be tayed e mad roraed, nge yuwan e yuw, nge ku boech e yuwan e gaki’iy ko gin nibe yib Yesus riy. Yead be og nag e magar ngak Got, ni yead be ga’ary, “Ayuweg e en ni pilung ni ir e ke yib ni owchen Somol: Gapas e bay u tharmiy, mi Got e ke sorok.”⁴ Nge biyay, “Hosanna Ke sorok Fak David: Ayuweg e en ni ke yib ni owchen Somol; Hosanna ko gin ni th’abi tolang.”⁵ Biney nike buch, ni gadaed ma madnom nag ni kanog fare Palm Sunday ngay, ni fare ngiyal’ ni rib gel e falfalaen’ riy ni’ir e fare wik u mm’on ni yim’ fare Tathapeg nge fare ma’ang’ang ni buch ni foskoyam’.

Gadaed pi gidii’en ni gadaed be leak, gadaed e gidii’ rok’, nikan pining daed ni ngaed wereged mornga’agen,⁶ ngad weliyed mornga’agen fare gapas nike pii’ nge fare maligach ni bayuliy. Biney e gapas e ba tawa’ath nikan micheg nag ngak e gidii’ ni gubin ni fa’anra yaedra sulweg gum’ircha’enraed ngak fare Tathapeg; biney e gapas e ma pii’ gelngindaed ni nge falfalaen’uy ko biney e yafos u fayleng me pii’ e athamgil ngodaed ko fapi amith ni gadaed be gafgow riy ko biney e yafos.

Napan e 1847, Somoel e madil nag ngak fapi pioneer ni gidii’en e Galasia, nib tu’uf e gapas roraed ma ngar pired ni yaed ba ta’areb ko ngiyal’ nib gel e momaw’ ngalan e milekag roraed. Ku boech ban’en, Somoel e madil nag ngak fapi gidii’en e Galasia ni ngar “gayed rogon ni dabra togopluw gaed ngomaed; ma dabra yoeged e thin nib kireb ngoraed.”⁷ Fapi chep nib thothup e ke micheg ni pi’in nibe gay rogon fapi muruwel nib mat’aw ma be gay rogon ni nge yean u wo’en fare Thothup rok’ Somoel e kan micheg nag ngoraed fare gapas nira tu’uf roraed ni ngar gel gaed ko pi rran ney ni yead bay riy ko ngiyal’ ney.⁸

Gadaed pi gachelpen fare Pilung ko Gapas, kan madil nag ngodaed ni ngaed pired ni bay “taʼareb gumʼirchaʼraed u taʼabang ngo fithikʼ e tʼufeg roraed ngoraed.”⁹ Profet nib t’uf rodad, President Russell M. Nelson, e keyog ni dawri n’uw napan, togopluw e ma gathay nag gubin ban’en nike rrin’ make machib nag fare Tathapeg.”¹⁰ Profet rodaed e ki yoeg ni ngaed rrin’ed gubin ban’en ulan e yafos rodaed ni ngaed taleged e tin ni gadaed be thamiy ulan gum’ircha’endaed ni dani fel’ nga tin ni dani fel’ ulan e yafos rodaed.”¹¹

Tafney niged e pi yalen ney rok’ Kristus ko rogon e t’ufeg rok’ ngodaed ni gadaed, ni pi gachalpem, ni ngaed gayed rogon ni ngaed rrin’ed nifan ngodaed. Fapi chep nib thothup e ke weliy e mit ney e t’ufeg ni adag.¹² Napan ni gadaedra tafney nag e adag, ma tafney rodaed e baga’ nira tafney nag boech e ngongol ni yibe gol ngak bee’ nge pii’ e ayuw ni nge ayuweg e pi’in nibe gafgow. Machane, adag e gathi kemus ni ban’en ni gadaed ma pii’ ngak bee’, machane ban’en ni yibe rrin’ ni woed ni yib rok’ fare Tathapeg ma rayag nira mang biyang ko yafos rodaed. Woed ni madil nag Somoel ni ke fonow ngaddad ni ngaed chuweg nga mad “nifan e tha’ ko adag, … ni’ir e fare tha’ ko tin nib polo’ nge gapas.”¹³ Ma faʼanra dariy e tʼufeg roraed ma dariy rograed,¹⁴ ma dabiyog ngoraed e rangi tagilʼ ni baʼaram ni kam falʼeg u lan e pi naʼun rokʼ e Chitamam.¹⁵

