Mut ngeni Kot epwe Nemenem

Pwi me fefinei achengicheng, ua men kinisiou ren ekkewe porous mi amwarar non ei mwichenap me ren ai tufich ne kapas ngeni kemi iei.

Ngang emon Aposel nap seni 36 ier, me ewe nongonongen ionfengeni Israel a emeseik ngeniei.¹ Mettoch meinisin usun a amwarar ngeniei, mi pachenong ekkewe angang me iten² Abraham, Isaac, me Jacob; manauer me punuwer; ewe pwon mi pin Kot a fori ngenir me mi feitiw ngeni ar neuo;³ ewe toropasen ekkewe engon me ru einang; me ekkewe chommong osini usun ewe ionfengen non ach fansoun.

Ua fen kaeo usun ewe ionfengen, ioteki usun, kametip won uokisin meinisin mi wewengeni, me tingorei ewe Samon ewe anapano ai weweiti.

Iwe ekieki usun ai pwapwa nupwen ua keran chok emwen ngeni ew minafon mirit. Fiti ewe aninis seni ruomon mi kaeo usun kapasen Hebrew, ua kaeo pwe ew me nein wewen ewe kapas Israel non Hebrew pwe “mut ngeni Kot epwe nemenem.”⁴ Iwe iten Israel a wewe ngeni emon aramas mi chengen ne mut ngeni Kot epwe nemenem non manauan. Ena ekiek a ku ngunui!

Ewe kapas chengen mi auchea ngeni ei awewen Israel.⁵ Kich meinisin mi wor ach pungun finata. Sia tongeni fini pwe sipwe seni Israel, ika apw. Sia tongeni fini ne mut ngeni Kot epwe nemenem non manauach, ika apw. Sia tongeni fini ne mut ngeni Kot epwe kon watte pochokunan non manauach, ika apw.

Ren och fansoun, sipwe chechemeni ew fansoun mi auchea non manauan Jacob, ewe noun noun Abraham. Ren ewe neni Jacob a eita ngeni Peniel (wewen “ewe mesen Kot”),⁶ Jacob a aunap ren ew ennetin osukosuk. An pungun finata a weri sossot. Seni ei aunap, Jacob a pwari met mi auchea ngeni I. A pwari pwe i mi chengen ne mut ngeni Kot epwe nemenem non manauan. Ren ponuwan, Kot a siwini iten Jacob ngeni Israel,⁷ wewen “mut ngeni Kot epwe nemenem.” Kot mwirin a pwon ngeni Israel pwe meinisin ekkewe feioch a fen kawor won mokuren Abraham epwe pwan an.⁸

Tipengawan, mwirimwirin Israel kewe ra atai ar pwon mi pin ngeni Kot. Ra mwonei ngeni fau ekkewe soufous me rese chengen ne mut ngeni Kot epwe nemenem non manauer. Mwirin, Kot a otoropasar ngeni ekkewe ruanu kinikinin fonufan.⁹ Ren an chen, A pwon An epwe iofengeniir, usun met Isaiah a makkei: “Ua poutuono non ekis chok fansoun, nge ren anononun ai tong upwe angisefanuk.”¹⁰

Ren ach ekieki wewen Israel non ach ekiek, sia kuna pwe ewe ionfengenin Israel a pwan kapacheta och wewen. Ewe Samon a ionfengeni ekkewe ra chengen ne mut ngeni Kot epwe nemenem non manauer. Ewe Samon a ionfengeni ekkewe ir mi finata ne mut ngeni Kot epwe emweniir non manauer.

Non ngerou ier, soufos ra fen osini usun ei ioifengen,¹¹ me a fis iei! Ew auchean amonetan ewe Oruwen Wareto an ewe Samon, ina ewe angang a kon auchea non ewe fonufan!

Ei ionfengen ina wisen emon me emon ren awatenon nuku me pwarachon ngun ren minion aramas. Me ren kich chon Ewe Mwichefenin Jises Kraist ren Aramas mi Pin non Fansoun Soponon, ika “fansoun soponon Israel pwon,”¹² sia fen wiseni ne anisi ewe Samon ren ei angang mi auchea.¹³

Nupwen sia kapas usun ionfengeni Israel won ir me ruepek ewe pwonupwon, ennet sia kapas usun misineri, tempel, me angangen uruon famini. Sia pwan kapas usun auetan nuku me kapasen pwarata non netipen ekkewe sia nom rer, angang rer, me anisir. Inet sia fori och mettoch a anisi emon—ese nifinifin won epekin ewe pwonupwon—an epwe fori me aneasochisi an pwon mi pin ngeni Kot, sia anisi ne ionfengeni Israel.

Ese tam fansoun a no, punuwen emon noun noum at a osukosuk non pekin ngun. Upwe eita ngeni “Jill.” Inamo ekkewe echikipin, iotek, me efeiochun pristut, Semen Jill we epwene mano. Neminewe a fokkun nuokusiti an epwe peut seni seman we me pwan an kapasen pwarata.

