Fagar Rodad ni de Chuw Ngodad

Pi walageg nib mo’on nge ppin nib t’uf, ulan e mo’olung ney kad thapeged e tawa’ath nibay yib bo’or e yi’iy. Pi tapigpig rok’ Somoel ni Yesus Kristus kar noned nge yad ra noned fapi thin nib riyul’, pi athamgil, nge powi’iy.

Kug falfalan’ ko fapi micheg ni ke share nag ko biney e conference ni fare Somoel ba yoeg ngodad u dakean fare Kan ni Thothup. Napan ngad meybil gad nge fol fare ya’el rok Kan Thothup, bay yib e tafney nge tawa’ath ni ba powi’iydad ko rran nib momaw ni bay yib.

Kad runuagdad bayay rok President Russell M. Nelson ni ”u fapi rran ni bay yib, dabiyoeg ningan fas e ya’el ko bee’ fa’an dariy’ e powiy’, fanow, golnag, fa ayuw ko fare Kan Thothup.”¹

Pi thin ney ke powi’iyeg ni ngu lem nag mang gu ba machib nag pi fakag nge pi fak e fakag mornga’agen u rogon bay e powi’iy ney u rran nib momaw ni bay yib.

Ere biney e molwul e babyor ngak pi fakag ni ra awyuwegrad napan dariy gag u fayleng. Guba adag ni ngad nanged mang gu ba naged ni ayuwegrad.

Kug nang nib ga’ e pi’nen thingari rrin’ ere ni ngar thapeged e ayuw rok’ fare Kan ni Thothup gubin e rran rodad. Kug thamey thingari gu non morunga’agen e pi’nen ni ke buch ngog ni kug pinning fare Kan ni Thothup, ufithik e guy rogon rog, ni nge paer ngog gubin yay. Meybil rog e rayog ni nggu pii’ athamgil ngorad.

Guba tabag ni ngar lemnag nge meybil nag murunga’agen fak ku Helaman, Nephi nge Lehi, nge reb e pi tapigpig rok’ Somoel ni kar mu’ruwel ngorow. Kar feked e magawon nib ga’. Mab pigpig ulan e tafen nib kireb nge yo’or mit e salpil’gun riy. Gub thapeg e athamgil, nge rayog ni gur, ulan ta’areb e verse ulan e chepin ku Helaman:

“Ma lan e bin medilip i ragag nge mereb e duw me tabab e wagagaey. Machane me yibi buch ni Nephi nge Lehi, nge boechi walagrow nib yoʼor ni yaed manang morngaʼagen e pinʼen nib gaʼfan mab riyulʼ ko machib, mab yoʼor e yiʼiy nibe yib ngoraed ni gubin e rran, ere ra machib niged fapi gidiiʼ, ni arame ra tileged e wagagaey roraed ni kare re duw nem.”²

Biney e molwul ba ayuwegeg, nge ba ayuwegem. Pi fak ni Helaman ni kar gagyeg nigew u dakaen buchuw e pi thamtham rok’ fare Kan ni Thothup. Me pii’ athamgil ngog rayog ni yib e machib nagdad ko fare Ya’el buchuw ngo buchuw, nima thapeg e pi’nen ni ba t’uf, nge nap’an gadad be fel’, rayog gadad ra thapeg boech.

Kug thap e athamgil ni woed rogon Nephi ni ke fek e fonow ni nge sul nga Jerusalem nifan e pi plate rok’ Laban. Gamed manang fare micheg rok. Ke ga’ar: ”Gag e bay guwaen nggu rin’ e pin’en ni ke motochiyel nag Somoel.”³

Pi’nen ni ke buch ngak Nephi ko fare Kan ni Thothup u ngongol ney nike pii’ athamgil ngog bo’or yay nap’an ni kug tabab e muruwel’ rog guma nang Somoel nike pii’ machane kug lemnag ni rib mo’omaw’ ko ganop rog nge rayog rog.

Kagamang e pi’nen Nephi ni ke yog morunga’agen piney: “Ma ngiyalʼ nem e banepʼ; me ere mug chiyliy [pi walageg] ni thingar miith gaed u wuruʼ e yoror. Me tomuren ni kar miith gaed, ma gag, Nephi, gu sinʼaegnʼaeg lingag iyaen nga langgin e binaw, mu guwaen iyaen ko tabinaew rokʼ Laban.”

