“Pe A Na Faapea e Maua e Keriso O’u Avanoa …”

I ni tausaga se tele ua mavae, a o ono, fa ma le lua tausaga o la ma’ua fanau matutua, sa ma faate’ia ai i latou i se suega puupuu. O aso uma sa matou faitauina ai faaleaiga le Tusi a Mamona.

Sa fesili atu lo’u toalua, “O ai le tamaloa lea na alu i le vao e tulimanu, ae nai lo le faia o lena, sa ia tatalo i le aso atoa?”

Ina ua mavae sina taimi o leai se pisa, sa ia tuuina atu se fesoasoani itiiti: “O lona igoa e amata i le E … e … e … e.”

Na valaau mai le ma tama e lua tausaga mai le tulimanu o le potu, “Nosa!”

O lenei tamaitiiti sa taalo i le tulimanu—o lē sa matou faapea, e laitiiti tele e le malamalama. Enosa! O Enosa lea na alu i le vao e tulimanu ae peitai sa matelaina mo lona lava agaga. E ui ina e le o faapea mai le tala sa leiloa o ia i le togavao, ae ua aoaoina i tatou i le tala ia Enosa, na aluese mai o ia mai le togavao o se tagata ua suia—ma, sa ia lagonaina se naunau mo le manuia o ona uso.

I le Feagaiga Fou, o loo aoao mai ai lo tatou Faaola o Iesu Keriso e uiga i le taua o le sailia o le tasi ua leiloa:

“O ai ea so outou e ana mamoe e selau, afai e leiloa le tasi, e le tuua e ia le ivagafulu ma le iva i le vao, a e alu ma saili i le na le iloa, seia maua?

“A maua, ua faafuata ma le olioli“ (Luka 15:4–5).

Talu mai le Pau o Atamu, ua i ai tagata uma i se tulaga o le leiloa ma le pau. E pei foi o le toatele o outou, o le “mauaina” o a’u, na amata e ni faifeautalai faamaoni se toalua. O le tausaga 1913, i Copenhagen, Tenimaka, na aoaoina ai e Elder C. Earl Anhder ma Robert H. Sorenson matua o lo’u tama, i le talalelei a Iesu Keriso ma papatisoina i laua. Sa aoaoina au e ou matua i le taua o le galue malosi, faamaoni ma le amiosao. Ae peitai, na i ai se tasi taimi puupuu na matou le toaaga ai i le Ekalesia ma [le toe i ai] se malamalamaaga i le talalelei. I le toe tepa i tua, a o ou laitiiti lava, ou te manatua ai a’u uo sa matou tafafao, sa valaauliaina au i le Peraimeri. O lo’u aafiaga muamua lava i le ekalesia, na fausia i se siosiomaga o faauooga i le Peraimeri.

A o ou laitiiti na toe o ni nai masina oo i lo’u aso fanau e 12 ai ou tausaga, i se tasi aoauli o se Aso Toonai, sa ou taliina ai le tu’itu’i mai o lo matou faitotoa i luma. O nisi o a’u uo—o le au Tiakono, i o latou ofutino papae ma fusiua—sa latou su’eina a’u ina ia ou alu atu i la’u lotu perisitua muamua lava. Sa ma savavali faatasi ma lo matou taitai a o matou faaifoifo atu i le a’ega e agai i le Tapeneko i le Lotoa o le Malumalu. O le sauniga lena a le au perisitua o le konafesi aoao ia Aperila.

O Lloyd Bennett o lo’u taitai Sikauti lena. Sa masani ona ia pikiina a’u i afiafi o Aso Toonai e ave i le ofisa o le Sikauti, e faatau mai ni a’u pine ma sapalai. Ma te talatalanoa a o alu le ma taavale. Sa avea o ia ma se uo faatuatuaina. O Lloyd Bennett, e pei o le toatele o isi tagata, sa faaavanoaina lona taimi mo le tasi [na leiloa].

O nei uo ma taitai lelei, na malamalama i le fautuaga lata mai nei a Elder M. Russell Ballard ina ia, “saili … se tasi” (“Toe Tasi,” Liahona, Me 2005, 69), ma ua latou malamalama i le mea o loo aofia ai. O nisi taimi o le tagata o loo i le tulimanu, lea sa tatou le mafaufau lava i ai.

O lo’u lava aafiaga faapei o Enosa na oo mai i le 18 o o’u tausaga, a o ou tootuli i totonu o lo’u potu o le ami i Fort Ord, Kalefonia. Ina ua tape ia moli sa ou tootuli loa i luga o le fola malo, ma sa faapei foi o Enosa na ou maua lo’u ala. E tatau ona ou auauna atu faamisiona. E tumu lou loto i le agaga faafetai i le toatele [o tagata] sa fesoasoani i le taumafaiga ina ia ou iloa po o ai a’u, ma ia ou iloa ai Keriso ma Lana talalelei. Na i’u ina ou malamalama o le auala ou te toe foi atu ai i le aiga, e ala lea i lo tatou Faaola o Iesu Keriso.

“E afio mai foi o ia i le lalolagi e togiola lona nuu; na te ave foi i ona luga solitulafono a i latou o e faatuatua i lona suafa; o i latou foi ia e maua le ola faavavau, e le maua foi le olataga e se tasi ua le faapea” (Alema 11:40).

