Fini Fel’ nra Yaen e Falflan’ Rom
Gu be piningmed e chiney ni ngam feked e llowaen romed, ma ku mich romed nib fel’, ma ngam maroed ko mission.
Pi walageg ni pumon nge ppin, pi lem rog e be paer ko fare mukun ko Isreal, ni President Russell M. Nelson ma pining ni “bin ni th’abi gaa’ fan ni be buch u dakean ea fayleng ea daba’. Dariy ban’en ni ta’abrogon ngay, dariy ban’en nib ga’fan ngay, dariy ban’en nib ga’ ngay.”1
Fare mukun e be dag fan nib gaa’ ni “fare fan ko pi ya’an e ba gaa’ u p’oewchen Got.”2 Arogon ni fani rib moem. Gadead be kunuy e bitir rok’ Got u nap’an e pi rran ney nib tomur ni fan ni rayog ngoraed “pi towa’ath e ngan pu’og nga dakean lolugraed”3 nge ku fapi michmich ko “fapi fala’ab ko manemus.”4 Arfan ni fa’an ra ngan kunuy e Israel ma ba t’uf ea missionaries rodaed—yo’or ko pi cha’ ni be pigpig e chiney.5 Gu be non e daba’ ni fan e pi’in nib labthir ni kan fal’eg rogon ni bay u lan fare Galasia ni rayog ni nge pigpig ni missionary. Gamed ba t’uf ku Somoel. Gimed ba t’uf romaed u lan e New York nge Chicago, Australia nge Africa, Thailand nge Mexico, nge gubin yang ni bay u thilin.
Am paged gag ni ngu fek gimed ko duw ni 2015. Ka piningeg ni ngu ’un ko fare Ulung ko fare Ulung ko fare Ragag nge L’agruwi Apostle. Reb e muruwel nib fel’ ko fapi Apostle e muruwel ni ngu pininged fapi missionary ni ngar pigpig gaed u lan e gin ni ngar muruwel gaed. Kug un ngay u nap’an ni gu paer ni gag ea Seventy,6 machane chiney ni gag e Apostle, ma kug thamiy nib tomal e re muruwel ney. Kug tabab ni ngu tay ni gu be meybil e elders nge sisters nib fel’ yangraed nib yo’or, ni reb ma reb, u lan e mission u gubin yang u dakean fayleng. Ma arame gu chel ko fapi gallabthir. Bay ragag ko fare list. Gathi yo’or. Kug gin, ma kug fith bee’ ko fare Missionary Department, “I’in e ba t’uf rodaed ko beiny e wiik ni ngaed sug gaed fapi pining?”
Ke fulweg ni ga’ar, “300.”
Ngiyal’ nem nib wenig e ke paer rog: ragag e gallabthir ni ngar sugyed e dalip i ra’ay ea pining.
President Russell M. Nelson e ke pining ni ngar “ragbug gow ngar fithew Chitamangiy nu Tharmiy ni fa’an ra ba fel’ ni ngar pigpigew ko mission.”7 Ni reb e tin nib gaa’ fan e, ke yoeg, “ngan adag ngan pigpig e bin ni tha’abi gaa’ fan”8
Fare scripture e ba yoeg, “Fa’an ra ga ba adag ni ngam pigpig ni fan Got ngan pining ni ngam un ko fare muruwel.”9 Re muruwel e mornga’agen fare motochiyel ko fare mukun. Gadaed be bi’eg u lan ko John, “aram e re mo’on ni yung e woldug nge re mo’on ni t’ar e woldug e bay ra felfelan gow u ta’abang.”10
Kug guy ni kan mugu’uliy fare motochiyel ko fare mukun u lane e tabinaew rog.
Boech e duw ko m’on ma kug yean e tabinaw, ma ke pinningeg fare bishof ni ngu mu’ nag fare mu’ulung ko sacrament.11 Nap’an ni gu be yib u dakean fare stand, ma ppin’ ke yib nga p’oewcheg ni bay rok’ e medlip e bitir rok’ ma ke yoeg ni Sister Rebecca Guzman fithingan.
