Fare Bee’ ma Chuwi’iy Bo’or nge Kanawo’ nima Powi’iy nga Tabinaw

Bochi gidii’ ma weliy fare bin ni th’abi fel’ e yaat.¹ Ni ke pilyeg nga biyu’ e pi thin ko bo’or e nam, ufithik fa binem l’agruw biyu’ e duw faram, e gidii’ ma yoeged e yaat ney ulangab e feyleng.

Nike weliy Yesus Kristus, Tathapegdad nge Tabiyul rodad, nike yib nga feyleng “nima thapeg e pi’nen ba malog.”² Me tabab ko pi thin ney nib moem: “Reb e mo’on ni bay la’agruw e fak rok.”³

Ni ka chingiyal’ nem gadad ma fil morunga’agen e magawon bin kirbaen’. Ta’areb e fak⁴ me non ngak e chitimag ni dabun e yafos u tabinaw. Ir ba’adag e puf-meta’won rok’. Ir ba’adag ni nge chuw e yalen nge machib rok’ e galibthir rok’. Ir ba fith nifan e pi tawa’ath rok’—chiney.⁵

Rayog ni ngam lemnag e pi’nen ni ke thamey e chitimangiy napan ni ke rungan’ biney? Napan ni nge nang e fak’ ir ba’adag ni nge chuw e tabinaw nge sana de sul reb e rran?

Fak ney nike thamey e falfalaen’ bachane e milekag. Tomuren e ngiyal nib n’ew, ni kemus ir. De t’uf ni nge fol e pi yalen nge motochiyl ko fare yalen ko faram, rayog ni nge mel’eg nge dariy’ e galibthir rok. Dariy’ thibngin. Rayog ni nge paer ufithik’ fapi ulungi gidii’ ma lemnag woed ir nge fas ulan e rogon rok.

Ke yan nga ngabangi nam nib mal’af, ke thapeg e pi fagar nib bi’ech nib papay nge tabab nike fal’eg e yafos ko lik’ay rok’. Sana nike mang e bee’ nib t’uf ngak boch e gidii’, bachane nike chuwey nib bo’or. Fapi fagar nib bi’ech—kar thapeged e tawa’ath bachane wagagaey rok’—dar pufthin nag ngak. Kar madnam, ba’adag, nge pi athamgil ngak nifan e pi mel’eg rok’.⁶

Fa’an bay e social media u ngiyal’ nem, riyul’ me sug e pi page ni bay fapi sasing ko fagar nima saminmin: #bafasnibribfel! #th’abifalfalaen’! #bt’ufninggurrinken’uwnapan!

Machane e madnom ni ke tal’—woed e rogom. La’agruw e pi’nen ke buch: somm’on, ke pii’ gubin e salpiy, nge l’agruw, ke yib e yungol ufithik’ e nam.⁷

Napan fare magawon ke ga’ nag, ke muguw. Faram ke lemnag ir machalbog, e bee’ nib falfalaen ni ke chuwiy bo’or e ba’nen ma chiney dabiyog ni nge chuwiy e gaan ko abich, fa na’un ko mol. Urogon ni nge fas?

Nike pii’ bo’or ngak fapi fagar rok’—rayog ni ngar ayuwegen chiney? Rayog ni nggu sap e cha’ney ni nge fith nifan buchuw e ayuw—kemus chiney—madako ni nge thapeg e salpiy bayay.

Fapi scripture me weliy ngodad, “Dariy be’ ni pi’ boch ngak.”⁸

Ke guy rogon nib tinoewey ni nge fas, ke mada’ e tamilaey’ ni nge pii’ e muruwel’ ni nge ayuweg e babiy.⁹

Me rib almarin e balig rok, ni dariy’ e bee’ ma kemus ir, sana e pagal ney ni ke lemnag urogon nike buch gubin e pi’nen nib kireb.

Gathi yigo e balig nike pii’ e magawon ngak. Bay e ya’el rok’ ko bilig. Ke nang fa’an ni ke thapeg e pi’nen ni ir ba’adag ir ra thapeg e falfalaen’, ma fapi motochiyl ni ir kemus magawon nag ko falfalaen’ ney. Nima nang chiney. Nge oh, mang e puluwan’ riy’ nifan e ganop ney.¹⁰

Napan ni ra gaa’ nag e balig ko dowen nge ya’el rok’, tafney rok’ nike sul nga chitimangin. Rayog ni nge ayuwegen tomuren gubin e pi’nen ni ke buch? Ni boed e tapigpig nib gum’aen’ rok’ e chitimangin bay e gaan ni nge ka’ nge tafen ma damiiteg ko pi yoko’

Machane sul nga chitimang?

