Sauniuniga Faaleagaga: Ia Vave Amata ma Ia Tumau Ai

O le toatele o i tatou ua manatunatu i auala e sauniuni ai mo afa. Ua tatou vaai ma lagonaina le mafatia o tamaitai, alii ma tamaiti, faapea ai ma tagata matutua ma e vaivai, na aafia i afa, galulolo, o taua, ma lamala. O le lagona e tasi e oo mai o le fesili ifo: “E faapefea ona ou saunia?” Ma ua faanatinati foi tagata e faatau ma teu ia soo se mea ua manatu latou te ono moomia mo aso e feagai ai ma na faigata.

Peitai, o loo i ai se isi sauniuniga e sili atu ona taua e tatau ona tatou faia, mo tofotofoga e mautinoa lava e oo mai ia i tatou taitoatasi. O lena sauniuniga e tatau ona amata sauniuni mamao atu i ai aua e umi se taimi e faia ai. O mea o le a tatou manaomia i na taimi e le mafaatauina. E le mafai ona nonoina mai. E le lelei pe a teu umi. Ma e tatau ona faaaogaina soo ma lata mai [lona faaaogaina].

O le mea o le a tatou manaomia i le aso o le tofotofoga o se sauniuniga faaleagaga. O le i ai lea o se faatuatua malosi ia Iesu Keriso, ia matuai malosi ina ia manuia ai la tatou suega o le olaga, lea e faalagolago i ai a tatou tulaga uma i le faavavau. O lena suega o se vaega o le faamoemoega na saunia e le Atua mo i tatou i le Foafoaga.

Na tuuina mai e le Perofeta o Iosefa Samita, le fetalaiga a le Alii e uiga i le tofotofoga tatou te fetaiai. O le lalolagi na foafoaina e lo tatou Tama Faalelagi ma Lona Alo o Iesu Keriso. O upu nei ua tatou maua ua faamatala ai le faamoemoega o le foafoaga: “Ina tatou o ifo ia i lalo, aua o loo avanoa lava, ma tatou ave nei mea ma tatou faia ai se lalolagi e nonofo ai i latou nei; Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua.”¹

O lea la, o le tofotofoga sili o le olaga, o le vaai lea po o tatou faalogo ma usitai i poloaiga a le Atua, i le lotolotoi o afa o le olaga. E lē o le onosai i afa, ae o le filifilia o le mea tonu pe a pesi mai. Ma o le tulaga faigata o le olaga, o le toilalo lea i lena suega ma lē agavaa ai e toe foi atu ma le mamalu i lo tatou aiga faalelagi.

O i tatou o fanau agaga a se Tama Faalelagi. E alofa o Ia ia i tatou ma sa Ia aoaoina i tatou ae tatou te le’i fananau mai i lenei lalolagi. Sa Ia fetalai mai, e finagalo ina ia tatou maua mea uma o ia te Ia. Ina ia agavaa mo lena meaalofa, sa tatau ai ona tatou maua ni tino faaletino ma ia tofotofoina. Ona o na tino faaletino, o le a tatou fetaiai ai ma mea tiga, ma’i, ma le oti.

O le a tatou oo i faaosoosoga e ala atu i manaoga ma vaivaiga e oo mai i o tatou tino faaletino. O le a faaosoosoina i tatou e au popoto ma le malolosi a le tiapolo, ina ia tatou gauai atu i na faaosoosoga. O le a oo mai tofotofoga o le olaga, o le a tatou faia ai ni filifiliga e faaaoga ai le faatuatua i mea e le mafai ona tatou vaaia i o tatou mata faalelalolagi.

Sa folafola mai ia i tatou, o le a avea Ieova, o Iesu Keriso, ma o tatou Faaola ma le Togiola. Na te faamautinoaina o le a tatou toetutu uma. Ma o le a Ia faia ina ia mafai ona tatou manumalo i le suega o le olaga, pe afai tatou te faatuatua ia te Ia e ala i le usiusitai. Sa tatou alalaga i le olioli i le tala fou fiafia.

O se fuaitau mai le Tusi a Mamona, o se tasi molimau ia Iesu Keriso, o loo faamatalaina ai le faigata o tofotofoga, ma tulaga e manaomia e manumalo ai:

“O lenei, ia outou lototetele, ma ia manatua ua tuusaoloto lava outou–ina ia filifili e outou le ala o le oti faavavau, po o le ala o le ola faavavau.

“O lenei foi, ou uso pele, ina faalelei ia outou ma le finagalo o le Atua, a e le o le loto o le tiapolo ma le tino ma ia manatua, pe a lelei outou ma le Atua, ua na o le alofa tunoa o le Atua e faaolaina ai outou.

