Kakabwaiakiia Ara Utu man Ara Berita
Ngkana ti kawakin ara berita, berita aika ti na karekei i bukin kaniwangara e na bon rangin korakora.
Tariu Aine, ai raoiroira te tairiki aei ngkai I kona ni mena i buakomi. Bon aine ngkami aika kam raoiroi. Kam rangi ni kakaonimaki, natin te Atua aine ngkami aika kam raoiroi, ae kam kataia ni kakaraoa ami kabanea ni konaa ni kawakin ami berita ake kam a tia ni karaoi ma Tamami are i Karawa.
Au kantaninga bwa ngkami nako e a tia n reke ami tai n noori beeba aika bubura aika koreaki iai taeka ma tamnei ni kaotaki iai boton te i ango ae, “Aio Ngai; kanakoai.” Te korobanna aei, e atuunaki n Pioneers Arriving, aio are e karaoaki i roun Tarira te Aine ae Minerva Teichert, te tina, te buu, ae te tia korobanna ae bati ni karineaki. Ti rangin tatangira te korobanna aei. Ti tangira aron taraan ubun te aine aei ngke e tabe n nakonako i rarikia ana utu. Ai moara riki tangiran ana baeki are e uouotia. E ngae ngke ti aki ataia bwa teera kanoan a na baeki arei, e kauringai n aron tein te baeki teuana are I nooria n tain te taromauri. I a tia ni uouotii, ao I kakoaua bwa ko a tia naba! Au baeki arei I a bon uouotia, naba n taai aika kakaokoro, kanoana koroboki aika tabu, au boki n reirei, bwatoro, booki, beeba, ao taian kara kureion.
Taari aika Aine, n aron uouotakin baeki aikai nakon te taromauri, ai bon ti teebo naba ma ngaira, n aron are e kanikinaaeaki n te bwai teuana, ti kainnanoa naba uouotakin ara baeki tabeua n te tabo are ti nako iai—ao i nanon te baeki aei bon kaubwaira i bukin berita—i bukina bwa bon ngaira aine ni berita. I kan maroro ma ngkami n aron kawai n ara berita bwa e na kaanga ni kakorakorai utu aika raoiroi.
E rangin bongana nakoira bwa ti na kaanga ni kiina te kawai teuana bwa e kaanga aron taraia utu aika raraoi. Tabeman utu aika raoiroi bon iai aia utu ae bwanin n aron aia karo ma tinaia; man taai tabetai, rinanon te mate ke te raure, bon ti temanna. Tabeua utu aika a etieti e bon rawata natiia, ao aia utu tabeman, ao n taai aikai, bon akea. Tabeman kaain te Ekaretia a bon tiku n tii ngaia ni maiuia aei, ma Teunimwaane ae Marvin J. Ashton e reireiniira, “Te Atua ao temanna boni ngaia utu.”1 N tabeua utu aika etieti tii te tama ae mwakuri i tinanikun te mweenga, ao taai tabetai, ikawai ni kauoman a bon riai ni mwakuri. E ngae, ngke tao ti okoro, ma utu aika raoiroi iai teuana aia i ango ae tii te arona ae te berita are a taua man tabuia.
I iangoi moani berita aika a irekereke nakon tuua i bukin te Ekaretia: kabwianibwai, te roroko n taromauri, Tuan te Mauri, n aron te katoto. Tariu Aine, ti aki nanona bwa n na manga tuangkami bwa ngkana kam kawakin berita aikai, ara utu e na bon kakabwaiaki. E aki taekinaki n ae tao ti naaki kona ni korakai, man tokina, ti na ataia bwa bon iai kanuangara ngkana ti kawakin berita aikai.
Tabeua berita a bon kairira nakon karaoan katei aika raraoi ke a bubuaka: ni ikotaki ma aron katei ao tuua ake a irereke nakon rabwatara. Ti riai n reireiniia natira katei aikai: te kokoaua, te karinerine, te etieti, te akoi n ara taetae ao ara mwakuri. Ti kanakoia natira nakon te aonnaba are katei aikai a moanna n totoronako, ma ti riai n reireiniia man ara taetae, ma ae bongana riki, bannara ni katoto, n ara mwakuri i bukin te karinerine te akoi ao te raoiroi.
