O Taimi Taua

Tatou te matua faafetai mo lo tatou perofeta soifua, o Peresitene Gordon B. Hinckley, ma mo ana upu ia, “Ia faamanuia e le Atua le Aualofa O Le Ekalesia a Iesu Keriso o le Au Paia o Aso e Gata Ai.”¹ O uso uma lava o lenei Ekalesia o tino o le Aualofa. E mafai ona lagona e i tatou uma le alofa e matua tele naua, i lenei faalapotopotoga na faatuina faalelagi.

E momomo lo’u loto ia te outou uso e, o e na ogaoga ni aafiaga i faalavelave faalenatura e le’i mamao atu nei. Ou te olioli i tala e uiga i tamaitai amiotonu o loo auauna atu ma i latou na tuuina atu i ai auaunaga. O auaunaga, e maua uma ai e le e tuuina atu le auaunaga ma le o loo auauna atu i ai, le alofa o le Alii. I nei taimi o tofotofoga, ou te tatalo ina ia outou lagonaina Lona alofa, faapea foi ma lou alofa, ma le alofa o le toatele o o outou uso o le Aualofa.

Na faatuina e le Perofeta o Iosefa Samita le alāfua mo le Aualofa ina ua ia saunoa i tamaitai i le 1842: “O le natura lava o tamaitai le i ai o lagona o le alofa—ma ua tuuina nei outou i se tulaga e mafai ai ona outou galulue e tusa ai ma na tigaalofa ua toto e le Atua i o outou loto. Afai tou te ola ai i nei mataupu faavae, ua sili lea ma mamalu!” ²

Na faaosofia e le Perofeta o Iosefa ia uso o le uluai Aualofa, e galulue. O le taimi nei, ua tatou maua foi avanoa e galulue ai o ni “tufugaaao o le Atua e faataunuu a’i lenei galuega tele.”³

O le a le uiga o le avea ma tufugaaao i se faaupuga masani? Ou te manatu o le faafaileleina o isi. Sa ta’ua e Iosefa Samita o le galulue “e tusa ai ma na tigaalofa”⁴ o loo i o tatou loto. E tele ni taimi matagofie na ou iloa ai le faaaogaina o a’u o se tufugaaao. Ou te talitonu e faapena foi ona taialaina outou, ma fesoasoani atu pe a outou aoao atu, faamafanafana, ma faamalosiauina.

Peitai, o i tatou o tamaitai, e fai lava si o tatou manatu faatauvaa ia i tatou lava! Talitonu mai ia te au pe a ou fai atu e sili atu lo tatou lelei nai lo le mea ua tatou manatu ai. E ao ina tatou iloa ma fiafia i mea sa’o o tatou faia. O le tele lava o mea tatou te faia e foliga mai e faatauvaa ma lē taua—ua na o se vaega o le olaga i aso fai pea. A valaauina [i tatou] “e avatu se lipoti ia Ieova,”⁴ e pei ona fautua mai le Perofeta o Iosefa, Ou te iloa, o le a tele ni mea tatou te faamatala atu.

Se’i ou avatu se faataitaiga. Talu ai nei sa ou fesili ai ia Elder William W. Parmley e uiga i mea na te manatua i lona tina, o LaVern Parmley, sa avea ma peresitene aoao o le Peraimeri mo le 23 tausaga. E le’i toe tepa le alii i ana lauga i konafesi po o le mau polokalama sa faatuina e ia. Sa ia ta’ua se tasi o taimi aupito taua na te manatua a o 17 ona tausaga, ma o loo sauniuni e a’e i le kolisi. Sa ia manatua lo la nonofo ma lona tina, a o aoao atu [e lona tina] ia te ia le su’iga o se faamau. Faatasi ai ma tamaiti o soo se matutua, o nai faatinoga laiti ma le faatauvaa, e umi lava ona latou manatua.

E le tofu i tatou ma fanau e mafai ona aoao atu i ai nai su’isu’i faigofie. O tamaitai sa i ai i le amataga [o le lotu] e eseese e pei foi o i tatou. O nisi sa faaipoipo, o nisi e leai, o nisi ua oti tane, ae sa fusia faatasi i latou i se faamoemoega. Ina ua ou asiasi atu ia te outou i le tele o atunuu, ma le tele o nofoaga, sa ou lagonaina lo outou alolofa. Uso e, ou te alofa ia te outou, ma ou te iloa e alofa foi le Alii ia te outou.

E toatele outou e le’i faaipoipo. O lena tou te aooga; tou te faigaluega; tou te fou i le Aualofa. O nisi o outou ua leva ona i ai i le Aualofa. Faamolemole talitonu mai pe a ou fai atu: e taua ma manaomia outou taitoatasi. E tofu aumai e outou le alofa, malosi, o manatu, ma se molimau i le galuega. O a outou taumafaiga ina ia ola latalata i le Agaga, e manuia ai i tatou uma aua ua outou aoao e faalagolago i le Agaga mo le malosi ma le taitaiga.