Non ew pwinin, punuwei we, Sister Wendy Nelson, a ureniei usun an Jill we osukosuk. Ewe sosoran mwirin Wendy a mefi pwe epwe ureni Jill pwe ua sinei ponuwen an we aunap ren pekin ngun pwe ew foun kapas! Ena foun kapas pwe myopic.

Mwirinon Jill a pwar ngeni Wendy pwe akkom a nichupung ren ponuwan me rei. A apasa, “Ua anean pwe Papachi epwe pwonei ngeniei ew manaman fan iten semei we. Ua soun ekieki pwata ewe foun kapas myopic ina ewe kapas a mefi pwe epwe apasa.”

Mwirin seman Jill we a mano, ewe foun kapas myopic a chok tonong non an ekiek. A suki netipan an epwe weweiti anonnonun pwe myopic wewen “kuna chok mi kaneto.” Me an ekiek a poputa ne siwin. Mwirin Jill a apasa, “Myopic a efisi upwe kouno, ekiek, me chikar. Iei ena kapas a auraeino ren kinamwe. A achema ngeniei ai upwe awatteno ai pekin kuna me kutta mettochun esemuch. A achema ngeniei pwe mi wor ew kokkot seni nang me semei we mi chiwen manau me tongeiei me tumunuei. Myopic a emweniei ngeni Kot.”

Ua men fokkun sikaseni punuwen noun noum ei nengin. Atun ei fansoun ariaffoun netip non manauan, achengicheng Jill a kaeo an ewe etiwa an Kot mochen fan itan seman we, ren an kuna pekin esemuch fan itan pwisin manauan. Ren an finata ne mut ngeni Kot epwe nemenem, a kuna kinamwe.

Ika sipwe mut ngeni, mi chommong napanap ei wewen Israel non Hebrew mi tongeni anisikich. Aneanei ifa usun ach iotek fan iten nouch misineri—me fan iten ach achocho ne ionfengeni Israel—epwe siwin ren ei ekiek non mokurach. Sia soun iotek pwe kich me ekkewe misineri repwe kuna ekkewe ra moneta ne angei ekkewe nongonongen ewe kapas allimen Jises Kraist. Ua, ekiek, ngeni ion sipwe kuna nupwen sia sio ach sipwe kuna ekkewe ra chengen ne mut ngeni Kot epwe nemenem non manauer?

Naman sipwe kuna ekkoch rese nuku non Kot ika Jises Kraist nge iei ra mochen kaeo Usur me Ar kokkoten pwapwa. Naman ekkoch ra fen “uputiw non ewe pwon”¹⁴ nge ra fen tanecheno seni ewe aanen pwon. Naman iei ra moneta ne aier, niwin, me mut ngeni Kot epwe nemenem. Sia tongeni aninis ren ach etiwer non sukkun pouch me netipach. Me ekkoch sipwe kuner naman ra soun mefi pwe mi wor och mettoch ese wor non manuer. Ir pwan ra mochen ewe unusoch me pwapwa a fis ngeni ir ekkewe mi chengen ne mut ngeni Kot epwe nemenem non manauer.

An ewe kapas allim tufich ne ionfengeni toropasen Israel mi fokkun watte. Mi wor nenien emon me emon mi unusen etiwa ewe kapas allimen Jises Kraist. Emon me emon chon minafon mwichefen a winiti emon noun Kot semirit pwon,¹⁵ ika ren uputiw are ren an choni. Emon me emon a winiti chon epwe angei meinisin met Kot a pwonei ngeni ekkewe semiriten Israel mi tupwen!¹⁶

Emon me emon kich a wor ach tufich seni nang pokiten kich noun Kot. Emon me emon mi nonno me non Mesan. Met ei nongonong mi esenipato mi amwarar. Pwi me fefinei, ose mochen ausenioch ngeni met upwe apasa. Kot ese tongei ew sokkun aramas nap seni pwan ew. An nongonong won ei mettoch mi fat. A etiwa meinisin repwe feito ren I, “chon me pwechepwech, chon fotek me chon ngaseno, mwan me fefin.”¹⁷

Ua pwon pwe oupwe pwan ami uta mwen Kot ese anongonong won onuwen inisimi. Tipew me tipengaw ngeni Kot a anongonong won ami tupwen ngeni Kot me An kewe annuk, eseap onuwen inisimi.

Ua netipechou pwe pwich me fefinach kewe mi chonochon won fenufan ra fen churi ametekin koputen ar sokkono me chon oputir. Ikenai ua kokkori nouch chon mwichefen ekis meinisin ne nikitano ekiekin me fofforun koputen aramas. Ua tingor ngeni ami oupwe pwarata sufen fan iten meinisin noun Kot kewe.