Ao teera katei aika a riai ni iraki aika ti kona ni karaoi nakon rabwatara? Tariu aine, ti riai n riki bwa ngaira banna aika raraoi nakoia natira n aron are ti kantaningaia bwa ana kunnikaia, n aron taraaia, ao n tuan itiaki n rabwataia. Uoua te ririki n nako, te Beretitenti ae Hinckley e tei n teuana n te bwabwaro man anga a na reirei nakoira “reireiniia [ara] ataei ngkana a uarereke, ao n tuai ni ikawai, ao tai katokia.”2 Aron teina ni kabane nakoira a boni b ane ni matata, ma te bwai ae ti a taia bon kawain te aonnaba aei e a reke bwa kawaira ao kawaia naba natira.
N te taina ao I ongo a na taetae temanna te tina ae e rangin buakaka ngke e tabe ni kaaitara natina te aine, ao e rineia bwa te kawai raa ae e na un iai ma natina. Ai ngaia are e a tia n rineia bwa e naki un i bukin aron kunnikaina. Ma e uneakina aron tein kunnikaina ngkai ngaia riki te bwai ae rangin berino arona. Ngkai e aki nanonaki bwa ti na rangin kairoroia natira aine ao mmwaane bwa a na kamanoi roroaia nakon ni moimoin rangaia, ma aio e na buokiia bwa a na ataa aron kunnikaia bwa a na kaotia iai ae ngaiia bon natin te Atua. Tariu Aine, kam bon rangin wanawana ao tiina ngkami aika kam kamimi. Kam aki kainnanoa te bokinikairi are e na tuangkami arora ni kunnikaira. Irira ana kairiri te Tamnei, ngkoe ao natim ni bane a na bon ataa ae eti.
Ti riai ni kakoaua bwa natira a na riai n oota raoi n aron ana babaire ke ana kaantaninga te Uea i bukin te aroaro n taanga. Tuan tararuan itiakin te rabwata bon akea bitakina—ataei a riai n ataia bwa e ngaa tokiia n anne. Mangaia are, n taai aika bati ti nonoriia natira bwa a kataia ni kabotaui maiua ma katei n te aonnaba aika aki eti. Ti riai n aki kamamaia ao ni karekea te namakin nakoia ae a naki rau iai, ma ti kona ni maroro ma ngaaia n aron kawaina ae riai. A riai n ataia raoi, bwa teera katei aika riai i bukin te mwaane ao te aine i tinanikun te mare. Ngkana ti aki reireiniia te tua i bukin anne, ao ti a taia bwa te aonnaba aei, e na bon mangaongao.
Ai bon ti teboo naba ma bwaai aika boou n te aonnaba aika a karika te raraoma: n aron bwai n rabakau. Te nanokawaki, n aron bwaai aika roko nakon mweengara ma ti riai n aki kariaia taeka ni kamatauninga nakon te Uea bwa e na rin ni mweengara. Te Intanete e bon rangin bongana, ti riai n taraia raoi bwa tamnei ake a oti iai a naaki riki bwa kaririara i nanon mweengara. Nonorakin tamnei aika bubuaka e tabangaki ngkai ao e a moanna rin ni maiua aika a Itiaki, ao n rairi nanoia nako man ana tua te Atua.
Te bwai ae e rangin bongana te berita nakoia utu bon aia berita are a tia ni karaoia i bukin karaoan te mare are akea tokina. Ti a taia bwa “te mare i marenan te mwane ao te aine e bon katabua te Atua ao utu boni ngaia nukaan ana karikibwai Teuare babaire i bukin kawaira are akea tokina I bukiia Natina.”3 Ara utu boni ngaia moan tabera i rarikin karekean kakabwaiara aika korakora.
