Talafaasolopito o le Ekalesia
28 O A Tatou Taumafaiga Tuufaatasi

Mataupu 28

O A Tatou Taumafaiga Tuufaatasi

Ata
o pagota o loo savavali solo ma le pa e maamaai pei o le tafi le uaea pito i luga

I le tautotogo o le 1942, sa tuuina atu ai e pisinisi i le salafa o le Iunaite Setete la latou lagolago mo taumafaiga o le taua. I Cincinnati, na sapalai atu ai e falegaosimea vaega o masini ma afi. O isi kamupani i le aai na gaosia ie pupuni faapogisa lanu uliuli, faamalu lele, ma vaega o fesootaiga o leitio. I faleoloa, e pei o lea na faagaoioia e le aiga o Bang, sa faasoasoa ma le faaeteete aitema a o agai atu le tele o oloa i le fafagaina ma le faaoofuina o fitafita.1

E faatasi i le aso ona le maua ni mea e faaaoga i aso uma, ma sa taumanatunatu ai Paulo ma Connie Bang pe mata o le a mafai e le Paranesi a Cincinnati ona fausia lo latou falelotu fou. Ina ua uma ona faatau atu lo latou falesa tuai, sa siitia atu e le Au Paia a latou sauniga i se potu mautotogi i se fale a le YMCA lata ane. O Paulo ma Connie o ni sui auai o le komiti o fale a le paranesi, ma sa la saili tupe mo le falelotu fou talu mai le taimi ao lei tupu le taua. Ae i le taimi nei, faatasi ai ma le tele naua o mea ua sioti, sa itiiti se faamoemoe o le komiti e faaauau a latou fuafuaga seia uma le taua.2

Pe tusa o le taimi lea, sa mafaufau ai Paulo ma lona uso faaletulafono o Milton Taylor e uiga i le aveina atu o o laua aiga i le malumalu. Soo se mea lava latou te liliu i ai, ua faavalavala e le taua aiga. O tane ma ava, atalii ma afafine na tuua aiga e auauna atu i lo latou atunuu. I le avea ai ma alii talavou i le luasefulu ma ona tupu tausaga, sa lesitala ai Paulo ma Milton mo tiute faamiliteli ma e mafai ona valaauina i le taua i soo se taimi. I le totonugalemu o sea lē mautonu tele, o faaipoipoga e faavavau ma feagaiga o le malumalu na tuuina atu ai le faamautinoaga ia i latou ma o latou aiga talavou.3

I se tasi aso, na iloa ai e Paulo ma Milton o le la uo o Vaughn Ball, o se tasi o le Paranesi a Cincinnati mai le Aai o Sate Leki, sa manao e malaga i Iuta. Afai e malaga atu le au Bang ma le au Taylor i Iuta faatasi ma ia, e mafai ona la faataunuuina le la miti o le maua o faaeega paia ma faamauina i le malumalu. Ma i le malaga faatasi, e mafai ai ona latou sefe i tupe faaalu.4

Na pau le faafitauli o le mauaina o se auala e oo atu ai iina. Ua toeitiiti atoa le lua tausaga talu ona faaipoipo Paulo ma Connie Bang, ma ua i ai nei se la tama teine e sefulu masina le matua, o Sandra. O Milton ma lona faletua, o Eseta sa i ai foi se la tama teine laitiiti, o Janet e lua tausaga le matua.5

Sa iloa e Milton se tamaloa sa i ai sana taavale faatuatuaina e lava nofoa, ma sa malie o ia e faaaoga i se totogi. E ui o augatupulaga na muamua atu o le Au Paia na o atu i sisifo e ala i taavale solofanua, taavale toso, po o nofoaafi, a e o le a aveina e le au Bang, le au Taylor, ma Vaughn Ball se taavale o le ituaiga o le 1939 DeSoto Touring Sedan e malaga ai.6

Na o ese atu le vaega mo Iuta i le vaiaso mulimuli o Aperila. Talu ai o le penisini sa lei tau le lava faapei o pa‘u i le ogatotonu o le taufaasoasoa i le taua, o lea sa mafai ai e le vaega ona faia la latou malaga sopo i le atunuu i le faautautaga lelei, pe afai e alu lemu e aloese mai le vave uma ai o palai o pa‘u.7

A o agai atu le Desoto i le salafa o le Iunaite Setete, sa manuia le au malaga mai le tele o auala mautu ma nofoaga o auaunaga ia na faaopoopo mai i aluga o le tolusefulu tausaga talu ai. I le po e latou te nonofo ai i faletalimalo i tafaala, lea sa mafai lava ona latou faatauanauina le au faipisinisi e faataga i latou e nonofo mo ni nai tala e itiiti ifo nai lo le tau na faasalalauina.

