Sailia o le Faatuatua i le Alii o Iesu Keriso

Mai lava i le amataga o taimi, na iloa ai e perofeta o Iesu Keriso o le Alo o le Atua, e uiga i Lana misiona i la le tino atoa ma Lana Togiola mo tagata uma.

Ana faapea na tatou ola i aso o nei perofeta, faamata tatou te talitonu i a latou upu? Faamata tatou te maua le faatuatua i le afio mai o le Faaola?

I Amerika anamua, na valoia ai e Samuelu le Sa Lamanā e faapea, o le po o le soifua mai o le Faaola “e i ai i le lagi malamalama tetele, … e iu ina i ai i tagata e peiseai o le ao” (Helamana 14:3).

E toatele na talitonu ia Samuelu ma tautau atu a latou agasala, salamo, ma na papatisoina. Ae peitai, o le toatele lava o tagata Sa Nifaē na tauaso i latou i “faailoga ma mea ofoofogia”; nai lo le gauai atu i na mea, sa faalagolago tagata Sa Nifaē “… i lo latou lava poto, ua faapea atu: Ai o i ai nisi mea ua matea tonu e le (au talitonu), … ae peitai … e le tusa lenei mea ma le mafaufau lelei, ia afio mai se tasi e pei o le Keriso” (Helamana 16:15–18).

I na ona aso ma o tatou nei taimi, o nisi o tagata tetee, na taua o aneti-Keriso, na faaliliuina loto o isi tagata e faapea e le manaomia se Faaola ma Lana Togiola. Ina ua faataunuuina mulimuli ane le valoaga a Samuelu “e fai ai le ao e tasi ma le po e tasi ma le tasi ao ae leai se po” (Helamana 14:4), ai se olioli tele naua na faatumulia ai loto o i latou na talitonu i perofeta! “Ma ua taunuu mea uma, o iota uma lava, e tusa ma upu a perofeta” (3 Nifae 1:20). O se fetu fou na iloa, e tusa ma folafolaga faavaloaga. O i latou na talitonu i upu a perofeta na latou iloa le Faaola ma sa faamanuiaina i le mulimuli ia te Ia.

O valoaga o le uluai afio mai o Keriso na faataunuuina “iota uma lava.” O se taunuuga la, e toatele tagata i le lalolagi atoa na talitonu na afio mai lava le Faaola ma na soifua i le vaeluaga o taimi. Ae o loo tele ma tele pea lava nisi o valoaga e ao ona faataunuuina! Ua tatou faalogo i perofeta soifua o vavalo ma molimau mai i le Afio Mai Faalua o Keriso. Latou te molimau foi i faailoga ma mea ofoofogia o loo siomia ai i tatou, o loo tau mai ai ia i tatou e moni lava e toe afio mai Keriso. Pe o tatou filifili ea e talitonu i a latou upu? Po o, inoino i a latou molimau ma lapataiga, pe o tatou “savavali i le pouliuli i le aoauli” (MFF 95:6), ma mumusu e tilotilo atu i le malamalama o valoaga o ona po nei ma tetee e faapea o le a toe afio mai le Malamalama o le Lalolagi ma nofotupu ia i tatou?

I le faagasologa o lo’u olaga, e toatele ni tagata lelei ma le agaalofa o e na latou tausisi i uiga faaKerisiano. Ae peitai, sa leai se faatuatua i nisi e faapea o loo soifua o Ia, ma o Ia o le Faaola o le lalolagi, ma ua toefuataiina mai Lana Ekalesia. Talu ai ona ua latou le talitonu i upu a perofeta, ua latou misia ai le olioli o le talalelei ma ona sauniga faaola i o latou olaga.

E i ai sa’u uo faapelepeleina o lē, i se tasi aso i se feiloaiga matagofie faaleuso na ia fesili mai ai, “Elder Hales, ou te fia talitonu, na ou manao lava ou te talitonu, ae faapefea ona ou faia?”

