Manatu Faaopoopo mo Taimi o Fetufaaiga, Tesema 2007

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Tesema 2007. Mo le lesona, faatonuga, ma gaoioiga e o faatasi ma nei manatu, tagai “O Le Meaalofa Silisili” i itulau U4 ma le U5 o le vaega a tamaiti i le lomiga lenei.

Faaali atu meaalofa e tolu ua afifi. Ta’u atu i tamaiti e faapea o le taimi o le Kerisimasi tatou te faamanatu ai le meaalofa o le afio mai o Iesu Keriso i le lalolagi (tagai Ioane 3:16). Ia faamalamalama atu faapea o le afio mai i le lalolagi ma folafola mai e toe afio mai, ua tuuina mai ai e Iesu ia i tatou ni meaalofa ofoofogia se tolu! Ta’u atu ia i latou faapea o le taliina o fesili e uiga ia Iesu Keriso e mafai ai ona latou mauaina po o a na meaalofa e tolu. (A o le’i amataina le Peraimeri, tusi i mataitusi lapopoa ia upu filemu, fiafia, ma le alofa, ona ‘oti lea o upu taitasi i ni tamai paso.) Ia valaaulia ni tamaiti se toatolu e uu i luga ia afifi. Ia faamalamalama atu a sa’o ona taliina e tamaiti ia fesili taitasi, o le a latou mauaina se fasi paso lea o le a ta’u atu ai ia i latou po o le a le latou meaalofa. Ia tuuina atu fesili e pei o le “O ai le tina o Iesu?” (Maria), “O ai le tama o Iesu?” (Tama Faalelagi), “O fea e mafai ona tatou faitau ai e uiga ia Iesu?” (i totonu o tusitusiga paia), “Afai tatou te fetagofi atu i le faamanatuga, o le a le mea o loo faatusa i ai le areto?” (tino o Iesu). O taimi uma e sa’o ai tali taitasi e tuuina mai, ia tuu atu se fasi paso e o faatasi ma le pusa i le tamaitiiti o loo uuina. Ia tuu atu i vaega o tamaiti e galulue faatasi e faamaea le paso ma faaali mai le upu. I le faaiuga o le taaloga, o le a faaali mai i atigipusa ia upu filemu, fiafia, ma le alofa.

Afai e tuufaatasia e tamaiti ia upu, ia tuu atu ia i latou e tatala ia afifi. O totonu o afifi taitasi o loo i ai se upu autu ma se mau: Filemu—Ioane 14:27; Fiafia—Mosaea 2:41; Alofa—Ioane 15:13. Tuu atu i le tamaitiiti o loo uuina le pusa e faitau le mau. Usu se pese po o se viiga e uiga i le Faaola, ma tuu atu le molimau i le filemu, fiafia, ma le alofa lea e oo mai e ala i le mulimuli ia te Ia.
Ina ia aoao atili e uiga ia Peteleema, vaevae le Peraimeri i ni vaega se tolu. Tuu atu i vaega taitasi se tasi o mea nei: se faafanua o le Nuu Paia (o loo maua i le Tusi Paia po o le potutusi o le tou falelotu); mau o le Mika 5:2; ma le mau o le Ioane 6:51. Tuu atu i le vaega muamua e faaali atu le vaega e i ai Peteleema. Tuu atu i le vaega lona lua e faitau le Mika 5:2 ma faamalamalama atu faapea o le fuafuaga a lo tatou Tama Faalelagi e mo Iesu ina ia fanau i Peteleema. Tuu atu i le vaega lona tolu e faitau le Ioane 6:51 ma faamatala atu pe aisea ua avea ai Iesu ma Areto o le Ola. Ta’u atu i tamaiti e faapea o le uiga o le upu Peteleema o le “Fale o le Areto.” Ia faamanino atu faapea o le Areto o le Ola sa fanau i totonu o le Fale o le Areto.

Aoao atu le fuaiupu muamua “Peteleema e, le Aai” (Viiga, nu. 122) po o se isi viiga o le Kerisimasi. Ia faamatala atu pe na faapeī foliga o Peteleema i le po na fanau ai Iesu. Ta’u atu le auala sa tulimatai atu ai tagata e amata mai ia Atamu ma Eva mo le afio mai o Keriso i le lalolagi. Sa faamoemoe tagata o le a Ia afio mai, ae o nisi sa fefefe ina ne’i le afio mai o Ia.

Tuu atu i tamaiti e tusi se ata o Peteleema (tagai i le “Gaoioiga Tusiata,” O Le Aoao Atu, E Leai Se Isi Valaauga e Sili Ai [1999], 175–76). Ia molimau atu faapea o le afio mai o Iesu Keriso i le lalolagi sa faataunuuina ai valoaga ma ua mafai ai ona tatou toe mafuta faatasi ma le Atua.