E ese mai ia Vaughn, e leai se tasi i le taavale na mamao ese atu i sisifo muamua, o lea sa fou ai le suiga o le laufanua ia i latou. Sa latou fiafia i le vaaiga seia oo ina iloa atu Mauga Papa ma o auala ua amata ona aegā ma matautia. Sa fiafia Vaughn e tietie i aega ma o‘o atu i mauga matagofie, ae na foliga mai na fefefe isi tagata uma nei meaane ua solo ia auala gaoa tifato ma tanu ola ai i latou. Sa latou lagona le toafimalie ina ua latou taunuu saogalemu i le Vanu o Sate Leki.8

I le aai, sa nonofo Paulo, Connie, ma Sandra ma le tina o Marion Hanks, o se faifeautalai sa auauna atu i Cincinnati, a e nonofo le au Taylor ma le tina o Vaughn Ball. Sa asiasi atu aiga uma e toalua i le Lotoa o le Malumalu i nai taimi, ma pue ata o fale ma maa faamanatu i luga o ia nofoaga. Sa latou asiasi atu foi ia Charles ma Christine Anderson, o e na taitaia le Paranesi a Cincinnati mo le silia ma le luasefulu tausaga. Sa tele le alofa o le au Anderson mo ulugalii e toalua ma ua leva ona faamoemoe e vaai ua faamauina i laua.9

I le aso 1 o Me, na ulu atu ai Paulo ma Connie i le Malumalu o Sate Leki faatasi ma Milton ma Esther. Ina ua uma ona maua o latou faaeega paia, sa aumaia ulugalii i se tasi o potu o faamauga e lima o le malumalu. O le Aposetolo o Charles A. Callis, o le sa avea muamua ma peresitene o le misiona i Cincinnati, sa ia ave ulugalii taitasi ma faamauina faatasi i laua a o auauna atu Peresitene Anderson o se molimau. Ona aumai ai lea o Janet ma Sandra i totonu o le potu, na laei papae, ma faamau i o la matua.10

I ni nai aso talu ona uma a latou faamauga, sa toe foi atu ai Paulo, Connie, Milton, ma Eseta mo se isi sauniga o faaeega paia. A o savavali atu Paulo ma Connie i le tele o potu ma alasavali o le malumalu, sa la maofa i lona telē ma le matagofie. Sa faagaeetia i laua i le i ai iina, malupuipuia i le malamalama sa faamauina faatasi i laua ma lo la afafine mo le olaga nei ma le faavavau atoa.11

I lena tautotogo, e latalata i The Hague, Netherlands, na faatofa atu ai Hana Vlam e tolusefulu-fitu-tausaga le matua i lona toalua, o Pieter, a o ia agai atu i le nofoaga o nofoaafi. Mo le lua tausaga ua mavae, sa nofoia ai e Nazi Siamani ia Netherlands. I le avea ai muamua ma se taitai i le fuavaa a Take, sa manaomia ai Pieter ia lesitala soo ma taitai o le au Nazi e le aunoa, ma o lea ua agai atu nei o ia i se aai e lata ane i le tuaoi o Siamani e faia ai.

“Ou te toe vaai ia te oe taeao,” na ia fai atu ai ia Hana a o lei alu ese.12

Sa faateia Hana ma Pieter i le osofaiga faamalosi a Siamani. Sa folafola atu e Hitila e le osofaia lava le Netherlands, o se atunuu e le faaituau e tutoatasi, ma sa talitonu i ai Pieter. Ona oo lea i se tasi po ia Me 1940, o leo o vaalele tau o loo faatoulu ifo pomu na luluina ai i latou mai moega. Sa vave ona fai toniga a Pieter ma tuua loa ina ia fesoasoani e puipui lona atunuu. Ae ina ua mavae aso e lima o le taua, sa siilima ai le autau a Take i le malosi tele o le autau a Siamani.13

O le ola ai i lalo o le pulega a le Nazi sa faigata. Na muta le tiute faamiliteli o Pieter, ae sa ia faamautuina se galuega o se tagata e le o toe i ai i le militeli e tausi ai lona aiga. Na faataga e tagata na nofoia Siamani ia le Au Paia Take e faaauau pea ona faia sauniga pe afai e mafai ona faalogologo atu taitai Nazi i mea o loo latou tautatala ai. Ma sa tatau i le Au Paia ona potopoto i le ao e usitaia ai tapulaa o le vavao. I le avea ai ma fesoasoani lua i le au peresitene o le Misiona a Netherlands, sa faaaluina ai e Pieter le toetoe a o faaiuga o vaiaso uma e malaga faatasi ai ma Peresitene Iakopo Schipaanboord ma le fesoasoani muamua o Arie Jongkees, o uso Take uma, e asiasi i paranesi i le atunuu atoa.14

Na oo mai se faalavelave i le au Vlam ia Mati 1941, ina ua taia e se nofoaafi ma fasiotia ai lo la afafine e fa tausaga le matua, o Vera. Sa na o le pau le faamafanafanaga ia Hana ma Pieter o le iloaina lea ua avea o ia ma a laua mo le faavavau. A o pepe Vera, sa faamauina faatasi le au Vlam ma le la fanau e toatolu i le Malumalu o Sate Leki i lo latou agai atu i le fale mai se tofiga faamiliteli i Initonesia. O lena malamalamaaga na fesoasoani ia i laua e pipiimau ai i a la feagaiga ma maua ai le filemu i aso pogisa na sosoo ai.15

I le taeao na tuua ai e Pieter e lesitala ma taitai o le Nazi, sa lei faamoemoe Hana o le a umi atu lo latou valavala ai nai lo ana malaga i le faaiuga o le vaiaso faatasi ma le au peresitene o le misiona. Ae mulimuli ane i lena aso, na sau ai i le atoa le la tama teine matua, o Grace e sefulutasi tausaga le matua, i le faitotoa.