I se tasi afiafi, sa lagona ai e Cynthia, o se tamaitai e le’i faaipoipo, ua uuna’ia o ia e alu e vaai se uso e faiaoga asiasi ai. E le’i i ai le uso lea i le fale. A’o savali atu Cynthia i le fale, sa ia vaaia se teine fomai i fafo o le falemai ma ni teineiti se toalua sa mafatia i ni mu tugā. Ina ua faalogo atu Cynthia o ta’u e le teine fomai le igoa o le teineitiiti, sa vave ona ia manatua: na ia iloaina teineiti nei a o faamisiona o ia i Bolivia i le fa tausaga ua mavae. Ina ua latou toe faamasani i le lotoa o le falema’i, sa manino ua faamaloloina tino o teineiti, ae e leai se lagolago faaleaiga, sa mafatia o la’ua lagona. Sa amata ona asiasi atu Cynthia i teineiti ma faafailele i la’ua. O le gauai atu o Cynthia i le uunaiga a le Agaga; na avea ai o ia ma tufugaaao o le Atua e faamanuia ai nei teineiti ma’imanatu e toalua.

Pe na ia faia lena galuega ona e le’i faaipoipo? E leai. Ona sa usitai atu o ia i le Agaga, ma sa gaua’i atu lona loto i le Atua. Afai tatou te ola i le Agaga, afai o tatou saili i le Alii ma Lana taitaiga, afai o tatou taumafai e toe foi atu i lo tatou Tama i le Lagi, o le a oo mai na taimi matagofie. Ma o le a tatou faatauaina, aua ua avea i tatou ma tufugaaao o le Atua.

O nisi taimi e oo mai ai mea faafuase’i i o tatou olaga, ma e tatau ai ona sui mai le “fuafuaga A” i le “fuafuaga E.” Sa tusia e se tasi uso nofofua: “Ou te le manatu na ou lagonaina le fiafia moni i lo’u olaga faatagata matua, sei vagana ai ina ua ou faia le faaiuga, o lo’u ta’uaogaina o se tagata ma se afafine o lo’u Tama Faalelagi, e leai lava ma se faiā i lo’u tulaga pe ua faaipoipo pe leai foi. I le tulaga lena, sa amata ai ona ou tulimata’i atu i lo’u alualu i luma o a’u lava ia ma le faaleagaga, ae le o le faapea pe ou te faaipoipo ea.”⁵

Vaai la’ia i le tele o mea tatou te aoaoina ma alualu ai i luma pe a tatou fefaasoaa’i a tatou molimau o loo soifua le Alii ma e alofa ia i tatou. E pei ona ou fai atu muamua, afai e i ai se mea se tasi ou te manao ia tupu ia te outou taitoatasi, o lo outou lagonaina lea o le alofa o le Alii i o outou olaga i aso taitasi.

O nisi taimi e oo mai lena alofa i ni auala e le’i fuafuaina. Sa faamae’a le faailoga o Kristen i se iunivesite ma sa faatoa fanau ai lana tama lona lua. Sa manatu o ia e tele naua mea ua ausia e isi o le au faauu, ma sa musu o ia e alu i le taumafataga o le faauuga. Sa faamaonia lona atuatuvale i le taumafataga, ina ua faatonuina le au faauu e lisi atu tulaga faapolofesa ua latou ausia. Sa toe ta’ua e Kristen: “Sa faafuase’i ona ou lagona le ma ma le maasiasi. Sa leai se mea e ta’u ai a’u, leai se tulaga maualuga, leai se tulaga aloa’ia faalegaluega.” Sa atili ai ona leaga, ona sa faitau e le polofesa ia lisi a o ia tauaaoina mai tipiloma i tagata taitoatasi. O le fafine na i luma atu o Kristen, e ese le tele o ana mea ua ausia: ua i ai lona faailoga o le PhD, ae o lona faailoga matuaofaiva lona lua le la, ma sa avea foi ma pulenuu! Sa matua patipati tagata mo lea tamaitai.

Ona oo mai lea o le faasologa ia Kristen. Sa ia tuuina atu i le polofesa lana fasipepa e leai se mea o tusi ai, a o taumafai e taofi ona loimata. O le polofesa o se tasi o ona faiaoga, ma sa ia faamalo atu i ana taumafaiga. Sa tilotilo ifo le polofesa i lana fasipepa e leai se mea o tusi ai. Sa ia faasilasila atu e aunoa ma se toe faatali, “O loo umia e Kristen le matafaioi aupito taua i le lalolagi atoa.” Sa le gagana o ia mo ni nai sekone, ona ia ta’utino atu lea i se leo malosi tele, “O ia o se tina o lana fanau.” Sa le na ona patipati tagata, ae sa tutula’i. Sa na o le tasi le taimi na tutula’i faaaloalo ai tagata i lena po; e mo le tina sa i ai i le potu.

Tina, o outou o tufugaaao o le Atua, ua i ai se tiutetauave paia e aoao ma faafailele a outou fanau. E matua manaomia e fanau iti lou lima alofa ma le agalelei. A outou faamuamuaina a outou fanau, o le a taitaiina foi outou i le ala sili e taulimaina ai i latou.