“O lenei, sei faatuina e le Atua o outou nai le oti i le mana o le toetu mai, nai le oti faaavavau foi i le mana o le togiola, ina ia talia outou i le malo faavavau o le Atua, ina ia outou vivii atu ia te ia i le alofa tunoa faaleatua. Amene.”²

O le a manaomia se faatuatua e le maluelue i le Alii o Iesu Keriso, e filifili ai le ala o le ola e faavavau. O le faaaogaina o lena faatuatua, e mafai ai ona tatou iloa le finagalo o le Atua. O le faatinoina o lena faatuatua, tatou te fausia ai le malosi e faia ai le finagalo o le Atua. Ma o le faaaogaina o lena faatuatua ia Iesu Keriso, e mafai ai ona tatou tetee atu i faaosoosoga ma maua ai le faamagaloga e ala i le Togiola.

E manaomia ona tatou atiina ae ma galueaiina le faatuatua ia Iesu Keriso, a o le’i taitai ona osofaia i tatou e Satani, ma o le a ia faia, ma le masalosalo, ma faatosina i o tatou manaoga faaletino, ma i ni leo pepelo e fai mai ai, e lelei le leaga, ma e leai se agasala. O na afa faaleagaga ua pesi mai. Ma tatou te iloa o le a atili ona faigata seia oo ina toe foi mai le Faaola.

E tusa lava pe o le a le tele o lo tatou faatuatua i le taimi nei e usitai ai i le Atua, e manaomia pea ona tatou faamalosia atili ma faafouina pea e le aunoa. E mafai ona tatou faia lena mea e ala i le filifili nei ia tali vave atu e usitai ma naunau atili e tumau. O le aoao ina ia vave amata ma ia tutumau ai, o ki ia i sauniuniga faaleagaga. O le faatuai ma le femoumouai o ona fili ia i le olaga nei.

Sei ou fautuaina atu ni tulaga se fa tatou te faataitaia ai le usitai vave ma ia tutumau. Muamua, o le poloaiga lea ina ia fiafia i afioga a le Atua. O lona lua, o le tatalo e le aunoa. Lona tolu, o le poloaiga ina ia avea ma se tagata e totogi atoa le sefuluai. Ma le lona fa, o le aloese mai le agasala ma ona aafiaga matautia. O ia tulaga uma e manaomia ai le faatuatua e amata ma tumau ai. Ma o nei tulaga uma e mafai ona faamalosia ai lou malosi ia iloa ma usitai i poloaiga a le Alii.

O lena ua outou maua le fesoasoani a le Alii e amataina ai. Ia Aokuso, na outou maua ai lenei folafolaga mai ia Peresitene Gordon B. Hinckley, afai o le a maea ona outou faitauina le Tusi a Mamona i le faaiuga o le tausaga: “Ou te folafola atu ia te outou e aunoa ma le faatuai, afai o le a tausia e outou taitoatasi lenei polokalama faigofie, e tusa lava pe ua faafia ona e faitauina le Tusi a Mamona, ae o le a oo mai i totonu o outou olaga ma totonu o o outou aiga se fuataga faaopoopo o le Agaga o le Alii, o se folafolaga mausali ina ia savavali i le usiusitai i Ana poloaiga, ma se molimau malosi atu e uiga i le moni o le i ai o le Alo o le Atua.”³

O le folafolaga tonu lava lena o le faateleina o le faatuatua, tatou te moomia e saunia ai faaleagaga. Ae afai e faatuai ona amata ona tatou usiusitai i lena valaaulia musuia, o aso taitasi o le a atili tele ai le aofai o itulau sa tatau ona tatou faitauina. Ma afai o le a le faitauina foi i ni nai aso, o le a faateleina foi le avanoa e toilalo ai. O le pogai lena na ou filifili ai ia ou faitau e sili atu nai lo lau fuafuaga o le aso, ina ia mautinoa ai o le a ou agavaa mo faamanuiaga folafolaina o le Agaga o le tautinoga ma le molimau ia Iesu Keriso. A uma le masina o Tesema, ua tatau ona ou aoao ai e tatau lava ona amata i le taimi e oo mai ai se poloaiga mai le Atua, ma le mausali i le usiusitai.

Ma e sili atu nai lo lena, pe a ou faitauina le Tusi a Mamona, o le a ou tatalo ina ia fesoasosani mai le Agaga Paia ia ou iloa ai le mea e finagalo le Atua ou te faia. O loo i ai se folafolaga o lena talosaga ua taliina i le tusi lava ia: “O le mea lea, na ou fai atu ai ia te outou, ia outou fiafia i le afioga a Keriso; aua faauta, e faaalia mai ia te outou i le afioga a Keriso mea uma tou te faia.”⁴

O le a ou galue vave loa i le mea e tau mai e le Agaga Paia e tatau ona ou faia, a o ou faitau ma mafaufau loloto i le Tusi a Mamona. Pe a ou faamaeaina le taumafaiga ia Tesema, o le a ou maua ni aafiaga se tele o le faateleina o lou faatuatua ia ou usitai. Ma o le a faamalosia ai lou faatuatua. Ma o le a ou iloa mai ou lava aafiaga, le mea e oo mai ona o le vave faitauina o tusitusiga paia ma tumau ai, e iloa ai mea ua finagalo le Atua ou te faia, ona fai lea. Afai tatou te faia lena mea, o le a lelei ona tatou saunia mo afa tetele pe a oo mai.