“E moni ea?” sa ia tagi ai. Sa salalau solo tala faapea na pue faapagotaina e le au Nazi le aufaigaluega muamua a le militeli o e sa oo atu mo le lesitalaga, sa ia ta’u atu ai i lona tina. Sa tatai atu i latou i totonu o ni taavale povi ma ave atu i se nofoaga o le falepuipui.

Sa faateia tele Hana na le mafai ai ona fai atu se tala. O le aso na sosoo ai, sa ia maua ai se faasilasilaga i le meli e faamautu ai ua ave Pieter i Siamani. Ua avea nei o ia ma pagota o le taua.16

A o faasolosolo lemu vaiaso, sa tatalo Hana mo le filemu ma le malosi. Sa ia ole atu i le Alii e leoleo lana tane ma tausia o ia ia saogalemu. I le mavae ai o le toeitiiti ono vaiaso o faatalitali mo se talafou, sa iu ai ina ia mauaina se tamai kata mai ia Pieter, sa faaofiofi lana tusilima ina ia faatumu ai vaega uma o le avanoa.

“O loo ou manuia i le tino ma le agaga,” na tusia ai e Pieter. Sa taofia o ia e le au Nazi i se falepuipui e ta‘u o Langwasser i le aai a Siamani o Nuremberg, ma e ui ina sa le lelei le taulimaina o ia ma ona uso a pagota e leoleo, ae sa ia onosaia pea. “O o‘u mafaufauga o loo i ai pea lava pea ia te outou uma,” na ia tusi atu ai. “I lo‘u mafaufau, ou te opomauina oe, la’u Hani pele.”

Sa ia fai atu ia Hana e ave atu ni meaai ma ana tusitusiga paia. Sa le mafai ona mautinoa e Hana pe pasia e le auiloilo Nazi ia tusi, ae sa ia naunau o le a ia taumafai lava.

“Ia lototele,” na uunaia ai o ia e Pieter. “O le a toe aumaia faatasi i tatou e le Atua.”17

I le aso 5 o Iulai, 1942, sa auai ai Tavita Ikegami i se konafesi a le Misiona Sapani i le Tapeneko o le Siteki a Hawaii Oahu. Mo Tavita, o lenei sauniga i le Aso Sa sa ese mai le tele o taimi. E le gata o le a faauuina o ia i le tofi o le aoao i le Perisitua Arona, ae sa talosagaina o ia e lauga i le taimi o le sauniga muamua o le konafesi. Faatasi ai ma le silia ma le luaselau tagata e auai, o le a sili ona telē atu nai lo faatasiga a le Aoga Sa sa masani ai o ia.18

Na faavae e Tavita lana tautalaga i le Mataupu Faavae ma Feagaiga 38:30: “Afai ua outou saunia o le a outou le matatau lava.” Toeitiiti atoa le fitu masina talu ona uma le osofaiga i le Uafu o Pearl, ae o loo i ai pea le fefe ma le le mautonu i luga o Hawaii. Sa pulea e le militeli a le Iunaite Setete faletalimalo ma sa toso ai pa uaea i luga o matafaga. Sa faamalosia e fitafita le vavao faamamaluina, ma o tagata e solia sa lamatia i le tafanaina. Sa toe amata vasega a le aoga a Tavita, ae sa moomia ona ia tauaveina se ufi kesi ma sa masani ona faatino e tamaiti aoga ia faataitaiga e saunia ai mo osofaiga o le ea ma le kesi.19

I le avea ai ma tagata Sapani Amerika, sa onosaia ai e Tavita ma lona aiga masalosaloga faatupulaia a o latou tuaoi e le o ni Sapani. O nisi tagata, e aofia ai le toatele o taitai o le malo ma le militeli, sa manatu e aunoa ma se faamaoniga faapea o le a taumafai tagata Sapani Amerika e faavaivaia taumafaiga o le taua a Amerika mai lo latou tuuto faamaoni atu lea i lo latou tupuaga o Iapani. Na amata i le amataga o lena tausaga, na amata ai foi e le malo o le I.S. ona toe siitia atu le silia ma le selau afe o alii, tamaitai, ma tamaiti Sapani Amerika mai o latou fale i Kalefonia ma isi setete o le Talafatai i Sisifo i tolauapiga faafalepuipui i setete maototonu e pei o Iuta.20

Sa lei faatinoina e le malo ni na faasalalau solo faafalepuipui i Hawaii, lea e toeitiiti atoa le 40 pasene o le faitau aofai o tagata o o latou tupuaga e Sapani. Ae na taofia e taitai pe tusa ma le afe limaselau tagata o le lotoifale Sapani o e sa i ai i ni tofiga maualuluga po o e na masalomia. Ma o le toatele o nei tagata taofia na avea ma ni pagota i tolauapiga i atumotu.21

Ina ia faaalia lona faamaoni atu i le Iunaite Setete ma fesoasoani i le taumafaiga o le taua, sa auai atu ai Tavita i se vaega volenitia e taua o le Kiawe Corps e fausia ni alasopo ma tatuu laau talatala o kiawe mo tolauapiga a le militeli. O le taimi lea, na amata galulue ai lona tama ma ona fesoasoani i le Aoga Sa Sapani e faatulaga se suegatupe mo fitafita a le I.S. o o latou tulaga sa aofia ai tagata o la latou lava Aoga Sa.22

