Mwet Fahsr tukun Fihsrack luhn Mislac

In ahkfalye mwe palye ituckyang nuh sel Zechariah,¹ utyak luhn Jisus pwengpweng nuh in Siti Muhtahl muhta fin donkey soko, oasr ke ma suhmuhslah muh “mwe akucl mahtuh luhn mwet fuhlwact luhn mwet Jew,”² oreklac pwacye nuh sin Tohkohsrah luhn tohkohsrah ac Fihsrack luhn Mislac.³ Rauniyucklac sin un mwet fahsr tohkohl engan, suc laknwelihk nuknuk lalos, lwesahk palm, ac lwesahk sahyac ke inkacnek ma Jisus El fahsr kac. Elos kaksakihn God, wowoyak ke puhsra luhlahp, “God Elan akinsewowoye tokosra su tuku Inen Leum! Misla in kusrao, ac wolana nu sin God.”⁴ Ac sulpac, “Kaksakin Wen nutin David! God Elan akinsewowoye el su tuku Inen Leum! Kaksakin God.”⁵ Ma wolacna inge, ma kuht ahkfuhlwactye oacna Palm Sacnri, pacl engan se met liki ma kweok ma ac sikyak ke wik se inge suc ahksahfyeyucklac ke kihsac pahkomuhta luhn Mwet Lahngo ac ma usrnguck wolacna ke kuclyuck aloal sac.

Mweyen kuht mwet fahsr Tohkohl, kuht pa mwet luhn God sifacna, suleyucklac in sulkackihn orekma wo Lal,⁶ ahkfahsrye mislac ma utuckuh fihsrwacsr Sel ac kihsac in iwaclah Lal. Mislac se inge el mwe sang uliyuck se nuh selos nuhkwewa suc ekuhllah insiaclos nuh sin Mwet Lahngo ac moul suwohs; kain mislac inge use nuh sesr kuht in engankihn moul lasr facluh ac ahkkweye kuht in muhtweng liki ma kweok luhn fuhfahsryucsr lasr.

Ke yac 1847, Leum El sang mwe kolyuck nuh sin Mwet Luhlahlfongi pioneer, suc tuh enenuh mislac in puhla wo ac tuhkweni ke elos sun ma upac yohk ke fuhfahsryucsr lalos nuhke acn kuhtuhlacp. Inmahsrlon ma puhs, Leum El luti Mwet Luhlahlfongi in tilac akuhkuhin inmahsrlolos ac tui tiac sifwil fahk ma koluk ke sie sin sie.⁷ Ma suhmuhslah ahkpwacyei tuh elos suc oraclah orekma suwohs ac fahsr kampare ke fihlpacp luhn Nguhn luhn Leum uliyuck mislac ma elos enenuh in kuhtanglah ke lwen ahkfohs ma kuht oasr kac mihsenge.⁸

Ke srihpen kuht mwet luhlahlfongi luhn Fihsrack luhn Mislac, kuht tuh lutiyuck in moulkihn “insiaclos in maeni in ma se ac in luhngse sie sin sie.”⁹ Mwet pahluh sacohk lasr, Prestuhn Russell M. Nelson, el tuhfahnna fahk, “Akuhkuhin lain ma nuhkwewa ma Leum El tu kuh kac ac luti.”¹⁰ Mwet pahluh el oacyacpac ngihsre kuht in oruh ma nuhkwewa in tulokihnyac akuhkuhin ma srimetyak ke insiacsr ac ke moul lasr.¹¹

Lwelah kuht in nuhnkuh ke ip yohk inge ke kuht ngwet nuh ke luhngse pwacye luhn Kraist nuh sesr lah kuht, ekihn mwet fahsr Tohkol, suk in oasr yurin sie sin sie. Ma suhmuhslah luti tuh kain luhngse se inge pa luhngse pwacye.¹² Ke kuht nuhnkuh ke luhngse pwacye uh, sahp kuht nuhnkuh ke orekma kuhlwacng ac mani kuht sang in ahkwoye kweok luhn elos suc puhlakihn ma upac luhn mahno, mani, kuh elyah ke nuhnak. Na, luhngse pwacye tiac ma se kuht sang nuh sin mwet sahyac muhkwena, tuh in sie ohiyac luhn Mwet Lahngo ma kuh in ipin ohiyacsr pac. Pa oruh Leum el luti kuht in nukumkuhtyang sifacna ke nuknuk luhn luhngse pwacye,“… suc pa nuknuk in suwohswohs ac mislac.¹³ Fin wacngihn luhngse pwacye, na kuht wacngihn pac,¹⁴ ac kuht tiac kuh in usrui acn ma Leum El ahkolah nuh sesr in lohm kahto sin Pahpah Inkuhsrao.¹⁵