Ke fitheg, “Elder Rasband, Gama nang e Rulon nge Verda Rasband?”
Mug min mug fulweg, “yow ea gallabthir rog.”
Rayog ni ngam guy ko mang e ra buch. Ke pageg Rebecca, ni bay u ro’ ko tabinaw u lan fare Conference Center, ma ngu weliy yat e tabinaw rok’.12
Gallabthir rog, i Elder Rulon nge Sister Verda Rasband, e ra pigpig gow ni yow e missionary nib ilal u lan e mission ko Florida Lauderdale.13 Ra machib mar lekew nib thothup rogon ni ngar kaen nigew paa’ row nga dakean e mab ko tafen Rebecca. Ir e fel’ yangren ma adag ni nge motoyil ko fare tong ku fapi Osmond, ni fagar rog i Donny—ni baey u ro’ e daba’.14 Ke motoyil ko sabathiin rorow ko media me fil ni yow ma un ko fare Galasia ku Yesus Kristus ko Gidii’en Got ko Tin Tomur e Rran. Ke thamiy ni bay ban’en nib thil ni mornga’agen, ma be lem ni binem e Galasia rorow, ma l’agruw i duw nap’an ni Rebecca e ke fileg e machib go fare Galasia u lan fare tagil e babyor u lane fare sukuul. Ere, fa’an ni kar kaen nigew paa’ row nga dakean e mab ko tabinaw rok’ e gallabthir ni yow e missionary ko Galasia ko Gidii’en Got ko Tin Tomur e Rran, ma ke gin.
“Ke yoeg nina rog ni ngu laang row,” ke yoloey Rebecca, “macahne ke yoeg gumircha’eg, ‘danga’.’ Kug sap nga oewchrow, mug thamiy e falflaen’ nge t’uf. Fare lem riy e ma yib nag e luu‘ nga oewcheg ma thamiy nib gel nga gumircha’eg”15
Rebecca e ke pining row ni ngar bow nga langin, me share nag gallabthir rog ni missionary ba chep ngak’, nge ku l’agruw e walagen ni ppin nib bitir, ma, nib thil rogon ni de un ngoraed, nina rok.
Rebecca e ke weliy ngog: “Gallabthir rom ni yow l’agruw e ba fel’ rogon ni kar weliyew e tin ni bay e fith romaed ni mornga‘agen. Rayog ni ngu guy oechrow ni boed rogon ni be liyegrow e tamilang. Kug koekoel niged e nina rom u m‘on ni ke yaen ni gubin ngiyal’, ma gubin ngiyal‘ ni ke guy rogon ni nge ayuweg e nina rog ni nge par nib fel’ ma ke liyoer. Chitamam e ke gubin ngiyal’ ni bay e tamilang u owechen u nap‘an ni ke machib ngomaed mornga‘agen Yesus Kristus. Ke gay rogon ni nge uneg e chitamag u lan e sabathin romaed ma ke yaen e tay ma ke un ngomad. Chitamag e ir e chef ko reb a country club ma ke tabab ni nge liitheg e ggan ko abich ko balayal, ma ke faleg e bin ni tha‘abi adag e chitamam, i key lime pie.”16
Fa‘an Elder nge Sister Rasband e ra ningew Rebecca nge Tabinaw rok‘ ni ngar bi‘eged fare Babyor ku Mormon, ma Rebecca ea ke mu‘ ni yigo‘ lal‘ e rran. Ir ba adag ni nge tawfe nib papay, machane yu boech e gidii‘en e tabinaw rok‘ e dani fel‘eg rograed. Ke yaen aningegg e puul‘, me ke yoeg Rebacca ni thingari tawfe nge un ko fare Galasia nib mat‘aw rogon. Ke yib nga laniyaen, “Urngin n’en ko ya‘al rog e nang nib riyul‘.”17 Ko April 5, 1979, me tawfe nagraed fapi missionary Rebecca ni ke 19 e duw rok‘, nina rok, nge gal i walagen ni ppin. Chitamag e ke guy e tawfe nem.