Ina ua tulai Tavita i le pulelaa i le taimi o le konafesi a le misiona, sa ia faasoa mai ni upu mai le lauga o le konafesi aoao aupito lata mai a Elder John A. Widtsoe. “O le fefe o se auupega sili lea a Satani e faia ai ia le fiafia tagata,” na aoao atu ai le aposetolo i le Au Paia, ma faamanatu atu ia i latou o i latou o e sa ola amiotonu ma lotogatasi sa le manaomia ona fefefe. “O loo i ai le saogalemu,” na ia tautino atu ai, “po o fea lava e nonofo ai ma le agavaa tagata o le Alii e maua ai le faalagiga paia o tagatanuu o Siona a lo tatou Alii.”23

I vaiaso na sosoo ai ma le konafesi a le misiona, sa faaauau ai e le tama o Tavita ona saili tupe mo fitafita Amerika. Na ta‘ua “Ua Tatou Autasi mo le Manumalo,” na saunia e le suegatupe ni auala mo se komiti o alii Sapani e limasefulu i le motu e lolomi le faitau afe o tusi valaaulia ma teutusi o foai e tufatufa atu i a latou uo ma tuaoi. I totonu o ni nai masina, sa latou aoina mai le $11,000. Sa faaalia e taitai o le militeli i atumotu le agaga faafetai mo le tupe, lea o le a faaaogaina e faatau ai tusi, fonokalafi mo kosi o le gagana, ma ni masini vili ata tifaga se lua ma ni lau e fesoasoani e siitia le naunautai o fitafita.24

Sa fiafia le Au Paia o le Misiona Sapani e fesoasoani. Sa faaalia manino lo latou lotonuu ma le faamaoni i valaaulia na tufatufaina atu i le nuu atoa. “Matou te mananao e faia mea uma matou te mafaia e fesoasoani ai e faamautu le saolotoga ma le saoloto tatou te faamemelo i ai,” sa latou faitau ai. “O le a faafiafiaina fitafita e ala i a tatou taumafaiga tuufaatasi.”25

I ni nai masina mulimuli ane, i se falepuipui i Hamburg, Siamani, sa faatalitali ai Karl-Heinz Schnibbe e tu i le faamasinoga mo le taufaalata. E lei leva ona pue faapagotaina o ia, ae ia vaai i lana uo o Helmuth Hübener i se potu umi, paepae o loo taofia ai ma le tele o isi pagota. Sa poloaiina uma pagota e tuu o latou isu i le puipui, ae a o savali atu Karl-Heinz e pasi atu ai, sa faapio e lana uo lona ulu, ata, ma faaivi laitiiti lona mata. Sa foliga mai, e lei tuuaia o ia e Helmuth. O foliga uno’oa, ma fulafula o le alii talavou na atagia mai ai na matuai sasaina lava o ia mo lona tumau.26

E lei leva lena, ae vaai foi Karl-Heinz i lana uo o Rudi Wobbe i le potu o loo taofia ai. Sa pue faapagotaina uma tama e toatolu mai le paranesi.

I nai masina muamua o lona faafalepuipuiina, sa onosaia ai e Karl-Heinz le suesueina, faamata‘u, ma le sasaina i lima o le Gestapo. Sa lei mafaufauina e le au faamasino faapea o Helmuth Hübener, o se tamaitiiti e sefulufitu tausaga le matua, sa i tua o se taupulepulega faapena, ma sa latou poloaiina ia iloa igoa o tagata matutua o loo aofia ai. E moni, sa leai ni igoa o tagata matutua e tuuina atu.27

I le taeao o le aso 11 o Aokuso, 1942, na sui ai Karl-Heinz mai lana toniga o le falepuipui i se suti ma se fusiua na aumai i le fale. Sa tautau le suti i luga o lona tino lamoī e pei o loo tautau i se mea tauau lavalava i le pusatu. Ona aumai lea o ia i le Fale Faamasino o Tagata, e lauiloa i Nazi Siamani mo le faamasinoina o pagota faaupufai ma tuuina atu i ai ni faasalaga matautia. O lena aso, na tutu ai Karl-Heinz, Helmuth, ma Rudi i le faamasinoga mo taupulepulega, le lotonuu, ma le fesoasoani ma le lagolagoina o le fili.28

I totonu o le potu faamasino, sa saofafai ai e ua molia i luga o se tulaga maupuepue e faasaga i faamasino, o e sa ofu i ni ofu talaloa mumu e teuteuina i se aeto auro. Mo le tele o itula, sa faalogologo ai Karl-Heinz a o auiliili ai e molimau ma ni sui o le Gestapo ni faamaoniga o taupulepulega a tamaiti. O pepa a Helmuth, e tumu i le gagana na faaleagaina ai Hitila ma faailoa atu ai mea taufaasese a le au Nazi, sa faitauina leotele. Sa feitai faamasino.29

I le taimi muamua, sa taulai atu le faamasinoga ia Karl-Heinz, Rudi, ma se isi alii talavou o se tasi sa faigaluega faatasi ma Helmuth. Ona latou liliu atu lea o lo latou gauai ia Helmuth lava ia, o le sa lei foliga fefe i faamasino.

“Aisea na e faia ai le mea na e faia?” na fesili atu ai se tasi faamasino.