Na tusia e le Aposetolo o Paulo, “E tupu le faatuatua i le taulogologo atu, o le taulogologo atu foi o i le afioga a le Atua lea” (Roma 10:17). O le mea moni lava o loo e faitauina lenei savali, i le taimi o le Kerisimasi po o soo se isi lava taimi o le tausaga, o lona uiga o loo e faafofoga i afioga a le Atua. O le laasaga muamua lava o le sailia o le faatuatua ia Iesu Keriso, o le faaavanoa lea o lou loto e pa’i atu i ai Ana afioga ia o loo tulei atu i fofoga o Ana auauna, o perofeta. Ae ua le lava ai i le na o le faalogo i Ana afioga ma faapea ai o le a liliuina ai oe. E tatau lava ona faia lau vaega. O le faalogo e manaomia ai se galuega e sili atu—o le manatu mamafa lea i mea ua aoaoina atu, manatunatu i ai ma le faaeteete, ma iloilo maeaea i ai i lou mafaufau. E pei ona aoaoina e le perofeta o Enosa, o lona uiga o le tuuina atu lea i molimau o le talalelei i isi ina ia “[tuia] ai [o tatou] loto” (Enosa 1:3). Sei o tatou iloiloina loloto le mea na tupu ia Enosa lea na atiina ae ai lona faatuatua:

O le mea muamua lava, na faalogo Enosa i upumoni o le talalelei mai lona tama. Lona lua, na ia faatagaina aoaoga a lona tama e uiga i le “ola e faavavau, ma le olioli tele o le au paia” e tuia ai lona loto (Enosa 1:3). Lona tolu, na faatumulia o ia i le naunau ia iloa mo ia lava pe moni nei aoaoga ma po o fea foi o tu ai o ia i luma o Lē na faia o ia. Ina ia faaaogaina upu a Enosa, “Sa matelaina lou agaga” (Enosa 1:4). I le i ai ia te ia o lenei matelaina tele i le faaleagaga, na agavaa ai Enosa lava ia e maua le folafolaga a le Faaola: “Amuia i latou uma o e fia aai ma fia inu i le amiotonu, aua e maoona i latou i le Agaga Paia” (3 Nifae 12:6). Lona fa, na tusi faamaumauina e Enosa, “Ona ou tootuli ai lea i luma o Lē na faia au, ma ua ou tagi atu ia te ia i le tatalo faatauanau ma le aioi atu mo lo’u lava agaga na ou tagi atu ia te ia i le aso atoa, ioe, ina ua po lava le aso ua ou alaga atu pea i le lagi” (Enosa 1:4). Sa le’i faigofie. E le vave ona maua le faatuatua. O le mea moni, na faaupuina e Enosa le mea na tupu ia te ia i lana tatalo o se “fagatuaga na [ia] faia i luma o le Atua” (Enosa 1:2). Ae na maua lava le faatuatua. E ala i le mana o le Agaga Paia na ia maua ai se molimau mo ia lava.

E le mafai ona tatou maua le faatuatua faapei o le faatuatua o Enosa e aunoa ma se fagatuaga muamua ma le Atua i le tatalo. Ou te tautino atu o le taui ua talafeauga ma le taumafaiga. Afai e te faia nei mea ma le faamaoni ma tumau ai, o le a faataunuuina i lou olaga upu na fetalai atu ai le Keriso i Ona soo: “Ia outou ole atu, ona foaiina mai ai lea ia te outou; ia outou saili ona outou maua ai lea; ia outou tuitui atu, ona toina ai lea ia te outou” (Mataio 7:7).

O le taimi lava tatou te maua ai le amataga o lo tatou faatuatua ia Iesu, o le a faatagaina loa e lo tatou Tama Faalelagi lo tatou faatuatua ina ia faamalosia. E tupu lenei mea i le tele o auala, e aofia ai le fetaiai ma puapuaga. E maua lo tatou faatuatua e ala i le tatalo, faatasi ai ma se faanaunauga moni ia faalatalata atu i le Atua ma talitonu ia te ia Na te tauaveina o tatou mafatiaga ma tuuina mai tali i faamoemoega o le olaga e le’i maua ni faamalamalamaga: O fea na tatou o mai ai? O le a le pogai ua tatou i ai i lenei lalolagi faaletino? Ma o fea foi tatou te toe o atu i ai pe a mavae lenei olaga faaletino i luga o le fogaeleele?