O outou uma ua i ai fanau matutua atu, e manaomia i o outou aiga. Ioe, e i ai atugaluga, ae e anoanoa’i foi mea e olioli ai. Saili na olioliga! O lo’u tausia o se fanau tama sogasogā se toafa, ua ou aoaoina ai ni nai mea e uiga i le avea ai ma se tufugaaao: Ia faaaoga uma le malosi o nei tausaga! Ia fai lou aiga ma se nofoaga saogalemu, fiafia, ma toafimalie e talia lelei ai uo. Faalogo atu i ai, alofa, ma faamatala atu i lau fanau au tala a o e laitiiti ma talavou.

Ia i ai ni faamoemoega mo lau fanau. Sa fai la matou sa, ma sa ta’u i la ma fanau e moe le Agaga Paia i le vaeluapo. Ina ua tuai mai i le fale, i ni nai taimi, sa fai mai le Agaga Paia ou te alu e su’e mai. Sa ofo nisi o teine sa latou tafafao. Ua matou talie nei i ai—ae ou te fai atu, e lē malie ae ua talie nei aua ua matutua.

Ia e i ai iina mo lau fanau. Nofo i luga o le moega ma sagisagi fiafia i talanoaga i le leva o le po—taumafai ia pupula ou mata! Tatalo i le Alii ina ia musuia oe. Ia faatele ona e faamagalo atu. Filifili po o a mea e sili ona taua. Ia molimau soo atu e uiga ia Iesu Keriso ma Lona agalelei faapea foi le Toefuataiga. Ae o le mea sili, ia latou iloa lou faalagolago tele i le Alii.

A oo ina matutua lau fanau ma o ese atu; afai e te le’i faaipoipo, pe ua tete’a pe ua oti foi se tane; aua nei avea na tulaga ma mea e taofiofia ai lou naunautai e faasoa atu ou aafiaga i le olaga. E manaomia lou leo.

I se lesona a le Aualofa i le Aso Sa i la’u uarota, sa matou talanoaina pe o a mea e ta’uleleia ai se faaipoipoga. Fai mai se tasi uso, o Lisa; “Atonu e le tatau ona ou tautala atu leaga ua ma tete’a. Peitai, o le mea lava ou te fiafia ai, o a’u feagaiga i le malumalu.” Ina ua mae’a le lesona, sa ou fesili i ni uso fou talavou o le Aualofa, “pe o le a se mea na latou fiafia i ai i le lesona?” Sa latou fai mai, “o le faamatalaga a Lisa na sili ona matou tosina i ai.”

O lea, o’u uso matutua pele, ua ou vaai atu i le faatusa o le Atua i o outou foliga tamalii. E anoanoa’i soifua ua tosina mai i lo outou poto ma le onosa’i ma le poto masani. E masani ona fai mai lo’u tina faale-tulafono maoa’e o Mary, ua 90 nei ma ona tupu ona tausaga, “E manatu tagata ona ua ou olomatua ou te le iloa se mea.” Se’i ou faamatalaina atu mea sa ia iloaina ma sa ia faia. A o nofo ai i se fale mo tagata matutua, sa fesili Mary i le pule pe mafai ona latou faaaogaina se potu mo a latou sauniga lotu. Sa fai atu le pule, e leai, ona e leai ni aulotu o le nofoaga autu. Sa musu Mary e talia lea tali! Sa tauanau pea e Mary ma isi uso matutua, seia i’u lava ina faaavanoa e le kamupani se potu. E le’i pine ae faavae se paranesi, ma sa potopoto ai le au paia i Aso Sa taitasi e taumamafa i le faamanatuga ma faafou ai a latou feagaiga. E le o se papupuni le matua, i le avea ai ma se tufugaaao o le Atua.

E le masino auala e avea ai ma tufugaaao o le Atua. Mo se faataitaiga, ia avea oe ma ituaiga o faiaoga asiasi e te manao lava i ai; fesili i se talavou nofofua pe o a mea e manao e fai ae le o le fesili pe aisea ua le faaipoipo ai; faasoa atu ae le o le faaputuputu mai [o au mea]; filifili ma le faaeteete ou ofu, upu, ma faafiafiaga; mata ataata i lau tane po o se tamaitiiti ua iloa ua latou matua’ia se faaletonu po o se lototiga; opo mai se tamaitai talavou; faiaoga ma se loto fiafia i le vasega pepe; faaali atu e ala i ou uiga faaalia o loo e maua le fiafia i la tatou faigamalaga. Na saunoa le Perofeta o Iosefa e uiga i na taumafaiga, “Afai tou te ola ai e tusa ma o outou faamanuiaga e lē lau maua, e le mafai ona taofia agelu mai le avea ai ma a outou aumea.”⁶

Ou te molimau atu ua tatou punoua’i i le galuega a le Atua. Faafetai atu i lo outou faamaoni i o outou aiga, o le Aualofa, ma le Ekalesia. Faafetai atu i le avea ai o outou ma tufugaaao o le Atua, e faataunuu a’i lenei galuega tele. Ia outou lagonaina le alofa o le Atua i o outou olaga ma ia outou faasoa atu lena alofa i isi, o la’u tatalo lea, i le suafa o Iesu Keriso, amene.