“Ona sa ou manao i tagata ia iloa le mea moni,” o le tali lea a Helmuth. Sa ia ta‘u atu i faamasino na te lei manatu e mafai e Siamani ona manumalo i le taua. Sa faatumulia le potu faamasino i le ita ma le le talitonu.30

Ina ua oo i le taimi e faasilasila atu ai le faaiuga, sa gatete Karl-Heinz a o toe foi atu faamasino i le laulau faamasino. Sa ta‘ua e le faamasino sili i latou o “tagata faalata” ma le “eleelea.” Sa ia fai mai, “O manu faalafua e pei o outou e tatau ona faatamaia.”

Ona ia faliu atu lea ia Helmuth ma faasalaina o ia i le oti ona o le maualuga o le le lotonuu ma le fesoasoani ma le lagolagoina o le fili. Sa matuai filemu le potu. “Oi leai!” sa musumusu atu ai se tagata asiasi i le potu faamasino. “O le sala oti mo le tamaitiiti?”31

Na faasalaina e le faamasinoga ia Karl-Heinz i le lima tausaga i le falepuipui ma Rudi i le sefulu. Sa matuai faateia tama. Sa fesili atu faamasino pe i ai sa latou tala e fai atu.

“Ua outou fasiotia a‘u e aunoa ma se mafuaaga,” o le tala lea a Helmuth. “Ou te lei faia lava se solitulafono. Pau le mea na ou faia o le ta’u atu o le mea moni. O lo‘u taimi lenei, ae o le a oo mai lo tou taimi.”

I lena aoauli, sa vaai ai Karl-Heinz ia Helmuth mo le toe taimi e tasi. I le taimi muamua, sa la faatalofa, ae na opo mai e Karl-Heinz lana uo i se opoalofa. Sa faatumulia mata lapopoa o Helmuth i loimata.

“Tofa!” o lana tala lea.32

O le aso na sosoo ma le aso na fasiotia ai e le au Nazis ia Helmuth Hübener, na iloa ai e Marie Sommerfeld mai se nusipepa. O ia o se tasi o le paranesi a Helmuth. O ia ma lana tama tama o Afa o ni uo, ma sa mafaufau Helmuth ia te ia o sona tina lona lua. Sa ia le talitonu ua maliu o ia.33

Sa ia manatua pea o ia o se tamaitiiti, atamai ma tumu i gafatia. “O le a e faalogo lava i se mea maoae e uiga ia te au,” sa ia fai atu ai ia te ia i se tasi taimi. Sa lei manatu Marie sa mimita Helmuth ina ua ia fai maia lena tala. Sa na ona manao lava o ia e faaaoga lona atamai e faia ai se mea anoa i le lalolagi.34

I le valu masina na muamua atu, na faalogo ai Marie e uiga i le pue faapagotaina o Helmuth a o le’i faia le faasilasilaga a le peresitene o le paranesi mai luga o le pulelaa. O se Aso Faraile, o le aso sa masani ona ia fesoasoani ai ia Wilhelmina Sudrow, le tinamatua o Helmuth, e faamama le falelotu. Ina ua ulu atu o ia i le falesa, sa vaai Marie ia Wilhelmina o tootuli i luma o le pulelaa, sa faaloaloa atu ona lima, ma aioi atu i le Atua.

“O le a le mea ua tupu?” Na fesili atu ai Marie.

“Ua tupu se mea matautia,” na tali atu ai Wilhelmina. Ona ia faamatalaina lea o le ala na o mai ai taitai o le Gestapo i lona faitotoa ma Helmuth, sue le fale mautotogi, ma ave ese nisi o ana pepa, lana leitio, ma le masini lomitusi a le paranesi.35

I le faateia ai i le mea na ta‘u atu e Wilhelmina ia te ia, sa vave lava ona mafaufau Marie i lana tama tama o Afa o le sa le’i leva ona tusia e auauna atu i le galuega a le au Nazi i Berlin. Mata na aafia o ia i le fuafuaga a Helmuth a o lei aluese atu o ia?

O le taimi lava na ia mafaia ai, sa malaga atu ai Marie i Berlin e fesili ia Afa pe na ia auai i soo se auala. Sa fiafia o ia ina ua ia iloa, e ui ina sa ia faalogo i nisi taimi i le leitio a Helmuth, ae sa ia leiloa o Helmuth ma isi tama sa latou tufatufaina ni anomea e tetee ai i le au Nazi.36

Sa tatalo nisi o tagata o le paranesi mo Helmuth i le gasologa o lona faafalepuipuiina. O isi sa feitai i alii talavou mo le tuuina o i latou ma isi Au Paia Siamani i le ala o faalavelave ma lamatia ai le gafatia e le Ekalesia ona faia sauniga i Hamburg. E oo lava i tagata o le Ekalesia o e sa lei manatu i le au Nazi sa popole ona sa tuu e Helmuth i latou uma i se tulaga lamatia o le falepuipui po o le sili atu ona leaga, ae maise lava ona sa talitonu le Gestapo na maua e Helmuth le fesoasoani mai tagata matutua.37

