Nakomai nakon Tion! Nakomai nakon Tion!

Ngakana ti kaitiboo ma kaain te Ekaretia iaon te aonaaba ni kabuta, teuana te kakaewenako ae taabangaki: bon karekean te tai ni karaoa are e riai ni karaoaki. Ibuakoia naake a karako aia bwai, e korakora riki te kainnano ni karemremwii bwaai aika a kainnanoaki ibukin te maiu. Ibuakoia naake a mwaiti aia bwai, te kainnano bon te tai ni kukurei ni bwaai akanne. Te kakaewenako e kabwaranano kioina bwa te tai e uarereke; e aki kona te aomat ni kanaanaua ke ni kauarerekea te bong ke te ririki.

Iango a reiakinaki man te aonaaba bon ngaiia taani bure. Ngkai e kakumekume te aonaaba ma aron barongaan te tai, e kamwaneira nakon bwaikorakin te aonaaba. Ma te maiu bon tiaki te ikakorakora ma te tai—bon te ikakorakora imarenan te raoiroi ao te buakaka.

Tera ae ti na karaoia ibukin aei ni kabane e kona n riki bwa teuana riki kamangaongaoan te babaire inanon te maiu. N 1872, te burabeti ae Brigham Young e reireiniia aika Itiaki iaon te bwai aei. E taku ngaia: “Tei! Tataninga! Ngkana ko uti n te ingabong, imwaiin ae ko kaona wiim n te amwarake, … boobaraaki imatan te Uea, butia bwa e na kabwarai am bure, ao E na kawaakiniko rinanon te bong, ni kawaakiniko man te kariiriaki ao man kammaira ni kabane, bwa E na kaeti mwanekam, bwa ko aoria ni karaoa te bwai teuana are e na reke iai rakan abanuean te Atua iaon te aonaaba. E reke am tai ni karaoa aei? … Aio te marooro are I karekea i bukiia Aika Itiaki Ni Boong aikai. Tei, tai rangi ni kawaekoa… . Ko rangi ni kawaekoako; ko aki bati ni iriiri bootaki, ko aki bati n tataro raoi, ko aki wareware raoi ni Koroboki aika Tabu, ko aki iangoi raoi am waaki, ni kabane am tai ao ko kibakiba, ni kawaekoako n te aro are ko aki ataia bwa tera moa ae ko na karaoia… . Kariaia bwa N na taekina aei ni kabeebetea—teuana te bwai ae moan te beebete arona ma n kamweengaraoi are e kona ni kamanenaaki—‘Kawaakina am bwai n amwarake bwa e na eti teina,’ bwa ngkana e bwaka karaun te bwaoriti, ko kona n raweia ni kaona am bwai n amwarake.”¹

Kamanenaa te babaire i nanon te euangkerio ni kawenei moani bwai. E reirei te Uea bwa, “Mangaia, are tai ukoukori bwaikorakin te aonaaba ma ukoukora moa katean abanuean te Atua [ke Tion], ni katea raoiroina; ao ni kabane baikai a na ikotaki nakoim.”²

Ngke te ataeinimwaane ngai n rikirakeu I Utah maiaki, iangoan Tion e aki bati n oota raoi nakoiu nakon ae ngkai n te bong aei. Ti maeka n te kaawa ae uarereke ae e aki raroa ma ana National Park.Tion. N te umwantabu, ti aki toki n anenei taeka aikai:

N au iango n ataei, I noori bwarietaata aika kamiimi ao kiri-atibu aika ririeta n te National Park. N rerebauau ribuakon kamwanono aika ririeta ooia e biri te karanga n ran—n tabetai e birimweere, n tabetai e birimwaaka, n tabetai e a mareburebu. Ko kona ni iangoa minominon ana iango te ataeinimwaane ae uarereke are e kataia ni bairei taekan te anene n taromauri ma aron tein te tabo ni kakakibotu are e tamaroa arei. E ngae ngke e aki ootaraoi n au iango bwa Tion bon te bwai teuana ae mimitong n te anua n Atua. Inanon ririki aika bwakanako, e a tia n reke te atatai ae korakora. Inanon koroboki aika tabu ti wareka aei, “Mangaia are, e koaua are e taekinna nakoimi te Uea, ke e na kimwareirei Tion, bwa aio Tion—te itiaki nanona.”⁴

