O Le Sasi i le Koko Vevela

Sa malulu! Na faanatinati atu Nikola ma ana uo i totonu o le faleaiga pisi e faamafanafana ai mo ni nai minute. A o latou tutu ai i totonu, na faatausisila atu Nikola i le lisi o meaai a le faleaiga.

“O le a oka sa’u koko vevela,” na ia faapea atu ai.

“Ma a’u foi” o le tala lea a Peti.

Na tilotilo Audrey i lana uati, ae faapea mai Heta, “E le o toe lava se tatou taimi. Ia manatua o lea e sau lo’u tina e piki tatou i le ta o le lua.”

Na tilotilo atu Nikola i le laina umi. E manaia ae maua se ipu koko vevela e faamafanafana ai o ia a o tau faauma la latou faatauga o le Kerisimasi. “Ma te o atu ma Peti tatou fetaui i le fale ofu lea e sosoo atu,” na ia fai atu ai ia Heta. “E le umi lava.”

Na o ese atu Heta ma Audrey, ae tutu Peti ma Nikola i le laina.

“Vaai foi laia, e maua foi le Vanila Farani,” o le tala lea a Peti, a o tusi atu i le lisi o meaai.

Na malosi le pupula a Nikola. “Tai manaia! E ese lo’u fiafia i le Vanila Farani ma le koko vevela.” Ona faanonou lea o ona mata, i le le mautinoa. “E le o faapea mai Vanila Farani toe koko vevela,” o lana tala lea. “E na o le Vanila Farani lava la e tusi mai ai.” Na u lona laugutu. “E i ai foi se mea e ta’u o se kofe Vanila Farani?”

Na faamimigi tauau o Peti. Ina ua oo mai le taimi e fai ai le oka a Nikola, na ia fesili atu i le tagata faigaluega ina ia mautinoa ai.

“O le koko vevela,” o le faamautu mai lea a le tina o loo i tua atu o le laulau.

“Lelei!” o le tala lea a Nikola. “Aumai la sa’u Vanila Farani lapoa.”

Na oka foi le ipu faapena a Peti, ona la tuua loa lea o le faleaiga. Ina ua latou feiloai ma Heta ma Audrey, na sosogi atu Nikola i le ausa o lana ipu. Ona ia mapuea lea. “E pei uma lava o se kofe Vanila Farani lenei!”

Na miti e Peti lana ipu. “E sao, alii. Ia soia ia. E manaia ma vevela. Ua amata ona ou mafanafana mai.”

“Ae o le kofe le mea lea!”

“E a la?”

Na ta’u atu e Nikola i lana uo, “Ou te auai i le Ekalesia Iesu Keriso o le Au Paia o Aso e Gata Ai. E le tatau ona ou inu kofe.”

“Pau lava lenei o le taimi e mafai ona e inu kofe ai,” o le fai atu lea a Heta ma le le onosai. “E te le tau atoatoa i sekone uma taitasi o le aso. Matou te le taua lava i se isi. Inu loa. E tatau ona tatou faatopetope.”

Na mafai ona iloa atu e Nikola ua umi atu lava le laina, ma ua le o toe tele foi se taimi o totoe e faauma ai le faatauga. Ae na iloa lelei le mea na ia manaomia e fai. “O le a ou faafesuiaia lenei ipu i se koko vevela,” o lana tala maumaututu lea. “Muamua atu outou. Tatou fetaui i le faleoloa o mea taalo.”

Na amata ona savali ese atu na o ia, ae na vave ona maua atu e Audrey. “O le a ou faatali ma oe.” Na ia fai mai ai. O Audrey o se tamaitai foi o le Au Paia o Aso e Gata Ai.

A o tutu tamaitai i le laina, na faapea atu Audrey, “Ua ou fiafia lava e te le’i inuina le kofe.”

Na ataata Nikola. “Faapena foi au.”

Ina ua faamatala atu e Nikola i le tina i tua o le laulau faatau o le mea inu lea na aumai o le kofe moni lava, na faatoese mai le tina ma toe sui mai lana ipu i le koko vevela. Ona faanatinati atu lea o Nikola ma Audrey i le malulu e faafetaui a la uo. Na lagona e Nikola le mafanafana i totonu o ia, ae le na o le koko vevela na maua ai le mafanafana. Na ia iloa na ia filifilia le mea tonu. E tusa lava po o a mea na fai mai ana uo e uiga i le leai o se tasi na te iloaina, na silafia e le Tama Faalelagi. Ma na ia lagona o le a mitamita o Ia ia te ia.

Ata

“Ia tu mai tagata o le lalolagi… . Filifili ia e ese mai; o le a faamanuiaina oe faaletino ma faaleagaga.”

Elder Russell M. Nelson o le Korama a Aposetolo e Toasefululua, “Ulufia po o le Saolotoga,” Liahona, Ianuari 1989, 8–9.