Sa talitonu le peresitene o le paranesi o Afa Zander e tatau ona ia vave galue e puipui tagata o lana paranesi ma faamaonia o le Au Paia o Aso e Gata Ai e le o taupulepule faasagatau atu i le malo. E lei leva ona pue faapagotaina tamaiti, ae la aveeseina mai ma le sui peresitene o le misiona, o Anthon Huck, le igoa o Helmuth mai faamaumauga a le Ekalesia. Sa feitai le peresitene o le itu ma nisi o tagata o le paranesi i lea faatinoga. Sa matua faanoanoa matua matutua o Helmuth.38

I ni nai aso talu ona mavae le fasiotia o Helmuth, sa maua ai e Marie se tusi na ia tusia ia te ia i ni nai itula a o lei maliu o ia. “E silafia e lo‘u Tama oi le Lagi e leai se mea sese ua ou faia,” na ia fai atu ai ia te ia. “Ou te iloa o loo soifua le Atua, ma o le a avea o Ia ma faamasino tatau o lenei mataupu.”

“Seia oo ina tatou toe faatasi fiafia i lena lalolagi sili atu ona lelei,” na ia tusia ai, “Ou te tumau pea o lau uo ma lou tuagane i le talalelei.”39

Mo ni masina, sa mafaufau Pieter Vlam pe aisea na faataga ai e le Alii le au Nazi e loka o ia i se tolauapiga falepuipui, e mamao mai lona aiga.

O faleie malepe i totonu o le tolauapiga sa tumu i ’utu, utufiti, ma manuninii o moega, ma o nisi taimi e o atu ai i fafo Pieter ma isi pagota e malolo i luga o se fasi mutia. I se tasi aso, a o latou taooto ma tilotilo ae i luga i le lagi, sa fesili atu se tamaloa ia Pieter pe mafai ona la talanoa e uiga i mataupu faaleagaga. Sa ia iloa o Pieter o se Au Paia o Aso e Gata Ai, ma sa i ai ana fesili e uiga i le lalolagi i talaatu o lenei lalolagi. Sa amata ona aoaoina o ia e Pieter i le talalelei.40

E lei umi, ae sailia e isi pagota le taitaiga faaleagaga a Pieter. Sa le faatagaina e leoleo ia alii e talanoa i ni vaega toatele, o lea sa ave ai e Pieter ni alii se toalua i le taimi e tasi, taitoatasi i le itu, ma o i savalivaliga faataamilo i le tolauapiga. E lei talitonu tagata uma i mea na aoao atu e Pieter, ae sa latou talisapaia lona faatuatua ma maua se malamalamaaga sili atu e uiga i le Ekalesia.41

Ina ua mavae le faaaluina o ni nai masina i le tolauapiga i Siamani, sa siitia atu Pieter ma ona uso a taitai Take i Stalag 371, o se tolauapiga falepuipui i Iurukureini ua nofoia e le au Nazi. O lo latou nofoaga fou sa i totonu o se fale maa malulu, ae sa sili atu ona lelei le tulaga iina nai lo le mea na onosaia e alii i Siamani. O le lagonaina o le malosi i le tino ma le agaga, sa faaauau ai pea ona savali Pieter ma soo se tasi e fiafia i mea sa ia aoaoina atu. I le tele ai o lana savali sa ia tusi atu ai i le aiga i lona toalua, o Hana, ma fai atu i ai pe mafai ona ia lafo atua ia te ia ni seevae laupapa fou e sui ai lona seevae ua masaesae.42

E lei umi, ae uunaia e se vaega pe tusa ma le toasefulu ia Pieter e faatulaga se Aoga Sa, ma sa ia ioe i ai. Talu ai ona sa faasaina e le au Nazi ia fonotaga, sa latou faapotopoto faalilolilo ai i se fale avanoa i se tulimanu mamao o le tolauapiga. Sa latou ufi le faamalama i se palanikeke tuai ma maua se pusa e faaaoga o se pulelaa. O se vavega lava, le pasia e le au iloilo o tapu e aunoa ma le lafoaia o a latou tusitusiga paia ma le tusipese na lafo atu e Hana ia Pieter ina ua uma ona pue faapagotaina o ia. Na aoao atu Pieter mai le Tusi Paia ma le Tusi a Mamona, ae sa lei taumafai le vaega e usu le pese. Nai lo lena, sa faitau leotele e Pieter ia viiga. I le faaiuga o a latou fonotaga, ona o atu lea o tamaloloa i fafo i le faitotoa e taitoatasi ina ia aloese ai mai le iloagofie.43

O se faifeau Porotesano i Stalag 371 na iu lava ina matauina ni alii o savavali ma talanoa ma Pieter. Sa ia aveese mai i latou taitoatasi, faaali atu ia i latou se tamaitusi e tumu i mea taufaasese e uiga i le Ekalesia, ma tau atu ia i latou ua taufaasese ia Pieter. Peitai, nai lo le faatauanauina o i latou e lafoai Pieter ma ana aoaoga, o taumafaiga a le faifeau na atili ai ona fia iloa e alii le talalelei toefuataiina.

Ina ua uma ona faitauina le tamaitusi, sa tonu i se alii e igoa ia Mr. Callenbach e auai i le vaega. “Ou te le manao e liliu,” na ia fai atu ai ia Pieter. “Sa na ona ou sau e faalogo i le tala mai ia te oe.”44

I se tasi Aso Sa, sa tonu ai ia Pieter e aoao atu le mataupu faavae o le anapogi. Sa ia ta‘u atu i alii e tatau ona latou avatua le tamai ipu fatupi sa latou mauaina i lena aso i se isi tagata.