Fa’an gu mada’ ko Rebecca nge tabinaw rok ko galasia, me kug feked e sasing ko tabinaw rok nge gag. Kug fek fare sasing ko nina’ rog nike pulubthir, me ke koel nib chugur ko gumircha‘en. Me yoeg ngog, “Ronnie, daba’ ea rran ni tha’abi gel ea falfalean riy.”
Tin ni yoeg nina rog e be pii’ e duwer ko pillibthir rodaed: “Mang ga be rrin’ ko re ngiyal’ ney ko yafos rom?” Bay yo‘or rogon ni missionary ni pillibthir e rayog ni ngar rined e tin ni dabiyog gubin e gidii‘. Gimed e ayuw ko tin fel‘, gimed e kan fel‘eg med u lan fare Galasia, ma kan fal‘eg rogmed ni ngam pii‘ed athamgil ngam ayuweged e bitir ku Got.
Boech e gimed e sana gimed be lemnag: “Machane gimed be chuw ko fak e bitir romaed? Dab gu uned ko tin ni nge rin’ nib gaa‘ fan ko tabinaw romaed, birthday, fagar, nge fapi gamanman u tabinaew.” Fa‘an ra kug ning e nina’ rog mang fan ni kar ranew chitamag ko mission, ma gum nang ni ra yoeg: “bay e fak ea bitir rog. Gu ba adag ni ngar nanged ni chitamam nge gag e kug muruwel gow ko mission, ma gamow ba adag ni ngu dagew rogon e paer nib gel’ ngak fakmow, ma kan towa’ath nagmow, nib gel rogon.”
Nap‘an ni gu yaen ko mission u gubin yang u dakean e fayleng, mug guy e muruwel ni rib fel‘ ko bo‘or e missionary ni pillibthir rodaed. Rayog ni ngan guy nib falflaen roraed ni ngar fol gaed ko “fare tunom ko fare Somoel” ma ku mornga‘agen ni yaed be un ko “muruwel ko Somoel .”18
Fan ko boech e gidii‘, ma gamed be athpeg ni yu biyu‘ i gimed, ma muruwel ko missionary ni full-time u lane reb e gin ko fayleng e ra paer ni’ir nib fel‘.19 Fan ko reb e gidii‘, ma pigpig ko mission ko Church-Service nib chugur ko tafan e ba fel‘. Bachane m‘ar nge reb e n‘en, bay e gidii‘ ni dabiyog ni ngar pigpig gaed. Gamaed ma nangfan e ngiyal‘ nem, ma gu be athpeg ni ngam pir’eg rogon ni ngam ayuweg e gidii‘ ni be muruwel. Mu fol gaed ko fare thin ko fare profet mu meybil gaed ni ngam nanged e tin ni ba adag Somoel ni ngam rined.
Gin ko mission ni bay u gubin yang u fayleng e yaed be ning ayuw romed. President Nelson e ke yoeg ni mornga‘gen e missionary ni pillibthir, “Ba fel‘ yangren e ya‘al roraed, bay e llowaen roraed, ma yaed ra muruwel gad nib gel.”20
U lane fayleng, bay rom e muruwel nib yo‘or: rayog ni ngam muruwel u lane office ko mission fa temple, ngam gelnag e missionary nib bitir, ngam gelnag e branch nib achigchig, ngam muruwel u lan e gin ko FamilySearch fa chep e gidii‘, ngam fileg e institute, ngam pii‘ e pigpig, ngam muruwel ko ilal nib fel‘ yangren, ngam ayuweg e gin ni ngan pireg ea muruwel fa u lane milay ko fare Galasia. Rogon ni ngan pigpig, ni rogon nib fel‘ ngom, ko gin nib t‘uf rom, ma rogon ni rayog ni ngam fal‘eg rogom ni ngam maen ngay ngan weliy ko website ni “Senior Missionary.”21 Rayog ni ngam non ko bishop fa branch president rom.
