Faamatalaga

I le avea ai o a’u o se peresitene o Tamaitai Talavou ou te faaaogaina lelei ai lava tusiga o loo sau i le Liahona, aemaise lava Pepa Lautele o i ai se Savali, aua e fesoasoani ai i le autalavou ia manatunatu i mataupu faavae o le talalelei ma faaaoga i o latou olaga. Ou te faaaogaina lauga ma tala i totonu o le Liahona aua o ni tala moni e uiga i tagata o e atonu e eseese a latou tu ma aganuu, ituaiga, po o itupa—ae o loo i ai lava a tatou molimau ma le talalelei moni o loo laugatasia ai i tatou.

Jessica Moreira de Macías, Ekuatoa

I se tasi o Aso Toonai a o avea a’u o se epikopo, sa ou sauni matou te o ma lo’u aiga i le matafaga ae uunaia a’u e le agaga ou te nofo. Na fesili mai lo matou aiga po o le a le mea ua tupu, ae na ou tali atu i ai e le mafai ona matou o ona e tatau ona ou asiasi atu i se tasi ulugalii. Ou te le’i malamalama i le mafuaaga, ae na ou foi i le fale ma tatalo ma ou lagona ai e tatau ona ou alu ma ave se kopi o le Liahona. Ou te leiloa po o le a le savali e tatau ona ou tuuina atu, ae ina ua ou taunuu na ou lagona ai e tatau ona ou talanoa atu e uiga i le faaipoipoga e faavavau.

Mulimuli ane, na ta’u mai e le tama ua auina atu a’u ia i laua e le Atua ona sa faia se la misa lea na faatoa tuu lava ina ua ou taunuu atu. O le mea na manaomia e le na ulugalii i lena taimi o le savali lea na ou avatua.

E taua tele le i ai ia i tatou o le Liahona i totonu o o tatou aiga aua tatou te le iloa po o le a le taimi o le a tatou manaomia ai e foia ai o tatou faafitauli. Ou te faafetai i le maua pea o le Liahona i totonu o lo’u aiga. Ou te lagona le malosi mai o le Agaga pe a ou faitau i ai ma saili ia faatinoina ona aoaoga.

Marcial F. Lima, Pasila

O le mekasini o le Liahona o se fesoasoani moni tele lea ia te au. O taimi uma taitasi ou te faitau i ai, e fesoasoani mai ai ia te a’u ia ou tulimatai atu i mea e tatau ona ou faia i aso uma taitasi. E tuuina mai ia te a’u le lototele ou te manaomia e faafeagai ai ma ou tofotofoga, e tuuina mai ia te a’u le faamoemoe pe a foliga mai ua leai se faamoemoe o mea uma o loo siosiomia ai au, ma e fesoasoani foi ina ia faamalamalamaina lo’u mafaufau i soo se taimi lava ou te puapuagatia ai. O se mea faigaluega sili foi i lo’u toalua ma a’u i taimi uma ma te saunia ai lesona o afiafi faaleaiga. O savali uma ma tala e musuia, ma a ou faitau i mea na tutupu i isi tagata o le Ekalesia ia e tutusa lava ma mea na oo foi ia te a’u lava ia, e faaopoopoina mai ai lo’u malosi. O taimi uma lava ou te faitauina ai le Liahona, ou te maua ai le lagona e le o tuua na o au. E alofa le Tama Faalelagi ia te au, ua Ia faailoaina mai ia te a’u e ala mai i lenei mekasini.

Bernadette Santo Domingo, Filipaina

E le’i leva lava talu na uma ona ou papatiso, ae tuu mai e se tasi ua leva ona auai i le Ekalesia ana lomiga uma lava ua tuanai o le Liahona (1999–2002), talu mai lava la lena taimi na ou faatauina ai le Liahona. O soo se taimi lava foi ou te mafaia ai, ou te faameaalofaina atu ai foi se kopi o le Liahona.

Na ootia lava a’u i le tala na saunia e John W. Welch, “O le Samaria Agalelei: O Faatusa Faagaloina” (Fep. 2007). Na ou aoaoina ai o le mea aupito sili ona taua i tagata ola o le malamalama, agaalofa ma le auauna atu.

Ginalva Pedro da Silva, Pasila

E lua o’u valaauga: O a’u o se faifeautalai a le paranesi ma le fesoasoani muamua i le au peresitene o le faalapotopotoga a Tamaitai Talavou. E fesoasoani le Liahona ia te a’u i le sauniaina o lesona ma faatulaga gaoioiga mo le au talavou. Ou te tuuina atu le Liahona i a’u uo e le o ni tagata o le Ekalesia, ma sa latou fiafia e faitau. Ou te iloa e alualu i luma le galuega a le Alii i malo ma ituaiga uma.

Natasha Vavenko, Ukraine