Sel Klisichel a Blakereng er a Chedaol Klechad

Rodam me a rodos, betik a renguk er kemiu. Ng kmal soak tiakid el techall mengedecheduch er kemiu er chelchal sils. Nglunguchek er a bek el sils me bom selbechakl er a odelcheklel a cheraro e le borngii a klisichiu lomakes el bedul uchei er a ngii di el olibesongel el bom chebangel.

A bebil er a ringel a kmal berrotel el berraod el diak el moues. E a kuk bebil a di chemolt er a beluulechad. A mekemad er a ongos er a beluu er a Europe a ta er ngii. Ng mla mo betok el taem el kbo er a Ukraine me a Rosia. Ng soak el beluu, me a rechad er ngii, me a tekingir. Ak lmangel e meluluuch el kirir a rechad el mla metemall er tial mekemad. A Ikelesia olngeseu er a ikel sebechel el ngosuterir tirkel ngara ringel me a chelebuul. Aki olengit er a rokui el chad el mo melemolem lolsengerenger e meluluuch el kirir tirkel chad el ngara chelebuul er tial ringel. A ngii di el teletael er a mekemad a kmal lomtok a rokui el Rubak el Jesus Kristo a ulisechakl e oltaut.

Ng diak a ta er kid el sebechel mtebechel a beluu, a lechub a loruul a rebebil er a rechad a lechub eng omerellir a rechad er a telungalek er kid. Ng di kid a sebeched el metebechelid. A kulekoi er ngii er chelechal sils, e rodam me a rodos, a mo torrob a uldikel el ngararengmiu, me arekeblimiu, me a me aklengar kemiu. Mdakl a rokui el teletael el ngii a mo melemall er a rebebil — el ngii el teletael a ngasechereng, a lechub eng mesechesuched el cheldecheduch, a lechub eng klsibereng el kirel a chad el blechoel mengerusii er kau. Eng di, a Osobel a dirrek el mla dmu er kid el mo odersii a bita lotenged,¹e mo oubeltikereng el mo er a rechereued, e meluluuch el kirir tirkel mekngit a blekerdelir el mei er kid.²

Ng kmal meringel a dolserechakl er a ngesechel a rengud sel domelchesiu el ngara llemalt. E dirrek el kmal meringel dousubes er tirkel mekngit a blekerdelir el mo er a re diak a telmellir. Eng di, a Osobel a mla dmu er kid el mo “ousubes er a rokui el chad.”³

Kid a oltirakl er a Prince er a Budech. E chelechal taem, e kede lmuut el kmal ousbech er a budech el di Ngii a sebechel meskid. Meng mekera e morngii a budech er a beluulechad a lsekum a dersta el chad a diak losiik er a budech me a kltalreng? Rodam me a rodos, ak medengei el kmo a kulekoi er ngii a diak el beot el tekoi. Eng di a roltirakl er a Jesus Kristo a kirir lochotii okesiu el beluulechad el rokir a mo oltirakl er ngii. A kulengit er kemiu me bo er a tkul er bab el sebechiu el merrob a uldikel el ngara chelsel a rengmiu me a klengar kemiu er chelechal taem.

Msall ek beketeklii tia longit el mo smodii a tekoi el uaia le milkletkak er a kumes a basket.

Sera uchelel, tial klekool ng meral mle smiich, er a bita me a bitang. E sola, a bochu el merek a taem, e a guard er a tara tim a loiia edei el point. Meng kmal mochu merek, e a kuk tara chad er a tim er ngii a rucherchii a bduu e loia tara point eng melebusech a taem. Me tial tim a merolang el mla mo kats er a eua el point, leng mle blak a rengrir el melemolem. Ng mle sebechir loba blakereng e melemolem me te mlo kats er a klekool.

Klisichel a blakerreng a ngarbab el osisechakl. Kede rokui el ngarngii a taem e kede mla soiseb er ngii el teletael—okesiul tiang, uaia a mlai el merael mo bekerurt a lechub a kakebosech luldasu a mocha klauteketok.