Me ul’ul’ ni, “Ma i powiʼiyeg e Kan ni Thothup, ya dagu nang ko mang e pinʼen ni bay nga mʼon ni thingar gu rinʼ.”⁴

Ke pii’ athamgil ngog u dakaen e ganop ni fare Ya’el ke powi’iy ngak Nephi gubin e ngiyal’ ufithik’ e neap’ nifan e muruwel’ rok’ Somoel.

Gadad ba t’uf fare Kan ni Thothup rodaed. Chiney, gadad ba adag, machane gadaed manang u dakean e n’en nike buch rodaed ni dani moem ni ngad thapeged. Ra bagdad ma ma leam nge yoeg nge pi n’en ni gadaed ma rrin’ u lane yafas rodaed ni rayog ni nge kireb nag e tafney rok fare Kan Thothup.

Nap’an ni ra buch, ma ir ra buch, gadad ra thameyed e m’ingaen’ rok’ Somoel. Nge gadad ra lemnag ni yigo’ dad. Rib gaa’ fan ni ngam puguran e micheg gadad ma thapeged gubin e wiik nap’an ni ngad kalngan’dad nge thapeged fare sacrament, “ni paer fare Kan ni Thothup rok’ ngoraed ni gubin e ngiyal’.”⁵

Fa’an ra kam thamiy gelngin fare Kan ni Thothup daba’, ma rayog ni ngam fek binem ngam nang ni be muruwel fare Biyul u lan e yafos rom.

Woed Elder Jeffrey R. Holland ni keyog: “Demtrug e ngiyal’ ney nib mo’omaw’ ra yib, dabda rusgad ko e lemnag ni Got ke pagdad fa de rung’aen e pi meybil rodad. Ir ma rung’aen dad. Ir ma sap gad. Ir ma t’uf dad.”⁶

Athamgil ney ke ayuwegeg. Nap’an kug thamey nib palog ngak Somoel, nap’an ke soen e fulweg ko pi meybil rog, kug fil ni nggu fol e fonow rok’ President Nelson ni nggu lemnag e yafos rog nifan e pi’nen rayog ni nggu kal’ngan’. Ir ma pug uran gad, “Kal’ngaen’uy ni gubin e rran e kanawo’ iyan ko ma’ang’ang, ma ma’ang’ang e ma pi’ e gelngiy.”⁷

Fa’an bay e magawon romed ni dabi thameyed fare Kan ni Thothup, rayog ni ngam lemnag morunga’agen e pi’nen thingari kalngan’ nge thapeg e n’agfan.⁸ Rayog ni ngam meybil ufithik’ e mich ni ngam nang e ngongol romed ni ra be’ech nag nge mang nib mat’aw nifan e ayuw rok’ fare Kan ni Thothup.

Fa’an gaba’adag ni ngam thapeg fare Kan ni Thothup, thingari ba’adag biney nifan e fan nib mat’aw. Fan romed me ta’abrogon nag ko fan rok’ Somoel. Fa’an e fan rom ir kemus nifan ngom, ra mang nib mo’omaw ni nga thapeg e fulweg rok fare Kan Thothup.

Be gaa’ fan ni ngad ba’adagdad e pi’nen fare Somoel ni ba’adag. Ba’adag rodad thingari buch bachane e adag rok’ Kristus nib machalbog. Meybil rodad e “Gube’adag e pi’nen ni gabe’adag. Ngan rin’ e tin nib m’agaen’um ngay.”

Gube guy rogon ni nggu puguran e maligach rok Somoel ni ba adageg. Me tomur, nap’an gube meybil ngak Chitamangiy nu Tharmiy ni be oge e magar, gube thamiy e t’uf nge pagaen’ ni ma rung’aen e pi meybil rog nge gura thapeg e tin nib mat’aw ko gag nge gidii’ gu ba adag. Me gelnag e mich rog.

Fan ko gubin e pi’nen me pii’ e m’ag fare Kan ni Thothup, rib ga’ nifan dad ni’ir Yesus ir fare Kristus, ni’ir e facha’ ni Fak Got nib fas. Fare Tathapeg nike micheg, “Fare Taayuw e bay yib, ni aram fare Kan ni Thothup nma dag e tin riyul’, ni bay yib rok e en ni Chitamangiy.”⁹

Fa binem e duw kafram Kug thapeg e kol rok’ e matin nib magof. Ke weliy ngog e bitir nib bpin rok’ nike milekag nga palog ko na’un rok’. Nike lemnag ufithik’ buchuw e non ngak e bitir ney ni ke buch e ba’nen nib kireb. Nike wenig nag ngog ni nggu ayuweg.