Jisus El sifacna oraclah srihkasrak suwohs in nokomwacng nuknuk luhn suwohs ac mislac, yohk liki na ke El sun kweok ke ma sikyak met liki misac Lal. Nuhnkuh ke pacl se inge ke ma Jisus El puhla ke El puhsisacllac in ohlah nien mwet tuhma lutlut Lal, etuh lah sie selos e fah tuhkahkuhnuhlwack ke fong sacn.¹⁶ Kuh ke Jisus, ao ekahsr tohkoh, pahkomuhta onwelah insracn mukul se suc weluhl Judas, mwet se ma Tuhkahkuhnuhlwack ah, in sruh El ah.¹⁷ Kuh finne ke Mwet Lahngo, tu ye muhtahl Pilate, ahkkolukyeyuck sin mwet tol ac elders, ac wacngihn kahs El fahklah ke kahs kikiacp ma tuhkuh Laenuhl, suc oruh kafuhnah luhn Rome arlac lut Sel.¹⁸

Nuh ke pacl upac tolu inge, Mwet Lahngo, finne El toasr ke ahsor ac ngal yohk, luti kuht ke srihkasrak Lal lah “lungse el mongfisrasr ac kulang; … luhngse el tia sok; … lungse el tia sifacna konkin, el tia inse fulat, lungse el tia oru ma sufal, el tia nunku kacl sifacna, el tia sa in mulat, [ac] el tia oakla ma koluk orek nu sel.”¹⁹

Sie pac ma yohk srihpac in elakihnyuck, ac ma nuhke ohiyacn moul in mwet luhlahlfongi lasr ac ohiyac se ma kuht ahkfahsrye mislac luhn Mwet Lahngo, pa ma kuht oruh nuh sie sin sie. Ke orekma Lal facluh, luti luhn Mwet Lahngo lohacng nuh ke—tiac muhkwena, tuh yohkiacna—ke ohiyac luhn luhngse, luhngse pwacye, muhtweng, ac kuhlwacng—ohiyac ma yohk srihpac nuh selos suc ke fahsr fototo nuh Sel ac ahkfahsrye mislac Lal. Ohiyac inge mwe sang sin God, ac ke kuht srihke in ahkyohkye, kuht ac muhtwacwacack in liye ma siena ac ma muhnahs luhn mwet tuhlan lasr ke kuhlwacng, pahkomuhta, suhnak, ac luhngse. Sie akucl in ahkkahlwemye pwacyeiyacn fototoi lasr nuh sin Mwet Lahngo ac in eklac oacna El pa ohiyacn luhngse, muhtweng, ac kuhlwacng ma kuht oruh nuh sin mwet tuhlan lasr, ke oacna sie ohiyac.

Kuht kwacna liye mwet uh sramsram ke ma tiac wo kuh ahkkolukye ohiyac, fahk muhnahs, ac fahk nuhnak lalos ke mwet sahyac, yohk na ke ohiyac ac nuhnak inge siena kuh tiac oacna ma elos oruh ac nuhnkuh uh. Kuht kwacna liye mwet inge in tahfwelah kain sramsram inge nuh sin mwet sahyac, suc mwet sahyac inge kalweni in fahk ma elos lohng inge uh tiac etuh ma pwacye ke elyah se inge. Koluk ohiyac, social media ahkyohkye kain sramsram inge orekmakihn ma pwacye ac kahlwem ke mwet inge. Wacngihn tulokihnyac, orekmakihnyacn digital inge kohlah mwet uh in sifacna sruhngacltahl ac puhrakwack fohs, oraclah suhpwacr, puhla ngal luhn insiac, ac ahkyohkwelihk sruhnga.

Nephi el palye tuh ke lwen sahflah inge, mwet lokoalok sac el fah kasrkuhsrak ac moklwelosyak in kasrkuhsrak ke ma wo uh.²⁰ Ma suhmuhslah luti lah “ohinge ma nuhkwewa ma suli ac ahkluhngye in oruh ma wo, ac in luhngse God, ac in kuhlwacnsapwacl uh ma mokleyuck sin God.”²¹ Nuh ke acn se sahyac ah, “ma koluk uh tuhkuh sin devil; tuh devil el sie mwet lokoalok luhn God, ac acnwuck laenuhl pacl nuhkwewa, ac suli ac ahkluhngye in oruh ma koluk, ac in oruh ma koluk pacl nuhkwewa.”²²

Ke kuht nuhnkuh ke mwe luti luhn mwet pahluh inge, tiac mwe lut se lah sie sin mwe sruhf luhn mwet lokoalok sac pa in pihrakwack ahngyahng ac sruhnga insiacn tuhlihk nuhtin God. El engan ke el liye mwet uh sramsram ahkkoluk, isruhn, ac kikiacp kacn sie sin sie. Kain mukwikwi inge kuh in kuhnahoslah ohiyac, pweng, ac engan luhn mwet se, yohk na ke mwet se nuhnuhkweyuck tiac pwacye uh. Yohk srihpac in fahk lah ke kuht lwelah kain mukwikwi se inge ke moul las uh, kuht ikacslah insiacsr nuh sin mwet lokoalok in uytak ac ukwiyac fihtac in fohs inmahsrlosr, tiac elyah in puhtatyang nuh ke mwe sruhf luhlahp lal.