Dariy’.

Weliy ngak e binaw rok’ nikemalog gubin e salpiy rok’?

Dabiyog.

Me yib ngak e buguliy e yoror rok’ ni kar noned ngak marunga’agen e ngngol rok’ nira tamra’ nag e tabinaw nge gathay nag e gum’ircha’row e galibthir? Sul nga pi fagar rok tomuren nike ufanthin e rogon ni ra thapeg e puf-meta’won rok’.

Dabun.

Machane e balig, kemus ir, nge gafgow de chuw—nge mada’ ko ngiyal’ “nike sulngaen’ ngak.”¹¹

Nike nang e tin ni ngan rin’.”

Chiney ngad suled ko chitimangiy, masta ko na’un nibay e kirbaen’. I’in e pi miri’iy, sana biyu’, ko hour ni ke fak nifan e magaf an’um ngay ko fak.

I’in yay ni ke sap nga ta’abrogon e kanawo’ e fak nike yaen nga dakaen nge puguraen bayay nge bayay e thamtham nib gafgow bachane e fak’ nike yaen nga but? I’in pi meybil nike pii’ u lukungun e neap’, me wenig nag ngak Got nima damiiteg e fak, nira piryeg e tin nib riyul’, me sul bayay?

Nge tomur ta’areb e rran, fare chitimangiy ba sap nga wo’ ney nib kirbaen’—fare wo’ ni ma powi’iy nga na’un—ni ba guy e bee’ ba yaen’ nga but ngak.

Binem nibe buch?

Dariy’fan e bee’ ni’ir nga palog, chitimaniy ni manag rib papay ir e fak’.

Nibe mil ngak, gumuchmuch ngak e chi cha’nem ni fak.¹²

“Chitamag,” nike yoer ngak tomuren sana biyu’ e yay nike practice, “Kug ngongliy e kireb nib togopluw ngak Got ma ba togopluw ngom. Dab kug bung ni nganog ni fakam gag.’ Kemus gube fith ngom ni nggu mang e tamuruwel’ rom.”¹³

Machane fare chitimangiy de pi e rogon ni nge kem’ay. Luuq u lan mit, ir ba motochyil fapi tapigpig: “Mu gurgad ngam feked i yib e bin th’abi fel’ e mad nga mon’ed nga daken. Mi gimed tay reb e luwew nga bugul i pa’ mi gimed yin’ e sus nga ay. Mu tay e madnom. Ke sul e fakag!”¹⁴

Ulan e office rog bay e sasing rok’ e bee’ nu Germany fithingan Richard Burde. Harriet nge gag ni gamow ma tʼuf yaʼan ney! Me dag ta’areb e ya’an ko fare ya’at rok’ Somoel.

siasing/Llecheklel

Fare Sul ko fare Fak ma Chuwi’iy, rok Richard Brude.

Napan gubin e gidii’ ba falfalaen’gad bachane e sul ko fak, ta’areb ni dabun—walagen nib ilal’.¹⁵

Ir ba fek boch e thamey nib kireb.

Ke paer urom napan e walagen nike fith ngak ni fan e tawa’ath rok’. Ke sap e gafgow nib ga’ rok’ e chitimangiy.

Tomuren e walagen nike yaen, ke guy rogon ni nge fek e totomal rok’ e chitimangiy. Gubin e rran, nike muruwel’ ni nge fulweg e gum’ircha’en nib kirbean’ rok’ chitimangiy.

Nge chiney e bitir nib almarin ney ni ba sul, nge urngin e gidii dabiyog kar taleg ni ngar pii’ e motoyil ngak e walagen nib togopluw.

“Gubin e pi dew ney,” ni ba weliy ngak e chitimangiy, “dariy ta’ab yay ni kug pag lungum. Machane u ngiyal’ nem, dabda madnam nifan ngog.”¹⁶

Me fulweg e chitamngin nib t’uf ngak ni ga’ar, “Fakag nib t’uf, urngin ban’en ni bay rog me gur e fanam! Biney ir gathi morunga’agen e ta’areb nag e tawa’ath nge madnom. Biney ir morunga’agen e golnag. Rran ney ir e ngiyal’ ni yibe athapeg nifan bo’or e duw. Walagen nike yim nge nibe fas bayay! I malog machane chiney e kan pir’eg.’¹⁷

Pi walageg nib t’uf rog, pi fagar, Woed gubin e pi ya’at rok’ Somoel, biney ir gathi morunga’agen e gidii’ ni kar pared nib kakrom. Morunga’agen gur nge gag, daba’.