O le a i ai foi sa tatou filifiliga e fai pe a maea le aso 1 o Ianuari. E mafai ona tatou filifili e mapuea ona ua maea ma faapea ifo ia i tatou lava: “Ua ou fauina se nofoaga tele o le faatuatua e ala i le vave amataina ma tumau ai i le usiusitai. O le a ou teuina mo taimi e oo mai ai tofotofoga ia te au.” O loo i ai se auala e sili atu ona lelei e sauniuni ai, aua e le umi se taimi e faaaoga ai lenei faatuatua tele [pe a le galueaina]. E mafai ona tatou filifili e faaauau le suesueina o afioga a Keriso i tusitusiga paia ma aoaoga a perofeta soifua. O le mea lenei o le a ou faia. O le a ou toe foi atu i le Tusi a Mamona ma sailiili loloto e le aunoa i ai. Ma o le a ou matuai faafetai lava mo le mea na faia e le lui ma le folafolaga a le perofeta i le aoaoina o au i le auala e maua ai se molimau malosi ma tutumau ai.

O tatalo a le tagata lava ia, e mafai foi ona fausia ai lo tatou faatuatua, e faia mea ua poloai mai e le Atua. Ua poloaiina i tatou ina ia tatalo e le aunoa ina ia le lofituina i tatou. O nisi o puipuiga tatou te manaomia o fesootaiga tuusao a le Atua. Ae o le tele lava [o fesootaiga] o le a oo mai mai le fausiaina o lo tatou faatuatua e usitai. E mafai ona tatou tatalo i aso uma e iloa ai mea e finagalo le Atua tatou te faia. E mafai ona tatou tautino atu e vave faataunuu i le taimi e oo mai ai le tali. O le mea ua ou iloa, e tali mai lava o Ia i talosaga faapena. Ona tatou filifili ai lea e usitai. A o tatou faia, o le a lava lo tatou faatuatua e maua ma o le a le mafai ona faatoilaloina i tatou. O le a tatou maua le faatuatua e toe foi ma saga foi atu ai mo nisi faatonuga. A oo ina oo mai afa, o le a tatou saunia e faia le mea ua poloaiina ai i tatou e le Alii.

Na faasino mai e le Faaola ia i tatou se faataitaiga sili o lena tatalo o le gauai atu. Sa tatalo o Ia i le Faatoaga o Ketesemane a o Ia faataunuuina le Togiola, ina ia mafai ona faataunuuina le finagalo o Lona Tama. Sa Ia silafiaina o le finagalo o Lona Tama mo Ia, o le faia o le mea sa matuai tiga ma matuitui lea e le mafai ona tatou malamalama i ai. Sa tatalo o Ia, e lē mo na o le taliaina o le finagalo o le Tama, ae ia faia foi. Sa Ia faaali mai ia i tatou le ala e tatalo atu ai i le gauai atoatoa ma le naunautai.

O le mataupu faavae o le faaaogaina vave ma tumau ai i le faatuatua, e faatatau foi i le poloaiga o le totogi o le sefuluai. E le tatau ona tatou faatalitali i le faatalanoaga faaletausaga o le sefuluai, tatou te filifili ai e avea o se tagata e totogi atoa le sefuluai. E mafai ona tatou filifili nei. E umi se taimi e aoao ai le taulimaina o a tatou tupe faaalu, ma faatuatua o mea ua tatou maua e mai le Atua lea. E manaomia le faatuatua e totogi vave ai a tatou sefuluai e aunoa ma le faatuai.

Afai tatou te filifili nei e avea ma se tagata e totogi atoa le sefuluai, ma afai tatou te tutumau i le totogiina, o le a faapea ona oo mai faamanuiaga i le tausaga atoa, faapea foi ma le taimi o le faatalanoaga o le sefuluai. E ala mai i a tatou filifiliga i le taimi nei, ia avea ma se tagata e totogi atoa le sefuluai, ma a tatou taumafaiga tumau e usitai, o le a faateleina lo tatou faatuatua, ma e i ai le taimi e faamalūlūina ai o tatou loto. O le suiga lena o o tatou loto e ala i le Togiola a Iesu Keriso, e sili atu nai lo le ofoina atu o a tatou tupe po o mea e maua, e mafai ai e le Alii ona folafola mai ia i latou o e totogi atoa sefuluai le puipuiga i le aso gataaga.⁵ E mafai ona tatou maua le faamautinoga o le a tatou agavaa mo lena faamanuiaga o le puipuiga pe a tatou tautino nei e totogi atoa le sefuluai ma ia tumau i le faia o lena mea.

