Og nag e Magar ngak fare Mo’on

Pi walageg ni pumo’on nge bpin, kug fal’falan’ ngay ni gubay romed ko biney e kadbul Gube meybil ni ngeyag ni yibliyem Somoel.

Owcheg e gathi kab ta’ab rogon ni wod somm’on. Kug wan kug guy e togta nifen owchey, ma kugog ni, “daryag ni ngguy fare teleprompter.”

Me ga’ar, “Arrogon, owchen e ke plubthir. Ma dabi thil rogon.”

Ere bay gay rogon gelngin nrayag rog.

Gu ba’adag ni nggu weliy ngomad boch ban’en nibay ko tafney rog. Fare Profet Joseph e ke par nibay ko tafney rog e gali pul ney. Kug par ma rigube tafney nag fare muruwel rok’ ni rib fel’ ni mang fare profet ko ngiyal’ ney, ko biney e mfen nib polo’.

Gube tafney nag ni gadad e chonggin e Fare Galasia ku Yesus Kristus ni fan ko gidii’en Got rok’ ko Tin Tomur e Rran e karin tawa’ath nagdad ni bachan Joseph Smith, be’ nib pagal ni ba’adag ni nge nang ko rogon min n’agfan e pi denen rok’, ni yan ngalan fare loway nib sug ko gak’iy u charen e tabinaew rok’ u Palmyra, New York, me ragbug nge meybil—rogon ni yib ko thin rok’—me meybil nib ga’ laman ni irreram e yin somm’on ni rrin’ e biney (muguy ko Joseph Smith—History 1:14).

Ko ngiyal’ nem, napan nibay Joseph nib ragbug ko ginem ni gadad ma pinning fithingan ni fare Loway nib Thothup, me mab lan e tharmiy. L’agruw nii’, nib gel ram’en ko yaal’, e rabow ngar m’ug gow ngak. Bagyow e non ngak me ga’ar, “[Joseph,] irerray Fakag ni rib tu’uf rog. Motoyil Ngak!” (Joseph Smith—History 1:17). Ma arram e ngiyal’ ni tabab fare Sulyarmen ko gospel ku Yesus Kristus nib Polo’ nib manechubog.

Bachan Yesus, ni’ir e Tathapeg nge Tabiyul rodad, e non ngak Joseph me bing kanawo’en e biney e mfen ni gadad bay riy e chiney, ni gadad ma yon’ tanggin, “Og nag e magar ngak fare mo’on ni gopuruy’ ngak Jehovah!” (“Praise to the Man,” Hymns, no. 27). Gadad be og nag e magar ngak Somoel nifan Joseph Smith nge athamgil rok’ ni yan ngalan fare loway ko 1820, u charen e tabinaew rok’ u Palmyra, New York.

Kug be tafney nag urngin e pi n’en ni gadad manang ni rib fel’ nge urngin e pin’en nibay rodad. Pi walageg, mich rog ngom ko biney e kadbul e kan tawa’ath nagdad ni rib gel ni gadad manang e pi n’en ni gadad manang ni bachan Joseph Smith, ni’ir fare profet ko biney e mfen nib tomur.

Gadad manang fan e biney e yafos, nge gadad mini’.

Gadad manang Got; gadad manang fare Tathapeg, ni bachan i Joseph, ni yan ngalan e loway, nibe gay ko rogon nrayag min n’agfan e pi denen rok’.

Gube tafney nag ni biney e reb e ban’en ni th’abi fel’ ma reb e ma’ang’ang ni gubin e gidii’ u fayleng nrayag ni nge nang—ni Chitamangdad nu Tharmiy nge Somoel Yesus Kristus e kar dagew row ko biney e mefn nge Joseph nikan chuwathiliy ni nge sulweg yarmen fare gospel ku Yesus Kristus ni ga’angin nib polo’.

Bay fare Babyor ku Mormon rodaed. Fare Babyor ku Mormon e reb e tawa’ath ni rib fel’ nibay chappen e Galasia riy. Ku reb e mich, ma ku reb e m’ag ni Yesus e ir Kristus. Bay rodad ni bachan Joseph nib fel’ thawingraed ni yag ni thapeg fapi plates, ni pii’ gelngin u tharmiy ni pilyeg fapi thin riy u daken fare tawa’ath ko gelngin Got me pii’ fare babyor ngak e fayleng.