Mini’ u fithik’dad de yaen ko fare kanawo’ nib thothup, nima lemnag rayog ni nge pireg e falfalaen’ nib ga’.

Mini’ u fithik’dad de thapeged e sobut’ nag laniyaen dad, kirbaen’ u gum’ircha’ey, nge thapeg e n’agfan nge runguy.

Sana boech gidii ba lemnag, “Rayog ni nggu sul? Gube thapeg e thin nib kireb ngog ni manimus, fek yathin, nge pi fagar ra mil ngog? Nib mangil ni nggu mang nib malog? Mang gara rrin’ Got fa’an gura guy rogon ni nggu sul?

Ya’at ney ma pii’ ngodad e fulweg.

Chitamangdad nu tharmiy nira mil ngodad, me sug e gum’ircha’en ko t’uf nge ba’adag. Ir ma gumuchmuch nagdad; tay e bin th’abi fel’ e mad nga mon’ed nga dakendad, tay reb e luwew nga bugul i pa’ mi gimed yin’ e sus nga ay; nge yoeg, “Daba’ gadad ra madnom! Bachane e fak, faram nike yim’, nibe fas bayay!”

Ma Tharmiy ri falfalaen’ nifan e sul rodad.

Rayog ni nggu fek’ e ngiyal’ romed chiney nge non urngin ngomed?

Dariy’fan mang ni ke buch u yafos rom, gube yoeg ta’abrogon e pi thin rok’ e fagar rog nib t’uf rog nge reb e Apostle ni Elder Jeffrey R. Holland: “Dabiyog ni ngam ligil nga tangin e magal nib manimus rok’ e [bayul ni maligach] rok’ Kristus.”¹⁸

Boch e meleg romed ke fekmed nib palog ko fare Tathapeg nge Galasia Rok, fare Bee’ nib Tagolnigey nib Masta ma sakiy udakaen e wo’ nima powi’iy nga na’un, me pinning med. Nge gadad e pi chongin ko fare Galasia rok’ Yesus Kristus ma guyed rogon ni ngad leked e susun rok’ nge ba’adag med ni woed e walageg, ni woed e pi fagar. Gamad be falfalaen’gad nge madnom gad ngom uta’abang.

Sul romed dabi achigchig nag fapi tawa’ath rok’ reb e bee’. Bachane e tawa’ath rok’ e Chitimangiy ni dariy n’umngin i nap’an, nge pi’nen ni ra thapeg ngak ta’ e bee’ de achigchig nag e tawa’ath ko reb e bee’.¹⁹

Dabgu dake ni rib moem ni ngam suloed. Rayog ni nggu micheg mornga’agen. Sana, nib riyul’, ra mang ni rib tha’bi mo’omaw’ e mel’eg rom.

Machane gube micheg napan ni ngam mel’eg ni ngam suloed nge maen nga dakean e wok rok’ fare Tathapeg nge Tabiyul rodad, gelingin nira tib ulan e yafos romed nge thilyegmed.²⁰

Pi angel u tharmiy nira falfalaen’gad.

Woed gamed, e tabinaw romed u Kristus. Bachane, ma gamed ma nang urugon ni nggu mang e bee’ nib prodigal. Gadad gubin bat’uf e gelngin ko bayul ku Kristus gubin e rran. Gadad ma nang e wo’ ney, nge gadad ma dared nga but ngom.

Danga, wo’en rodad de chuw e gafgow fa kirbaen’. Machane kad yib ura’ nib palog “nu dakean fare thin rokʼ Kristus u fithikʼ e mich nib miyuluy ngakʼ, ni gimed be tagaʼ ni poloʼ nga dakean e pi ngongol rokʼ e chaʼ ni bay gelingin ni nge thapegey.” Nge fa’an ni ngad “pii’ed iyaen nga m’on u fithik’ e yul’yul’ romed ngak’ Kristus, nib machalbog laniyaen’med ko athap, nge t’ufeg rok’ Got ngak’ gubin e [gidii’].”²¹ Uta’abong gadad ra “falfalaen’gad ni bay e falfalaen’ nib ga’ nge be sug ko fla’ab”²² bachane Yesus Kristus e gel rodad!²³

Ireray e meybil rog ni ngad rungan, ulan e ya’at ney, e lam rok e Chitimangiy nima pinningdad nga dakaen e kanawo’ nima powi’iydad nga tabinaw—bay e athamgil rodad ni ngad kalngan’, thapeged e n’agfan, nge fol e wo’ ni ma powi’iydad ngak Got rodad nib runguy nge wurengaen’. Ko pi’ney gube pii’ e m’ag rog ma ku digey ngomed nge tawa’ath rog u dakean fithngan Yesus Kristus, amen.