A oo mai luitau o le olaga faaletino, ma e oo mai lava mo i tatou uma, e foliga mai o le a faigata ona talitonu pea. I nei vaitaimi, ua na o le faatuatua lava i le Alii o Iesu Keriso ma Lana Togiola e maua ai e i tatou le filemu, faamoemoe, ma le malamalama. Ua na o le faatuatua lava na Ia puapuagatia mo i tatou o le a tatou maua ai le malosi e tumau ai e oo i le iuga. Pe a tatou maua lea faatuatua, tatou te iloaina se suiga tele i o tatou loto, ma, e pei o Enosa, e faamalosia atili ai i tatou ma amata ona lagona se manao mo le lelei o o tatou uso ma tuafafine. Tatou te tatalo mo i latou, ina ia faapena foi ona faamalosia i latou e ala i le faatuatua i le togiola a lo tatou Faaola.

Sei o tatou iloiloina nai molimau faaperofeta nei e uiga i aafiaga o le Togiola i o tatou olaga. A o tatou iloiloina, ou te valaaulia outou ina ia faagoto ifo i o outou loto ma faatumulia ai po o le a lava le tele o lou matelaina o loo i ai i lou agaga.

“Ma o lena lava aso na afio ifo ai i luga o Atamu le Agaga Paia, o Le e molimau i le Tama ma le Alo, o le na faapea mai: O a’u o le Atalii e Toatasi na Fanaua o le Tama mai le amataga, … ina ia togiolaina oe, talu ai ona ua e pau” (Mose 5:9).

Na molimauina e Amona, “Faauta, ua ou vaaia lo’u Togiola, e afio mai foi o ia, e fanau mai i se fafine, e togiolaina foi e ia tagata uma o e faatuatua i lona suafa” (Alema 19:13).

Ma i le faaiuga, o Iosefa Samita—o se taulealea e 14 tausaga le matua—na ia faatinoina ma le le masalosalo le faatuatua ma mulimuli i le faatonuga a Iakopo ina ia “ole atu ia i le Atua” (Iakopo 1:5). Na faaali atu le Atua le Tama ma lona Alo, o Iesu Keriso, ma tuuina atu ia te ia faatonuga. E maeu le mamalu o lenei Uluai Faaaliga i le perofeta o lenei tisipenisione mulimuli! I le sefuluono tausaga mulimuli ane i le Malumalu i Katelani, na toe faaali ane ai le Faaola ia te ia ma tautino mai, “Ua ma vaaia le Alii … ma o lona siufofoga e pei o le taalili o vai tetele, o le siufofoga lava o Ieova, ua faapea mai: O a’u o lē muamua ma lē mulimuli; o a’u o lē o loo ola, o a’u o lē na fasiotia; o a’u o lo outou fautua i le Tama” (MFF 110:2–4).

Ia i latou uma o e o loo matelaina o latou agaga mo le faatuatua, ou te valaaulia outou “ia outou saili ia Iesu ua tusia e le au perofeta, ma le au aposetolo” (Eteru 12:41). Ia avea a latou molimau e faapea, na foaiina mai e le Faaola Lona soifua mo oe ina ia goto ifo i lou loto. Ia saili se molimau e uiga i lenei upumoni e ala i le Agaga Paia ma le tatalo, ona e vaai lea i le faamalosia o lou faatuatua a o e faafetaiaia ma le olioli luitau o lenei olaga faaletino ma saunia ai mo le ola e faavavau.

Na afio moni mai lava Iesu Keriso. Sa soifua o Ia. Ma o le a toe afio mai o Ia. O se upumoni matagofie lena e tauaveina i o tatou loto i le taimi o le Kerisimasi ma le tausaga atoa.