Mulwol rog ko biney e kadbul e rib moem, ma rib ga’fan, mab sug ko t’ufeg ngak fare Profet Joseph Smith nge gubin e, gidii’, nikar sustain niged ma kar ul’ul’gad ni yaed be sustain nag ko ngiyal’ ni kab fal’yangren.

Gu ba’adag ni nggu og nag e magar ngak e chitinngin. Guma tafney nag ni rib fal’el’ napan ni yib Joseph ulan fare Loway nib Thothup, me weliy ngak e chitinngin ko mang e buch rok’, me michuwaen’ Lucy Mack Smith ko pi’n’en nike buch rok’.

Falfalan’ug ngak e chitamngin nge pi walagen ni pumo’on nge fapi walagen ni bpin nge tabinaew rok’, nikar pi’ed e ayuw ngak ko gelngin e murulwel nib gel ni tay Somoel nga daken poen ni nge mang fare profet ni nge sulyweg yarmen fare gospel ku Yesus Kristus bayay nga daken e fayleng.

Ere mich rog ko biney e kadbul e gu manang ni Yesus Kristus e ir fare Tathapeg nge Tababyul ko fayleng. Ma guma nang ni Chitamangdad nibay u Tharmiy nge fare Somoel Yesus Kristus e kar m’ug gow ngak Joseph mi yow fal’ag rogon ni nge mang fare profet.

Ri gube og nag e magar ngak, ni gu manang ni oran i gimed e kube rrin’ ni arogon, ko rogon nikan tawa’ath nagdad ni gadad manang mornga’agen fan e yafos rodad, fan ni gadad bay u roy, nge pi n’en ni gadad be gay rogon ni ngad rrin’ed ni gubin e rran. Gadad bay ko ngiyal’ ni ngad fal’aged rogondad, reb e rran ngareb, ni ngad mon’oggad buchu’uw, min gol buchu’uw, ni gadad be fal’ag rogondad nifan fare rran, nira buch, ni gadadra sul biyay nga gulil’ungun e Chitamangdad nibay u Tharmiy nge Somoel Yesus Kristus.

I gag e kug chuchugur ko biney. Dabki n’uw napan make gaman 95 e duw rog. Pifakag e yad ma yog ngog ni ke gel e blubithir rog nga boch e rran, machane ba OK. Gube rrin’ u gelngin nrayag rog.

Machane ke chugur nike gaman 50 e duw ngay, o pi walageg, nikan tawa’ath nigeg ni kug milekag u langab e fayleng ni kug rrin’ e muruwel rog ni gag reb e General Authority ko Galasia. Ba tawa’ath ni rib fel’. Gube tafney nag ni kug guy ni ga’angin yang e faylang. Kug mada’ nag chonggin e Galasia ni bo’or u daken e fayleng.

Oh, gamed ba t’uf rog. Rib falfalan’ug ko biney—nrayag ni nggu sap nga owchenmed, mug un nga fithik’med, mug thamiy e t’ufeg romad ngak Somoel nge fare gospel ku Yesus Kristus ni kan Fulweg.

Magar Somoel nge matanggiydad e chiney me yibliy gubin ban’en ko biney e mu’ulung. Par fare Thothup rok’ Somol nge yib nga gum’ircha’endad, ma par nib t’uf rodad fare gospel ku Yesus Kristus—ni’ir fare Tu’ufeg rodad, fare Somoel Yesus Kristus—nge mon’og ma gadad be gay rogon ni ngad pigpig gad ngak min fol ko fapi motochiyel rok’ min bod ni bachan e wub rodad ko general conference. Demuturug ko gin ni gabay riy u fayleng, yibliyem Got. Par fare Thothup rok’ Somoel rom. Ma gadad thamiy fare gelngiy nibe yib u tharmiy ko ngiyal’ ni gadad be liyor u ta’abang ko biney e general conference.

Nggu pag med u fithik’ e mich rog nge tin nib michuwun’ug ngay ni gu manang ni Yesus e ir fare Kristus. I Ir e Tabiyul rodaed, nge Tathapeg rodaed. Ir e tafagar rodad. U dakean fithngan Yesus Kristus nib thothup, amen.