Jisus Kraist pa Top Pacl Nuhkwewa
Fuhkah kihsen siyuck kuh elyah lom, top uh pacl nuhkwewa sukokyak lun moul ac mwe luti luhn Jisus Kraist.
Tamuhlwel ac tahmtahel sacohk wiyuck, kuht kihteyuck ke nguhn ke lwen luo tari inge. On luhn choir an askuhlacna. Elos suc sramsram ah oacna mwe kuhfa luhn Leum. Nga pruhe kowos in suk Nguhn Muhtahl el in kol kowos ke lutlut lowos an ke kowos nuhnkuh yohk ke ma pwacye ma lutiyuck ke acn emet inge ah. Pwacyena ma inge suhpweyucklac sin inkuhsrao.
Wik se fahsruh pac Istuh Sacnri. Lwen sacn pa lwen in alu yohk srihpac emet ke mwet fahsr tukun Jisus Kraist. Srihpac yohk se kuh ahkfuhlwactye Christmas pa ke srihpacn Istuh. Mwe luti luhn Tuhkuh, Fahsr Tukuk ke wik se inge fah ngihsre kom in lutlut ke utyak wolacna luhn Mwet Lahngo nuh acn Jerusalem, ahknwacsnwacs Lal luhn tempuhl, kweok Lal ke imac Gethsemane, Srihpsrihp lal, Moulyak wolacna Lal, ac sikyak Lal nuh sin mwet fahsr Lal.1
Engankihn kahs sacohk inge ac suk ohiyac nuhkwewa in sang kuloh nuh sin Pahpah tuhmasr Inkuhsrao lah El suhpwacma Wen Kuloh Sefanna Nahtuhl nuh sesr.2 Ke srihpacn Jisus Kraist, kuht kuh in auliyak ac eis nuhnak muhnahs ke ma koluk lasr. Ke Srihpacl, kais sie sesr fah sifilpac moulyak.
Nga oacyacpac suli kom in lutlut ke sikyak luhn Mwet Lahngo nuh sin mwet Nephites fin acn Merike, sihmihsyuck 3 Nephi. Tiac paht met liki sikyak se ngacn, Puhsral lohngyuck sin mwet, wiwi na kahs siyuck inge:
“Yac kowos inge ac tiac fohlohkoh nuh Yuruk, ac auliyak ke ma koluk lowos, ac forlah eklac, tuh Nga in kuh in unwe kowoslac?
“… Liye, paho pahkotwen Luhk ahsroeyucklac nuh yuruwos, ac el suc fah tuhkuh, Nga fah eisacl.”3
Tamuhlwel ac tahmtahel sacohk, Jisus Kraist El usot suli sacpacna nuh sum mihsenge. Nga ngihsre kom in tuhkuh nuh Sel El in kuh in ahkwoyelah kom! El fah ahkwoye kom liki ma koluk ke kom auliyak. El fah ahkwoye kom liki ma suhpwacr ac ma sahngweng. El fah ahkwoye kom liki kihnet luhn facluh se inge.
Fuhkah kihsen siyuck kuh elyah lom, top uh pacl nuhkwewa sukokyak lun moul ac mwe luti luhn Jisus Kraist. Lutlut yohk ke Iwaclah Lal, luhngse Lal, pahkomuhta Lal, mwe luti Lal, wosasuc fohlohkyak Lal ke ahkwoye, ac kapwack. Forlah nuh Sel! Fahsr Tohkohl!
Jisus Kraist pa srihpac se kuht muhsahiyuck tempuhl. Kais sie pa lohm muhtahl Lal. Oraclah wuhlweacng ac eis akwuck yohk srihpac lun tempuhl, oacna suk in fototoi nuh Sel, fah ahkinsewowoye moul lom ke ohiyac ma wacngihn alu sahyac kuh in oruh. Ke srihpac se inge, kuht sang kuhiyacsr nohfohn in oruh mwe ahkinsewowoye luhn tempuhl in mwesahs yohk liki met ah nuh sin mempucr fin facluh. Mihsenge, nga srui in ahkkahlwemye plwacn lasr in muhsahiyuck tempuhl sasuc ke acn inge:
-
Retalhuleu, Guatemala
-
Iquitos, Peru
-
Teresina, Brazil
-
Natal, Brazil
-
Tuguegarao City, Philippines
-
Iloilo, Philippines
-
Jakarta, Indonesia
-
Hamburg, Germany
-
Lethbridge, Alberta, Canada
-
San Jose, California
-
Bakersfield, California
-
Springfield, Missouri
-
Charlotte, North Carolina
-
Winchester, Virginia
-
Winchester, Virginia
Tamuhlwel ac tahmtahel sacohk wiyuck, Nga fahkwack lah Jisus Kraist El kol orekma luhn Alu Lal. Nga fahkwack lah fahsr Tohkohl pa inkacnek sefanna nuh sin engan ma pahtpaht. Nga etuh lah kuh Lal puhtati nuh fin mwet orek-wuhlweacng Lal, suc “nuklac ke suwohswohs ac ke kuh luhn God ke wolacna yohk.”4 Nga fahkwack, ke luhngse ac insewowo luhk nuh suwos kais sie, ke ine muhtahl luhn Jisus Kraist, amen.