Me a kuker, ngera mekdebechii a blakereng el melemolem el ngara chedaol tekoi? Kede mla mes okesiu er a ungil me a mekngit el blakereng. Kede medengelterir a roltirakl er a Jesus Kristo el ulebult e mirrael mo mesisiich a klaumera er tir. E dirrek el medengelii a tang lulebult el mo oumerang eng di ng mla touchakl. A blakereng a sebechel mesim el mong e mei.

Kede kmal mui lousbech er a ungilblakereng er a chedaol klechad er chelechal sils, el mo mtekengii a rretel a mekngit me a olangch er chelechal taem el di meleketek. A ungil blakereng er a chedaol klechad a ngosukid lomakes el bedul uchei er chelechal taem er a dakt me a rraureng er a omekodall el secher, tsunami, obuu el bulkeno, me a mekemad. A blakereng er a chedoal klechad a sebechel ngosukid lodngakl, a mekngit lodelcheklel a cherarou me a omengesuseu er ngii el melemall er a chedaol dodai er kid.

Betok el blekeradel a sebechel mekdebechii a blakereng er a chedaol klechad. Blekongesenges, beltikekereng, ngariou el reng, omesiou, me a omereng el saul⁴ a bebil er ngii.

Chelechal sils, eng soak el dmu kleim el tokubets el tekoi el sebeched lousbech el mo ngosukid el mo urrekodel er a blakereng er a chedaol klechad.

A kot: Miiull er a rolel a telbiil e di mereko el ngarngii.

Ng diak el sal meketeketa el tekoi, e a kulmerous el mle teloi er a klou el cheldebechel er a rechad. Te uleker ngak a betok el ker, el ta er ngii el ker a kirel a rolel a telbiil e ngera uchul meng klou a belkul.

Chelsel tial berrusek, e ak milsaod el kmo kede soiseb er a rolel a telbiil el mo nguu a techolbechelid el soiseb er a kot el telbiil lobengkel a Dios.⁵ Ea bek el taem el dolai er a sakrament, e kede yaksok el muutel mo nguu a ngklel Osobel, e mo melbedebek er Ngii, e mo oltirakl a Llechul.⁶ Seikid, e a Dios a meketeklii el mei er kid el kmo a Chedaol Reng er a Rubak a mo blechoel lobengked.

Uriul e kede soiseb er a lmuut el telbiil er a chelsel a templo, el bo dengai a lmuut el ngarbab el yaksok. A chedaol ruoll me a telbiil a meskid a tecahll er a klisischel a kledios. A rolel a telbiil a di chimo el rael el ngoikid el mo suobel e nguu a diak a ulebengelel klengar.

Tial berrusek, e a tal redil a uleker ngak el kmo a chad el mla tomall a telbillel ng mekera luut el mei er a rolel a telbiil. A nger ngak er a keril a ngoikak el mo er sel ongerung el tekoi:

Bo betik er a deureng er a bek el sils er a ouchel reng.

Ngera ultutelel a ouchel reng? A Alma ulisechakl el kmo “ng diak a ngera el dolisechakl ng di tal ouchel reng me a klaumera er a Rubak e merekong.”⁷ A ouchel reng a kirel motirakl er a rebek el sebechir el chad el tir a sorir a diak a ulebengelel klebkall.⁸ Ng diak a mochib er ngii. Chelsel sel chedaol ocholt el mo er a Profet Joseph Smith, e a Rubak a ulengeroel er a remengeteklel a Ikelesia el dimlak lolisechakl er a rengelkir a ebangkelio.⁹ A ouchel reng a ngiia kiis er a bekesed. A mechelins el klaumerang a ngoikid el ngoriakl er a rolel a telbiil.

