Fapi Gulil’ungun e Fla’ab

Tin nikan thogthog nag e chiney e kad nanged ni gubin e gidii’ ni’ i moy u fayleng e gathi kemus ni tharmiy e fan e tin nib mat’aw e gidii’ ma infierno e fan e tin nike magay e gidii’. Ya wo’en e t’ufeg rok’ Got e mu’un e biney ngay ni machib nag fare Tathapeg, ni’ir Yesus Kristus: “Pi re’ e senggil ni bay u lan e naun rok e Chitamag.”¹

Fapi machib ko fare Galasia rok Yesus Kristus ni Fan ko Gidiiʼen Got ko Tin Tomur e Rran nike sulyarmen e ma fil ni gubin e pifak Got—ni ba’ rogon mrayag machane dabiyag ni weliy ni ga’angin—e rayag ni ngar tafnayed reb fapi dalip i gulil’ungun e fla’ab, nib mu’un fabinem ngay “nib pag ko tin ni yima nangfan.”² Tomuren nikar pired boch u fithik’ e denen roraed ma yaed be gafgow, ni irreram fare gafgow nira fal’ag rogon raed ko bin migid e n’en ni nge buch, ma arram ni gubin e gidii’ nira foskoyam’ ma yean ko fare bin th’abi Tomur e Pufthin rok Somoel Yesus Kristus. U rom, fare Tathapeg rodaed nib sug ko t’ufeg, ni’ir, e kan machib nag ngodaed, “era tayfan fare Chitamangin, me ir e bay i muruweliy e pin’ey,”³ e bayi pii’ fapi bitir rok’ Got ni gubin nga reb e pi gulil’ungun e fla’ab ney nibe yaen u rogon e tin nikar mel’egned.

Reb e machib nib thil ni gadaed ma rrin’ ulan e Galasia nikan sulweg yarmen e kan dag ko fapi motochiyel nge fapi m’ag ni yima pii’ ngak e bitir ku Got ni gubin fare tawa’ath nib thothup ko bin th’abi tolang gil’ilingun ni bay ko fare celestial kingdom. Bin th’abi tolang e gin ni ngan par riy—fare n’uf ngalang ko bin th’abi tolang e falfalaen’ ulan e celestial kingdom— e ir Fare Galasia Rok Yesus Kristus ni fan ko gidii’en Got ko Tin Tomur e Rran.

Tin nikan thogthog nag e chiney, gidii’en Got ko Tin Tomur e Rran e yaed ma nangfan fare wo’en Got ko falfalaen’ nifan ngak pifak. Biney e wo’en e tabab nap’an ni bugi ya’el e yafos rodaed u mm’on ni gargeleg daed, ma ke dag fan nge tin ni gadaed be mel’eg u roy u fayleng nge gin ni gadaed be sor ngay.

Gadaed ma nang ko tin ni kan thogthog nag e chiney ni “gubin fapi gil’il’ungun e bay e motochiyel riy nikan pii’”⁴ ma bin gulil’ungun ni kad thapaged ko fare Pufthin ni bin Tomur e ke yaen u rogon fapi motochiyel nikad mel’eged ni ngad laked. U tan e biney e wo’en ko t’ufeg, bay ni bo’or fapi kingdom riy—ni bo’or thal—ya ngeyag ni gubin pifak Got me par nga reb e pi gulil’ungun ni motochiyel riy e fel’ ko “par” roraed.

Nap’an ni gadaed ra weliy mornga’agen nge tin nib t’uf ko reb e pi kingdom ney ko wo’en e Chitamangiy, ma gadaed ma tabab ko bin th’abi tolang, ni’ir e fapi motochiyel nib thothup nge gam’ing ni ke dag Got u dakean Fare Galasia ku Yesus Kristus ni fan ko gidii’en Got rok’ ko Tin Tomur e Rran. Ulan fare gulil’ungun e “celestial”⁵ bay ni dalip thal,⁶ ni bin th’abi tolang riy e fare celestial kingdom. Irerray e gin nima par e pi’in “nikar thapegned ni polo’ i ga’angin yang, nge fla’ab rok’,” aram fan, “ni wod ni yad e got, ni yad fapi pagal [nge bpin] nifak Got”⁷ mi “yaed par ko gin nibay Got riy nge Kristus ni manemus.”⁸ U dakean e tin nikan thogthog nag, Got e ke dag fapi motochiyel nib manechubog, fapi gam’ing, nge fapi m’ag ni thangar ni fol riy mrayag ni ngan nag gelngin e tin nib thothup. Fare Galasia ku Yesus Kristus nifan ko Gidii’ rok’ ko Tin Tomur e Rran mel’eg e pin’ey ni bachan e fan e Galasia nike sulyarmen e nge fal’ag rogon pifak Got ko fare wo’en e thap ko gulil’ungun e fla’ab, nrib ga’, ni fare bin th’abi tolang ko falfalaen’ nibay.