Kug pinning bo‘or e gallabthir ni ngar pigpig ew mug guy ni ke suguy yow fare tamilang ku Kristus ya‘row.22 Nap’an e sul, ni kar tayew mar weliyew ni kar ranew nga chugur ko fare Somoel mar pirew nib chugur nga ta’abang, ni yow be thamiy fare Kan Thothup ku Somoel ni yib e pu‘og ni dakean row, nge yow ma nang ni yow be ayuweg ni yib e thil.23 Mini e dabuun e binem?
Ba mission e susuun e guruy ni tha‘abi gaa‘ fan u lane yafos ko gallabthir. Reb e title nib fel‘ e rayog ni“ Somoel rog e bay gu t‘uf rok‘.”24 Gu ra paer ko nam ni dawor mu nang; machane, gelngin fare Kan Thothup e bayi ayuwegnem ni ngam thamiy ni boed rogon ni gu be paer ko tafnam.
Gallabthir rog ma ku yu ragag i biyu‘ e missionary ni ke mu‘ ke share nag e mich ni mornga‘agen e falflaen‘ ni kan pireg ko muruwel ko missionary. Ke yoeg Somoel u lane chep nib thothup ko tin tomur e rran,”Ma fa’an ni ngam muruwel urngin e rran rom ni ngam machib e kalngaen’ ngak e gidii’ ney, mu fek, kemus ta’areb e ya’el ngog, ma yoeg gaa’ e falflaen’um u lan fare gil’lungung e Chitamag!25
Ke pii’ Isaiah ngodaed e weliy thin nib fel’ ko mang fan ni ngan pigpig u lan e “milay” ko mission. Fapi chep e be yeog ngodaed “fare gi milay’ e fare fayleng.”26 Cha’ ney e profet nib fel’ nib kakrom e yoloey,“Bay mu chuwgad u fithik’ e felfelan’; bay ni pow’iymed nga wuru’, e re binaw nem u fithik’ e gapas: Pi burey nge yochi burey e bay ra tang gad, ma pi gek’iy e bay ra tolul niged e felfelan’.”27 Fapi malang, pi burey, pi milay, nge pi gak’iy e rayog ni nge ta’ab rogon ko president ko mission, bishop, district leader, gidii’en e galasia, nge gidii’ ni be guy e tin riyul’ machane “de nang ko gin ni nge pir’eg,”28 Yaedra micheg ni fapi missionary ni pillibthir e rayog ni ngar thilyeged rogon ko mich roraed ko Tabiyul nge Tathapeg rodaed, i Yesus Kristus.
Gag e Apostle ko fare Somoel i Yesus Kristus, ma gube ning med ni gimed e missionary ko fare mukun ko Israel nge sana’ ngam pigpig biyay. Gimed ba t’uf rodaed—gimed ba t’uf rodaed. Gamed be oeg e magar romaed ngomed ni gimed i gallabthir ko yafos romed ma rogon ni kam pired u lan e tabinaew, ward, nge stake romed. Gu be piningmed e chiney ni ngam feked e llowaen romed, ma ku mich romed nib fel’, ma ngam maroed ko mission. Gu be meybil nag ni bin migid e yay ni ngu par nga but’ ngu pii’ e muruwel ko missionary nib gallathir, ma bay bo’or i ra’ay e gidii’ ni be soen nag e muruwel rom.
Ku gube micheg ni nap’an ni gimed be pigpig, ma bay mu thamiyed e t’uf ku Somoel u lan e yafos romed, may bay mu nanged Ir, ma bay i nang Gimed ni urngin, ma “ra gel e falfalean rom.”29 Muruwel rom ni fan ko Yesus Kristus e bay i pii’ tamilang nga laniyaen’ nge tawa’ath nag e tabinaw rom, pi fak e bitir romed, nge pi fak roraed. “Gapaes, nge t’uf ea [bay ni] bo’or nag”30 u lan e yafos roraed ni bo’or e duw ni nge yib. Gu be micheg. U dakean fithngan Yesus Kristus, amen.