Ewe kapaseis kich meinisin, ese nifinifin sokofesenin aramas, mi chok nonno. En mi chengen ne mut ngeni Kot epwe nemenem non manauom? En mi chengen ne mut ngeni Kot epwe emwenuk non manauom? Kopwe mut ngeni An kapas, An annuk, me An pwon mi pin repwe emweni met ka fori iteiten ran? Kopwe mut ngeni Mongungun epwe auchea me mwen ekkoch? En ka chengen ne mut ngeni met chok A mochen kopwe akkomwa nap seni ekkoch mochen? En ka chengen an epwe nemenano om mochen non An?¹⁸

Ekieki ifa usun ena chengen a tongeni efeiochuk. Ika kose pupunu me ka kutta emon punuom fochofoch, om mochen pwe kopwe “chon Israel” epwe anisuk ne finata ion kopwe date me ifa usun.

Ika en mi pupunu ngeni emon a atai an pwon mi pin, om chengen ne mut ngeni Kot epwe nemenem non manauom epwe mut ngeni om pwon mi pin ren Kot epwe chok unusoch. Ewe Chon Amanau epwe echikara netipemi mi netipingau. Nang epwe suk nupwen ka kutta om kopwe sinei ifa usun kopwe sopoopono. Ese auchea kopwe feinfetan ika aurek.

Ika mi wor om ennetin kapaseis usun ewe kapas allim ika ewe Mwichefen, nupwen ka finata ne mut ngeni Kot epwe nemenem, kopwe emwen ne kuna me weweiti ekkewe nongonong mi ennet minne repwe emweni manauom me anisuk ne nom pochokun won ewe aanen pwon.

Nupwen ka weri sossto—ika mwo ewe sossot a fis nupwen ka pekus ika mefi anamon ika wewengaw—ekieki ewe pwaracho ka tongeni angei nupwen ka finata ne mut ngeni Kot epwe nemenem non manauom me nupwen ka sio ngeni I epwe apochokunok.

Nupwen om watten mochen pwe kopwe mut ngeni Kot epwe nemenem, kopwe chon Israel, chommong pekin finata repwe mecheres. Chommong osukosuk rese chiwen osukosuk! Ka sineochu ifa usun kopwe enimenima inisum. Ka sinei met kopwe katon me annea, ian kopwe nom ia, me ion kopwe chiechi ngeni. Ka sinei met ka mochen awesi. Ka sinei ewe sokkun aramas ka wesen mochen winiti.

Iei, pwi me fefinei achengicheng, mi namwot epwe wor om nuku me pwaracho ne mut ngeni Kot epwe nemenem. Epwe wor tiniken, wenecharen angangen ngun ne aier me poutano ewe inisin aramas seni ewe Achasefanin Jises Kraist.¹⁹ Epwe wor tettenoch, achocho iteiten ran ne forata orenien kaeo ewe kapas allim, ne kaeo usun Samach won Nang me Jises Kraist, me ne kutta me ponuweni pwarata.

Non ekkei fansoun efeiengaw minne ewe Aposel Paul a osini usun,²⁰ Setan ese chiwen sotuni ne opano an fiu ngeni an Kot kokkot. Chommong ekiekingaw ra itefouno. Ina minne, ewe chok aanen ach sipwe manau non pekin ngun ina sipwe finata Kot epwe nemenem non manauach, me kaeo ne ausening Mongungun, me aea ach pungun finata ne anisi ionfengenin Israel.

Iei, ifa usun ewe Samon a mefi usun aramas repwe mut ngeni Kot epwe nemenem? Nifai a ammwochu: “[Ewe Samon] tongei ir ekkewe ir repwe etiwa i pwe ar Kot. Nengeni, a tongei semach kewe, me a fori ew pwon mi pin ngenir ir, ewer pwan Abraham, Isaac, me Jacob; me a chechemeni ekkewe pwon mi pin minne a [fen] fori.”²¹

Me met ewe Samon a chengen ne fori fan iten Israel? Ewe Samon a fen pwon pwe I epwe “ani [ach] fiu, me an [nouch] semirit fiu, me an noun nouch kewe [fiu] … ngeni ewe aunungating me aruwanun tettenin aramas”!²²

Nupwen oupwe kaeo noumi kewe pukefel non ekkei wonu maram repwe feito, ua peseikemi ne makketiw meinisin met ewe Samon a fen pwonei pwe epwe fori fan itan Israel. Ai nuku oupwe mairu! Ekipwichi ekkei pwon. Kapas usunr ngeni ami famini me chiechiemi. Iwe manau me ewitiwiti ekkei pwon ar repwe pwonuta non pwisin manauemi.

Pwi me fefinei achengicheng, nupwen oupwe mut ngeni Kot epwe nemenem non manauemi, oupwe pwisin mefi pwe ach Kot i “emon Koten manaman.”²³ Kich noun aramas pwon, me sipwe kokko ren Itan. Usun ei ua pwarata non ewe it mi pin iten Jises Kraist, amen.