Katean Tion e na riki bwa aia kouru ni kabane kaain te Ekaretia. E kona n atongaki bwa: Ngkana a bane nanora ni ukoukora katean Tion, e na bua mairoura te iango ae e aki tau ara tai. Iai kimwareirei ma kakabwaia ngkana ti ira te waaki ae kakannato aei. E na bitaki aron maiun temanna. E na riki te mweenga bwa ai tiaki te outero ma te tabo ae rau, e mano ao n tangira. E na bitaki te bootanaomata. I Tion, a na toki kakauntaeka, a na toki okoroia aomata ao e na mauna te kairiribai, akea ae kainnano—n te maiu n tamnei ke n rabwata, a nang akea kakiriwe, taromaurian boua n ainti, ao aekaki nako ni kammaira a na mauna. N aron ae a kakoaua tabeman, “e Koaua ae akea riki te bootanaomata ae kukurei riki i buakoia aomata ni kabane … ake a karikaki ni bain te Atua”⁵

Te burabeti ni kawai ngkoa are Enoka e beku inananon ririki aika bati ni uarokoia ana bootanaomata nakon te aro n raoiroi. N aron ara bong ngkai, a maeka naba inanon tain te kairiribai, buakaka, buaka ao kawawaean te rara. Ma aomata aika raraoi a kaeka ni kangai, “Ao te Uea e araniia ana aomata bwa Tion, ibukina bwa a nano teuana ao teuana aia iango, ao a maeka inanon te raoiroi; ao akea ae kainnano ibuakoia.”⁶

Tara raoi te taeka ae ibukina ni koroboki aika tabu. E kateaki Tion ao e rikirake ibukina bwa a kairaki maiuia ma aia mwakuri kaaina iroun te Atua. E aki roko Tion bwa te bwaintituaraoi, ma bukina bwa aomata aika ata te riai/katei, kaain te berita ae tabu a ikoikotaki ni kateia. Beretitenti Spencer W. Kimball e noora aei, “Ngkana ti uaia n anenea ‘Nakomai nakon Tion,’ ti nanonna ikai … nak mai nakon te uoote, te mwaanga, te miitin, te titeiki, ao anga te ibuobuoki ni katean Tion.”⁷ Ai ngaia are a ikotaki n aron nanon te Uea, aika Itiaki ni boong aika Kaitira ni kekeiaki ni uarokoa Tion bwa “abanuean Atuara ao ana Kristo,”⁸ ni katauraoi imwaiin kauaokin te Uea.⁹

E kauringiira Beretitenti Hinckley bwa “te waaki ae ti ira karaoakina tiaki te bwai n aki akaaka. Bon ana waaki Kristo. Bon abanuean te Atua Tamara ae Akea Tokina. Boni katean Tion iaon te aonaaba.”¹⁰

“Ngkana ti katea Tion anne are a tia n tataekinna burabeti are e a tia te Uea n anga ana berita ae korakora, ti riai ni katikui kateira ni mataai. Ti riai n tokanikai iaon aron tangiran te mweeraoi ma te amarau n te waaki, ao inanon ara waaki ni kekeiaki aei, e ngae n tain te karawaawataki ae bati, ti na rikirake n reitaki riki ma Atuara.”¹¹

Mai buakon reirei ake e karekea te rikirake ae rietata nakon ana waaki te nakoanibonga n te botanaomata bon te tangira, te beku, te mwakuri, te toronibwai, te anganano, ao te mwiokoaki ni karaoan te beku.¹² Ni kan ataakin aron katean Tion i aon koaua aika boto iai, ti na iangoi moa.

Te moan bon te tangira.

“E taku Iesu … Ko na tangira te Uea ae Atuam ma nanom ni kabanea, ao tamneim ni kabanea, ao am iango ni kabanea.

“Aio te moan tua ae kakannato.

“Ao te kauoua bon titebo naba ma anne, ko na tangira raom n ai aron tangiram iboni iroum.

“Iaon tuua aikai ake a kateitei iai burabeti.”¹³

Tangiran te Atua iaon bwaai ni kabane e kairira bwa ti na tabeakin ara moani bwai, ni kaeti maiura bwa a na ira Nanona. Ti rikirake n tangira ana kariki bwai nikabane te Atua, ni ikotaki ma raora. Kaakarimoan te Atua moa i aon bwaai nikabane e karekea te akoi ae korakora ao te nanomwaaka i marenaia buu, kaaro ao ataei. I Tion, ao ti kunea ae “nikabane aomata a ukoukora kukurein nanoiia kaain rarikiia, ao a karaoi bwaai nikabane ma te mata ae nanobuaka riki nakon mimitong te Atua.”¹⁴