Boton te maungatabu aei “Aio Ngai; kanakoai.” Taeka bon te berita nakkon te Uea, ao e anganira nanora raoi ni kan i buobuoki. Ngkana ti kawakin ara berita, berita aika ti na karekei i bukin kaniwangara e na bon rangin korakora. E koreaki anne i roun Beretitenti Boyd K. Packer:
“E bon aki rangin kakubanako i rouia kaaro ngkana e bua temanna ma i buakoia natiia, n te tai anne, e kaotaki n anne bwa e riaon aia konaa ni kairiri. A maraki i bukia natiia mwaane ao aine aika kakaitaraiia. Aki oota raoi n aroia naatia man aki reke buokaia ngke a kataia ni karaoa are a riai ni karaoia.
“Au kaantaninga bwa aro ni kairiiri aika bubuaka akanne n te bong teuana e na bon kona ni kairaki… .
“Ti aki kona ni katereterea i aona riki aron kakawakin te mare n te tembora, aron kabaeakira n tuan te otenanti ni kabaebae, ao te tua ibukin kakaonimaki are e i rekereke ma ngaia. Ngkana a kawakin aia berita kaaro are a tia ni karaoia ngke a katorobubua n te tembora, natia a na bon kabaeaki ma ngaiia n akea tokina.”4
Tariu aine, berita aikanne e bon anganai te kaantaninga ae bati. Ti ria ni karaoa mwanangara aei ma te nanomwaaka, ara baeki aikai a riai nim mwaaka i aan baira, ao ti riai ni kanakoi kanoan ara baeki aikai ake ti aki kainnanoi. Rawawatana riki i aora e na bon karekea te waeremwe. Ti a kanakoi ke ni kaaki bwaai aika e na katabeaiangaira tao n aron “teera ngke arona” ao “ngke arona” ao “karenakoi [ara] rawawata i aon te Uea.”5 I tangiria ni kani karaoa aei ma ngkoe. Ti na kataia ni karaoa ara kabanea n raoiroi n te bong ae koraki ao ni kariaia te Uea bwa e na karaoa te okoro i bukira. Anne te berita are E a tia ni karaoia nakoira.
Ao ngkai, n na karakina temanna te aine ae I kaitibo ma ngaia, I rangin tatangira te aine aei i bukina bwa e rangin kokoaua nakon a na berita. Tibutoru te unaine, Charlotte Gailey Clark, boni ngaia te kabanea i buakoia aomata aika 295 ni karekea aia berita man te Nauvoo Tembora imwain te moanibwai are e na moanaki i maeaon te tabo anne. Te tembora e a bon tia n iin ngke a kanakoaki aika a Itiaki ma ikekei, ma naake a bon kakaonimaki e bon tuai n reke aia tai ni karekei aia entaumenta. Tibutoru te aine anne ma kainnabana a na bon kairiia aia utu nako maeao, ao e tangiria ni karaoa a na berita ma ngaia i mwain waakinan kawaina. I a tia ni iangoia i nanon n namwakaina aikai. I bia te taina n atonga aei nakoina, “Tibu, ko rabwa i bukin kawakinan am berita are ko karaoia. I rangin kakabwaia ngkai i riki bwa tibum te aine ngai. Man am kakaonimaki e a bon tia ni kakabwaiai ma au utu—ao e na bon reitinako ni kakabwaiaira ni kabane n te roro aei.” Tariu aine, natira ao tibura n te taina ana boni kona ni manga atonga aei nakoira, i bukira ni kabane. N te bong teuana a na manga boni karabwaira i bukin kawakinan ara “baeki” are ara berita i roura, ao ni kamanenai i bukin kakabwaiakiia ara utu.
E bia kakabwaiaira Tamara are i Karawa bwa ti na kawakin ara berita bwa aonga ara utu ni kakorakoraki ao ni kakabwaiaki i bukin maiuakina te etieti ni maiura, n aran Iesu Kristo, amen.