Wo’en Got, e rib t’uf ni fare bin th’abi tolang e falfalaen’ e rayag ni ngan thapeg u fithik’ e yul’yul’ u thilin fare mabgol nib manechubog u thilin bee’ ni pumo’on nge bpin ulan e temple nib thohup,⁹ ni mabgol e rayag ni nge fanay e gidii’ ni gubin nib yul’yul’. Arram fan ni gadaed ma machib nag ni “dugliy dowem e ir e baga’fan ngak bee’ ko yafos nib m’on ko biney e yafos, yafos u fayleng, nge fan e bin nib manechubog e yafos.”¹⁰

E machib ni ba ayuwegdad ngongnoliy ko tolang e falfalaen e ba fare 1995 proclamation ko fare tabinaw.¹¹ Weliy nib tomilang mornga’agen rogon ni rayag ni ngaed thapagned ngan fal’ag rogoy ngan par rok Got fare Chitamangiy nge fare Fak’, ni Yesus Kristus. Gidii’ ni dar nangfan e biney e wo’en e Chitamangiy ni fan ngak pi fak e bay ra lem niged nike m’ay fa ke thil e biney e motochiyel. U reb e rogon, gamad be micheg ni fare bugithin ni fan e tabinaew, e kan sunmiy u dakaen e fapi machib ni dabi thil, nibe weliy marunga’agen e tha’ ko tabinaw u fayleng nib machalbog nib ga’fan ni ra buch.

Apostle Paul e weliy mornga’agen e re dalip i gulil’ungun e fla’ab ney, ni wod e yal’, pul, nge fapi tu’uf.¹² Me tunguy fithingan e bin th’abi tolang ni “celestial” nge bin migid ngay ni “terrestrial.”¹³ Dani tunnguy fithingan e bin th’abi tanggin, machane thogthog ni yib ngak Joseph Smith e tungguy fithing e biney: “telestial.”¹⁴ Bareb e thogthog me weliy rogon ko chon mini’ e yira tay nga ra reb e pin’ey Gulil’ungun e Fla’ab. Pi’in nira mel’eg “ni dabi fol ko motochiyel ko celestial kingdom,”¹⁵ e ra yean nga reb e pi gulil’ungun e fla’ab ney, nib ba chig boch ko celestial machane mat’aw ko rogon e pin’en ni kar mel’eged mrayag ni ngar “pired” riy. Biney e thin ni par, e rib bo’or ulan e chep nib thothup, be yip fan bangi ban’en ni dariy bi’id mara thil.¹⁶ Wod, pi’in ni bay u lan fare terrestrial kingdom—e wod nib chuchugur rogon ko tharmiy—“pi’in nrayag ni ngar uned nga fithik fare Fak, machane gathi ga’angin e Chitamangiy.”¹⁷ Tiney e gidii’ e “bugi gidii’ nib fel’ u fayleng, machane kemus ni tin nu fayleng ban’en e ur guyed,”¹⁸ machane “dan ur kireb niged e mich ni mornga’agen Yesus.”¹⁹

Kan dag makan weliy ni pi’in ni ran tay ko bin th’abi sobut’ e gulil’ungun e fla’ab, ni’ir fare telestial, e pi’in, “ni dabiyag ni nge par ulan e … gulil’ungun ko terrestrial.”²⁰ Tiney e gidii’ e bugi gidii’ nikar fekyathin niged fare Tathapeg ma dar saga’algaed ko ngo ngolen raed ni dani fel’. Irreray e gin nima par e gidii’ nib ta denen, u tomuren nikar gafgow gaed ko fapi denen roraed. Tiney e kan weliy mornga’agen ko thogthog nike yib e chiney ni “yaed e fapi gidii’ ni dani fanay fare gospel ku Kristus, nib mu’un fare mich ngay ku Yesus. …

“Tiney e gidii’ e bugi gidii’ ni taban, nge ta biiy, nge ngo ngolen e galong, nge pi’in nima sabanban.”²¹

Weliy mornga’agen ere dalip i gulil’ungun e fla’ab ney, President Russell M. Nelson: “Yafos u fayleng e kemus ni gowa reb e second ndani ta’areb rogon ko yafos nib manechubog. Machane biney ni gowa reb e second e rib ga’fan! Mu tafney nag rogon e biney: Nap’an e biney e yafos ma gara mel’eg e bin ngan e motochiyel ni ngan fol riy—par ko fare celestial kingdom, fa fare terrestrial, fa fare telestial—ma, arram e bin gulil’ungun e fla’ab ni gara par riy ni dariy bi’id manemus. Rib falel’ e biney e wo’en! Ba wo’en ni rima tayfan fare mat’won.”²²

Apostle Paul e machib nag ni fapi machib rok’ Somoel nge fapi m’ag rok’ e ni pii’ ni ngeyag ni gadaed gubin “ma aram ma gadad ilal i yan nge mus rogondad ngad boded Kristus.“²³ Wo’en e biney e rib ga’ ni gathi kemus ni ngan thapeg fapi llowaen’. Dani gaman ni kemus ni ngan nang fare gospel; thingarda rrin’ed ni ngeyag ni uned ngay. Ba thil ko boch e machib, nibe fil ni ngad nanged boch ban’en, fare gospel ku Yesus Kristus e ma athamgiliy daed ni ngad boded ban’en.