Are imwiina bon te mwakuri. Te mwakuri n rabwata, n te iango ke te kekeiaki n tamnei. E tua te Uea bwa, “Mani maonon ramwam ao ko na karekea kanam.”¹⁵ Te mwakuri e reke ma iai te kukurei, ataakin boonganam iboni iroum, ao te kaubwai. N ana waaki te Atua are e a tia ni kateia, ao akea nnen te kewekewe ao te mataaibwai. Te mwakuri e riai n etieti ni bautaki iai te anua n Atua are e karaoaki ibukina: “Te tia mwakuri i Tion e na bon mwakuri i bukin Tion; ma ngkana a mwakuri i bukin te mwane a na anaaki maiua.”¹⁶

Are imwiina te toronibwai. Bon te bwai ae na riki moa imwaiin inaomatam n rinerine ao nikom. Te Ekaretia aei ma kaaina a tuangaki iroun te Uea bwa a na bwaina te tauraoi, te toronibwai, ao ni inaomata.¹⁷ Tain te mari bon te tai ni maiu ni kaikobwai. Tain te rongo bon te tai ni maiu ni katautau/taubaang ao ni katine iaan bwaai ake a tia ni kaikoikoaki.

“Akea aomata aika Itiaki ni boong aika Kaitira aika a kokoaua, ake a konabwai rabwataia ke aia iango, ake a na anga ma nanoia kamaiuraoaia aia utu nakoia tabeman riki. Ngkana e konabwai, ao iaan ana kairiiri te Uea ni ikotaki ma ana mwakuri, e na karekei bwaai ake e kainnanoi ngai ma ana utu ni bwain te rabwata ao te tamnei ibukin te maiu.”¹⁸

Ngaira naati mwaane ao aine iroun te Atua ao ti bon katang Irouna ibukin baike iai iroura. Ngkana ti kaawakin Ana tua nako, E na aki kona ni manuokiniira. Ma Tamara are i Karawa E aki kona ni karaoi bwaai ibukira ake ti boni kona ni karaoi ngaiira. E kantaningaira bwa ti na kamanenai bwaai ni kabane ake ti karekei mairouna Ngaia ni kamanenai ibukira ao ara utu. Ngkana ti karaoa anne, ti a toronibwai ngkanne.¹⁹

N tokina, te anganano. Te berita ae tabu ibukin te anganano are boboto iaon te angakarea are e reke iai te ao boni ngaia boton katean abanuean te Atua. “E aki kona ni kateaki Tion,” e taku te Uea, “ngkana e aki kaboonganaaki tuan te abanuea ae te tiretiare.”²⁰ Te berita ae tabu ibukin te anganano e boboto iai te tua aei. E tuai ni kamaunaaki ke ni katukaki moa. “Bon te anga ana tai temanna, ana tarena, ao kaubwaina ibukin kawaakinaia kainnano—bwa tao n te itera n rabwata ke n tamnei—ao ni katean abanuean te Atua.”²¹

Reirei aika i bukin koauan te tangira, mwakuri, toronibwai, ao te anganano boni mairoun te Atua. Aomata ake a maiuakin baikai, ao ma n kairi maiuia ni baikai, a riki ni itiaki nanoia. Te reitaki ae etieti boni kanikinaean te bootanaomata aio, aia rau ao nakoraoia e riki bwa te buraeki/kanikina nakoia aomata. Aei ae e taku te burabeti ae Iotebwa Timiti:

“Katean Tion bon te waaki are e a tia n anai nanoia ana aomata te Atua n rooro nako; bon boton aia rongorongo naba burabeti, ibonga ao ueea ao a tia n tataekinn ma te kukurei; … e a katukaki nakoira bwa ti, ira te waaki aei ao ni buoka karokoana ni mimitong ni boong aika Kaitira [inanon Tion] … te mwakuri are e a tia ni baireaki bwa e na urua mwaakan te roo, manga kaetan te aonaaba, mimitongin te Atua, ao manga kautaia maate ake kain te utu.”²²

I kakoauai bwaai aikai bwa a koaua. Beretitenti Gordon B. Hinckley bon ana burabeti te Atua iaon te aonaaba, n aron naba Iotebwa Timiti, te teei. Uean te Atua bon Ana Ekaretia Iesu Kristo ibukiia aomata aika Itiaki ni boong aika Kaitira ao e na riki bwa Tion n tamaroana ni kabane. Kristo bon te Tia Kamaiu ibukin te aonaaba, Natin te Atua ae Tangiraki, Teuare Tabu. N aran Iesu Kristo, amen.