“Afai e le mafai ona e moe i le po,” na fai atu ai Pieter, “e tatau ona e tatalo i le Atua ma ole atu ia te Ia pe moni mea na e faalogo i ai mai ia te au.”45

O le Aso Sa na sosoo ai, sa tutulai ai tamaloloa e faasoa mai a latou molimau. O Callenbach o le tagata mulimuli lea na molimau. Faatasi ai ma loimata, sa ia toe faamatalaina ai lona aafiaga i le anapogi.

“O lena po sa ou matuai fiaai ai lava,” o lana tala lea. “Ona ou manatua lea o le tala a Vlam e uiga i le tatalo.” Sa ia faamatalaina le ala na ia tatalo ai ma le naunautai ia iloa pe sa‘o mea na aoao atu e Pieter. “Sa oo mai ia te au se lagona le mafaamatalaina o le filemu,” na ia fai mai ai, “ma sa ou iloa sa ou faalogo i le upumoni.”46

  1. Kennedy, Freedom from Fear, 615–27; Miller, World War II Cincinnati, 51–56; Knepper, Ohio and Its People, 384–87.

  2. “Mormons to Build Church on Old Herrmann Homesite,” Cincinnati Enquirer, Jan. 8, 1941, 10; Fish, Kramer, and Wallis, History of the Mormon Church in Cincinnati, 66–68; Cincinnati Branch, Building Committee Minutes, Mar. 14, 1941–Apr. 23, 1941.

  3. Bang, “Personal History of Paul and Connie Bang—1942 Forward,” 4; May, “Rosie the Riveter Gets Married,” 128–30; Paul Bang, Draft Registration Card, Oct. 16, 1940, Paul and Cornelia T. Bang Papers, CHL; Milton Yarish Taylor, Draft Registration Card, Oct. 16, 1940, U.S. World War II Draft Cards Young Men, available at ancestry.com.

  4. Bang, “Personal History of Paul and Connie Bang—1942 Forward,” 4–5; Vaughn William Ball, in Cincinnati Branch, Record of Members and Children, no. 403; Ball, Reminiscences, part 3, section 4, [00:07:38]–[00:08:38].

  5. Bang, “Personal History of Paul and Connie Bang—1942 Forward,” 4; Janet Taylor, in Cincinnati Branch, Record of Members and Children, no. 375; Ball, Reminiscences, part 3, section 4, [00:08:38].

  6. Ball, Reminiscences, part 3, section 4, [00:08:38]–[00:09:08]; “The Fixers,” Photograph, Paul and Cornelia T. Bang Papers, CHL.

  7. Bang, “Personal History of Paul and Connie Bang—1942 Forward,” 4; Miller, World War II Cincinnati, 55–56.

  8. Hugill, “Good Roads,” 331–39, 342–43; Jakle and Sculle, Gas Station, 49, 58, 131–33; Ball, Reminiscences, part 3, section 4, [00:09:57]–[00:10:49].

  9. Bang, “Personal History of Paul and Connie Bang—1942 Forward,” 4–5; Taylor, Autobiography, 2–3; Utah Trip, Photographs; Charles V. Anderson to Milton Taylor, Jan. 13, 1936; Charles V. Anderson to Milton Taylor, Feb. 24, 1937; Charles V. Anderson to George and Adeline Taylor, July 30, 1940, Paul and Cornelia T. Bang Papers, CHL. Autu: Laumua o le Ekalesia

  10. Bang, “Personal History of Paul and Connie Bang—1942 Forward,” 4–5; Taylor, Autobiography, 2; Salt Lake Temple, Endowments of the Living, 1893–1956, volumes H, I, May 1, 1942, microfilms 184,075 and 184,082; Sealings of Living Couples, 1893–1956, volume E, May 1, 1942, microfilm 1,239,572; Sealings of Couples and Children, 1942–70, volume 3E/3F, May 1, 1942, microfilm 1,063,709, U.S. and Canada Record Collection, FHL.

  11. Salt Lake Temple, Endowments for the Dead, 1893–1970, volumes 6U, 6Y, May 4, 1942, microfilms 184,248 and 1,239,528, U.S. and Canada Record Collection, FHL; Bang, “Personal History of Paul and Connie Bang—1942 Forward,” 5. O Autu: Malumalu o Sate Leki; Faaeega Paia o le Malumalu; Faamauga

  12. Vlam, Our Lives, 95; Vlam, History of Grace Alida Hermine Vlam, 7; Weinberg, World at Arms, 122–27.

  13. Vlam, Our Lives, 87–89; Weinberg, World at Arms, 122.

  14. Vlam, Our Lives, 87, 91, 95; Netherlands Amsterdam Mission, Manuscript History and Historical Reports, 1939, 1941–42, 1, 9–12. Autu: Netherlands

  15. Vlam, Our Lives, 64, 81, 91–95; Vlam, Interview [May 2020], [01:00:25].

  16. Vlam, History of Grace Alida Hermine Vlam, 8; Vlam, Our Lives, 95.

  17. Vlam, History of Grace Alida Hermine Vlam, 8; Vlam, Our Lives, [94]–95, 158; Vlam, Interview [May 2020], [01:15:10]; Vlam, “Answers to the Questions Posed,” 1–2.