Tiney e machib ma kad nanged ni fare bin Tomur e Pufthin e gathi kemus ni ngan guy ko urngin e tin nib fel’ nge tin nib kireb—machane fapi n’en nikad rrin’ed. U dakean e tin nikad duugliyed ni ngad rrin’ed—n’en ni kad manged Mrayag ngodaed e yafos ni manechubog u daken fare wub rodaed. Wod rogon nikan fanay u roy, bugney e thin ni bo’or fan e rib ga’fan ko tin ni gadaed be rrin’ ban’en. Dani gaman ni kemus ni nge yean bee’ u fithik’ e biney. Fapi motochiyel, nge fapi gam’ing, nge fapi m’ag ko gospel e gathi fithingan bugi ban’en nib t’uf ni ngan rrin’ nifan bugi chep nibay u tharmiy. Fare gospel ku Yesus Kristus e ir fare wo’en ni nge dag ngodaed rogon e tin ni magarran’ e Chitamangdaed nibay u Thramiy ni ngad manged.²⁴

Bachan Yesus Kristus nge fare Bayul rok’, nap’an ni gadaedra mul ko biney e yafos, ma rayag ni ngaed kalngan’gaed min sul ko fare kanawo’en e m’ag ni ra fek dad i yean ngak e Chitamangdaed nibay u Tharmiy.

Fare Babyor ku Mormon e fil ngodaed ni biney e yafos e ireray e re ngiyalʼ i nʼen ni fan [ngodad] ni ngad muguʼuliyed daed ni ngan madaʼ gaed Got.”²⁵ Machane bey e ri bay n’umngin nap’an ko “biney e yafos” ni pii’ reb e athap (nifan boch e gidii’) ni n’en ni dag Somoel ngak President Joseph F. Smith, nibay ko Doctrine and Covenants section 138. “Ere musapgad,” nike yoloy fare profet, “tin nib yul’yul’ e gidii’ ko biney e mfen, nap’an ni yaedra chuw ko biney e yafos, mi yaed ul’ul’ ko machib nag e gospel ko kalngaen’ nge bayul nigey, u daken fare maligach nitay fare Fak ni Ma’agirag Rok’ ni bitir ku Got, ngak e pi’in ni yaed bay u fithik’ e lumor nge gafgow ko denen ulan fare fol roman.

“Gidii’ nike yim’ nike kalngaen’ e ran thapeg nag, ni fa’an yaed ra fol ko fapi yalen ko nu’un rok Got,

“Nge tomren ni kar pi’ed pilwon fapi magawon rorad ni kar rrin’ed, ma kan be’ech nagraed, ma ran tawa’ath nagraed ko rogon fare muruwel roraed, ya yaed pi gidii’en e thap.”²⁶

Ul’ul’ ngay, ni kagdad ma nang ni fare Millennium, fare biyu’ e duw nira yib fare bin L’agruw e Wub ko fare Tathapeg, e ngiyal’ ni yira rrin’ fapi gam’ing nifan ngak e pi’in ni daniyag ni thapeg nap’an e bay u fayleng.²⁷

Bo’or ban’en e dan dananged ko mornga’agen ere dalipi i wo’en e thap ney, nge rogon e tha’ roraed ngoraed: (1) fare bin somm’on e yafos u tharmiy, (2) yafos u fayleng, (3) nge bin migid e yafos. Machane gadaed manang e tin ba’aray nib riyul’: “Ra bee’ mab milfan ngak rogon ni nge thap, machane n’uf nigey ngalang ko bin th’abi tolang e falfalaen e fan e tabinaew.”²⁸ Bay e Chitamangdad nibay u Tharmiy nrayag ni nge guy nikad thapagned gubin fapi tawa’ath nge gubin ban’en ni gadad ba’dag nge tin nikad mel’eged nrayag. Ma kagdad manang ni dabi towasriy daed ko sealing ni fa’anra dani magarran’daed ngay. Tawa’ath nifan e tha’ nikan seal nag e fan ni nge micheg nag e pi’in ni yaed be ayuweg e m’ag roraed machane dariy bi’id nira towasriy e biney ngak bee’ ni dani be’ech fa dabun.

Pi walageg, gube micheg e pin’ey nib riyul’. Gube micheg ni Somoel Yesus Kristus, “niʼir e tabolngin nge tungun e mich [rodaed],”²⁹ ni Bayul Rok, utan fare wo’en e Chitamangdad ni bay u Tharmiy, e ke fal’ag kanawo’en e pin’ey ni nge yag, u daken fithingan Yesus Kristus, amen.