O Le Fitafita Fou

Na ou tago ma sii ae i luga le talafaamaumau a lo’u toalua ma toe faitauina lana tala e uiga i le mauaina o le Ekalesia i le silia ma le afa seneturi ua tuanai:

“A o avea a’u o se alii talavou e 20 tausaga le matua i le 1951, sa ou i ai i le aoga a satini i le ‘Olo o Kronborg [i Tenimaka]. O le po o le Kerisimasi sa ou tiute ai i luga o le auvai o loo siomia faataamilomilo ai le ‘olo. I se tasi o taimi na ou tu ai, tilotilo a’e i fetu, ma ou lagonaina e i ai nisi mea e sili atu i le va o le lagi ma le lalolagi nai lo mea sa ou manatu i ai. I se isi faaupuga, na amata ona ou talitonu e i ai se Atua, lea ou te le’i matua talitonu faalelei lava i ai muamua. O o’u matua o ni tagata e matuai le lolotu lava, ma sa na o papatisoga, faamauga, faaipoipoga, ma maliu matou te o mai ai i le lotu.

“I ni masina mulimuli ane sa avea ai a’u ma se satini, ma sa i ai sa’u lava vaega: e 44 fitafita fou—po o le aofaiga tonu lava, e 43 faaopoopo le 1. O le tasi lea e matua ese lava o ia, ma ina ua ou fesili atu ia te ia pe o le a le mea ua ese mai ai lava o ia mai isi, na fai mai o le a ia tauina mai ia te a’u i le afiafi i totonu o lo’u potu.

“O iina na ia ta’u mai ai ia te a’u e uiga i le Ekalesia a Iesu Keriso o le Au Paia o Aso e Gata Ai mo afiafi sosoo e lima. I le aso lona ono, o le Aso Sa lea, na ou alu ai i le lotu. Ma o iina na amata ai lo’u olaga fou.

“Na matuai o’u aafia lava i le Ekalesia. Na faifai malie lava ona amata ona ou masani i tagata o le Ekalesia. Na ou iloa ai o le fitafita fou i la’u vaega e leai lava sona eseesega tele ma tagata o le aulotu.

“Na ou talitonu e moni le Ekalesia, o le Ekalesia a le Alii—ma na papatisoina a’u. O se aso lava e moni le ofoofogia.”

Ou te faafetai i lo’u toalua, o Orla, o le na maliu i le 1998, na ia tusia nei upu i lana lava talafaasolopito. O lena po o le Kerisimasi ua leva, ina ua faatoa lagonaina e lo’u toalua mo le taimi muamua o loo i ai moni lava se Atua, ma ana talanoaga ma le fitafita fou o le mafuaaga lena o le ma feiloaiga, ma faamauina i totonu o le malumalu, ma maua se fanau e toalima—o e ua latou fanauina foi ni fanau ma fanauina e a latou fanau ni fanau i totonu o le matou aiga. Ua matou maua se olaga tamaoaiga i totonu o le Ekalesia ma le tele o faamanuiaga. Ou te faafetai mo lena po o le Kerisimasi faapea foi ma le fitafita fou i totonu o Tenimaka i na tausaga e tele ua leva.