A kulengit me lak ko medakt a lechub e momekeoud el kirel ouchel reng. A Diablong a ungil a rengul omngara klengitelreng. Mterbengii. Motebedii er a klengar kau! Momuchel er a chelechal sils el mo melchesuar a deureng sel bo bechei a soal a rengul a chad.¹⁰ A Osobel a blechoel di betik a rengul er kid eng di tokubetstirkel louchel a rengrir Ng mla yaksok el kmo “a mekididai el rois a mo dibus, me a bukl a mo riou … eng di a blekokokouii er ngak a diak bol cheroid er kau.”¹¹

A lsekum e ke omelchesiu el mla touchakl er a rolel a telbiil el kmal cheridang a lechub eng kemengetang e diak el sebechem lobult, eng kmal diak el klemerang.¹² A kulengit me bo mongedecheduch er a bisop a lechub eng merredel er a branch. Ngii a omtechei er a Rubak e mo ngosukau el mo melchesuar a deureng me a selbechakl er a ouchel reng.

Chelecha, e tial uleklatk: A luut el mo er a rolel a telbiil a diak el belkul a kmo ng mo beot. Ng meringel e a bebil er a taem e kede omelchesiu el merael er a kongesachel.¹³ Tia uaisei, e leng, skeng el mei er kid e olisechakl er kid, e mengikiid er kid, e ngosukid el mo santo. Ng di chimol el mo er a diak a ulebengelel klengar. A tal profet¹⁴ a milsaod er a “ungil e ngara deureng el klengar er tirkel loltirakl a llechul a Dios. A le uaisei, e tir a ngeltengat er a rokui el tekoi, a tekingel a klechad me a reng; e a lsekum te outekangel el mo er a ulebongel e te mora babeluades … [e] mo kiei lobengkel a Dios el ngara diak a ulebengelel deureng.”¹⁵

A dengara rolel a telbiil, lobengkel ouchel reng er a bek el sils, eng mekdebechii a ungil blakereng er a chedaol klechad.

A ongedei el tekingek a kmo: Mosuub el kirel a Dios me a teletelel a Loureor.

A tara klou el ringel er chelechal taem a ultebenged er a klemerang er a Dios me a chelbeldil a Diablong. Tiaikid a uchul e a Rubak a soal a “deblechoel meluluuch, … me luchul e [kid] bo de mesisiich er a Diablong, e bol … sebeched el chemiis er a chimorir a remesiungel a Diablong el tir omtok er tia lureor.”¹⁶

A Moses a meskid okesiu el kirel a ultebenged er a Dios me a Diablong. A Diablong er a lemei el me mengetikaik er a Moses, eng miltebengar a chelbeldil le ngii el dirk mlo merek el kaseues ngii me a Dios. A Moses a mle mereched el mtebengar a Diablong e dilu er ngii me bol cheroid.¹⁷ A Diablong er a di lollechelch, e a Moses a mle medengei el kmo ng mekera lomekedong er a Dios el kirel a ngesou. A Moses a ngilai chedaol ngesou meng liluut el oklii a diablong e dilu, el kmo, Bom cheroid, e Diablong leng di chimol Dios a kungull er ngii.¹⁸

Ng kired el mo oltirakl er tiaikid lokesiu. Modikii a Diablong er a klengar kau! A kulengit me lak mobengkel mo er sel basio er ngii el “beluu er a klengitelreng me a klekurusii.”¹⁹

Ng kmal mereched, a klaumerang el mo moalech a lsekum eng diak dongoeas er ngii er a bek el sils “lolab a tekingel a Dios”²⁰ can crumble. A leuaisei, e sel mo mtekengii a chelbeldil a Diablong a bleketakl: Kede ousbech el mengull er a Rubak er a bek el sils e mesuub er a ebangkelio er Ngii. A kulengit er kemiu me a Dios bo lomtebechel a klengar kemiu. Bsa Rubak a klebech a iidisel temem. Sel bom uaisei, e momtab el kmo ngera duubech er a ungil blakereng er a chedaol klechad er kau.

Ongeua el tekoi: Mosiik e mongerchir a mengasireng el tekoi.