Yesus e dag rogon ni rib gel’ e ran’ey nibe yipfan fare tha’ ko tin nib polo’ nge gapas, ni rib ga’ ko fare ngiyal’ nin gafgow nag u mm’on nin lii’ nge yim’. Tafney nag ko mang ere n’en ni thamiy Yesus ko napan nibe lukuy rifrif ay fapi gachalpen, ni manang ni bay bee’ u fithik’raed nira yagnag ko re nap nem.¹⁶ Fa napan ni Yesus, boech e awa nga tomuren, ni fosag yuwan tel fare mo’on ni un ngak Judas, facha’ ni yagnag, ni ngan kalbus nag.¹⁷ Fa ngiyal’ ni fare Tathapeg, ni sak’iy u mit Pilate, ni fapi tolang ko prist nge pi’in pi’ilal nib togopluw ngak, machane de yog ban’en nib togopluw ngak, me digey fapi am u Roma nike gin owchraed.¹⁸

Ko dalip i n’ey ni buch, fare Tathapeg, ni aram gelngin e kirbaen’ nge tomal nibe thamiy, make machib nag ngodaed ni “t’uf e ba gumaen’ ma ba gol, ma der ma awan’; … ma de uf; … ma de tolngan’, nge de kireb daken, ara kemus ni ir e ma leamnag ir, ara ba papey e damumuw ngak; ma der ma aw [nga] laniyan’ e n’en nib kireb ni kan rin’ ngak.”¹⁹

Reb e pin’ey nib ga’fan, ni’ir e rib ga’fan ko rogon ni ngan dag ere gapas ney rok’ fare Tathapeg, e rogon ni ngaed ayuweged rogondaed. Napan e ngiyal’ e machib rok’ u fayleng, fare machib rok’ fare Tathapeg e baga’ ni—gathi kemus, machane—gin ga’yang riy, e mornga’agen e t’ufeg, adag, gumaen’, sobut’aen’, nge murnguy—ni’ir e fapi def nifan e pi’in ni ba’adag ni nge chuchugur nag ir ngak me dag rogon e gapas rok’. Pi n’ey e bugi tawa’ath nike yib rok’ Got, ma napan ni gadaedra gay rogon ngaed rrin’ed, ma gadaedra tabab i guy e n’en ni be mo’owar e bugiliyiror rodaed riy u fithik’ e murnguy, munguy, tayfan, min nangfan. Reb e pow nibe m’ug ni gadaed be chugur nagdaed ngak fare Tathapeg ma gadaed be bod ir e fare t’ufeg, gumaen’, nge rogon ni gadaed be ayuwegdaed, ni demuturg ko n’en nibe buch.

Bo’or yay ni gadaed ma guy e gidii’ nima un i yoeg e thin ni dani fel’, fa n’en nib mo’owar facha’ riy, fa tafney rok’ e gidii’, nib ga’ nima buch e biney ko ngiyal’ ni dar puluw rogon e tafney roraed fa rogon e ngongol roraed. Rib mom ni ngan guy e pin’en ni yaed be yoeg ngoraed, ni yaed ma un ko n’en nikar rung’agned ni dan nanged ko n’en nike buch. Woed, e social media e rib gel ko mitney e ngongol ko tin nib riyul’ nge tin ni dani tu’uf ni ngan weliy mornga’agen. Fa’anra dabiyag ni ngan siyeg, ma mit ney e thin u online e baga’ nima karang e tuwthin, nge kirbaen’, amith nga gum’ircha’ey, ma be karang e dumomuw nib alamrin.

Nephi ni prophecy nag ni fare rran nem e ire ra gagyeg u lan gumʼirchaʼen e gidiiʼ me kʼaringraed ngar damomuw gaed ko tin nib mangil banʼen.²⁰ Fapi chep nib thothup e machib nag ni, “gubin banʼen nibe piningey ma be miliyey ni ngan rinʼ e tin nib mangil, ma ngan tʼufeg Got, min pigpig ngakʼ, e thogthog ni yib rokʼ Got.”²¹ Ere, “ma tin nib kireb e ma yib rokʼ moʼoniyanʼ; ya fare moʼoniyanʼ e ire toʼogor rokʼ Got, ma be togopluw ngakʼ ni gubin e ngiyalʼ, ma be pining ma be miliy laniyaenʼ e gidiiʼ ko denen, ni ngar rinʼed e tin nib kireb ni gubin e ngiyalʼ.”²²

Mu tafney nag e biney machib nikan prophecy nag, dani gin owchey ngay ni reb kanawo’en fare mo’oniyan’ e nge wereg e gidii’ u but’ nge sug gum’ircha’enraed ko fananikan ngak pifak Got. Rima falfalaen’ ngay napan nira guy e gidii’ nibe mak’rang, ma be thin ni kireb, fa ognag e kireb ngak bee’. Mit ney e ngongol e rayag nira kireb nag mornga’agen bee’, thibngin facha’, tafney rok’ facha’, ni baga’ ni fa’anra dabin pufthin nag facha’ nib mat’aw. Rib ga’fan ni ngan guy ni napan ni gadaedra pag e tiney e ngongol nge yib ngalan e yafos rodaed, ma arram ni gadaed be bing gum’richa’endaed ngak fare to’ogor ni nge yung fare awoch nga thilindaed, nibe wawliydaed ni ngaed mulgaed ngalan fare wup rok’.