Kug pir’eg e home teacher rok’ e bitir nib bpin. Rayog ni ba nag ko biney e fithingan ni ke kakrom. Kug kol ngak. Ir e bee’ nib fel’ yangren. Machane nike weliy ir nge companion rok’ kar od gad u luk’ungun e neap’ nifan e magof morunga’agen e bitir nib bpin nge ke yib e yi’iy ngorow me ir ra fal’eg boch e mel’eg rok ni ra feken e kirebaen’ nge gafgow. Me kemus e yi’iy ney rok Ya’el, kar ranow nga mada’ ngak.

U bin somm’on dabun ni nge weliy morunga’agen e rarogon rok’. Ko yi’iy, kar wenig nag ngak ni nge kalngan’ nge mel’eg e kanawo’ fare Somoel ni ke fal’eg nifan ngak. Ma ke nang, ya mich rog udakaen e Ya’el, kemus e rogon rayog ni ngar nangew morunga’agen e yafos rok’ ni ke buch rok’ Got. Matin nike pii’ e magawon rok’ ngak e Chitamangdiy ni bay u Tharmiy nge Tathapeg. Fare Kan ni Thothup nike yaen nga pi home teacher nem bachane yow ba’adag ni ngar pigpig fare Somoel. Kar folgow e fonow nge micheg nibay ulanggin fare Doctrine nge Covenants:

“Mu suguy ngorngorem ko murnguy ngak gubin e pumo’on, ni nge par nibay fare mich riy, mag pag e tin nib mangil ni nge suguy e leam rom; ma aram ni ran gel nigem u lan gil’il’ungun Got; nge fare machib ko priesthood nira yib nga ya’el rom woed e garayuw u tharmiy.

“Fare Kan ni Thothup ra paer ngom gubin rran, nge fare scepter rom ni dabi thilyeg e scepter nib mat’aw nge tin riyul’; nge suwon rok ra mang e suwon nib manimus, nge dariy e motochiyel riy rayog ni nge yib ngom ni gubinfen ma dabi m’ay.”¹⁰

Gube micheg ni fare Somoel e ke fulweg e michmicheg rok’. Fare Kan ni Thothup nima yaen nga pi chongin nib mat’aw ko fare galasia ku Yesus Kristus. Chiney, pi’nen nima buch ngom e ba thil, nge fare Ya’el nira powi’iy nigem u dakaen e rogon nib fel’ ko mich rom nge rogom ni ngam thapeg e yi’iy nifan gur nge pi’in niba t’ufeg nge pigpig ngak. Gube meybil u fithik e gum’ircha’eg ni gara ga’nag e athamgil romed.

Gube pii’ e m’ag rog ni Got en Chitamangiy ba fas. Gab t’uf rok’. Be rung’ag gubin e pi meybil romed. Yesus Kristus nike meybil ngak e Chitimangiy ni nge pinning fare Kan ni Thothup ni ra powi’iy, gapas nag nge machib nag dad. Chitamangin nge fa nib t’ufrorad, kar m’ugew ngak Joseph Smith u fithik ulan e luway nib sug e geki’iy riy. Fare Profet Joseph Smith e pilyeg e fare Babyor ku Mormon riy u daken fare tawa’ath nge gelngin Got.

Pi gidii’ nib thothup ni kar fulweg fapi kiy ko priesthood. President Russell M. Nelson ir e profet rok’ Got nib fas nifan gubin e feylang.

Gube pii e m’ag rog morunga’agen Yesus Kristus, Guma nang ni Ir ba fos ma Ir be powi’iy e Galasia Rok’. Gadad ma bay e rogon ni ngad thapeged fare Kan ni Thothup ni de chuw ngodad nge thapeged e pi’nen nib riyul’ napan ni ngad t’ufeged fare Somoel, kalngan’, nge fith ngak ni fan e t’uf rok ni ra ying e gum’ircha’dad. Gube meybil ni gadad ra thapeged e tawa’ath ko fare Kan ni Thothup daba’ nge gubin e rran u yafos rodad. Gamed ba t’uf rog. U dakean fithngan Yesus Kristus nib thothup, amen.