O Se Leo o le Lapataiga

Sa matou nonofo ma ou matua mo ni nai aso, sa fai sina malologa ona sa ou ma’i. Ae ua oo nei i le taimi ou te foi atu ai i le fale, o lea na matou faamavae ai ma ou alu loa i le pasi e agai atu i Leicester, i le ogatotonu o Egelani. Sa ou matamata i le te’a atu o atufalega ma tagata na pisi i a latou fuafuaga o aso taitasi. O se aso lagi lelei ma manaia o le taumafanafana i le 1976, ma sa ou lagonaina le fiafia, ua saunia e taulimaina soo se mea ma te fetaiai. Sa ou alu ese mai le pasi ma savali atu i le maila i le fale faatali nofoaafi.

Sa feoma’i le pasese i luga o le tulaga o le fale faatali nofoaafi a o latou faatalitali mo nofoaafi e malaga ai i nofoaga eseese. Na faalogoina mai lea taimi ma lea taimi se leo mai le faaleotele leo e faasilasila mai ai nofoaafi.

E le’i umi ae taunuu mai loa le nofoaafi na ou faatalitali i ai. Ae a o ou laa atu i luga [o le nofoaafi], na oo mai ia te au se lagona manino lava. Sa ou toe laa i tua, ma se lagona malosi e le tatau ona ou alu i le nofoaafi ae e tatau ona ou foi atu i le fale i se pasi. Sa ou faatauina se pepa malaga o le alu ma le toe foi i le nofoaafi, ma sa ou tau le gafatia le faatauina foi o se pepa malaga i le pasi. Ae peitai, sa matua malosi lava lo’u lagona, o lea na le mafai ai ona ou le amanaiaina.

Na fai si ou fou i totonu o le Ekalesia, ae na ou lagonaina le Agaga ina ua papatisoina ma faamauina au. A o ou toe laa atu i le nofoaafi, sa ou faalogoina se leo filemu na fai mai, “Leai!” Sa ou tu faasasao mo se taimi e vaai pe ou te toe faalogoina, ma na toe fai mai foi le leo, “Leai!”

O le taimi lava na ou tuua ai le fale faatali nofoaafi, na ou lagonaina se mafanafana na faapea ona faamaonia ai le sa’o o la’u filifiliga. Ina ua ou taunuu atu i le fale faatali pasi, e silia ma le itula na ou faatalitali ai mo se pasi e aveina atu a’u i le fale i Coventry. Ana ou alu i le nofoaafi, semanu ua leva ona ou taunuu i le taimi lenei—ia o ou mafaufauga na. Ae o le pasi, na faatoa ou taunuu atu i le fale i le afiafi po lava.

I le kiina o le televise i tala fou, sa ou te’i i le mea na ou vaaia. O le nofoaafi na tuu ou te alu ai na lavea i fafo mai o Nuneaton! E toatele tagata sa manunua ma ni nai tagata na maliliu ai.

E masani ona ou nofo i potu pito i luma, e i tua tonu lava o le afi o le nofoaafi—o se itu na matuai faaleagaina lava. Sa le uma lo’u mafaufau i le mea na semanu e tupu ia te au pe a na ou le faalogo i le leo itiiti ma le filemu. Sa le uma foi lo’u mafaufau i galuega uma o talafaasolopito o aiga ma le malumalu mo o’u tuaa ua maliliu, e semanu e le mafai ona ou faamaeaina pe a na ou lavea tigaina pe oti ai.

Ou te faafetai lava mo le leo o le lapataiga ma le faamaoniga a le Agaga Paia. Ou te iloa, afai tatou te faalogo i le leo o le Agaga, e le mafai lava ona tatou sese.