Fa’anra dabda sapgad e lemnag, pi thin, nge pi ngongol rodad, gadad ra fek e t’aer liyiben rok to’ogor, nira gathaynag e pi tha’ rodad ko pi’in ulangabdad nge pi’in nib t’uf rodad.

Pi walageg, gadad e gidii’en nib thil nge pii’ed e gapas Rok’, dabda thapeged ulanggin e gum’ircha’dad e t’aer liyiben ney rok’ e mo’oniyan. Dabda fekdad e magawon ney ni ma gathay nag e thamey, tha’, nge yafos. Fare gospel ni bay yip’ fan pi thin nib felʼ nib mangil;

Arragon, dariy bagdaed nib polo’, ma bay ni bay bochingiyal’ ni gadaed ma un u fithik’ e tiney e ngongol. U fithik’ e t’ufeg rok’ nge llowean’ rok’ ni gubin ban’en ma manang ko mornga’agen e dodow ko gidii’, fare Tathapeg e gubin ngiyal’ nima yoeg ngodaed e riyaq ko pin’ey. Ke fil ngodaed, “Ya rogon ni kam turguyed e tafnaey romed ngakʼ beeʼ, e aram rogon ni yira turguy e tafnaey ngomed; ma rogon gelingin e gechig ni ngam turguyed ngakʼ beeʼ e ku aram rogon gelingin e gechig ni yira turguy ngomed.”²³

Brothers nge sisters, napan ni gadaed be gay rogon ni ngaed rrin’ed e pin’ey ni’i rrin’ fare Tathapeg, ma rayag ni ngad manged pa’ fare gapas rok’ u dakean e fayleng ni woed rogon nike yarmiy make duugliy. Gube piningmed ni ngam tafney niged rogon ni rayag ni ngam thilyeg rogonmed ni ngam chubiyed magmed pii’ e ayuw ngak’ e gidii’, gidii’ nib sug gum’ircha’gen ko min’agfan, gidii’ mima guy e tin nib fel’ ko gidii’, ma gubin ngiyal’ nibe par u waen’ ni “faʼanra bay banen nib tamilang gamʼingin, ma ba felʼ matʼawon fa manging, ni felʼ bugwan, ma aram e pinenʼ ni gamad be gay.”²⁴

Ri gube micheg nag ni fa’anra gadaedra gay rogon min rrin’ e pin’ey, mara moem ngodaed ni ngaed nangfaned e tin nib tu’uf ko gidii’ nibay u charendaed.²⁵ ma yaedra thamiy e falfalaen’, gapas, nge mon’og ko thothup.²⁶ Gu manang, ni Somoel era guy rogon ni gadaed be athamgil mara pii’ ngodaed fapi tawa’ath ni ngeyag ni ngaed gumaen’gaed ko gidii’ nib thilthil ngodaed, tin ni gadaed be mo’owar riy nib thil, nge tin ni dar fel’ rodaed. Ma krayag, nira moem ni ngan digey min palog nigey ko ngongol fa kireb nag mornga’agen bee’. Ma adag rodaed ni ngan n’agfan rok’, ni woed rogon nike rrin’ fare Tathapeg, e en nike rrin’ e kireb ngodaed era gel me mang biyang rodaed.

Nge mang e daba’, ko re rran ney ko Palm Sumday, ni ngaed wereged e t’ufeg nge adag, ni ngaed laked wo’en fare Pilung ko Gapas ni gadaed be fal’ag rogoy ko re madnom ney, ni bayib, fare ma’ang’ang nifan fare foskoyam’. Gadaed e brothers nge sisters ngak Kristus, ngaed doged u fithik’ e falfalaen’, “Hosanna Ke sorok Fak David: Ayuweg e en ni ke yib ni owchen Somol; Hosanna ko gin ni th’abi tolang.”²⁶

Gube micheg ni Yesus Kristus e bay nib fos nge fare t’ufeg rok’ nib polo’, ni dag ko fare maligach ni bayuliy, e bay nifan e gidii’ ni gubin pi’in ni ba’adag ni ngar unded ngak mar falfalaen’gaed ko fare gapas rok’ ko biney e yafos nge bin migid ngay. Gube yog e pin’ey u dakean fithingan fare Tathapeg nib thothup nge Tabiyul, Yesus Kristus, amen.