  18. Central Pacific Mission, General Minutes, July 5, 1942, 144.

  19. Ikegami, Memories, 1; Allen, Hawaii’s War Years, 90, 112–13, 360–61; Ikegami, Journal, Jan. 14, 1942; Feb. 19, 1942; May 5 and 6, 1942; June 25, 1942; July 5, 1942.

  20. Okihiro, Cane Fires, 210–11; Jay C. Jensen, “L.D.S. Japanese Aid U.S. Soldiers,” Deseret News, Nov. 28, 1942, Church section, [1]; Kennedy, Freedom from Fear, 748–51; Heimburger, “Remembering Topaz and Wendover,” 148–50.

  21. Knaefler, Our House Divided, 6; Odo, No Sword to Bury, 2–3; Scheiber and Scheiber, “Constitutional Liberty in World War II,” 344, 350; Allen, Hawaii’s War Years, 134–37, 351.

  22. Allen, Hawaii’s War Years, 91; Ikegami, Journal, June 24, 1942; Jay C. Jensen, “L.D.S. Japanese Aid U.S. Soldiers,” Deseret News, Nov. 28, 1942, Church section, [1], 6; “We’re United for Victory,” in Central Pacific Mission, General Minutes, Summer 1942, 149; see also Akinaka, Diary, Dec. 7–8, 1941, and June 16, 1942.

  23. Ikegami, Journal, July 5, 1942; John A. Widtsoe, in One Hundred Twelfth Annual Conference, 33.

  24. “We’re United for Victory,” in Central Pacific Mission, General Minutes, Summer 1942, 149; Jay C. Jensen, “L.D.S. Japanese Aid U.S. Soldiers,” Deseret News, Nov. 28, 1942, Church section, 6, 8.

  25. “We’re United for Victory,” in Central Pacific Mission, General Minutes, Summer 1942, 149.

  26. Schnibbe, The Price, 45, 47–48; Holmes and Keele, When Truth Was Treason, 55–56.

  27. Schnibbe, The Price, 41–47; Holmes and Keele, When Truth Was Treason, 57.

  28. Holmes and Keele, When Truth Was Treason, 61–62, 66–67.

  29. Schnibbe, The Price, 36, 51–52; Document 52, in Holmes and Keele, When Truth Was Treason, 67–68, 221.

  30. Schnibbe, The Price, 52; Holmes and Keele, When Truth Was Treason, 69.

  31. Document 52, in Holmes and Keele, When Truth Was Treason, 69, 219; Schnibbe, The Price, 54.

  32. Holmes and Keele, When Truth Was Treason, 69–71; Schnibbe, The Price, 55. Autu: Helmuth Hübener

  33. Document 72, in Holmes and Keele, When Truth Was Treason, 273–75; Dewey, Hübener vs Hitler, 239.

  34. Sommerfeld, Interview, 2; Document 72, in Holmes and Keele, When Truth Was Treason, 273–74.

  35. Nelson, Moroni and the Swastika, 308–9; Sommerfeld, Interview, 9–10; Document 72, in Holmes and Keele, When Truth Was Treason, 274; Schnibbe, The Price, 31.

  36. Document 72, in Holmes and Keele, When Truth Was Treason, 274; Sommerfeld, Interview, 4–5.

  37. Sommerfeld, Interview, 11; Document 65, in Holmes and Keele, When Truth Was Treason, 257–58; Nelson, Moroni and the Swastika, 281, 307–9.

  38. Documents 65, 71, and 72, in Holmes and Keele, When Truth Was Treason, 258, 272, 275; Keele and Tobler, “Mormons in the Third Reich,” 23; Sommerfeld, Interview, 11–12.

  39. Dewey, Hübener vs Hitler, 239; Document 61, in Holmes and Keele, When Truth Was Treason, 240. Na leiloa le uluai tusi. O upu a Helmuth o le toefatuga e Marie Sommerfeld mai le manatuaga.

  40. Vlam, Our Lives, 95–97, 107.

  41. Vlam, Our Lives, 97, 99.

  42. Vlam, Our Lives, 99; Vlam, History of Grace Alida Hermine Vlam, 9.

  43. Vlam, History of Grace Alida Hermine Vlam, 9; Vlam, “Answers to the Questions Posed,” 1–2; Vlam, Our Lives, 99, 101.

  44. Vlam, Our Lives, 99, 101. Ua faasa‘oina upusii mo le faafaigofie o le faitauina; o le uluai punaoa o loo i ai le “sa lei manao o ia e liliu, sa na ona sau o ia e faalogo i le tala mai ia Piet.”

  45. Vlam, Our Lives, 101. Ua faasa‘oina upusii mo le faafaigofie o le faitauina; o le uluai punavai o loo i ai “afai e le mafai ona latou momoe i le po, e tatau ona latou tatalo i le Atua ma ole atu ia te Ia, pe moni mea na latou faalogo i ai mai ia Mr. Vlam.”

  46. Vlam, Our Lives, 101. Ua faasa‘oina upusii mo le faafaigofie o le faitauina; “O lena po mulimuli” i le uluai tusiga na suia i le “I lena po,” “o ia” na suia ia “a’u,” ma o taimi e fa o le “o ia” na suia i le “O a‘u.” Autu: Anapogi