Fin kuht tiac karihngihn nuhnak, kahs, ac mukwikwi lasr, kuht kuh in srihfeyuck sin mwe sruhf suhlallacl luhn mwet lokoalok sac, ma kuhnaoslah kuhpahsr lasr nuh sin mwet ma rauni kuht ac mwet kuht luhngse.

Tamuhlwel ac tahmtahel, oacna mwet luhn Leum sifacna ac mwet suc ahkfahsrye mislac Lal, kuht tiac kuh in lwelah mwe sruhf luhn mwet koluk sac in oasr insiacsr. Kuht tiac kuh in us ma toasr koluk ma kuhnaoslah puhla, kawuck, ac finne moul. Wosasuc uh kalmacn pweng wo luhn engan yohk.

Pwacye, wacngihn sesr suwohs, ac pwacye oasr pacl ma kuht srihfeyuck nuh ke kain mukwikwi inge. Ke luhngse pwacye ac etuh fohnlah Lal ke ohiyacsr mwet uh, Mwet Lahngo El kwacna sensenkackihn kain in mwe sruhf inge nuh sesr. El luti kuht, “Tuh ke ohiyac sepacna ma kowos nuhnuhnkuh, kowos fah nuhnuhnkweyuck oacna; ac ke ohiyac sepacna ma kowos srihkasrak, ac fah oacyacpac srihkasrakiyuck kowos.”²³

Tamuhlwel ac tahmtahel sacohk wiyuck, ke kuht srihke in eis ohiyac oacna ohiyacn Mwet Lahngo, kuht kuh in mwet orekma ke mislac Lal fin facluh fal nuh ke inkacnek ma El sifacna tuh akiyac. Nga suli kowos in nuhnkuh ke inkacnek ma kuht kuh in ikuhlkuhtlac sifacna nuh ke mwet kuhlwacng ac wo, mwet suc oasr kahlwem ac nuhnak muhnahs se, mwet suc suk ke ma wo ke mwet sahyac, esam pacl nuhkwewa lah “Fin oasr kuhtwena ma wo, kahto, kuh ke pweng wo kuh ma fal in kaksakihnyuck, kuht suk ma inge.”²⁴

Nga olwelah nuh suwos tuh ke kuht suk ac ahkwoye ohiyac inge sesr, kuht ac puhla kuhlwacng ac pahkomuhta yohk liki met nuh sin mwet tuhlan lasr²⁵ ac puhlakihn engan, mislac, ac yohkwelihk nguhn in kuht.²⁶ Pwacye lah, Leum El ac akihlen mukwikwi lasr ac use nuh sesr mwe sang ma kuht enenuh in nuhnak muhnahs ac muhtweng nuh ke ma siena, ma muhnahs, ac ma tiac suwohs luhn mwet sahyac. Oacyacpac, kuht kuh in kuhtanglah mwe sruhf ma srihfwe kuht in puhla ahngyahng kuh ahngohn elos suc ahkkolukye kuht. Kena lasr in sang nuhnak muhnahs, oacna Mwet Lahngo, nuh selos suc ahkkolukye kuht ac kahskahs koluk nuh sesr fah yohkwaclihk ac e fah ipin ohiyacsr.

Lwelah kuht mihsenge, ke Palm Sacnri se inge, in laknwelihk nuknuk lasr ac lwesahk palm luhn luhngse pwacye, fahsr tukun Fihsrack luhn Mislac ke kuht ahkolah in ahkfuhlwactye Sacnri, se fahsruh inge ke ma usrnguck ke kuclyuck aloal sac. Ekihn tamuhlwel ac tahmtahel ke Kraist, lwelah kuht in sulkackihn, “Kaksakin Wen nutin David! God Elan akinsewowoye el su tuku Inen Leum! Kaksakin God!.”²⁷

Nga fahkwack lah Jisus Kraist El moul ac tuh luhngse pwacye Lal, ahkkahlwemyeyuck ke kihsac in iwaclah Lal, som nuh selos nuhkewa suc kena Weluhl fahsr ac engankihn mislac Lal ke facluh se inge ac ke facl se fahsruh uh. Nga fahk ma inge ke ine muhtahl luhn Mwet Lahngo ac Mwet in Molwelah, Jisus Kraist, amen.