O le mana lava e tasi o le vave filifili e faaaoga le faatuatua ma tumau i le usiusitai, e faatatau foi i le mauaina o le faatuatua e tetee ai faaosoosoga ma maua ai le faamagaloga. O le taimi sili ona lelei e tetee atu ai i faaosoosoga o le amataga lava. O le taimi sili e salamo ai o le taimi nei lava. O le a tuuina e le fili o o tatou agaga i totonu o o tatou mafuafau ni manatu e faaosoosoina ai i tatou. E mafai ona tatou filifili vave e faaaoga le faatuatua e tafiese ai mafaufauga leaga ae tatou te le’i faia. Ma e mafai ona tatou filifili vave e salamo pe a tatou faia le agasala, a o le’i faavaivaia e Satani lo tatou faatuatua ma saisaitia ai i tatou. O le sailia o le faamagaloga e sili atu lava le lelei i le taimi nei nai lo se taimi mulimuli mai.

A o taoto lo’u tama i lona moega ua lata ina maliu, sa ou fai atu ia te ia, pe le manatu o se taimi lenei e salamo ai ma tatalo mo le faamagaloga o soo se agasala e le’i faaleleia ma le Atua. Atonu sa ia lagonaina sina faaataataga i lou leo atonu o fefe o ia i le oti ma le faamasinoga. Sa na ona ataata filemu o ia, ma faapea mai ia te au, “Oi e leai, Hal, sa ou salamo lava i lo’u olaga atoa.”

O filifiliga i le taimi nei ina ia faaaoga le faatuatua ma ia tumau i le usiusitai, e i ai le taimi e maua mai ai le faatuatua maoae ma le faamautinoaga. O le sauniuniga faaleagaga lena tatou te moomia uma lava. Ma o le a tatou agavaa ai i taimi o faigata mo le mauaina o le folafolaga a le Alii e faapea, “afai ua saunia outou, o le a outou le matatau ai lava.”⁶

O le a moni lena mea pe a tatou fetaiai ma tofotofoga o le olaga faapea ma le manatu e uiga i le oti. Ua tuuina mai e se Tama Faalelagi alofa ma Lona Alo Pele ia i tatou uma le fesoasoani e mafai ona La’ua tuuina mai tatou te manumalo ai i tofotofoga o le olaga ua faataatia mai i o tatou luma. Ma e tatau ona tatou filifili e usitai ona faia ai lea. O aluga o taimi, faapea ma a tatou filifiliga i aso taitasi, [tatou] te atiina ae ai le faatuatua tatou te manumalo ai i tofotofoga o le usiusitai. E tatau ona tatou filifili e vave faataunuu soo se mea e finagalo ai le Atua ia i tatou. Ma e tatau ona tatou filifili e tutumau i tofotofoga laiti o le usiusitai, lea e atiina ae ai le faatuatua tatou te manumalo ai i tofotofoga sili atu, ia o le a faapea lava ona oo mai.

Ou te iloa, o oe ma au o le fanau a se Tama Faalelagi alofa. Ou te iloa, o loo soifua Lona Alo o Iesu Keriso, ma o Ia o lo tatou Faaola, ma sa Ia totogiina le tau o a tatou agasala uma. Na toetu o Ia, ma na faaali mai i Laua ma le Tama Faalelagi i le taulealea o Iosefa Samita. Ou te iloa o le Tusi a Mamona o le afioga lea a le Atua, na faaliliuina e ala i le meaalofa ma le mana o le Atua. Ou te iloa o le Ekalesia moni lenei a Iesu Keriso.

Ou te iloa e mafai ona tatou iloa mea e finagalo le Atua tatou te faia, e ala mai i le Agaga. Ou te molimau atu e mafai ona Ia tuuina mai le mana e faataunuu ai mea ua Ia finagalo tatou te faia, po o le a lava, ma po o a foi tofotofoga e ono oo mai.

Ou te tatalo ina ia tatou filifili i taimi uma e usitai vave i le Alii, i taimi o le malū ma taimi o afa. Pe a tatou faia, o le a faamalosia lo tatou faatuatua, o le a tatou maua le toafilemu i lenei olaga, ma o le a tatou maua le faamautinoaga o le mafai ona tatou agavaa ma o tatou aiga mo le ola e faavavau i le olaga a sau. Ou te molimau atu ai i le suafa o Iesu Keriso, amene.