Na tautino mai e le perofeta o le Feagaiga Tuai o Isaia, i lona vaaia o le a toefuatai mai i o tatou aso le talalelei i le atoatoa:

“O loo faapea ona fetalai mai o le Alii o Ieova, Faauta, ou te sii atu lo’u lima i Nuuese, ma ou faatu i luga lo’u tagavai i nuu: latou te aumaia a’u tama tane i o latou fatafata, a e aumaia a’u tama teine i o latou tauau” (Isaia 49:22).

Uso e ma tuafafine, a o tatou amana’iaina le toatasi, tatou te vaaia le faataunuuina o lena valoaga. Pe ua outou iloa ea le auala na aumaia ai outou i fatafata ma tauau—i le saogalemu?

O le a se mea e faia e le Faaola i avanoa ua tatou maua ina ia aafia ai lena [tagata] e tasi? A o tatou faataunuuina lena mataupu faavae Ana Faapea E Maua e Keriso O’u Avanoa, O Le A Se Mea Na Te Faia? o le a taulai atu a tatou filifiliga o le olaga ia Keriso.

Ou te iloa lelei lava sa saili la tatou [uo] pele o Elder Neal A. Maxwell i taimi uma ina ia maua, le tasi. E pei foi o Nifae sa galue o ia “ma le maelega ina ia tusitusi, e faaoleole, [i tatou uma] ia talitonu ia Keriso, ma ia lelei ma le Atua” (2 Nifae 25:23). Ou te iloa e sili atu ma le faatasi ona valaau atu Elder Maxwell ia i latou, e oo lava i le tasi, sa taumafai o ia e aumai ia Keriso.

Pe o i tatou o se faiaoga o le Peraimeri, taitai o Alii po o Tamaitai Talavou, taitai Sikauti, faiaoga o aiga, faiaoga asiasi, po o se uo, o le a faaaoga i tatou e le Alii, pe afai o le a tatou faalogo, e saili atu ma maua mai lena [tagata] e tasi.

Ou te lagona le agaga faafetai ona o le filifiliga ina ia auauna atu i se misiona, lea na avea ma se faatumutumuga o lo’u olaga. Alii talavou, o loo ia te outou le avanoa e auauna atu ai, e galulue ai ma le maelega. Ia tumau ona ola agavaa; ia saunia e talai atu le talalelei; ia aua le faatuai—o atu ma auauna atu! Tamaitai Talavou, e tele mea e mafai ona outou faia e fausia ai le malo. Le au matutua pele: matou te manaomia outou!

Sa maua e lo matou aiga le avanoa e auauna atu ai i Kanata, faatasi ai ma ni alii, ma tamaitai faifeautalai, ma ulugalii faamisiona lelei ma faamaoni. Faatasi ai ma le loto i le loto, agaga i le agaga, faapea ma le malosi o le Alii, sa latou saili atu ai le tasi ma maua mai i latou, e pei ona faia e faifeautalai faamaoni i le lalolagi atoa.

“Ma ua faapea ona avea i latou ma tufugaao o le Atua e aumaia ai nisi e toatele i le malamalama o le upu moni, ioe, ma le iloa lelei o lo tatou Togiola” (Mosaea 27:36).

E mafai e i tatou uma taitoatasi ona faia se eseesega i le olaga o se tasi, e oo foi i o latou ola faavavau, ae e tatau ona tatou faatino; e tatau ona tatou faia; e tatau ona tatou galulue maelega. Atonu ua e maua se musumusuga e valaaulia se tasi e toe foi mai i le ekalesia, pe faalogologo foi i le savali o le talalelei toefuataiina mo le taimi muamua. Ia fai loa ma mulimuli i lena musumusuga. Aisea tatou te le taufai valaaulia ai se tasi e susū mai taeao e faalogologo i le siufofoga o le perofeta? Pe tou te faia ea lena mea? Pe tou te tuuina atu ea lena valaaulia i le aso? Faatasi ai ma le faatuatua ma le loto naunau (ma le manao), e tatau ona tatou faatuatua o le a tuuina mai e le Agaga “i le ituaso lava, ioe, i le minute lava, le mea [tatou] te fai atu ai” (MFF 100:6). Ou te iloa o le a faapena lava.

Ou te faafetai tele mo lenei valaauga e toe auauna atu ai, i le taimi nei i Ausetalia. E faailoa atu lo’u alofa e faavavau ma le talisapaia o lo’u toalua ma la’u fanau e toaiva o e manatunatu pea i le galuega faafaifeautalai, mo lo latou alolofa ma la latou lagolagosua. Ou te molimau faamaoni atu, ua toefuatai mai le atoatoaga o le talalelei i luga o le fogaeleele, o Iosefa Samita o se perofeta a le Atua, ma o le Tusi a Mamona o le afioga a le Atua. O loo taitaiina i tatou i aso nei e se perofeta soifua o Peresitene Gordon B. Hinckley. Ma ou te iloa o loo soifua le Atua, ma ou te iloa o Iesu o le Keriso, o lo tatou Faaola ma le Togiola. O aao agalelei o le Leoleo Mamoe ma luga o Ona tauau e ave atu ai i tatou i le aiga. E pei foi o Enosa, ou te faapea atu ma le lotomaualalo: “Ia ou talai atu … i lenei nuu, ma tautino atu le upu e tusa ma le upumoni e i ai ia Keriso. Ma ua ou … fiafia lava i ai e sili lava ai le fiafia o le lalolagi” (Enosa 1:26). Ou te molimau atu ai i nei upumoni, i le suafa o Iesu Keriso, amene.