A Moroni a milketeklii er kid el kmo“A Dios a diak el bla le bo lak el Dios er a mengasireng.”²¹ A bek el hong er a chedaol llechukl ochotii el kmo a Rubak a semeriar el mo soiseb er a klengar er tirkel loumera er Ngii.²² Ngii a milingii a Bekerekard el Daob el kirel a Moses, e ngilseuir a Nephi el ngmai aikel tibereberk el sintsyu, e ulutii a Ikelesia er Ngii lokiu a Profet Joseph Smith. A dersta er a ikal mengasireng el teletael a ulusbech er a kemanget el taem e locha dimlak el sal kmal ngii a lullengit tirkal chad er a Rubak.

Ng osisiu el teletael, el Rubak a mo omekngeltengat er kauer a ikel mengasireng el kau ousbech a lsekume kau oumera er Ngii, “el diak moumededenger.”²³ Moruul a chedaol tekoi el kirel a skel ongasireng. Mngara nglunguuch lolengit er a Dios me lengesukau el mo ultuil er tiaikid el klaumerang. Ak yaksok er kemiu el kmo ng sebechiu el mo medengei el uase a Jesus Kristo “a mesterir a klisiich a remechitechut me tirkel diak a klisichir a ngii a mo mengisois.”²⁴ Bebil er a tekoi a mo mekereklii a blakereng er kemiu er a chedaol tekoi el rubak a mo ngosukemiu el ngoriakl er a ikel olibesongel el bom chelbangel er a klengar kemiu.

Ongeim el tekoi: Mterob a uldikel er a klengar kau.

Ak lmuut el meklii a tekingek er a mo torob a uldikel er a klengar kemiu. Bo moba ngariou el reng, blekeu, me a klisiich el mo ousubes, e mosiik er a klausubes. A Osobel a mla yaksok el kmo a “lsekum e [kid] ousubes er a kngtil a chad, [e a] demad er a babeluades a mo ousubes er [kid].”²⁵

Erul sandei er chelechal sils e kede mo oudkeu er a Baskua. Chelechal mo el muut er sel sils, e a kulengit er kemiu me molasm el mo torob a uldikel lomekberaod er kemiu. Ngarngii a lmuut el ngarbab lomeruul el ngaruchei er a omereng el saul er a Tngakireng er a Jesus Kristo? A lsekum eng meringel kau lousubes, e molengit a klisiich lokiu a rsechel a Jesus Kristo el mo ngosukau. Sel bom uaisei, e ak yaksok el kmo ko mo nguu a budech me a blakereng er a chedaol tekoi.

A Osobel er a lolngakireng el kirir a rokui el chad, e Ngii a milkengii a rael me tirkel mo oltirakl er Ngii a mo ungil, e mesisiich, e nguu a klisiich er a mo suobel. Aika el chedaol tekoi a ngarngii el mo er tirkel rokui losiik el mo Rongesii e oltirakl er Ngii.

Rodam me a rodos er ngak, ngultuil er a rokui longit el ngara renguk, e ak mengelechel er kemiu el mei er a rolel a telbiil e molemolem el ngarngii. Bo molchesuar sel deureng er a ouchel reng er a bek el sils. Mosuub el kirel a Dios me a teletelel a Loureor. Mosiik e molsingch a mengasireng el tekoi. Molasm el merrob a uldikel er a klengar kau.

Sel bo moltirkal aika el moktek, e ak yaksok er kemiu a duch el mo omakes el bedul uchei el ngara rolel a telbiil el chachisois a blakereng er kemiu, el diak el iior er a olibesongel el mchelbangel. E dirrek el yaksok er kemiu a klsiiich el mo odngakl ongetikaik, me a budech el mei er a uldesuiu e mimokl er a dakt, me a klou el kltalreng er a telungalek er kemiu.

A Dios a ngar! A Jesus a Kristo! Ngii a ngar! Ng betik a rengul er kid e mo ngosukid. Aika kuuchais el ngara chedaol ngklel a Osobeled, el Jesus Kristo, amen.